Xogo de Tronos á tele
A canle de televisión por cable americana HBO ven de lle dar a luz verde definitiva á longamente agardada versión para a pequena pantalla da série fantástica da literatura Xogo de Tronos.
A canle de pago realizará o proxecto en princípio para unha primeira tempada que debutará a primavera que ven. A tempada constará dun piloto e de mais nove episódios mais.
Dende o momento no que o proxecto se anunciou por primeira vez a finais do ano 2008, a série baseada nas novelas de George R.R. Martin acadou unha enorme expectación, xerando un interese sen precedentes para unha saga da que ainda non se rodara nin un metro de fita.
A série está ambientada no mítico mundo de Westeros e narra a história dunha família de nobres, os Stark, que se ven atrapados no médio das intrigas de palácio cando o patriarca Eddard (a quen dará vida na tele o actor Sean Bean) se converte no novo axudante e man dereita do rei. A saga está composta por catro tomos, e a HBO pretende converter cada un deles nunha tempada completa.
Ao contrário de non poucas novelas de fantasía, a série de Xogo de Tronos evita case por completo basear-se en elementos máxicos e en troques opta por un brutal realismo, que foi descrito coma Os Soprano con espadas. Martin, que é un antigo guionista de televisión (Beauty and the Beast), escribiu cada capítulo cun final de suspense, o que deberá prestar-se moi ben para cando sexa pasado á televisión.
Ademais de Bean, os actores xa confirmados que formarán o reparto da série serán Jennifer Ehle, Richard Madden, Sophie Turner, Maisie Williams, Isaac Hempstead-Wright e Kit Harington, entre outros. David Benioff e Dan Weiss son os creadores da série.
Reality Twilight
Se hai algo que aos americanos se lles dá ben, iso é vender. Ainda que sexa a costa do seu sentido do ridículo. Forks, unha pequena vila no Estado de Washington, foi o sítio elixido por Stephenie Meyer para ambientar os filmes da súa saga de Twilight, algo que desde logo non pasou desapercibido aos seus habitantes e ainda menos aos seus comerciantes. Así, dende hai un par de anos toda a vila vive envolta nunha loucura polos vampiros, tentando atrair aos turistas ás suas tendas, restaurantes e toda clase de comércios. O único que lles faltaba era facer un reality show para a televisión. E agora xa o teñen.
Daquela, cando unimos a literatura lixo co cinema lixo e mais a televisón lixo, o que é o que resulta? Pois un Grande Irmán con vampiriños adolescentes. O produtor Zig Gauthier está a preparar unha série baseada na xente real de Forks: “Obviamente non imos rodar no océano ou andar con esa clase de perigos, senón que a ideia é amosar como é a vida aquí realmente. Hai moitas maneiras nas que podemos facer isto, pero por suposto estamos ainda nas primeiras etapas“. Non haberá nada sobrenatural nesta mistura: “Queremos xente que teña unha conexión auténtica coa comunidade. Queremos evitar xente con reclamacións ultraterreas“.
Así que nin vampiros, nin pantasmas nin cousas do alén… todo moi descafeinado. Iso si, ambientado en Forks, a súa audiéncia será sen dúbida a mesma que é capaz de se tragar nestes intres calquera cousa que saia da imaxinación de Meyer, famenta polo sobrenatural pero sobre todo polas histórias románticas. Os únicos que sairán gañando serán ao cabo os comércios da pequena vila.
Super Hero Squad en TVE
TVE e Nickelodeon emitirán próximamente a série de debuxos animados Super Hero Squad, baseada nun deseño actualizado dos superheroes mais coñecidos da Marvel Comics.
Super Hero Squad é un dos mais recentes éxitos de animación nos Estados Unidos e Canadá, onde se estreou a mediados de outubro, e os seus dereitos de emisión para España vendéron-se a TVE e Nickelodeon, segundo informou a compañía Planeta Junior, que xestiona en España as licéncias desta série.
A Marvel Animation produce actualmente 52 episódios de Super Hero Squad, nos que aparecen algúns dos persoaxes mais populares da Marvel, entre eles Iron Man, o Capitán América, Thor, Hulk e Lobeto, nunha versión con deseño actualizado para os nenos e toques de comédia.
Episódio perdido de Star Trek
Case todos os fans da saga de Star Trek saben que o episódio piloto da série orixinal foron en realidade dous, e que tan só se emitiu ún deles. Pero poucos saben que ademais existiu un terceiro, unha versión alternativa. Esta versión, recén descuberta e remasterizada, aparecerá axiña en formato Blu-Ray cando a CBS Home Entertainment lance Star Trek: The Original Series—Season 3 o vindeiro 15 de decembro xunto a unha chea de extras da terceira tempada.
