NOVA FANTASIA » Breves

A era dos miragres

Editor — Wed, 08 Feb 2012 15:42:36 +0000

A River Road Entertainment ven de se facer cos dereitos para levar ao cinema a primeira novela de Karen Thompson Walker, The Age of Miracles. O filme é a história da chegada á maioría de idade dunha rapaza e un drama familiar ambientado no decurso dunha catástrofe mundial causada pola ralentización da rotación da Terra. O guionista será Seth Lochhead (Hanna) e Bill Pohlad (The Tree of Life) producirá.

Volve Insidious

Editor — Wed, 08 Feb 2012 15:31:23 +0000

A Alliance Films está a preparar unha secuela do seu éxito do ano pasado Insidious, o filme de pantasmas e terror escrito e dirixido por James Wan e Leigh Whannell e que cun orzamento de 1,5 millóns de dólares recadou 150 millóns en todo o mundo. Ainda non se sabe se os protagonistas Patrick Wilson e Rose Byrne repetirán os seus papéis, pero a rodaxe deberá escomenzar a finais deste ano.

Nick Schenk escribirá o novo Robocop

Editor — Sat, 04 Feb 2012 01:43:34 +0000

O guionista de Gran Torino, Nick Schenk, será o encargado de escribir o argumento de RoboCop, o relanzamento do persoaxe que prepara a MGM baixo a dirección de José Padilha. O duo xa traballara xunto no thriller de acción Tri-Border. A rodaxe escomezará este verán, pero antes deberá dar-se a coñecer o reparto.

Dark Shadows regresa en DVD

Editor — Sat, 04 Feb 2012 01:42:39 +0000

A MPI Home Video está a preparar para abril a saída ao mercado de DVD da súa série completa do programa de televisión dos anos 60 Dark Shadows, a comédia gótica que Tim Burton está a levar ao cinema e que non se estreará até un mes despois. O conxunto está composto por nada menos ca 131 DVDs cos 1.225 episódios emitidos, pero sen incluir as dúas películas que se fixeron en 1970 e 1971. O seu prezo rondará os 500 euros.

666 Park Avenue

Editor — Wed, 25 Jan 2012 10:57:38 +0000

A canle de televisión ABC ven de se facer cos dereitos de 666 Park Ave., unha nova série de episódios dunha hora de duración orixinal dos mesmos produtores de The Vampire Diaries. A série está baseada nos libros de Gabriella Pierce sobre unha parella de chega a New York para se facer cargo dun edifício de apartamentos onde vários dos residentes fixeron pactos co demo. Polo de agora a ABC xa encargou un episódio piloto.

Nova «cervexería» en Star Trek?

Editor — Wed, 25 Jan 2012 10:56:39 +0000

Roberto Orci ven de arroxar algunha luz sobre a vindeira secuela de Star Trek nunha recente entrevista a un sítio Web. Orci confirmou que o orzamento do filme será superior aos 145 millóns de dólares que custou a primeira parte, principalemente porque a escala do proxecto é tamén moito maior. Unha das localizacións que mais queixas espertaron entre os afeccionados foi a da sala de máquinas con fasquía de fábrica de cervexa. Segundo Orci, este escenário foi millorado e veremos mais del no vindeiro filme.

Peter Berg quere facer Hancock II

Editor — Fri, 20 Jan 2012 00:59:31 +0000

O realizador Peter Berg revelou nunha recente entrevista que está a preparar unha secuela do filme de superheroes Hancock, para o que xa mantivo conversas con Will Smith (protagonista do filme orixinal) e cos produtores Michael Mann e Akiva Goldman: «estamos todos interesados, pero temos problemas literalmente para podermos estar todos xuntos na habitación ao mesmo tempo«.

David Kajganich será o guionista de The Stand

Editor — Fri, 20 Jan 2012 00:58:14 +0000

O guionista de The Invasion e Blood Creek, David Kajganich, é o novo encargado de escribir o libreto da adaptación ao cinema da novela de Stephen King The Stand, que dirixirá previsíbelmente Ben Affleck para a Warner Bros. Pictures. Kajganich xa traballou anteriormente na longametraxe (que nunca chegou a se rodar) It, que tamén está baseada na novela homónima de King.

