Xogo de Tronos á tele
A canle de televisión por cable americana HBO ven de lle dar a luz verde definitiva á longamente agardada versión para a pequena pantalla da série fantástica da literatura Xogo de Tronos.
A canle de pago realizará o proxecto en princípio para unha primeira tempada que debutará a primavera que ven. A tempada constará dun piloto e de mais nove episódios mais.
Dende o momento no que o proxecto se anunciou por primeira vez a finais do ano 2008, a série baseada nas novelas de George R.R. Martin acadou unha enorme expectación, xerando un interese sen precedentes para unha saga da que ainda non se rodara nin un metro de fita.
A série está ambientada no mítico mundo de Westeros e narra a história dunha família de nobres, os Stark, que se ven atrapados no médio das intrigas de palácio cando o patriarca Eddard (a quen dará vida na tele o actor Sean Bean) se converte no novo axudante e man dereita do rei. A saga está composta por catro tomos, e a HBO pretende converter cada un deles nunha tempada completa.
Ao contrário de non poucas novelas de fantasía, a série de Xogo de Tronos evita case por completo basear-se en elementos máxicos e en troques opta por un brutal realismo, que foi descrito coma Os Soprano con espadas. Martin, que é un antigo guionista de televisión (Beauty and the Beast), escribiu cada capítulo cun final de suspense, o que deberá prestar-se moi ben para cando sexa pasado á televisión.
Ademais de Bean, os actores xa confirmados que formarán o reparto da série serán Jennifer Ehle, Richard Madden, Sophie Turner, Maisie Williams, Isaac Hempstead-Wright e Kit Harington, entre outros. David Benioff e Dan Weiss son os creadores da série.
Goyer no guión de Superman
O guionista de Batman Begins e Blade, David Goyer, ven de ser contratado para escribir The Man of Steel, o novo filme de Superman que realizarán a Warner Bros. Pictures e mais a Legendary Pictures.
Segundo indican as nosas fontes, Goyer ten a ideia de facer que o filme sexa unha encarnación á pantalla grande da encarnación que fixera John Byrne nos cómics. Moderno, críbel e divertido. Esta encarnación non tería ningún vencello con Superman Returns, así que Brandon Routh non será o protagonista nin Bryan Singer o director.
Os rumores van mais aló e apuntan mesmo a quen serán os inimigos do Home de Aceiro neste filme: a história de Goyer vai sobre Luthor e Brainiac. Non é unha orixe destes persoaxes nin de ningún outro, así que asume que xa todoo mundo os coñece, así coma a Lois, Clark, Jimmy e Perry. O Daily Planet está en problemas por mor da Internet e haberá de trasfondo toda unha mitoloxía kriptonián.
A nosa fonte indicou asemade que os anteriores rumores sobre que o guionista de cómics Mark Millar (Wanted, Kick Ass) podería ter algún papel ou ocuper-se do libreto do novo filme son totalmente falsos. O mesmo Millar hai uns días dixo que nunca estivo no proxecto e que debía rexeitar por completo eses rumores. Millar ademais dixo que Goyer é o home ideial para se ocupar de Superman nestes intres.
A contratación de Goyer non debería ser unha grande sorpresa após das novas que hai uns poucos días vencellaban ao director de Batman Begins e O Cabaleiro Escuro, Chris Nolan, co novo Superman para se converter no produtor e supervisor da franquía. Goyer e Nolan co-escribiron o guión de Batman Begins e Goyer tivo participación nos créditos de O Cabaleiro Escuro que Chris e mais o seu irmán Jonah Nolan co-escribiron.
Cando Goyer anunciou hai unhas semanas que ía deixar o seu traballo como guionista da série de televisión FlashForward para se adicar a outras cousas, moitos tiveron o ideia de que había en marcha un novo proxecto de Batman dirixido por Nolan. Pero seica a verdade estaba uns pasos ao lado, e non será o orelludo da capa senón o Grande S o persoaxe do que se vaia ocupar a parella que mais fixo polo cinema de superheroes ao lado da DC Comics nos últimos anos.
