Cannes poderá acoller a Indiana
A canle Fox News ven de informar que os representantes de Steven Spielberg están tentando asegurar-se de que Indiana Jones and the Kingdom of the Crystal Skull sexa o filme que abra este ano o Festival de Cinema de Cannes, que escomezará o vindeiro 15 de maio.
Isto sería o pistoletazo de saída para a moi agardada secuela das aventuras de Indiana Jones, e unha espléndida oportunidade para toda a equipa e mais o reparto de desfilar pola alfombra vermella do prestixioso Palais de Cannes.
Os rumores ademáis din que a Paramount non planea facer ningunha presentación prévia paraa prensa, polo que a estrea de Cannes sería realmente unha prmícia mundial e a primeira oportunidade exclusiva de mirar este filme antes da súa estrea oficial, o 22 de maio.
A Fada dos Dentes
O antigo loitador de wrestling reconvertido a actor Dwayne Johnson protagonizará o papel principal en The Tooth Fairy, unha comédia fantástica da 20th Century Fox que se vai rodar a partir do mes de agosto. Michael Lembeck (The Santa Clause) será o director.
Johnson fará o papel dunha persoa corrente que se verá envolta nunha loita por salvar ao reino máxico dos dentes onde vive a famosa fada.
The Tooth Fairy conta cun guión de Lowell Ganz e Babaloo Mandel coa colaboración de Joshua Sternin e Jeffrey Ventimilia.
Johnson é o protagonista do filme da Disney Witch Mountain, que se estreará axiña, e asemade poderemos ve-lo este verán nas carteleiras xunto a Steve Carell na comédia da Warner Brothers Get Smart.
Nos países anglosaxóns a Fada dos Dentes é o persoaxe que coma o rato Peres en España deixa regalos aos nenos cando se lles caen os dentes de leite.
Volve a Xustiza
A Warner Brothers regresa coa Liga da Xustiza, e aposta por un lanzamento en 2009, agora que ven de rematar a folga de guionistas.
A Warners tentara que A Liga da Xustiza, o filme baseado na popular franquía da DC Comics, entrase en produción xa hai meses, pero tiveron que adia-lo indefinidamente en xaneiro, co que os contratos que tiñan cos membros do reparto expiraron. Naquel intre xa dixeran que os estudos non querían seguir adiante até que os guionistas lle deran outro repaso ao libreto do filme.
Os guionistas Kieran e Michele Mulroney están ocupados pulindo o guión, que se agarda que estea de volta nos estudos dentro dalgunhas semanas, mentres que aos actores lles aconsellaran que seguiran poñéndo-se en forma para entraren nos seus uniformes de super-heroes. O director George Miller está facendo labouras de preprodución en Austrália, pero non está nada claro se o filme se rodará alí ou en Canadá.
Adam Brody, contratado para facer o papel de Flash, é o actor de máis sona dentro do reparto para o filme. O rapeiro Common fará o persoaxe de Lanterna Verde, mentres que o resto dos papeis serán para actores menos coñecidos, coma Armie Hammer Jr. (Batman) e Megan Gale (Wonder Woman).
Gañadores dos prémios do Anime
A Feira Internacional de Anime de Tóquio (TAF), a feira de comércio máis importante do mundo adicada aos debuxos xaponeses, ven de presentar “Evangelion 1.0: (Non) Estás só” co seu prémio á Millor Animación do ano.
Os debuxos, a última entrega da franquía da Hideaki Anno TV sobre os rapaces que pilotan robots xigantes en loita contra invasores extra-terrestres, foi un grande éxito o ano pasado cando foi distribuida nos Estados Unidos, recadando 19 millóns de dólares.
A TAF anunciou asemade outros prémios nas súas dúas seccións principais: Traballos Nominados, para séries e películas emitidas, exhibidas ou vendidas nos pasados 12 meses, e Traballos Enviados, para séries e filmes remitidos polo público en xeral en todo o mundo.
O grande prémios na sección de Traballos Nominados foi para Adventures in the NPM, unha curta taiwanesa de Helen Huang que é unha guía animada polo Museu do Palácio Nacional en Taipei. A obra de Grzegorz Jonkajtys Ark e mais a de Moin Samadi The Lost Puppet foron seleccionadas coma Mencións de Honra na categoría xeral, o que supón o segundo prémio. Christmas in Taxi de Young-kwang acadou o Prémio Especial, e a obra de Takashi Kato The Clockwork City e mais a de Guillaume Briet BistRobot gañaron mencións de honra na categoría de estudantes.
