O Cuarto Reino da Fox

A Fox ven de se facer cos dereitos sobre a triloxía Fourth Realm, unha série de novelas de ciéncia-ficción do escritor John Twelve Hawks.

O primeiro tomo da série, The Traveller, está ambientado nuns Estados Unidos alternativos cuxa sociedade está baixo constante vixiáncia por unha organización secreta. Os “Travellers” (Viaxeiros) son un grupo xa case extinguido de xente que pode proxectar o seu espírito a outras dimensións.

O argumento principal segue as andainas de Maya, un Arlequín (gardiáns dos Viaxeiros) reácio, que debe protexer a dous irmáns Viaxeiros que son demasiado inocentes.

O co-guionista de Watchmen Alex Tse será o encargado de adaptar esta nova franquía baixo a produción de Gil Netter e Andrew Tennenbaum. Os libros xa foron supervendas, axudados polo seu autor, un tipo misterioso de quen non se coñece nada, agás que vive recluido e a que nin tan sequera o seu axente viu xamais en persoa.

J.K. Rowling acusada de pláxio

O pasado mes de xuño os herdeiros do escritor Adrian Jacobs interpuxeron unha demanda no Tribunal Supremo de Londres contra a editorial Bloomsbury, asegurando que J.K. Rowling copiara partes considerábeis de As aventuras de Willy o Mago, escrito por Jacobs en 1987.

A demanda aseguraba que o argumento de Harry Potter e o cáliz de fogo copiou argumentos da trama de Willy o Mago, incluido un concurso de meigos, e que a saga Potter tomou prestada a ideia de que os meigos viaxaran en trens.

Rowling foi engadida á causa como acusada, o que provocou a sua resposta personal: “Sínto-me entristecida porque se presentara outra demanda decindo que roubei material doutra fonte para escribir Harry“, dixo nun comunicado. “O feito é que nunca oíra falar do autor do libro antes da primeira acusación daqueles relacionados coa herdanza do autor en 2004; certamente nunca lin o seu libro“.

Rowling engadiu que “as denúncias que se presentaron non son só infundadas senon absurdas, e estou decepcionada porque se nos poña na situación de ter que nos defender a min a e miña editorial no Reino Unido, a Bloomsbury. Recurriremos ao tribunal decontado para que dictamine que a denúncia non ten validez e que polo tanto debería ser desestimada sen demora“.

Os sete libros do rapaz meigo, dos que Harry Potter e o cáliz de fogo é o cuarto, bateron récords de publicación, vendendo mais de 400 millóns de cópias en todo o mundo e dando orixe a unha saga cinematográfica que recadou miles de millóns de euros.

A Bloomsbury negou rotundamente as denúncias de pláxio cando o caso chegou por primeira vez aos tribunais.

A novela de Avatar

O produtor de Avatar Jon Landau ven de revelar nunha recente entrevista na televisión que o director James Cameron ven de escomezar a escribir unha novela que será unha precuela do seu filme de ciéncia-ficción épico e que podería aparecer a finais deste ano.

Landau dixo especificamente que esta non será unha novelización da história xa coñecida no cinema e que “Jim quere escribir unha novela que é unha história grande, épica, que encha moitas cousas“.

Así que o que é o que podemos agardar? “Sería algo que levaría a narrar a história do filme, pero iría moito mais aló sobre todas as histórias sore as que non tivemos tempo de entrar, coma o coléxio e o persoaxe de Sigourney Weaver ensinando nese coléxio; Jake na Terra e a súa história anterior e como chegou aquí, a morte de Tommy, o irmán de Jake; e o coronel Quaritch, como é que rematou alí e todo iso“, dixo Landau.

Landau engadiu que algunhas das escenas de Avatar que remataron curtadas poderían resucitar xa sexa para o libro ou para outros tipos de publicación (coma cómics): “Podería haber oportunidades noutros médios para narrar o trasfondo, contar algunhas das histórias da guerra na Terra, o que foi da vida de Jake antes do filme. Teríamos todo iso preparadado para cando haxa que contar a história do que aconteceu en Pandora moitos anos despois de que a nosa película rematara“.

Landau tamén revelou que Cameron mantivo conversas con Marc Webb, o director do vindeiro relanzamento de Spiderman para a Sony Pictures, para discutir a posibilidade de face-lo en 3D. Landau dixo que “queremos axudar todo o que sexa posíbel“.

Lazarillo Z, outro clásico con zombies

Dentro da nova tendéncia do cinema a facer revisións dos clásicos a base delle meter zombis á soupa, unha tendéncia á que axudou e non pouco o libro Orgullo e Prezuízo e Zombis, seica está en preparación outro zume de cerebros e vísceras palpexantes grazas a un dos libros mais coñecidos da literatura en español, O Lazarillo de Tormes.