Unha das sorpresas desta nova versión é o monólogo co que o capitán James Kirk abre o episódio:
Caderno de bitácora da Enterprise, ao mando do Capitán James Kirk. Estamos a deixar atrás esa enorme nube de estrelas e planetas á que chamamos a nosa galáxia. Atrás de nós a Terra,Marte, Venus, mesmo o noso Sol son só motas de pó… A cuestión é: ¿o qué hai aí no negro vacío máis alá? Até agora a nosa misión foi a de regulación da lei do espazo, contactar coas colónias da Terra e a investigación da vida alieníxena… Pero agora, unha nova tarefa. Unha nova proba aló onde ningún home chegou antes.
The Cage foi o primeiro episódio piloto, protagonizado por Jeffrey Hunter coma Capitán Christopher Pike. Os executivos da NBC rexeitaron o episódio por considera-lo “demasiado cerebral” (ademáis de ter problemas con que Spock fose extra-terrestre e que a Número Ún fose unha muller), polo que Hunter deixou a série antes de escomezar. As escenas deste episódio piloto foron logo aproveitadas para os episódios normais titulados The Menagerie, primeira e segunda partes.
Cóida-se que o piloto agora descuberto é o que os executivos da NBC viron realmente e grazas ao cal lle deron luz verde á série. Nel podemos ver a William Shatner coma capitán James T. Kirk e unha división interna en “actos”, Ademáis tenunha música distinta da recoñecida por todos e unha longa escena de acción.
O mais curioso de todo é que a fita foi descuberta en Alemaña, onde un fan ben documentado atopou-na en formato de filme de 35 mm hai anos e finalmente decidiu poñer-se en contacto coa CBS Home Entertainment e coa distribuidora, a Paramount Home Entertainment. O filme foi pasado a vídeo de alta definición e logo remasterizada dixitalmente polo departamento de restauración da CBS.
Baixo a cúpula
A seguinte novela do mestre do terror Stephen King, un thriller sobrenatural que levará por título Under the Dome, xa apunta directamente ás pantallas de televisión e podería converter-se nunha minisérie antes do pensado.
A DreamWorks TV ven de se facer cos dereitos sobre o libro e planea converte-lo nunha minisérie que se seguirá a través dalgunha canle por cable. Os guionistas xa están a manter xuntanzas cos estudos para ver o mellor xeito de enfocar esta tarefa.
O argumento da novela é un drama que se desenvolve ao redor dunha pequena vila de vacacións en Maine, onde un campo de forza invisíbel descende sobre a mesma deixándo-a atrapada dentro. E mentres os habitantes da vila loitan por sobrevivir, comezan a xurdir faccións rivais lideradas pro persoaxes enigmáticos.
King, Steven Spielberg, Stacey Snider, Darryl Frank e Justin Falvey serán os produtores executivos.
Secuela de 2012 na TV
O director Roland Emmerich ven de revelar interesantes novidades sobre unha nova série de televisión que está xa en desenvolvemento e que será unha secuela do seu novo filme de grande orzamento, a película épica de acción apocalíptica 2012 que se estreará o venres.
Mark Gordon (2012, Reaper, 10000 BC) será o produtor executivo e xa está en contactos coa canle ABC para que realice e posteriormente emita este drama de desastres.
(Atención: spoilers importantes!) O filme 2012 trata sobre un aliñamento planetário que causa unha intensa reacción solar na Terra, que comeza a ferver por dentro e ocasiona que os continentes comecen a se desfacer, creando volcáns, desprazamento masivo de placas tectónicas e mega-tsunamis que destrúen o planeta tal e coma o coñecemos. Finalmente sobreviven uns poucos a bordo de barcos que se dirixen ao único continente que resistiu, África.
Emmerich dixo que o seu plan para a série de televisión é que a humanidade está xa en 2013 e ten que recomezar a poboar o planeta. “É moi, moi fascinante. A série enfocará-se nun grupo de persoas que sobreviviron pero non nos barcos… se cadra estaban nun anaco de terra que se separou e se converteu nunha illa no proceso de destrución da Terra“.
Gordon engadiu que “hai algunhas persoas que sobreviven e a pregunta é como farán eses supervivintes para construir un novo mundo e como será“.
Fantasy Island, reality show
O gurú dos reality shows da televisión americana Mark Burnett e mais a Sony Pictures TV van unir as súas forzas para converter a série icona dos anos 70 Fantasy Island nun concurso de televisión.
