George Lucas e as fadas
O director e creador da saga da Guerra das Galáxias, George Lucas, ten previsto producir un filme musical en debuxos animados xerados por computador, un proxecto que se mantén baixo o maior dos segredos e que está actualmente en preprodución no Rancho Skywalker, o lugar de residéncia de Lucas.
O director das Tartarugas Ninja e de Dead of Night, Kevin Munroe, dirixirá este novo filme que se espera que conteña música procedente dunha variedade de fontes. Do seu argumento, á parte de que é obra do guionista David Berenbaum (Elf, As Crónicas de Spiderwick) o único que se sabe é que contén fadas.
Un voiceiro da Lucasfilm dixo que ainda era moi axiña para comentar detalles sobre este proxecto. Lucas está nestes intres rematando o seu traballo como produtor no filme de Red Tails.
Rock heavy en Green Hornet
Tal e coma adiantamos hai uns meses, o clásico grupo de rock heavy canadiano Anvil fará un cameo na vindeira película de Michael Gondry sobre o heroe da rádio The Green Hornet, que protagonizará Seth Rogen.
Os músicos xa gravaron as súas escenas o pasado mes de outubro mentres realizaban unha xira co gallo do lanzamento do seu novo disco, Anvil! The Story of Anvil.
Agora, o director de documentais Sacha Gervasi ven de revelar á prensa o que a banda de rock fará nas súas escenas neste filme, e seica de feito o filme escomezará con Anvil tocando nun clube de rock: “e coido que voan nun estourido, e por suposto na millor tradición de Anvil, continuarán tocando mesmo mália a explosión“.
Elfman fóra de The Wolfman
O compositor da banda sonora de filmes coma Batman, Spiderman, Men in Black ou Wanted, Danny Elfman, non lle porá a música á vindeira longametraxe de grande orzamento The Wolfman.
O curioso é que Elfman xa rematara a banada sonora enteira para o novo filme de terror que segundo todas as fontes era moi semellante ao traballo de Wojciech Kilar no filme de 1997 Bram Stocker’s Dracula, porén o constante troco de datas que está a padecer The Wolfman fixo que Elfman simplemente non tivera tempo de ficar no proxecto e poder rematar o seu traballo. De feito, o habitual é que unha vez rematada a película o director e mais o compositor procuren xuntos unha música que sexa axeitada a cada unha das escenas, pero neste caso, ao non saber-se cando vai rematar de se editar o filme, a axenda de Elfman non puido aturar mais adiamentos.
No seu lugar, Paul Haslinger (Underworld, Shoot ‘Em Up) será quen se ocupe de lle poñer música a este proxecto, e non cabe dúbida que o fará dándo-lle un toque mais grunge e roqueiro. Haslinger foi membro de Tangerine Dream, o influinte grupo de música electrónica dos anos 80 que lle puxo a banda sonora a non poucas películas da época (Risky Business, The Keep, Near Dark).
Precisamente, Tangerine Dream foron os encargados de compoñer a música a toda présa para o filme fantástico de Ridley Scott Legend, após de que o non menos lendário compositor de Hollywood Jerry Goldsmith fora rexeitado no derradeiro intre en favor da banda electrónica, o que semella todo un anticipo do que estamos a vivir arestora.
Non sería bonito?
A Disney ven de se facer cos dereitos cinematográficos de Wouldn’t It Be Nice, unha comédia familiar de ciéncia-ficción baseada nun guión da equipa formada por Barry Blaustein e Jason Hefter. Andrew Gunn producirá a través da súa compañía, a Gunn Films.
A história vai sobre unha parella de adolescentes que, xusto antes de levar a cabo os seus plans de fuxir xuntos a perseguir os seus soños, son transportados máxicamente vinte anos no futuro, onde descubren que as súas vidas non sairon tal e coma planeaban. Con mais de trinta anos pero con mentalidades de adolescente e tentando sacar adiante a tres fillos pequenos, aprenderán que non eran tan maduros coma coidaban ser.
Todo semella indicar que será un filme prescindíbel cheo de moralina e baseado na canzón orixinal do mesmo nome dos Beach Boys.