A encarnación do Superman de John Byrne mencionada mais enriba refíre-se ao relanzamento do persoaxe que fixo John Byrne en 1986 nos cómics nunha minisérie de 6 episódios titulada precisamente O Home de Aceiro. Byrne devolveu ao persoaxe ás súas orixes, reducindo sinificativamente os superpoderes de Superman. Na nova reencarnación, os seus pais ainda están vivos, Clark Kent é moito menos tímido, a Fortaleza da Soidade non existe e a xente non sabe que Superman ten unha identidade secreta (polo que Kent non é sospeitoso de ser Superman).
Emmerich rodará a Fundación
Roland Emmerich, director de 2012, anunciou este venres os seus plans para adaptar ao cinema, coa mesma tecnoloxía ca Avatar, a triloxía da Fundación, un dos grandes piares da ciéncia-ficción, obra de Isaac Asimov.
O cineasta alemán pretende rodar tres películas en 3D e empregando a técnica de “performance capture”, que dixitaliza aos actores, incluidas as suas voces, e os converte en imaxes xenadas por computador.
“A tecnoloxía de Avatar póde-se aplicar a Fundación“, dixo Emmerich á prensa. “Tén-se que facer todo por computador porque non sabería como rodar todo iso na realidade“, engadiu. Emmerich traballou no guión con Robert Rodat, autor de Salvade ao soldado Ryan. O realizador xermano pretende deste xeito dar un paso adiante na súa carreira profesional.
“Probábelmente agora todas as grandes películas terán que ser en 3D, non só polo seu efecto, coma demostrou Avatar, senón porque consigue que poidas pedir mais cartos para a produción; aí está a clave“, manifestou.
Emmerich foi ún dos privilexiados que estivo presente na rodaxe de Avatar, de James Cameron, e admite que ese xeito de rodar “é o camiño definitivo para o cinema“.
Fundación (1951) é o primeiro libro da triloxía orixinal escrita por Asimov, composto por cinco relatos curtos que narran a decadéncia dun império galáctico.
Nominados aos Oscar 2010
As nominacións para os 82º prémios anuais da Académia de Cinema de Hollywood xa son oficiais, e coma era de agardar, cun máximo favorito: Avatar con nove candidaturas.
Entre os nominados do cinema fantástico, hai que salientar asemade a District 9 e Star Trek con catro, e The Princess and the Frog, o último da Disney que ainda non chegou a Galiza, con tres.
No que respeita aos nosos intereses de xénero, a listaxe é esta:
- Millor película: Avatar, District 9 e Up
- Millor director: James Cameron por Avatar
- Millor actor secundário: Woody Harrelson por The Messenger e Stanley Tucci por The Lovely Bones
- Millor filme de debuxos animados: Coraline, Fantastic Mr. Fox, The Princess and the Frog, The Secret of Kells e Up
- Millor guión adaptado: Distrito 9
- Millor guión orixinal: Up
- Millor dirección artística: Avatar, The Imaginarium of Doctor Parnassus e Sherlock Holmes
- Millor cinematografía: Avatar e Harry Potter and the Half-Blood Prince
- Millor deseño de vestiário: The Imaginarium of Doctor Parnassus
- Millor edición: Avatar e District 9
- Millor maquillaxe: Star Trek
- Millor banda sonora: Avatar, Fantastic Mr. Fox, Sherlock Holmes e Up
- Millor canzón: Almost There, de The Princess & the Frog e Down in New Orleans, de The Princess & the Frog
- Millor curta animada: French Roast, Granny O’Grimm’s Sleeping Beauty, The Lady and the Reaper, Logorama e A Matter of Loaf and Death
- Millor edición de són: Avatar, Star Trek e Up
- Millor mistura de són: Avatar, Star Trek e Transformers: Revenge of the Fallen
- Millores efectos especiais: Avatar, District 9 e Star Trek
Lazarillo Z, outro clásico con zombies
Dentro da nova tendéncia do cinema a facer revisións dos clásicos a base delle meter zombis á soupa, unha tendéncia á que axudou e non pouco o libro Orgullo e Prezuízo e Zombis, seica está en preparación outro zume de cerebros e vísceras palpexantes grazas a un dos libros mais coñecidos da literatura en español, O Lazarillo de Tormes.
A nova versión, Lazarillo Z, xa se encontra nos andéis das librarías dende hai uns días, onde apareceu directamente en formato de peto, o que non é habitual en España pero si de agradecer. Na novela recén editada, Lázaro González-Pérez, o protagonista (e autor agora) do Lazarillo, decide contar a verdadeira versión dos feitos acontecidos, sen intermediários anónimos, e deste xeito poderemos saber que o pícaro mais famoso das letras hispanas foi en realidade un persoaxe cunha importáncia capital na vaga de zombies que asolou España no século XVI.
