Intercámbio de corpos
Ryan Reynolds (Deadpool, Lanterna Verde) e Jason Bateman (Hancock) van-se unir nunha comédia co clásico argumento de intercámbio de corpos titulada Change Up na Universal Pictures.
As comédias deste subxénero foron moi populares nos anos 80, cando escomezaron a se explorar as posibilidades de que acontecería se dúas persoas intercambian os seus corpos pero non as súas mentes. E así tivemos intercámbio de home-muller, neto-avó, pai-fillo, e un longo etcétera que chegou a esgotar ao público. Nesta ocasión, Bateman será un responsábel pai de família que se intercambia co nugallán ao que chama o seu millor amigo (Reynolds).
Jon Lucas e Scott Moore (The Hangover) escribiron o guión deste filme que contará coa dirección de David Dobkin e a produción de Neal Moritz. A rodaxe arrincará en setembro.
O regreso de Dan Dare
Seica o actor australián de moda, Sam Worthington, (Avatar, Clash of the Titans) ven de asinar a súa participación na adaptación ao cinema do clásico cómic inglés Dan Dare: Piloto do Futuro na Warner Bros. Pictures.
O cómic, todo un clásico de longo percorrido no mundo do cómic de ciéncia-ficción, foi moitas veces definido coma unha espécie de Buck Rogers á inglesa, e comezou nos anos 50 creado polo ilustrador Frank Hampson cunhas tramas argumentais moi complexas, un diálogo intelixente e un excepcional deseño artístico. A tira cómica desapareceu, pero regresa mais ou menos unha vez por década nun “revival” que o fai depender dos tempos. Nos anos 90 o artista Grant Morrison deu-lle un toque escuro e moi agudo cheo de críticas ao thatcherismo.
Mália a súa longa história e ao seu grande éxito no seu país natal, a propriedade nunha tivo grande aceptación fóra do Reino Unido, e así o mundo das adaptacións dos heroes do cómic á pantalla grande sempre estivo dominado polos superheroes americanos (Batman, Superman, X-Men) e os ocasionais éxitos europeos (Tintín, Astérix).
Ainda que nos anos 80 lanzou-se unha adaptación ao mundo dos videoxogos, a reencarnación mais actual de Dan Dare é a minisérie que debuxou Garth Ennis e grazas á cal este proxecto comezou a se desenvolver. Ainda non hai nin guionista nin director vencellados á longametraxe.
Weaving Cráneo Vermello?
Hugo Weaving (O Señor dos Anéis, V for Vendetta, Matrix) podería engadir un novo papel ao seu longo percorrido polo cinema fantástico e converter-se no malvado Cráneo Vermello en The First Avenger: Captain America, o filme que sobre o Capitán América prepara a Marvel Studios.
Nos cómics, Cráneo Vermello é a man dereita de Hitler e un as da espionaxe e da sabotaxe a princípios dos anos 40. Após dunha loita contra o Capitán, fica conxeado en animación suspendida e xunto a el, é revivido nos tempos actuais.
Joe Johnston, o director deste proxecto, traballou xa con Weaving até o mes pasado en The Wolfman. O actor, nacido en Nixéria no ano 1960, xa ten costume de traballar baixo unha máscara todo o tempo en V de Vendetta, o que o converte no home ideial para un papel que deberá poñe-lo baixo unha tonelada de maquillaxe e mesmo disimular todo o seu rostro coa axuda de efectos especiais.
Leonardo o aventureiro
O produtor Adrian Askarieh ven de vender á Warner Bros. Pictures unha idea para unha longametraxe que contará cunha fasquía ao xeito de Indiana Jones, chea de aventura e acción… pero que terá como protagonista a Leonardo da Vinci. O seu título será Leonardo da Vinci and the Soldiers of Forever.
A história reimaxina ao xénio italiano do século XV coma membro dunha sociedade secreta, atrapado no médio dunha aventura sobrenatural na que deberá enfrontar-se a demos bíblicos, códigos secretos, civilizacións perdidas, fortalezas ocultas e anxos caídos.