Thriller converterá-se nun musical de Broadway
O maior éxito de Michael Jackson, Thriller, será axiña un musical de teatro. Así o veñen de confirmar os produtores da Nederland Organization, que adquiriu os dereitos do musical, explicando que ésta será “a versión exclusiva autorizada por Michael Jackson” e que o cantante “participará en cada paso do proceso creativo“.
James Nederland, dono de nove teatros en Broadway e que ven de adquirir os deretos para o espectáculo, está encantado de poder traballar co cantante: “Gósta-me a ideia de facer de Thriller un musical. Unha rapaza atopa un rapaz, namóran-se, o rapaz ten un grande segredo, e agora o que?“.
O disco Thriller (1982) é o mais vendido da história e a produción teatral reproducirá o videoclip de catorce minutos do mesmo título que fai unha paródia dos filmes de terror. Nel un rapaz convírte-se en lobishome mentres pasea cunha rapaza. Asemade incluirá tamén cancións do álbum Off the wall, de 1979.
Ademais de Jackson, aparece na canción a voz do actor Vincent Price; o clip, dirixido por John Landis, custou 500.000 dólares da época e foi un dos mais emitidos por todas as canles do mundo.
O manager e voceiro do polémico artista, O doutor Tohme Tohme, asegurou que “os de Nederland e Michael Jackson representan a excélencia do teatro en directo e do musical“. Jackson, de 50 anos, é un dos artistas que mais venderon ao longo da história.
Aladino visita Vigo
O musical Aladdin visitará Vigo esta fin de semana da man de Caixanova e representará un total de 4 funcións, dous delas o sábado (ás 17:00 e ás 20:00 horas) e outras dúas o domingo (ás 12:00 e ás 17:00 horas) no Centro Cultural que a entidade ten na cidade olívica.
O espectáculo, producido por Theatre Properties, unha compañía con experiéncia en musicais de grande formato, destaca pola calidade da sua posta en escena e decorados, especialmente por elementos coma a luz e o són ou o coidado vestiário. Ademais, este conto das Mil e unha noites, narrado por Sherezade, contará coa actuación de mais de 20 profesionais.
A xira, que xa pasou por Londres, continúa en España e Vigo acollerá a história de Aladdin, un xoven que utiliza todas as suas artimañas para conseguir o amor da princesa Jazmine, mentres o malvado Jaffar manipulará todo o seu poder para tentar conseguir o califato. Outro dos personaxes destacados será o Xénio, que brindará a oportunidade de facer os soños realidade.
Cada función ten unha duración de dúas horas e dez minutos, incluído o descanso. As entradas terán un prezo de 35 euros en butacas e o anfiteatro primeiro, mentres que nos anfiteatros segundo e terceiro custarán 30 euros.
Legado dunha traxédia
Legado de una tragedia (“Legado dunha traxédia”), unha obra interpretada por 21 cantantes e case 50 músicos das bandas mais importantes de hard rock de fala española, verá a luz este luns día 1 de decembro.
Ao longo desta ópera-rock, que repasa en forma de fábula a atormentada vida do xénio, van-se narrando as andainas do escritor americano Edgar Allan Poe, cos seus fracasos, o seu paso polo exército, a sua voda coa sua curmá de trece anos, a sua relación con Charles Dickens e a sua particular visión da relixión, até que finalmente escomeza o seu declive a raíz da morte da sua esposa, derrumbándo-se mentalmente e abandoándo-se a unha vida de excesos que lle levaría a unha morte indigna, afogado na miséria.
Legado de una tragedia inclúe ademáis algunhas pezas musicadas baseadas en obras de Poe, concretamente en dous dos seus relatos: O corvo e O péndulo, ademáis de se incluir unha pequena introdución composta sobre o que están considerados os dous primeiros versos dos que se ten constáncia do autor, escritos por el á idade de 15 anos.
Ideada, composta, arranxada, producida e gravada por Joaquín Padilla e Jacobo García entre xaneiro de 2006 e febrero de 2007 nos estudos “El Cielo de Madrid”, “Estudios Espartanos” e “La Marabunta Estudios”, foi misturada por Alberto Sánchez en xullo e agosto de 2007 nos estudos de Hispamusic.