As súas aventuras relatarán como chegou a se converter nun dos cazadores de zombis mais famosos do império e os problemas que isto lle ocasionou na Corte do rei e mais coa Inquisición. Finalmente, na actualidade, en pleno século XXI volve a aparecer a vaga de zombis e un persoaxe chegado do pasado se enfrontará a eles.
Downey sen Áliens e Cowboys
Robert Downey Jr. ven de ficar fóra do western de ciéncia-ficción Cowboys and Aliens. El e mais o director de Iron Man (do que Downey tamén é protagonista) ían reunir-se unha vez mais nesta adaptación do cómic á pantalla grande que xira ao redor dunha vila de Arizona no século XIX que é conquistada e escravizada polos áliens, até que un grupo de índios e vaqueiros axuntan as súas forzas para combater aos extraterrestres.
Agora e ainda que Jon Favreau está aínda á fronte do proxecto, Downey xa non e iso obriga á DreamWorks a procurar outro protagonista. A principal razón da marcha do actor é segundo indicaron fontes dos estudos, a incompatibilidade nas axendas dado que Downey está vencellado a unha secuela de Sherlock Holmes que podería escomezar a se rodar este mesmo ano.
Pola súa banda, a DreamWorks Pictures, a Universal Pictues e mais a Platinum Studios xa están á procura dun sustituto e todo semella indicar que este podería ser o protagonista de James Bond, o actor Daniel Craig.
Craig faría así o papel de Zeke Jackson, para o que xa se están a preparar algunhas modificacións no guión de Alex Kurtzman e Roberto Orci (Transformers, Star Trek).
Ron Howard, Brian Grazer, Steven Spielberg e Scott Rosenberg son os produtores deste filme, que comezará a se rodar este ano e que ten prevista a súa estrea para o verán de 2011.
Spiderman relánza-se
O luns coñeceu-se a nova de que a Sony Pictures e mais o director Sam Raimi, que levaban vários meses de tira e afrouxa por mor das diferéncias creativas ao redor da cuarta entrega da saga de Spiderman, veñen de rachar os seus acordos, e anunciaron que a Sony Pictures e mais a Marvel Studios teñen novos plans, que consistirán no relanzamento da franquía contando cunha equipa de produción totalmente nova.
A história utilizará o guión rexeitado de James Vanderbilt, que fai regresar a Parker ao seu papel de adolescente ateazado polos seus problemas como persoa humana e como superheroe: “Peter Parker é un adulto novo normal que conta con poderes extraordinários, o que sempre foi o fundamento que fixo deste persoaxe algo intemporal e atraínte para xeracións de fans. Estamos moi emocionados polas posibilidades creativas que veñen das raíces de Peter“, dixo a xefa da Sony Amy Pascal nunha rolda de prensa oficial.
Como resultado deste movemento, Sam Raimi (director) e Tobey Maguire (protagonista) fican fóra, con tan só unha nota de agradecemento da Sony. Raimi esencialmente dixera aos estudos que non podía ter un filme preparado para o verán de 2011, e os estudos, en vez de tenta-lo sen el, preferiron escomezar de novo, cun relanzamento da franquía no canto dunha cuarta entrega da saga actual.
O director de (500) Days of Summer, Marc Webb, é o principal candidato para sustituir a Raimi. Os estudos contan cunha “lista de desexos” na que aparecen James Cameron, David Fincher e Wes Anderson. Pero Webb é o único que polo de agora mantivo reunións cos produtores e mais os executivos dos estudos.
Estas novas fan que todas as anteriores notícias e rumores sobre Spiderman 4 fiquen anuladas: Kirsten Dunst non regresará e todas as conversas que contaban con o Vuitre e mais a Gata Negra xa non teñen valor algún. Os produtores Avi Arad e Laura Ziskin aínda están vencellados ao filme, coa mesma capacidade que antes, mentres están á procura dunha data no verán de 2012 para un Spiderman que mesmo podería rodar-se en 3D, a tecnoloxía de moda.