Gañadores dos Golden Globe

Editor — Mon, 16 Jan 2012 11:38:42 +0000

Este ano os prémios Golden Globe que concede a asociación da prensa estranxeira en Los Angeles non contiñan moitos candidatos do xénero, pero ainda así houbo catro afortunados gañadores a salientar: Woody Allen polo guión de Midnight in Paris, The Adventures of Tintin coma millor película de debuxos animados, Jessica Lange coma millor actriz secundária nunha série de televisión (en American Horror Story) e Peter Dinklage por Game of Thrones coma millor actor secundário (no papel de Tyrion Lannister).

Avatar: dous anos mais de espera

Editor — Fri, 13 Jan 2012 14:45:20 +0000

O produtor Jon Landau confirmou un espectacular adiamento da segunda parte de Avatar, nada menos ca dous anos mais haberá que agardar para regresar ao planeta Pandora dende a inicial previsión de 2014 até a mais nova de 2016. Landau confía de todos os xeitos en que a nova película será millor cá primeira: «estamos emocionados e temos a grande parte do mesmo equipo connosco, algunhas ideias xeniais de deseño e grandes temas«.

Robert Stromberg dirixirá Maleficient

Editor — Mon, 09 Jan 2012 09:36:51 +0000

A Disney Pictures ven de facer público o nome de Robert Stromberg (quen traballou coma produtor de deseño en Avatar e Alice in Wonderland) para que faga o seu debut coma director en Maleficient, o filme que lle dará unha nova volta de rosca ao clásico da Bela Durminte, ao contar a história dende o punto de vista da raíña. Angelina Jolie é polo de agora a actriz que está vencellada ao pepel protagonista.

Harrison Ford, confirmado para Ender

Editor — Thu, 22 Dec 2011 14:29:44 +0000

Ven-se de confirmar que Harrison Ford está xa por fin contratado para O xogo de Ender, a adaptación ao cinema da famosa novela de ciéncia-ficción de Orson Scott Card. E xunto a el a xoven actriz Abigail Breslin (Zombieland), que fará o papel da irmá maior de Ender Wiggin (Asa Butterfield). A produción escomezará a se rodar en New Orleans a primeiros de 2012, coa vista posta nunha estrea que non será até 2013.

Tráiler oficial de O Hobbit

Editor — Thu, 22 Dec 2011 14:19:29 +0000

O primeiro tráiler oficial da longamente agardada película de Peter Jackson The Hobbit: An Unexpected Journey, baseado no clásico conto de J.R.R. Tolkien, está xa en liña e dispoñíbel para todos os internautas neste enderezo Web, despois de que a empresa monopolista Apple decedira por fin permitir o seu visionado aos que non son usuários do seus computadores.

Renovada American Horror Story

Editor — Thu, 22 Dec 2011 14:17:26 +0000

A série American Horror Story foi renovada para unha segunda tempada que estará composta por 13 episódios, segundo anunciou John Landgraf, presidente da FX Networks. Este programa, creado por Ryan Murphy e Brad Falchuk, é unha série dramática que explora un conto de terror subversivo cunha visión moderna e xira en torno aos Harmon, unha família de tres que se muda de Boston para Los Angeles como maneira de se conseguir reconciliar co seu pasado.

Finou Joe Simon

Editor — Thu, 22 Dec 2011 14:16:36 +0000

Joe Simon, o lendário creador de persoaxes de cómic coma o Capitán América, Sandman, a Mosca e centod mais, finou o pasado 14 de decembro aos 98 anos de idade, segundo fixo público o seu fillo no Facebook. Xunto ao seu parceiro Jack Kirby, Simon revolucionou os xéneros de cómic de superheroes, de terror e mesmo de romance. Nos últimos anos, Simon adoitaba aparecer en convencións, onde sempre era aclamado coma unha lenda vivinte da Era Dourada do Cómic.

William Hurt entra en The Host

Editor — Wed, 07 Dec 2011 13:28:01 +0000

William Hurt está en conversas para se unir ao reparto do vindeiro filme de ciéncia ficción que dirixirá Andrew Niccol, a adaptación ao cinema da novela de Stephenie Meyer The Host. Hurt podería facer o papel de Jeb, o excéntrico tío da protagonista Melanie Stryder (Saoirse Ronan) cuxo cerebro foi secuestrado por unha entidade alieníxena.