A nova versión, Lazarillo Z, xa se encontra nos andéis das librarías dende hai uns días, onde apareceu directamente en formato de peto, o que non é habitual en España pero si de agradecer. Na novela recén editada, Lázaro González-Pérez, o protagonista (e autor agora) do Lazarillo, decide contar a verdadeira versión dos feitos acontecidos, sen intermediários anónimos, e deste xeito poderemos saber que o pícaro mais famoso das letras hispanas foi en realidade un persoaxe cunha importáncia capital na vaga de zombies que asolou España no século XVI.

As súas aventuras relatarán como chegou a se converter nun dos cazadores de zombis mais famosos do império e os problemas que isto lle ocasionou na Corte do rei e mais coa Inquisición. Finalmente, na actualidade, en pleno século XXI volve a aparecer a vaga de zombis e un persoaxe chegado do pasado se enfrontará a eles.

O Relostro pode voltar a brillar

O escritor Stephen King podería estar a traballar na secuela de O Relostro, unha das suas obras mais célebres que levará por título Dr. Sleep. Foi o próprio King quen fixo o anúncio nun acto promocional do seu último traballo Under the Dome (Baixo a cúpula), unha novela que polo de agora xa conta cun proxecto de minisérie na TV por conta de Steven Spielberg. O autor de It ou Carrie asegurou que desde o verán leva traballando nesta secuela para ver se consegue ter entre as suas mans unha história que poda funcionar e saiba estar á altura do relato orixinal.

O único que King quixo desvelar é que a novela levará por título Dr. Sleep e que terá como protagonista a Danny Torrance, o neno da novela orixinal xa crecidiño. Segundo apuntou o autor, Dr. Sleep presentará-nos a Danny con corenta anos, vivindo en New York e traballando nun centro para enfermos terminais. Alá axuda a quen están por morrer utilizando os poderes que xa se albiscou que tiña en O Relostro.

Uns poderes que tamén usa para se gañar un diñeiriño apostando nas carreiras de cabalos. “A primeira novela nunca explica o que aconteceu co xove Danny e os seus poderes psíquicos“, apuntou King nunha entrevista xunto ao director David Cronenberg na que se negou en redondo a dar mais detalles. “Talvez se sigo falando diso non terei que escribi-lo“, sentenciou.

De todos os xeitos, King engadiu que a xente non debería “ficar contendo o alento” agardando a que apareza esta novela, e que probablemente nunca chegará a existir. Aínda así, King non puido pechar a porta ao rumor que el mesmo escomezara, e engadiu que “probablemente non é con total certeza, así que xa veremos“.

Publicada en 1977, The Shining (O Relostro) é unha das novelas mais emblemáticas na carreira de King que, como moitas outras obras do Rei do Terror, foi levada á grande pantalla, da man de Stanley Kubrick en 1980 nunha decepcionante película que protagonizou Jack Nicholson.

Natalia Corbillón, Prémio Mallorca Fantástica

A escritora ourensana Natalia Corbillón foi a gañadora do Prémio de Narrativa Mallorca Fantástica grazas ao seu conto El amante fiel.

A história vencedora, coma o resto da súa obra, fuxe da clásica temática fantástica de fadas e elfos e procura un maior realismo. O conto, que podedes ler nesta páxina Web (ollo, contido magufo!) retrata a un antigo empregado de prelo que segue adicando a sua vida aos libros. O protagonista escrebe até se converter nunha estátua, controlado polos libros como nunha adición.

En Mallorca, onde estivo tres días presentando o seu libro reeditado en outubro Los Hijos de Gea, Natalia atopou-se “cun festival de ciéncia ficción e terror incríbel que xira sobre todo ao redor do cinema, o ano pasado acudiu Vicente Aranda e nesta edición, Álex de la Iglesia“, segundo relatou a própia Corbillón, quen dispón dun blog de seu onde dá a coñecer as novidades verbo das súas novelas.

Con 25 anos e estudante de Deseño Industrial, Corbillón traballa agora nunha triloxia a partir de Los hijos de Gea. En algún lugar de Orión, un libro que conta coas ilustracións do artista esloveno Urban Breznik. A triloxía utilizará como argumento o clásico mito de Orión e o Escorpión: “A sua loita de inimigos, coa intervención da deusa Xea, o orgullo dos gregos e as suas terríbeis vinganzas“. A acción de Los hijos de Gea transcurre en diversos lugares do planeta da nosa actualidade, ainda que os seus persoaxes actúan movidos por raíces da mitoloxía grega. É unha maneira diferente de ver a fantasía e unha maneira diferente de ver a ciéncia-ficción, unha ponte a cabalo entre o exótico dos mundos pasados e a realidade actual.

Chega o Home Máquina

A Mandalay Pictures ven de se facer cos dereitos para o cinema da última novela online de Max Barry, o thriller Machine Man.

A história vai sobre un enxeñeiro de tecnoloxía que está canso de pasar pola vida con normalidade e sen poder-se facer ver, así que decide reemprazar partes do seu corpo con pezas de titánio deseñadas por el mesmo. Pero axiña descubrirá que el non é o único que ten plans para o seu novo corpo.

