A hora mais escura en Rúsia
A New Regency e mais a Summit Entertainment producirán conxuntamente o thriller The Darkest Hour. O filme terá un tón moi semellante ao de 28 días despois e o seu argumento vai sobre un grupo de rapaces que loitan por sobrevivir nalgures en Rúsia após dunha invasión alien. Chris Gorak (Right at Your Door) dirixirá a partir dun guión de Les Bohem e Jon Spaihts que el mesmo reescribiu. Timur Bekmambetov e Tom Jacobson serán os produtores. A rodaxe escomezará en Rúsia no mes de xuño.
Tron, a triloxía
A Disney Pictures agarda que Tron: Legacy, a súa vindeira secuela-relanzamento do clásico da ciéncia-ficción dos anos 80 Tron sexa un éxito moi grande, porque xa está a facer plans para desenvolver unha triloxía e mais unha frnaquía cos dereiutos deste filme. Por suposto, todo dependerá do que faga Tron: O Legado a partir do vindeiro 17 de decembro.
Greg Berlanti podería facer a Flash
Seica o guionista e produtor de Lanterna Verde, Greg Berlanti, non terá que se laiar moito por non ser elixido director para ese filme, xa que a Warner ficou tan abraiada polo seu traballo que lle vai ofrecer dirixir a outro superheroe: Flash. Para iso nombergantes deberá vencer a outros realizadores que están na lista de candidatos: entre eles a David Goyer, Shawn Levy e David Dobkin.
Maggie Q. será a nova Nikita
A protagonista de Mission: Impossible III Maggie Q será a nova encarnación de Nikita no planeado remake do filme de acción de Luc Besson de 1990. A actriz será a protagonista, a quen están adestrando para reemprazar á orixinal. Anne Parillaud, Bridget Fonda e Peta Wilson fixeron versións anteriores do persoaxe.
Fracaso de Imagi Studios
Os estudos de cinema con sede en Hong Kong Imagi Studios (TMNT, Astro Boy) veñen de pechar as súas portas definitivamente, para tentar asemade preservar o capital, a liquidez e mais o valor das accións da súa empresa matriz. Dende a súa creación, os estudos estiveron ao borde da creba, e o fracaso de Astro Boy foi o golpe definitivo. Agora continuarán desenvolvendo ideias e filmes só para o mercado chinés, onde a calidade carece por completo de importáncia. Un dos primeiros proxectos en caer no esquecemento será Gatchaman (A Batalla dos Planetas).
Chase Palmer en Dune
Chase Palmer (Number Thirteen, The Dallas Buyer’s Club) será o encargado de reescribir algunhas partes do guión que adaptará unha vez mais á pantalla grande a clásica novela da ciéncia-ficción de Frank Herbert Dune para a Paramount Pictures e baixo a dirección de Pierre Morel, quen tomou ao seu cargo recentemente a dirección do proxecto. Palmer será o encargado de incorporar as ideias do director francés ao guión orixinalmente escrito por Josh Zetumer.
Saw chega ao seu final
O guionista Patrick Melton, que é autor ou coautor de todos os filmes da saga de Saw dende o primeiro até o cuarto, ven de revelar á prensa que a vindeira sétima entrega será posíbelmente a derradeira, principalmente porque a anterior película, Saw VI, foi moito peor do agardado no despacho de billetes. Melton afirmou que non cré que se poida relanzar a franquía nun futuro próximo.
Non hai director para os símios
O produtor Peter Chernin está a ter moitos problemas para atopar un director de alto nivel interesado na franquía de O Planeta dos Símios. Nin Kathryn Bigelow, nin Robert Rodriguez nin Tomas Alfredson aceptaron a oferta realizada pola Fox para dirixir o filme Caesar, que era o proposto relanzamento da saga. Os últimos en rexeitar nin sequera entraron a considerar a oferta: Albert e Allen Hughes (From Hell, The Book of Eli), Pierre Morel (Taken, From Paris with Love), James McTeigue (V for Vendetta, Ninja Assassin), Dennis Illiadis (The Last House on the Left) e Scott Stewart (Legion).
Sen novas doutros Gremlins
Na estrea mundial de Percy Jackson and the Lightning Thief, o director Chris Columbus revelou á prensa que nin el nin Steven Spielberg semellan ter escoitado ren sobre unha terceira entrega da saga de Gremlins. Nombergantes, amosou certo interese en facer unha secuela do clásico Os Goonies.
Avatar, número 1 en USA
A película de James Cameron Avatar, que xa era o filme con maior recadación da história do cinema en todo o mundo, xa o é tamén nos Estados Unidos, onde grazas a un totoal de 601 millóns de dólares ven de sobrepasar a Titanic, que tiña 600,8 millóns até de agora. O récord de Avatar chegou en tan só sete semanas, mentres que Titanic precisou case un ano de exhibición nos cinemas. A redación mundial xa leva mais de 2.000 millóns de dólares.