Os motivos de todo isto non están nada claros. Ainda que o orzamento de Spiderman 3 foi de 250 millóns de dólares e as críticas foron moi negativas, os fans acudiron en masa os cinemas e o filme recadou 890 millóns en todo o mundo, polo que á Sony non lle debería importar moito as subas de orzamento, o caché dos protagonistas nin o do seu caprichoso director. A Sony ten que seguir facendo filmes de Spiderman para non perder os dereitos sobre o persoaxe, así que aquí hai algo mais que non nos contaron.
Dende o punto de vista dun executivo dos estudos, todo cobra sentido porque se poden reducir os custes da rodaxe da seguinte película e se recuperaría o control creativo sobre a propiedade, ao contar cun director mais disposto a aceptar ordes. O regreso aos anos de mocidade do persoaxe no canto de explorar a vida dun trintaneiro casado semella mais doada de aceptar polo público e polos creativos. Voltar ao Peter de sempre, dándo-lle énfase ao romance, podería incrementar a audiéncia feminina e fará que de novo destaquen as súas diferéncias co seu máximo rival no despacho de billetes, o superheroe da DC Comics Batman, do que axiña se verán dúas novas entregas.
Todo isto ten o seu lado negativo: os fans de sempre perderán-se, a xente que é leal sobre todo a Raimi deixará de ir a ver o filme, e nos fóros da Internet as críticas mesmo antes de escomezar a se producir o novo Spiderman xa arrécian e poderían danar á franquía. En todo caso, a presión está agora do lado da Sony, obrigada a cumprir coa súa palabra e ter un bó filme en verán de 2012.
3D ao rescate do cinema
Dende que en 1983 se estreara Tiburón en 3D, pasou moito tempo e a indústria do cinema comeza a se preguntar se chegou o momento de facer películas que non sexan de xénero fantástico en tres dimensións, o cal é bó sinal de que o cinema en 3D por fin é maior de idade. Avatar, a longamente agardada película de James Cameron, leva xa recadados 617 millóns de dólares (uns 429 millóns de euros) en todo o mundo dende a súa estrea, que foi só hai dez días.
O caso é que esta foi a fin de semana con maior recadación da história do cinema, grazas non só a Avatar, que levou a parte grande do roscón, senón tamén a Sherlock Holmes (co clásico persoaxe de Sir Arthur Conan Doyle convertido en superheroe), a segunda parte de Alvin e os Esquíos (tamén en 3D) e á comédia romántica It’s Complicated con Meryl Streep. En total foron 278 millóns de dólares só nos Estados Unidos, batendo o récord que estaba establecido en 261 millóns, cando en xuño do ano pasado O Cabaleiro Escuro gañaba adeptos nas pantallas.
Pero respeito de Avatar, que contou cun orzamento inicial de 300 millóns, dos cales leva xa recuperados 212 (iso contando só Estados Unidos e Canadá), a aposta de Cameron xa non semella tan arriscada coma hai só once días. Os executivos da 20th Century Fox están encantados coa choiva de cartos e as consideracións sobre segundas e terceiras partes xa non semellan tan afastadas.
En todo caso, o grande gañador é o 3D, un sistema que ofrece ao espectador unha experiéncia que non pode repetir na televisión nin baixándose a película de Internet, e que polo tanto asegura audiéncia ás salas de cinema. E ainda que levabamos vários anos con bós filmes en 3D, ou polo menos que supuxeron avances nesta tecnoloxía, coma Ice Age ou a saga de Final Destination, a longametraxe de James Cameron será o apoio decisivo a unha técnica que ven de lle dar novos azos a unha indústria que non pasaba polo seu mellor intre pero que seica por fin ten bós motivos para ollar o 2010 con novas esperanzas.
Finou o guionista de Alien
Dan O’Bannon, o guionista de clásicos do terror e a ciéncia-ficción coma Dark Star (1974), Alien (1979) ou Desafío Total (1990), finou onte nun hospital de Los Angeles aos 63 anos de idade. Antes de escribir xunto a Ronald Shusett o guión de Alien, un dos títulos mais famosos do cinema de ciéncia-ficción, O’Bannon debutou co texto de Dark Star, unha das primeiras obras do gurú do terror John Carpenter, o seu amigo dende que coincidiran na Universidade do Sul de Califórnia. O’Bannon tamén foi responsábel da edición dese filme, no que ademais interveu como actor.
