Posters para I am Legend

O novo filme de Will Smith, I Am Legend, debutará nos Estados Unidos o vindeiro 14 de decembro (o 19 en Galiza), e para preparar a chegada non só a terras americanas senón a todo o mundo, están-se a preparar unha chea de posters promocionais, nos que aparecen diferentes lugares ben recoñecíbeis de várias cidades do mundo, pero en ruínas. E entre eses lugares atópa-se a obra dun galego, o arquitecto Antonio Palacios, autor do edifício de Correios (actualmente, sede do Concello de Madrid). Ademáis, noutra das escenas tamén aparece Lisboa, coa Ponte 25 de Abril coma protagonista.

Neste filme de ciéncia-ficción, Robert Neville (Will Smith) é un brillante científico, pero nin sequera el pode evitar que un terríbel virus, creado nun laboratório, remate con toda a humanidade… agás con el. Inmune por algún motivo descoñecido, convírte-se no derradeiro ser humano do planeta, abandoado á súa sorte na cidade de New York. Pero se atopará cun pequeno problema, e é que o virus transformou ao resto da povoación en vampiros. E el é o seu principal obxectivo e inimigo.

Law e Schreiber, reposuídos

Jude Law, Liev Schreiber e Forest Whitaker protagonizarán o filme de ciéncia-ficción Repossession Mambo para a Universal.

Schreiber (The Manchurian Candidate) será o xefe de Law nunha caixa de aforros do futuro especializada en emprestar órganos artificiais. Cando o persoaxe de Law recibe un órgano artificial, fúga-se xunto coa súa esposa, que xa debe cartos polos órganos que lle emprestaran a ela.

Eric Garcia adaptou unha novela de ciéncia-ficción de seu xunto con Garrett Lerner; Miguel Sapochnik será o director do filme, o primeiro de grande orzamento que realice. Scott Stuber e Mary Parent serán os produtores.

Schreiber tamén protagonizará o filme da Fox X-Men Origins: Wolverine, a secuela da saga da Patrulla X.

Gardini e Sanderson gañan o UPC

Nun acto que tivo lugar o día 28 na Universidade Politécnica de Cataluña, no decurso do cal pronunciou unha conferéncia o novelista Jasper Fforde, anunciáron-se os gañadores da edicion deste ano do prémio UPC, uns galardóns que recairon en:

• Primeiro prémio (ex aequo): Belcebú en llamas, de Carlos Gardini d´Angelo e Defending Elysium, de Brandon Sanderson
• Mención especial: Records d´una altra vida, de Jordi Guàrdia Torrent
• Mención UPC: Tricord (Tres cordes i una sola melodia), de Joan Baptista Fonollosa y Guardiet
• Finalista da Mención UPC: Memòria de Lerna, de Albert Solanes Parra

O xurado estivo composto por Lluís Anglada, Miquel Barceló, Jordi José, Josep Casanovas e Manuel Moreno.

O exorcismo dos guionistas

Cantando “Fóra, demos, fóra!“, un grupo de máis de 65 guionistas de cinema de terror escenificaron un exorcismo fronte as portas dos estudos da Warner Brothers en Burbank (Califórnia) o pasado 27 de novembro, como parte da folga de guionistas de Hollywood.

Os piquetes levaban postas camisetas co lema “Guionistas de terror en folga: comemos esquirois“. Outros guionistas levaban postos traxes de curas e monxas e botaron auga bendita. O obxectivo era “librar-nos do mal que infesta os estudos“, segundo dixeron.

A ideia para o exorcismo xurdiu de Scott Kosar, quen escribiu os remakes dos clásicos de terror dos anos 70 A Masacre de Texas e o Terror de Amityville.

Entre os guionistas que participaron na charada estaban Steve Niles (30 Days of Night), Mick Garris (Masters of Horror), Stephen Susco (The Grudge) e Drew McWeeny (Masters of Horror).

A Fenda chega ao cómic

Nun futuro non moi lonxano, nunha era dominada non polas nacións senón polas grandes empresas na que o hiperespazo e mais a intelixéncia artificial son normais, unha nave experimental pérde-se nun recuncho descoñecido da galáxia. Un home polémico é enviado á súa procura e rescate: William Perez William, enxeñeiro, pirata, vaqueiro, mercenário e poeta; un home que debe enfrontar-se aos seus medos e lembranzas, e que nos conducirá por unha viaxe a través da súa vida e polo pasado, presente e futuro da humanidade.

Este é a grandes riscos o argumento de The Gap, un techno-thriller de ciéncia-ficción en formato cómic que ven de se publicar nos Estados Unidos nunha edición pioneira bilíngüe, en español e inglés. Con guión, entre outros, do noso colaborador habitual e amigo Joseph Remesar, The Gap (A Fenda) fora publicado xa no número 4 de NOVA FANTASIA, aló polo ano 1998, e agora chega ao grande público que constitúe o mercado americano, ainda que conta xa con algunhas ofertas para se editar en Inglaterra.

Polo de agora, e ainda agardando a que nos chegue o noso exemplar, podedes ir facendo boca no sítio Web oficial do cómic, realizado en Flash e cunha técnica envexábel.

Bale en Terminator 4?

O último rumor apunta a que o protagonista de Batman Begins, Christian Bale, é o máximo favorito en todas as apostas para se facer co cobizado papel de John Connor en Terminator Salvation: The Future Begins, a vindeira cuarta entrega na popular saga de ciéncia-ficción.

