Lovecraft en Suíza

Unha nota de interese para os nosos leitores en Suíza, que sabemos que hai moitos, é que do 18 de outubro ao 6 de abril de 2008 a Fondation de la Maison d’Ailleurs en Yverdon-Les-Bains celebrará unha exposición titulada An Exhibition of Unspeakable Things – Works inspired by H. P. Lovecraft’s Commonplace Book e adicada ao clásico escritor de terror H.P. Lovecrft, en lembranza do 70 cabodano do seu pasamento.

Nesta exposición, un cento de artistas (H.R. Giger, Paul Carrick, Jeff Remmer, Guy Davis…) amosarán o seu punto de vista sobre “as profundidades abisais evocadas polos relatos do mestre de Providence para explorar todo aquilo que debería ficar innomeado“, segundo define o mesmo museu.

O escritor americano Howard Phillips Lovecraft (1890-1937) é sen dúbida ún dos máis importantes autores de ciéncia-ficción do século XX. Coma creador dunha brillante e terrorífica cosmogonía, o termo “escritor de culto” semella que fora acruñado expresamente para el. Lér mais

Chucky de novo en acción?

David Kirschner, o co-produtor de toda a vida dos filmes de terror do boneco diabólico, revelou que os fans poden agardar a ver outra vez ao seu xoguete asasino favorito, Chucky, de novo en acción nun futuro próximo: non nunha secuela, senón nun remake do filme orixinal de 1988. Chucky viu-se por última vez na película A semente de Chucky.

“Estamos a falalo con Don Mancini, que escribiu todos os filmes connosco, dende o comezo” dixo Kirschner nunha entrevista mentres promocionaba o seu último filme, Martian Child. “O seguinte que imos facer é regresar realmente cara atrás e refacer o primeiro. E imos facelo ainda millor e facer unha versión moi terrorífica do primeiro filme, que coido que xa é moi terrorífico tal coma é“.

Kirschner desvelou que o guión orixinal non se utilizará palabra por palabra pero que se reterá moito del. “Coido que estará moi preto del, iso seguro“, dixo. “Pero hai algunhas outras cousas que estamos a explorar tamén e algúns xiros que non queremos que a audiéncia agarde, coma un par de mortes e como coidas que estás a ir nunha dirección pero estás indo na outra coma resultado de sabelo e ser xa unha franquía moi popular“.

Wallace dirixirá o Arcanum

O guionista reconvertido a director Randall Wallace ven de se embarcar no proxecto de The Arcanum, un filme de aventuras fantásticas escrito por Thomas Wheeler e producido pola empresa de Paul Brooks, a Gold Circle.

Adaptada da primeira novela de Wheeler, o filme está ambientado no ano 1919 e vai sobre o escritor Arthur Conan Doyle, quen dirixe unha asociación secreta chamada o Arcanum, entre cuxos membros están o meigo Harry Houdini, a princesa vudú Marie Laveau e mais o escritor de terror H.P. Lovecraft, todos xuntos e unidos para loitar contra unha poderosa forza sobrenatural que ameaza ao mundo. Wheeler atópa-se arestora realizando unha produción en Polónia, após da cal escomezará cos cástings.

Wallace fora nominado para o Oscar ao millor guión polo filme Braveheart. Entre os seus cretos coma director atópan-se Cando eramos soldados ou O home da máscara de ferro.

Wahlberg entra nos ósos

Tan só un día antes de que escomezara a rodaxe, Mark Wahlberg ven de sustituir a Ryan Gosling en The Lovely Bones, a agardada adaptación da novela homónima de Alice Sebold que Peter Jackson dirixe para a DreamWorks.

Wahlberg fai-se co papel de Jack Salmon, o aflixido pai dunha nena. Gosling marchou após de gañar 9 kilos e deixar-se medrar a barba para a rodaxe. As fontes consultadas afirman que a súa saída obedece a diferéncias creativas.

Após de ler o guión, Wahlberg comprometeu-se axiña o 21 de outubro. El e Rachel Weisz interpretan a unha parella cuxo mundo fica rachado en anacos após de que a súa filla morra asasinada. A nena vixiará dende entón aos seus pais e mais ao seu asasino dende o ceo. Jackson escribiu o guión xunto á súa muller, Fran Walsh e Philippa Boyens, as súas colaboradoras nas mesmas tarefas en O Señor dos Aneis e King Kong.

O filme escomezou a se rodar o mércores en Pennsylvania, onde Wahlberg xa fixera o papel protagonista en The Happening, o filme de M. Night Shyamalan para a Fox.

A secuela de O código Da Vinci chegará en decembro de 2008

Columbia Pictures quere por en marcha o antes posíbel a rodaxe de Anxos e demos, baseada, igual que O código Da Vinci, nunha novela de Dan Brown e protagonizada, tamén, polo simboloxista e investigador Robert Langdon.

A premura débe-se a que o pacto da Columbia Pictures coa WGA (Writers Guild America), a asociación de guionistas, expira a finais deste mes. Ademáis, trascendeu que a estrea fixou-se para o 19 de decembre de 2008.