Barry leva polo de agora revelando unha páxina ao día da súa novela no seu sítio Web oficial, nun “experimento literário interactivo” que incorporará no argumento as suxestións que fagan os leitores a medida que se vaia desenvolvendo a história.

Cando estea completa, o libro poderá mercar-se en tapa dura grazas á editorial Vantage Books en 2011.

Autores fantásticos pásan-se á publicación directa

Edición tradicional, novos médios, ebooks… o mundo da edición está a pasar por augas revoltas mentres espera non pasar polo mesmo destino cá indústria musical.

Mentres, para os autores de Book View Cafe, a resposta aos problemas é aliar-se e tomar o mando. Este grupo de vinteséis autores galardonados e de éxito en vendas elixiron pasar da edición tradicional e sacar os seus últimos traballos directamente no formato Kindle de Amazon e no eReader de Sony.

Todos eles xa publicados anteriormente de xeito profesional, e moitos na actualidade baixo contrato con selos tradicionais de New York coma Random House, Tor Books e Simon & Schuster, os autores de Book View Cafe axuntáron-se por primeira vez en 2008 para crear bookviewcafe.com, un portal de ficción en liña. Armados cun século de experiéncia en todos os aspectos da edición, os miembros inclúen autores multipremiados na ciéncia-ficción e a fantasía coma Ursula K. Le Guin e Vonda N. McIntyre, bestsellers coma Sarah Smith e Laura Anne Gilman, e novos talentos coma Seanan McGuire.

Os títulos de Book View Press serán creados e editados polos membros da BVC, e postos á disposición a través das tendas do Kindle e do Sony eReader, así coma directamente en bookviewcafe.com. Ningunha casa editorial externa estará involucrada e os beneficios van directamente aos autores.

O primeiro proxecto de Book View Press é unha antoloxía de ciéncia-ficción, Rocket Boy and the Geek Girls, que incluirá obras de Vonda N. McIntyre, Katherine Kerr, Amy Sterling Casil, Irene Radford, Maya Bohnhoff e C.L. Anderson.

O seguinte proxecto será entre fantasía e ciéncia-ficción, unha antoloxía de histórias breves vencelladas titulada The Shadow Conspiracy e que aparecerá o vindeiro 15 de decembro. Estará ambientada nunha era victoriana alternativa chea de aeronaves e autómatas na que un alma humana pode ser roubada e o alma dunha máquina pode nacer.

Gañadores dos World Fantasy Awards 2009

O xurado desta edición dos World Fantasy Awards 2009, composto por Jenny Blackford, Peter Heck, Ellen Klages, Chris Roberson e Delia Sherman, ven de dar a coñecer aos gañadores dos galardóns, que coma todos os anos prémian aos millores escritores no eido da literatura fantástica.

A listaxe dos gañadores vai de seguido:

• Prémio por toda unha carreira: Ellen Asher e Jane Yolen
• Novela (empate): The Shadow Year, de Jeffrey Ford e Tender Morsels, de Margo Lanagan
• Novela curta: If Angels Fight, de Richard Bowes
• Relato: 26 Monkeys, Also the Abyss, de Kij Johnson
• Antoloxía: Paper Cities: An Anthology of Urban Fantasy, de Ekaterina Sedia
• Colección: The Drowned Life, de Jeffrey Ford
• Ilustrador: Shaun Tan
• Prémio especial, Profesional: Kelly Link e Gavin J. Grant
• Prémio especial, Non-profesional: Michael Walsh

Presentación do libro A Capela Branca

Este venres 23 no Hotel Hesperia de Vigo (Avenida da Florida, 60) a partir das 20:00 horas terá lugar a presentación do libro La capilla blanca (A capela branca), unha novela de xénero fantástico escrita pola autora Isabel Llor e publicada en español por Ediciones Atlantis.

A novela xira ao redor dos Mestres Cabaleiros que descenden dos ceos cada dez anos para seleccionar a uns poucos elixidos, adicados aos valores máis nobres e á protección de cantos o precisen. De entre eses aspirantes, un está destiñado ao máis alto. Iván de Bretaña percorrerá o camiño dunha viaxe iniciática, alén do mundo visíbel, e voltará con moito máis ca un coñecemento íntimo e profundo de canto compón a realidade. Co tempo, o seu cometido de guerreiro, ser o primeiro para que os que veñan atrás o teñan máis doado, extenderá-se até formar un proxecto fabuloso de proporcións nunca vistas.

Isabel Llor Cerdán é unha escritora viguesa adicada profesionalmente ao ensino e é profesora no Conservatório de Vigo. Esta é a súa primeira novela en español, xa que é autora de dous libros en galego para nenos: Contos da Cidade de Cristal e Contos de vellos tempos.

Páxina seguinte »