Antes de se embarcar na Nostromo, a nave onde transcorría a história de Alien, traballou no departamento de efectos visuais de Star Wars (1977), a primeira parte da saga galáctica de George Lucas. Pero foi o alieníxena mais ameazador da história do cinema o que marcou a sua carreira. Alien definiu por completo a carreira de O’Bannon, quen mantivo o seu nome nos títulos de crédito de todas as películas posteriores da franquía, mesmo a última: AVPR: Aliens vs. Predator – Requiem (2007).
“Con Alien, coidei que como membro da audiéncia, o que non ves te asusta mais do que ves“, dixo O’Bannon sobre a decisión de non amosar ao alieníxena completamente até a parte final da película. Tras aquel filme de Ridley Scott, que catapultou ao estrelato a Sigourney Weaver, os seus traballos mais salientábeis foron a dirección de Return of the Living Dead (1985), segunda parte do clásico de George A. Romero Night of the Living Dead, e mais a adaptación do libro de Philip K. Dick en Desafío Total, con Arnold Schwarzenegger e Sharon Stone. Tamén foi o guionista de Screamers, Bleeders, Invaders from Mars, Lifeforce ou Dead & Buried, entre moitos outros filmes de xénero.
Adéus a Paul Naschy
Jacinto Molina Álvarez, mais coñecido coma Paul Naschy, finou o martes na súa casa en Madrid após de perder unha longa loita contra o cancro. O actor, guionista, produtor e director que mais fixo de lonxe polo xénero fantástico en España continuou traballando até o derradeiro intre, aparecendo nunha cadeira de rodas no pasado Festival de Cinema Fantástico de Sitges en outubro, onde poucos se decataron da gravidade da súa condición.
Alcumado decote coma o Lon Chaney español, Paul Naschy tivo unha longa e próspera carreira no cinema dende que apareceu por primeira vez coma extra no filme fantástico-relixioso de Nicolas Ray Rei de reis (1960), pero o seu traballo no xénero fantástico escomezou realmente en 1968 con La marca del hombre lobo, un filme que non só protagonizou, senón que guionizou.
Após diso, Naschy interpretou a moitos monstros clásicos da pantalla: o conde Drácula, Mr. Hyde, a múmia, o xorobado, e moitos outros viláns reais e imaxinários. O seu persoaxe mais popular foi o lobishome Waldemar Daninsky, nunha série de dez filmes (Licántropo foi o derradeiros deles, de 1996).
Naschy adoitaba escribir os guións dos seus própios filmes, e con Inquisición (1976) engadiu a dirección ao seu currículum. Mais tarde, cando o cinema español deixou o xénero fantástico, Naschy converteu-se en produtor, acadando manter ao xénero vivo e dándo-lle benefícios. Durante este periodo, rodou documentais para a televisión xaponesa, e chegou a facer a primeira coprodución hispano-xaponesa da história, o filme de lobishomes La bestia y la espada mágica.
Paul Naschy recebiu numerosos prémios pola súa adicación ao cinema, ao que lle deu nada menos ca 95 películas. En 2000, a revista Fangoria introduciu-no seu “Salón da Fama”, unha honra baseada nos votos dos fans de todo o mundo. E após de moitas décadas de lle negar mérito á súa obra, o cinema español pediu-lle perdón en 2001 outorgándo-lle a Medalla de Ouro ás Belas Artes.
As derradeiras producións de Paul Naschy son School Killer (2001) e a curta A Tell-Tale Heart (2001). En decembro de 2002 apareceu por primeira de derradeira vz coma actor de teatro na obra Las mujeres fragantes, unha versión do clásico de Oscar Wilde O retrato de Dorian Grey. E en 2003 fixo a súa primeira viaxe a Hollywood para participar en dúas producións: Countess Dracula´s orgy of blood e Tomb of the Werewolf, que supuxo a reaparición do seu persoaxe Waldemar Daninsky.
Naschy tamén contribuiu ao cinema galego, participando en filmes coma Era outra vez (Juan Pinzás, 2000), o primeiro filme Dogma do cinema español, e en 2010 estreará-se coa súa voz O Apóstolo, de Fernando Cortizo.
A súa obra sen rematar é La herencia Valdemar, da que puidemos ver recentemente o tráiler en NOVA FANTASIA.
En 1997, Naschy escribiu unha autobiografía, Memórias de un hombre lobo.