A TAF terá lugar do 27 ao 30 de marzo en Tóquio (Xapón). O ano pasado a feira amosou traballos de 270 empresas diferentes, incluindo 55 estranxeiras, e atraiu a 107.713 visitantes.
Shazam ainda non está morto
O director Peter Segal revelou á prensa que a recentemente rematada folga de guionistas de Hollywood adiara o seu proxecto de filme sobre Shazam, pero que agora xa está de novo de volta para o traballo.
“Coido que ainda acontecerá“, dixo Segal (Get Smart) a un grupo de xornalistas no decurso da WonderCon en San Francisco na pasada fin de semana. “Pero o tempo vai ser un factor clave de agora en adiante, porque… normalmente estariamos a traballar nun guión mentres estabamos facendo a post-produción de Get Smart, así que agora que rematamos a post-produción, estamos listos para escomezar coa preprodución do seguinte proxecto“.
Pero Segal dixo que non non quería apurar-se para facer un guión para o filme, baseado na venerábel figura do Capitán Marvel, un persoaxe clásico da DC Comics. Segal confirmou asemade que o título agora é Billy Batson and the Legend of Shazam (en España Billy Batson foi traducido coma Memo Batson).
“Realmente non queremos apresurar-nos con algo coma Shazam“, dixo Segal. “Quero dicir que vai ser un filme realmente grande, grande en perspectivas e grande en prezo. Así que queremos asegurar-nos de que temos un guión sólido e prestar atención ao reparto e a toda a preprodución que hai ao redor disto. Xa sabedes, cando estea ben, farémo-lo“.
O vindeiro filme de Segal é Get Smart, baseado na série cómica de espías O Superaxente 86 dos anos 60. A estrea está prevista para o 20 de xuño.
Finalistas Prémios Nebula
Veñen de se anunciar os finalistas para os Prémios Nebula deste ano para os millores no eido da literatura de fantasía e ciéncia-ficción. Os gañadores serán dados a coñecer no decurso da Fin de Semana dos Prémios Nebula os días 25 ao 27 de abril en Austin, Texas. A listaxe completa dos nominados podédela atopar neste ligazón.
E o Oscar vai para…
O xénero fantástico estivo este ano representado por tres filmes gañadores na gala dos prémios Oscar da Académia de cinema de Hollywood.
O Oscar aos millores efectos especiais recaiu en O compás dourado, que venceu sorpresivamente a Transformers e mais a Piratas do Caribe 3, dous filmes que partían coma claros favoritos na carreira.
Pola súa banda, Brad Bird gañou o seu segundo Oscar (o primeiro fora en 2004 con Os Incríbeis) grazas ao filme de debuxos animados Ratatouille, que leva camiño de se converter nunha grande lenda por mor dos moitos prémios que xa recadou dende a súa estrea. De todos os xeitos, Ratatouille só gañou ún dos cinco Oscars aos que estaba nominado.
Finalmente, o terceiro Oscar da noite foi a parar a Tim Burton polo seu filme musical Sweeney Todd The Demon Barber of Fleet Street (“O terríbel barbeiro da rúa Fleet”), que foi galardonado co prémio á millor dirección artística. A película de Burton recebiu críticas non demasiado positivas, por mor do seu exceso co sangue e mais as súas reminiscéncias dos filmes de terror da Hammer, pero se cadra foi precisamente iso o que miraron de bó os membros da Académia.
Harry Potter en galego
Onte púxose á venda Harry Potter e as reliquias da morte, última entrega da serie de novelas de J. K. Rowling, publicado por Editorial Galaxia.
Para celebrar este lanzamento Editorial Galaxia organizou unha série de actividades na FNAC da Coruña e na Casa do Libro de Vigo co fin de lles ofrecer aos harrypotólogos a posibilidade de compartir a espera do lanzamento dun xeito entretido. Unha hora antes da posta á venda da sétima entrega de Harry Potter tivo lugar un concurso de disfraces de personaxes desta série de libros. Tamén houbo unha charla-presentación a cargo dun grupo de lectores e coñecedores cualificados das aventuras de Harry Potter.