O tratamento de Askarieh está agora á procura de guionistas que lle dean forma, mentres que el mesmo, Roy Lee e Doug Davison serán os produtores.
Regreso ao mundo de Oz
A Warner Bros. Pictures está pensando na posibilidade de pasar ao cinema outra saga de novelas fantásticas e de converte-las nunha posíbel franquía. Pero esta vez non se trata da obra dun autor descoñecido nin do supervendas dunha noite, senón de todo un clásico da história da literatura: a série de Oz escrita por L. Frank Baum e que inspirou a outro clásico do cinema, O meigo de Oz, en 1939.
Polo de agora os estudos están a considerar dous guións, un de Darren Lemke (Shrek Forever After) e Temple Hill (Twilight) e o outro mais escuro e sinistro, a cargo de Josh Olson (A History of Violence) e da produtora Thunder Road Pictures (Clash of the Titans) que o creador de Spawn Todd MacFarlane producirá.
As duas versións seguen os libros de Baum mais de preto cá clásica versión de 1939 que se tomou moitas liberdades, coma as zapatillas de rubí (que no libro son de prata) e numerosos trocos nos persoaxes. Ainda que os libros de Baum xa están no domínio público, certos elementos do filme de 1939 ainda levan o copyright da Metro Goldwyn Meyer, coma as devanditas zapatillas ou o título “The Wizard of Oz”.
Se isto sae adiante, podería dar-lle aos estudos unha franquía moi grande para desenvolver, xa que Baum escribiu nada menos ca 14 tomos ambientados nos mundos de Oz. Anteriormente xa houbo moitas adaptacións das súas obras: a mais salientábel é Return to Oz, de 1985, a série de anime para televisión de 1986 que adaptou catro libros da série, un proxecto rexeitado en 2002 e que só chegou ser un episódio piloto dirixido por Mick Garris e protagonizado por Melissa George, e a minisérie de 2007 Tin Man na canle Sci-Fi Channel. Ademais, hai que contar os musicais The Wiz e o mais recente Wicked, todo un éxito mundial.
A nova versión podería ser de grande orzamento e mesmo facer-se en 3D.
Entrevista con Chris Nolan
Na súa primeira entrevista dende hai moito tempo, o director de O Cabaleiro Negro, Chris Nolan, por fin desvelou algúns dos segredos mellor gardados sobre o estado actual das franquías de Batman e Superman.
Ao respeito dunha terceira entrega de Batman, o irmán de Chris, Jonathan Nolan, está xa a traballar no guión: “o meu irmán está a escribir un guión para min e xa veremos o que sae… está a loitar por uni-lo á história épica que vós queredes que sexa“.
Ainda que non confirmou que el vaia ser o director, o seu principal interese é dar-lle á súa creazón un remate, facendo que a triloxía remate dunha maneira axeitada: Batman Begins reintroduciu aos persoaxes, O Cabaleiro Escuro levou ao protagonista e mais a Gothan City ao límite, e o terceiro deberá resolve-lo todo.
“Sen ser moi específico, o tema clave que fai do terceiro filme unha grande posibilidade para nós é que queremos rematar a nosa história e ao ve-la coma o remate dun relato mais ca coma extendéndo-se ilimitadamente“, dixo Nolan, que non quixo nin sequera revelar quen será o vilán, agás que non será Mr. Freeze.
Pero o mais interesante arestora é sen dúbida o que tiña que contar sobre Superman: “é moi emocionante, temos unha história fantástica e sentimos que podemos face-lo ben. Coñecemos o contorno, se queres, coñecemos o xénero e como facer que saia ben“, dixo Nolan.
Ao contrário do Superman Returns de Bryan Singer que lle debe moito á visión do persoaxe de Richard Donner de filmes anteriores, os plans de Nolan pasan por facer unha aproximación mais do seu própio gusto.
