As illas Cutlass
A New Regency ven de mercar un guión para un filme de aventuras fantástico de Tom Wheeler titulado Cutlass Islands e ten pensado poñer en marcha o proxecto con Alex Gartner da Mosaic Media e Shawn Levy da 21 Laps; o guión vai sobre un par de irmáns náufragos que descobren o segredo das illas Cutlass, unha terra perdida de espécies máxicas e mitolóxicas.
Dougherty dirixindo Robots
O co-guionista de Superman Returns Michael Dougherty ven de se asociar coa Walt Disney Pictures e coa produtora de Robert Zemeckis, a ImageMovers, en Calling All Robots, unha aventura de ciéncia-ficción en debuxos animados que o guionista planea dirixir. Dougherty usará o mesmo sistema de captura de imaxes que xa puidemos admirar no filme de Robert Zemeckis Beowulf.
Dougherty escribirá o guión xunto con Breehn Burns e Simeon Wilkins, quen ademáis traballarán coma artistas e deseñadores de escenários no proxecto. O trío concebiu a ideia xuntos.
Os detalles do proxecto ainda fican en segredo, pero a história seica será coma unha volta aos vellos filmes de Godzilla, segundo revelou Dougherty. A compañía de Zemeckis, a ImageMovers, ademáis de Jack Rapke e Steve Starkey, serán os produtores.
Dougherty recentemente dirixiu Trick ‘r Treat, un filme de terror ambientado na noite de Halloween que a Warner Brothers e mais a Legendary Pictures ían lanzar o pasado mes de outubro, pero que adiaron a este ano para evitar que fose confundido co típico filme de asasinos sanguentos que adoitan encher as carteleiras durante esas datas.
Maguire producirá “Afterburn”
O protagonista da triloxía de Spiderman, Tobey Maguire, vai producir Afterburn, un filme de ciéncia-ficción baseado no cómic da Red 4 de Paul Ens e Scott Chitwood. A produtora de Neal Moritz, a Original Films, será a que finance o proxecto.
A Relativity (a compañía de Maguire) está en conversas para entrar neste proxecto post-apocalíptico, cuxa história comeza un ano despóis de que unha laparada solar destruira a metade da Terra. Os cazatesouros tentarán regresar á metade queimada do planeta para recuperar todo o que ainda se poida recoller polo lugar abrasado.
A compañía de Maguire tamén ten en mente producir unha adaptación da saga de anime xaponés Robotech para a Warner Brothers, xunto á Suckerpunch de Tóquio para a Sony.
Ian McKellen de novo no pel de Gandalf
Ainda que estaba cantado que O Hobbit contaría con Ian McKellen meténdo-se de novo na pel de Gandalf, ainda non estaba confirmado con seguranza. Agora, o mesmo actor inglés ven de acougar aos milleiros de fans que non podían ver a este persoaxe interpretado por outro e será el quen faga o papel do meigo baixo a produción de Peter Jackson, quen seica foi a clave para que McKellen aceptara o papel.
Nombergantes, ainda non se remataron de ultimar detalles da produción tan importantes coma a dirección, ainda que, como xa saben os fans de NOVA FANTASIA, soa forte o nome de Guillermo del Toro, que podería ser unha acertada elección. Tamén hai que engadir a dificultade engadida coa difícil situación da New Line, a produtora da saga, que vai desaparecer, ainda que será absorbida pola Warner Bros.
“Si, fareino, se Peter Jackson e eu temos que ver co filme, el na produción, e eu, por suposto, coma afortunado actor“, escribiu McKellen o pasado 26 de marzo. As palabras de Sir Ian McKellen na sua Web fan manter a esperanza aos amantes da saga de Tolkien na pantalla grande. Seica Jackson está decidido a encamiñar a O Hobbit a bó porto, e podería comezar a se rodar en 2009, xa que McKellen afirmou que está a deixar a súa axenda “libre para ese ano“.
King e Fillo
Os escritores supervendas Stephen King e mais o seu fillo Joe Hill colaborarán xuntos nun relato longo que levará por título Throttle e que aparecerá nunha próxima anoloxía que servirá para honrar ao autor de Eu son Lenda, Richard Matheson. Esta será a primeira colaboración entre o pai e mais o fillo.
A antoloxía, que levará o título de El é Lenda, é un tributo persoal a Matheson e tamén contará coa súa colaboración. A escolma incorporará novos relatos ambientados en mundos creados nas novelas de Matheson.
A colaboración King/Hill, Throttle, estará ambientada no mesmo mundo do relato de Matheson Duel, que xa foi adaptado nun telefilme por Steven Spielberg.
Outros famosos que tamén prestarán a súa pluma para esta antoloxía serán o mesmo fillo de Matheson, Richard Christian Matheson, así coma F. Paul Wilson, Joe Lansdale, Whitley Strieber, William F. Nolan, Gary Braunbeck, Thomas Monteleone, John Shirley e Ed Gorman. Ademáis contará cunha iontrodución de Ramsey Campbell.
El é Lenda tamén incluirá material orixinal de Matheson, concretamente un guión para o filme Conjure Wife (baseado na novela de Fritz Leiber), que escribiu en colaboración co recentemente finado Charles Beaumont. O filme foi distribuido co título de Night of the Eagle (e tamén co de Burn, Witch, Burn!).
A antoloxía aparecerá en febreiro de 2009, cunha edición de luxo de 750 exemplares asinados por todos os escritores que contribúen nela (agás Matheson), e outra edición de 52 exemplares que tamén asinará o mesmo Matheson.