Ricardo Montalbán foi o protagonista da série orixinal, emitida nos Estados Unidos entre finais dos anos 70 e comezos dos anos 80, no papel do místico Sr. Roarke, un home que podía conseguir que os soños dos visitantes da illa se convertesen en realidade.
E no concurso, un reality show no que participarán doce persoas, a competición consistirá en ver cal deles se converte no novo señor ou señora Roarke. Ainda non se sabe que canle emitiría este reality, que xa está á venda para os interesados.
Primeval, segunda oportunidade
Ainda que a súa produción foi cancelada oficialmente o pasado mes de xuño, o drama de ciéncia-ficción con dinosáuros Primeval ven de ser rescatado da extinción grazas a un novo acordo que permitirá dividir os custes cunha canle de televisión dixital.
A canle inglesa ITV, que se atopa nunha difícil situación financieira, cancelou este verán vários dos seus proxectos, entre os que se atopaban Wire in the Blood e Primeval, ambos os dous con bós índices de audiéncia pero cuxa produción estaba a ser demasiado cara para a emisora nestes tempos de crise económica mundial.
Agora as compañías produtoras Impossible Pictures e ITV veñen de chegar a un acordo coa BBC Worldwide, a BBC America e mais a canle alemá Pro7 para que se incorporen como parceiros no proxecto, o que permitirá a gravación doutros trece episódios da série. Os episódios serán rodados o ano que ven e logo divididos en dúas metades cada ún, polo que teremos unha cuarta e mais unha quinta tempada aseguradas ao longo de 2011.
O acordo sinifica que as canles ITV e mais a Watch compartirán os dereitos de emisión para televisión. A cuarta tempada será estreada na ITV1 e logo pasará á Watch a primeiros de 2011, mentres que a quinta tempada será estreada na canle Watch e logo pasará á ITV1 a finais de 2011.
A série, que vai sobre un grupo de científicos na Inglaterra de hoxe en día que loitan contra criaturas prehistóricas e do futuro que foron transportadas a través do tempo, pasou por unha remodelación do seu cásting este ano. Agora agárda-se que o reparto de actores da terceira tempada regrese na súa totalidade para os seguintes episódios, todos os cales están presentados por Adrian Hodges.
King regresa con Haven
Stephen King ven de asinar o contrato polo que cede os dereitos cinematográficos sobre a súa novela The Colorado Kid para que sexa adaptada á televisión en forma dunha série con episódios de unha hora de duración e que serían producidos polos estudos independentes E1 Entertainment baixo o título de Haven.
O proxecto céntra-se nunha arrepiante vila de Maine onde viven exiladas persoas que sofriron un meigallo. Cando a malldición regresa, o axente do FBI Audrey Parker chega para investigar e manter a raia ás forzas sobrenaturais, mentres tenta resolver os mistérios dos habitantes de Haven.
O actor Scott Shepherd será o protagonista e produtor executivo, xunto con Lloyd Segan e Shawn Piller. Os tres xa exerceran a mesma laboura na série da USA Network The Dead Zone.
Outros dous antigos participantes daquela série, Sam Ernst e Jim Dunn, están a escribir o guión para o episódio piloto e ademáis serán produtores executivos eles tamén.
Richard Curtis no Doutor Who
O director e guionista dos filmes The Boat That Rocked e Love Actually, Richard Curtis, será o encargado de escribir o libreto para un novo episódio que relanzará a série familiar de ciéncia-ficción O Doutor Who na canle inglesa BBC en 2010.
Curtis, autor de moitos dos guións mais salientábeis da história do cinema inglés nas últimas dúas décadas (O diário de Bridget Jones, Notting Hill, Catro vodas e un funeral), escomezou a súa carreira na televisión escribindo e producindo séries clásicas de humor coma Blackadder, Mr. Bean e The Vicar of Dibley. Recentemente fixo o guión coma convidado especial noutras séries non de xénero na canle HBO. Para esta ocasión, Curtis di que o episódio presentará a unha famosa figura histórica loitando contra un monstro, algo que non é descoñecido para os fans da série xa que foi o argumento de vários episódios xa emitidos até agora.
O episódio non será nin manterá relación co que se rodou hai unhas semanas en Gales, League of Gentlemen, escrito por Mark Gatiss e no que os Aliados loitan contra os nazis, con Winston Churchill nun papel salientábel na história.
Entre outros guionistas convidados para Doutor Who pero que polo de agora non chegaron a concretar a súa colaboración coa série están Stephen Fry e Neil Gaiman, ambos sen confirmar polo de agora pero obxecto de rumores.