Agárda-se que o filme faga rexurdir a franquía cunha história ambientada no futuro, durante as tantas veces mencionadas pero nunca vistas guerras entre os robots da Skynet e a humanidade. A Warner Brothers planea lanzar Terminator Salvation para o verán de 2009.

O guión, obra de John Brancato e Michael Ferris, xa está rematado. Ambos os dous foran tamén os autores do libreto de Terminator 3: Rise of the Machines.

Fringe, o novo de Abrams

Alex Graves (Journeyman) dirixirá Fringe, o episódio piloto para a série paranormal da canle Fox que conta con guión de J.J. Abrams e mais os seus parceiros Alex Kurtzman e Roberto Orci.

A produción ten previsto o seu comezo en febreiro. O episódio piloto durará dúas horas, tratando sobre mistérios paranormais vistos a través dos ollos dun científico tolo, o seu fillo enemistado e mais unha axente feminina do FBI.

A Fox ten moitas esperanzas postas neste novo proxecto, que chega da man da Warner Brothers TV e mais da empresa produtora de Abrams, a Bad Robot.

Graves será ademáis o produtor executivo de Fringe, tarefa que compartirá con Abrams, Kurtzman, Orci e Bryan Burk.

O guión de Fringe xa estaba escrito cando a Fox obtivo os seus dereitos, o que sinifica que a produción podería escomezar mesmo ainda que a folga de guionistas continúe.

Ana María Matute, Premio Nacional das Letras Españolas

A escritora barcelonesa Ana María Matute, autora de Olvidado Rei Gudú, sen dúbida a obra mestra do xénero fantástico en español, gañou hoxe o Prémio Nacional das Letras Españolas en recoñecemento á sua ampla obra que xa mereceu numerosos galardóns. Este prémio concéde-o o Ministério de Cultura e está dotado con 30.000 euros.

O xurado estivo presidido por Rogelio Blanco, director xeral do Libro, e contou con Mónica Fernández como vicepresidenta. Formaron parte tamén del Juan Luis Cebrián, Xosé Ramón Barreiro (presidente da Real Académia Galega), Aurelia Arkotxa, Carles Miralles, Antonio Hernández, Luis Alberto de Cuenca, José Antonio Pascual, Laura Freixas, Clara Sánchez, Manuel Longares e o galardonado o pasado ano, Raúl Guerra.

Ana María Matute escribiu o seu primeiro libro con 17 anos, Pequeño teatro. Daquela necesitara o permiso de seu pai para o contrato coa editorial, ainda que non sería publicado até 11 anos máis tarde. De feito, a sua primeira obra publicada sería Los Abel, en 1948.

Semifinalista do Prémio Nadal en 1949 por Luciérnagas e nominada ao Nóbel de Literatura en 1996, a sua mocidade marcada pola Guerra Civil sobrevoa en grande parte da sua obra coma Los Abel (1948), Fiesta al noroeste (1953), Los hijos muertos (1958) ou Los soldados lloran de noche (1964). En todas elas subxaz unha ollada infantil ou adolescente. En efecto, as obras infantís terán un grande peso na sua traxectória, moitas delas adicadas ao seu fillo Juan Pablo.

Membro da Real Academia Española, onde ocupa a cadeira letra K, o seu discurso de ingreso estivo adicado á fantasía. Pertence, asimesmo, á Hispanic Society of America e obtivo, entre outros, o Prémio Nacional de Literatura Infantil (1984) por Sólo un pie descalzo.

Lér mais

Watts en Anxos e Demos

Segundo informa a prensa americana, Naomi Watts (O Señor dos Aneis, King Kong) ven de acadar ún dos papeis principais para acompañar a Tom Hanks en Anxos e Demos, a precuela de O Código da Vinci, que o mesmo cá anterior, será dirixida por Ron Howard. O representante da actriz non atendeu chamadas nin requerimentos dos xornalistas para confirmar o rumor.

De todos os xeitos, o comezo da produción tivo que adiar-se por mor da folga de guionistas de Hollywood, e probábelmente non escomezará até o mes de febreiro, segundo desvelou unha fonte interna á que tivo acceso NOVA FANTASIA.

Así e todo, a película fará-se, e o seu lanzamento para primavera de 2009 ainda non sufriu modificacións.

Hasselhoff regresa ao coche fantástico

O protagonista da série orixinal O coche fantástico, David Hasselhoff, está en conversas para aparecer no vindeiro telefilme que suporá o episódio piloto da nova série da canle americana NBC, repetindo o seu papel coma Michael Knight.

Pola súa banda, Deanna Russo (The Young & the Restless) será a protagonista feminina no filme, enfrontándo-se ao actor principal, o especialista en culebróns Justin Bruening.

O novo coche fantástico será unha secuela da série orixinal dos anos 80, esta vez cdentrada en Mike Tracer (Bruening), o fillo de Michael Knight que nunca chegou coñecer ao seu pai.

Queimado polo seu amor pola súa amiga dende a nenez e antiga moza Sarah Kamen (Russo), Mike está a malgastar o seu tempo en Las Vegas cando de súpeto Sarah reaparece a di-lle a Mike que que quere pagar as súas débedas de xogo en troques da súa axuda.

Sarah é a brillante filla de Charles Kamen, o inventor do coche fantástico K.I.T.T., e que traballa coma axudante dun profesor no departamento de enxeñería en Stanford. Cando ela recibe o aviso do coche falante de que o seu pai está desaparecido, ela e K.I.T.T. porán-se en marcha para atopar e recrutar a Mike.

Páxina seguinte »