Jackman tamén nos cómics
Hugh Jackman e mais o co-creador de Eli Stone Marc Guggenheim van-se axuntar coa Virgin Comics para crear Nowhere Man, un novo cómic de ciéncia-ficción que será deseñado como paso prévio para facer unha película que protagonizará o mesmo Jackman.
O argumento ainda mantén-se en segredo, pero o parceiro de Jackman na Seed Productions, John Palermo, dixo que será algo semellante ao persoaxe que fixo Will Smith en Eu son Lenda. O concepto é un mundo futuro onde a humanidade trocou a privacidade pola seguridade.
Guggenheim é un guionista recoñecido polos fans por ter escrito tamén algunhas entregas de Amazing Spider-Man e Lobeto para a Marvel Comics. Jackman atópase arestora en Austrália, protagonizando o filme da 20th Century Fox X-Men Origins: Wolverine, a secuela da saga dos Homes X que verá a luz nos cinemas en maio de 2009.
Nowhere Man será publicado pola liña editorial da Virgin Voices, unha editora que xa fixo Voodoo Child, a série cuxos dereitos mercou Nicolas Cage xunto con seu fillo Weston.
Jericho á procura dun novo fogar
Carol Barbee, produtora executiva da série post-apocalíptica Jericho, recentemente cancelada pola CBS, revelou que está a menter conversas con outras cadeas de televisión á procura dalgunha que queira seguir emitindo os episódios desta saga, ainda que sexa nalgunha por cable.
“Non podo dicir demasiado sobre negociacións específicas, porque non son a única que está a ter esas conversas“, dixo Barbee nunha entrevista o pasado 24 de marzo, a víspera de que a CBS emitise o derradeiro episódio. En Galiza a série puido seguir-se a través da canle estatal Telecinco, con non moi bós resultados de audiéncia, pero nos Estados Unidos, cando foi cancelada a primeira vez, a CBS recebiu unha chea de mensaxes rogando que a repuxesen, cousa que ao cabo aconteceu.
Se Jericho non consigue acomodo nalgunha coutra canle, Barbee dixo que poderían tentar dar-lle vida dalgún outro xeito: “Definitivamente, hai unha série de Internet que hai que facer, e sempre falamos sobre unha novela gráfica, e… unha película“.
Pero o tempo está a se rematar. Jericho pechou a súa segunda tempada en novembro, xusto cando escomezou a folga de guionistas. Dende aquela, o reparto e a equipa de rodaxe ficaron libres para outros proxectos, os decorados da série ficaron desmantelados ou destruídos e a mesma Barbee foi enviada a outra série, Swingtown, creada por Mike Kelley, e que se vai rodar no mesmo plató onde se facía Jericho.
M. Jon Harrison gaña o Prémio Dick 2008
Xa se coñece o gañador do Prémio P.K. Dick 2008 á millor novela publicada directamente en formato peto nos Estados Unidos durante o ano pasado. No decurso da Norwescon anunciou-se o resultado do Prémio Philip K. Dick de 2008:
Finalista e Mención especial: From the Notebooks of Dr. Brain, Minister Faust (Del Rey).
Vencedor: Nova Swing, de M. John Harrison (Bantam. En España: Bibliópolis).
Premios británicos de CF 2007
A pasada fin de semana, no decurso da Orbital/Eastercon (congreso anual británico de ciéncia-ficción, que sempre ten lugar na Páscua) déron-se a coñecer os gañadores dos Prémios BSFA 2007, que foron os seguintes:
Millor novela: Brasyl de Ian McDonald
Millor relato: Lighting Out de Ken MacLeod
Millor ilustración: Cracked World (portada de disLocations) de Andy Bigwood
Millor Novela de 1958: Non-Stop, de Brian Aldiss (esta é unha categoría especial para celebrar o médio século de existéncia dos prémios).
Spielberg xa ten actor para o seu Tintín
A espera foi longa pero ao cabo todo chega. Tintín, ún dos persoaxes de cómic más carismáticos, cativadores e aglutinador de todo tipo de xeracións chegará á pantalla en carne e óso da man dos prestixiosos directores Steven Spielberg e Peter Jackson. Encarnará-o un xove inglés de tan só 17 anos: Thomas Sangster.
Steven Spielberg e Peter Jackson decidiron que sexa o rapazolo inglés Thomas Sangster (Love Actually, A derradeira lexión) o que faga o papel do clásico persoaxe na primeira das películas que pretenden rodar, xa que se todo vai ben, tamén fará as outras dúas da proxectada triloxía.
Seica Sangster xa estivo en Los Angeles traballando na preprodución cos dous directores e tamén con Andy Serkis, que interpretou a Gollum en O Señor dos Aneis e que nesta triloxía dará vida ao Capitán Haddock.
Tamén se soubo que no filme se utilizará animación en 3D e a tecnoloxía de captura de movemento, coma fixo Robert Zemeckis con Beowulf.
A rodaxe da primeira entrega de Tintín comezará en outono e seica será o mesmo Spielberg quen a dirixirá (a estrea estaría prevista para 2009), co guionista Steven Moffat (The office). Peter Jackson fará-se cargo da segunda, ainda sen data. Da terceira, non se sabe ren ainda.
Os rumores apuntan a que se cadra a história baseará-se en O Segredo do Unicórnio, á que seguiría a súa continuación no cómic O Tesouro de Rackham o Vermello. Ainda que se trata de dúas das millores histórias de toda a série, moitos fans seguen soñando con ver outros títulos coma Tintín no Tíbet, O loto azul, Aterraxe na lúa ou O templo do Sol.