Editorial Galaxia vén publicando, en colaboración con Ediciones Salamandra de Barcelona, a serie Harry Potter en lingua galega. A última entrega, Harry Potter e as reliquias da morte, foi traducida por Laura Sáez, quen tamén prepara a tradución de Harry Potter e a Orde do Fénix. Carlos Acevedo é o tradutor de Harry Potter e o misterio do príncipe.
Este último libro narra os acontecementos que seguen directamente ao libro anterior: Harry Potter e o misterio do príncipe, e conclúe co enfrentamento final, largamente esperado, entre Harry Potter e o mago Lord Voldemort. Éste é o único libro da serie que non inclúe algún comentario da crítica no interior de la portada, na que en cambio se pode ler: “We now present the seventh and final installment in the epic tale of Harry Potter“.
Con estas novas saídas editoriais no ano 2008 Editorial Galaxia presenta en lingua galega a série completa do popular personaxe. O compromiso entre os editores é ofrecer aos seus lectores as obras ao mesmo tempo nas tres lénguas, de xeito que os lectores galegos poidan acceder á novela de J. K. Rowling nas mesmas datas que calquera outro lector do estado español. Este á a filosofía na que Editorial Galaxia vén desenvolvendo a súa política de traducións nos últimos anos. As novelas de Paul Auster, Martin Amis, Andrea Camilleri, Daniel Kehlmann están a ser publicadas á par que as outras línguas europeas.
Verbinski súma-se á animación
O director de Piratas do Caribe, Gore Verbinski, fará o seu primeiro filme de debuxos animados asociándo-se co realizador Graham King para producir o proxecto.
O filme de acción e aventuras está baseado nunha ideia orixinal de John B. Carls, un empregado da empresa de Verbinski Blind Wink Productions, ten un orzamento inicial duns 60 millóns de euros e unha aposta polo ano 2010 coma data de lanzamento. O guionista John Logan (Sweeney Todd) está en conversas para se encargar de escribir o libreto deste filme e das súas posíbeis secuelas.
King financiará o desenvolvemento do filme, ainda sen título. A Warner Brothers ou outros estudos serán a sede do proxecto após de que se remate de escribir o guión.
Verbinski está a procurar un grupo de deseñadores para este novo filme, incluindo ao xénio dos efectos especiais Mark “Crash” McCreery e mais ao xefe de guionistas e artista de bocetos James Ward Byrkit, ambos dos cales xa traballaran con el nos seus filmes de piratas. O coprodutor David Shannon traballará como artista conceptual neste proxecto. Os realizadores decidirán se traballar nunha unidade de animación de seu ou se ir a uns estudos de gravación unha vez estea rematado o guión.
Akira ao cinema
Leonardo DiCaprio vai-se asociar á Warner Brothers para producir un filme de acción real baseado no popular manga e anime Akira.
Ruairi Robinson foi contratado para dirixir o que nun princípio será un filme épico dividido en dúas partes. A película marcará o debut na realización de longametraxes de Robinson, cuxa curta animada de ciéncia-ficción Fifty Percent Grey foi nominada a un Oscar. Gary Whitta escribirá a adaptación, que DiCaprio producirá a través da súa empresa Appian Way.
Akira é todo un clásico para os afeccionados. Orixinou-se en 1988 coma un manga (un cómic xaponés) e despóis converteu-se nun anime (película de debuxos animados xaponeses), con guión e dirección de Katsuhiro Otomo. A história está ambientada nunha cidade futurista alumeada polas luces de neón, chamada Nova Tóquio en 2019, onde un membro dunha banda de moteiros é obrigado a participar nun experimento do governo que desata os seus poderes até daquela agochos. O líder da banda deberá atopar un xeito de deter a vaga de destrución causada.
Akira leva moito tempo en desenvolvemento pola compañía, cos produtores Jon Peters e Basil Iwanyk implicados en diversos intres, así coma os directores Stephen Norrington e Pitof. Os dereitos caducaron, pero a Warner mercounos outra vez a Robinson, que é o que ten a ideia de adaptar o filme en dúas partes.
A história, nombergantes, trasladará-se até “Nova Manhattan”, unha cidade reconstruida polos xaponeses. Os estudos agardan que se todo vai ben podamos falar da estrea da primera parte alá polo verán de 2009.