Fassbender perfíla-se coma o novo Noé

Editor — Thu, 01 Dec 2011 12:47:12 +0000

Após de que Christian Bale rexeitara o papel de Noé no filme épico de Darren Aronofsky Noah, unha adaptación do mito do arca que producirán a Paramount e mais a New Regency, seica agora é Michael Fassbender quen estivo a discutir o papel con Aronofsky. A produción en todo caso debería escomezar en primavera, xusto cando o actor alemán ten un óco dispoñíbel na súa axenda.

Mad Max ameaza por triplicado

Editor — Thu, 01 Dec 2011 12:41:45 +0000

O realizador George Miller ven de revelar que o seu vindeiro filme Mad Max: Fury Road, que servirá coma remake do clásico persoaxe do cinema de ciéncia-ficción, podería ser continuado non por unha, senón por dúas secuelas. Nunha entrevista dixo que xa escribiu o guión da segunda película e está case rematado o da terceira.

O novo Akira non será moi diferente

Editor — Thu, 01 Dec 2011 12:41:09 +0000

Segundo ven-se de revelar coa sinopse oficial da vindeira longametraxe de Jaume Collet-Serra, o remake en inglés e con actores reais do clásico do anime Akira, os cambios no argumento non van ser demasiados: Kaneda será o dono dun bar no canto de ser o líder dunha banda de moteiros, e Tetsuo é o seu irmán no canto de ser o seu amigo.

Bryan Singer úne-se á Família Munster

Editor — Thu, 01 Dec 2011 12:35:37 +0000

Segundo informan diversas fontes Bryan Singer estaría a negociar a súa incorporación coma director e produtor executivo da clásica série cómica dos anos 60 na NBC The Munsters. O produtor Bryan Fuller está atrás deste remake, que tentará facer unha versión «visualmente espectacular«. O proxecto sería a terceira vez que Synger dirixe un episódio piloto para unha série detelevisión, despois de House e Footballers’ Wives.

Finou Ken Russell

Editor — Tue, 29 Nov 2011 12:17:21 +0000

O pasado domingo 20 de novembro finou aos 84 anos de idade o realizador inglés Ken Russell, que ainda que foi unha figura moi salientábel do cinema será relembrado polos fans coma director do filme de ciéncia-ficción Altered States (1980) e dos de terror Gothic (1986) e The Lair of the White Worm (1988).

Tintín comeza ben en Europa

Editor — Tue, 01 Nov 2011 15:28:52 +0000

Ainda que nos Estados Unidos non se estreará até nadal, o filme As Aventuras de Tintín, producido por Peter Jackson e dirixido por Steven Spielberg, arrincou con moita forza no seu mercado natural, Europa, onde ademais conta co visto bó da crítica. En España acadou xa unha recadación no día da estrea superior á que fixeran Toy Story 3 e Iron Man 2. En total o filme fíxo-se con 56 millóns de dólares nos 19 países onde xa foi estreado.

Cameron fala sobre Fantastic Voyage

Editor — Tue, 01 Nov 2011 15:27:38 +0000

James Cameron confirmou que o traballo do remake de Fantastic Voyage está feito en 2/3 partes xa e que esta versión será moito mais emocional có orixinal de 1966: «din-lle ao director Shawn Levy a miña ideia de como habería que transformar isto nunha história de amor e realmente estivo de acordo con ela«. A história será a dun médico con problemas no seu matrimónio que é miniaturizado e inxectado no corpo da súa esposa para poder salvar a súa vida.

Hyperdrive na Paramount

Editor — Fri, 14 Oct 2011 15:00:51 +0000

A Paramount Pictures adquiriu os dereitos sobre un guión de ciéncia-ficción escrito por Morgan Jurgenson e David Daniels e titulado Hyperdrive. A história vai sobre un duro policía que recruta a un friki da CF para que o axude a perseguir a un misterioso persoaxe que foi testemuño dun crime. Durante a procura atopan-se no médio do espazo, fóra da Terra.