E esa aproximación pasa pola visión do guionista David Goyer, encargado do libreto. Goyer contou a súa opinión a Nolan e este dixo que “aceptei-na de contado, encantou-me e pensei: ei, esa é uha aproximación á história que nunca vira antes e que a fai incríbelmente emocionante“.
Ademais, Nolan aproveitou para botar abaixo os rumores sobre a súa participación nun filme da Liga da Xustiza, xa que el coida que o seu Superman vive nun mundo diferente ao do seu Batman: “cadaún serve á lóxica interna da história. Non teñen ren que ver o un co outro“.
Ademais tamén desbotou os rumores que apuntaban ao seu irmán para dirixir o filme, e dixo que non tiña nin ideia de quen dirixiría o proxecto, pero que a súa participación sería coma a de Peter Jackson en Distrito 9, un filme que dirixiu Neill Blomkamp, ou O Hobbit, que dirixe Guillermo del Toro.
Porno creacionista
A Paramount Pictures vai facer un filme en tecnoloxía 3D de auténticas dimensións bíblicas e que levará por título In the Beginning (No comezo).
Definido xa coma “filme porno creacionista”, contará cun orzamento de 30 millóns de dólares e utilizará o libro do Xénese da Bíblia coma fonte primária para narrar uns feitos lendários coma a creazón da Terra por un deus máxico e todopoderoso ou a creazón de Adán e Eva no xardín do Edén.
A produtora de efectos especiais Reel Fx está xa a traballar nalgunhas escenas de proba para o proxecto, que se todo vai ben e recibe a luz verde, contará cun guión de John Fusco (Hidalgo, Young Guns, The Forbidden Kingsom).
O veterán da televisión David Cunningham será o director e Cary Granat (Viaxe ao centro da Terra) será o produtor.
Director para Fright Night
Craig Gillespie (Lars and the Real Girl, Mr. Woodcock) está en conversas para se encargar da dirección do remake da comédia de culto de vampiros Fright Night, un clásico realizado en 1985.
Todo semella indicar que Gillespie se fará cunha tarefa que foi anteriormente ofrecida a outros tres directores. O filme orixinal ía sobre un rapaz que descubre que o seu veciño é un vampiro.
O veterán guionista da série de televisión Buffy Cazavampiros Marti Noxon foi o autor do libreto, mentres que Mike De Luca e Alison Rosenzweig serán os produtores.
Lobishomes ou Lobismulleres?
A guapa actriz Juno Temple (Year One, Wild Child) ven de se unir ao reparto do vindeiro filme independente de Bradley Rust Gray, unha película de lobshomes protagonizado por lesbianas titulado Jack & Diane.
A história vai sobre dúas rapazas adolescentes na cidade de New York: a encantadora e inocente Diane (Temple), cuxo afecto e cariño chegan a furar o corazón da dura e pechada Jack (Olivia Thirlby).
A punto de deixar o país, Diane loita por mantér o seu amor vivo pero agocha o feito de que o seu recén espertado desexo sexual lle proporcionou visións de lobishome.
Temple substitúe neste papel á actriz Ellen Page e tamén a Allison Pill, que á súa vez reemprazou á anterior. A rodaxe dará comezo a finais de maio en New York.
As noites de Arábia
O actor australiano Liam Hemsworth (The Last Song, Knowing) ven de se unir ao reparto da longametraxe de acción en 3D Arabian Nights que producirán a Inferno Entertainment e mais a ROAR.
O filme, de carácter épico, estará ambientado nun reino que ven de ser controlado por un golpista que matou ao rei. Hemsworth interpretará a un xoven comando que se alista nunha equipa na que tamén está Simbad o mariño e mais Aladino. Todos eles deberán rescatar á raíña Scheherazade.
Chuck Russell será o director deste filme, que conta cun guión que el mesmo escribiu xunto a Barry P. Ambrose. Bill Johnson, Mark Ciardi e Gordon Gray son os produtores. A rodaxe escomezará a finais de verán.