Winehouse quere vingar-se de James Bond
A cantante londinense Amy Winehouse prepara a súa vinganza após de ser humillantemente descartada do último filme de James Bond, Quantum of Solace, que se estreará o 31 de outubro en Inglaterra, e no que ela ía compoñer e interpretar o tema principal.
A polémica cantante revelou que pensa rematar a gravación de Another way to die que empezou con Mark Ronson e podería mesmo saca-la ao mercado o mesmo día da estrea do filme, para fastidiar aos produtores.
Os americanos Alicia Keys e Jack White, da banda White Stripes, foron os finalmente elixidos para gravar a dúo a canzón para a película, despois de que en maio se fixera público que Winehouse non estaba en condicións de face-lo.
O compositor e produtor musical Mark Ronson, colaborador de Amy no proxecto, confirmou que ían abandoa-lo a médias ao non estar ela “preparada para se centrar na música” tras vários problemas de saúde por mor da súa adición ás drogas.
“Deberían ter agardado un pouco máis“, dixo en alusión aos productores da película. “Se querían un éxito mundial, téño-os todos aquí dentro“, engadiu, sinalándo-se a cabeza.
Amy quere amosar aos directivos cinematográficos que “cometeron un erro” ao prescindir dela: “Supoño que querían algo ben definido e aburrido. Cando saque a miña versión, e estou tentada de face-lo o mismo día da estrea, será o maior éxito“, presumiu a cantante.
A Mosca, ópera en París
O Teatro parisino do Châtelet pecha a sua tempada lírica cunha verdadeira traca final: a estrea mundial, este mércores, de The Fly (A Mosca), primeira ópera de Howard Shore, dirixida por Plácido Domingo ao fronte da Orquestra Filharmónica de Radio France e polo cineasta canadiano David Cronenberg, tres artistas de poderío internacional que decidiron trasladar á lírica unha das películas de ciéncia-ficción de culto do século XX, cunha montaxe encabezada polo seu mesmo realizador, Cronenberg, e polo seu compatriota Shore, compositor da música de case todas as suas películas, incluida A Mosca (1986).
Ainda que The Fly é un dos éxitos máis comerciais na carreira de Cronenberg, a sua tradución lírica non é precisamente tarefa doada, por se tratar dunha creación contemporánea. Xusto o reto que quería afrontar o compositor de O silenzo dos años (1991), de After Hours (1985) ou Infiltrados (2006), dúas veces oscarizado pola triloxía O Señor dos Aneis (2001-2003).
O libreto retoma o argumento da fita de ciéncia-ficción e terror que levou o Prémio do xurado no Festival de Avoriaz en 1987 e resucita os temores e experiéncias do científico metamorfoseado por erro en mosca asasina.
Entre o 2 e o 13 de xullo ofrecerán-se en París cinco representaciónes desta ópera, cuxo ensaio xeral terá lugar este mesmo luns á noite, poucas horas despois de que o compositor, o cineasta e o tenor á apresenten á prensa.
Neverland ao teatro
A produtora The Weinstein Co. ven de anunciar un cobizoso plan que suporá o desenvolvemento de dous novos proxectos para o teatro, que comezará axiña cunha versión musical de Finding Neverland en 2010, e continuará cunha representación do álbum de Pink Floyd The Wall.
Finding Neverland, baseado no filme de 2004 da Miramax sobre a história após do escenário da creación por J.M. Barrie de Peter Pan, conta cun libreto de Allan Knee, o escritor inglés a partir de cuxa obra adaptou-se o filme. A música será do duo Grey Gardens que compoñen Scott Frankel e mais o letrista Michael Korie.
Pola súa banda, Roger Waters, o creador e líder do grupo Pink Floyd, será o encargado xunto co escritor e guionista Lee Hall (Billy Elliot) de adaptar The Wall a partir do álbum de culto, que xa foi a base dun filme de 1982 de Alan Parker.