Robert Langdon porá-se após da pista dunha sinistra sociedade secreta que descubriu una arma moi poderosa. Anxos e demos é, de feito, unha precuela do popular e polémico best seller de Dan Brown. Foi publicada en 2000, e é a terceira novela que escribiu, pero a primeira na que aparecía o personaxe de Robert Langdon e, polo tanto, anterior a O código Da Vinci. Lér mais

Costner e Baquero nun filme español

Kevin Costner será un pai cuxa filla (Ivana Baquero, a nena de O labirinto de Pan) escomeza a amosar un comportamento terrorífico no novo thriller sobrenatural da produtora Gold Circle, The New Daughter.

O director español Luis Berdejo debutará após das cámaras neste filme.Costner interpreta a John James, un pai que se muda a unha granxa cos seus dous fillos após dun doroso divórcio. Axiña, a súa filla escomezará a se comportar dun xeito terrorífico, e o seu pai sospeitará que un túmulo mortuório que hai após da súa casa ten algo que ver neses feitos. Con esta película, Ibana Baquero escomeza a súa carreira en Hollywood e rodando en inglés.

The New Daughter foi adaptada por John Travis a partir dun conto de John Connolly publicado en 2005 no libro Nocturnes, unha escolma de relatos de terror. A rodaxe escomezará no primeiro cuarto do ano que ven.

Alien aterra en España

O modelo orixinal de Alien, o oitavo pasaxeiro, o grande mito extra-terrestre do cinema fantástico, aterrou en València da man do seu creador, o artista suizo H.R. Giger, gañador dun Oscar polo seu traballo nesta película. Esta é a primeira visita de Giger a España.

O artista inaugurou onte unha exposición sobre a sua obra na Universidade Politécnica de València, que amosará 50 pezas de escultura, fotografía e deseño entre as que destaca, polo seu valor simbólico, a cabeza do alieníxena, que poderá contemplar-se até o vindeiro 5 de nadal.

H.R. Giger, de 67 años, é un escultor e arquitecto coñecido polas suas recargadas obras de xéneros fantásticos. Ademáis de Alien, é o responsábel do deseño en películas coma Poltergeist II e Species.

Outra das pezas de culto que poderán contemplar os seguidores da saga sobre o monstro extra-terrestre que comezou o director Ridley Scott en 1979 son os bocetos orixinais que realizou o artista para Alien 3.

Nova versión dos paxaros

Naomi Watts protagonizará e Martin Campbell está en negociacións para dirixir a nova versión que a Universal pretende facer do clásico Os paxaros. A película está planeada coma unha nova visión do conto orixinal de Daphne du Maurier que inspirou a Alfred Hitchcock para facer o seu filme de 1963.

Michael Bay, Andrew Form e Brad Fuller producirán a través da súa empresa Platinum Dunes, mentres que Peter Guber e Cathy Schulman participarán coa Mandalay Pictures.

Stiles White e Juliet Snowden escribiron unha versión do guión que ainda esá en desenvolvemento, polo que poderían contratar-se a máis guionistas en breve.

Outing para o meigo Dumbledore

A novelista inglesa J.K. Rowling ven de sacar do armário a un dos principais personaxes da exitosa série literária de Harry Potter, ao dicir aos seus seguidores en New York que o meigo Albus Dumbledore, director da escola Hogwarts, é homosexual.

Durante a sua primeira xira polos Estados Unidos en sete anos, Rowling confirmou no Carnegie Hall na cidade dos rañaceos o que algúns afeccionados sospeitaran, que ela “sempre pensou que Dumbledore era homosexual“.

Rowling dixo que Dumbledore namorou-se do encantador meigo Gellert Grindelwald, pero que cando Grindelwald interesou-se máis polas artes escuras que polo ben, Dumbledore ficou “terribelmente desilusionado” e foi a destruir ao seu rival. Ese amor, afirmou a novelista, era a “traxédia secreta” de Dumbledore.

“Namorar-nos pode cegar-nos até certo punto“, sostivo. A audiéncia ficou en siléncio após da revelación, pero axiño estoupou nun aplauso. Rowling, de 42 anos, dixo que se ela souber que esa sería a resposta, revelaría antes os seus pensamentos sobre Dumbledore. Lér mais

As igrexas utilizan Halo 3 para atrair aos rapaces

Os tempos nos que a igrexa organizaba grupos de rapazolos para sair de excursión ou facer actividades comunais ao aire libre xa pasaron de moda. Agora os pastores deben adaptar-se aos novos estilos de vida da mocidade, como así acontece con moitas igrexas americanas que decidiron organizar veladas de Halo 3 para atrair novos fregueses.

O polémico videoxogo, que bateu récords de vendas nas suas dúas primeiras entregas e saiu á venda o pasado 25 de setembro, é unha violenta aventura épica no espazo na que os xogadores tomarán o control do Xefe Mestre nunha misión contra os Covenant e os Flood para salvar á humanidade. Lér mais

Páxina seguinte »