Impacto europeo

Natasha Henstridge (Species), James Cromwell e David James Elliott protagonizarán Impact, un telefilme de desastres e ciéncia-ficción dividido en dúas partes sobre unha estrela anana que choca contra a Lúa e causa estragos na Terra. Os actores alemáns Benjamin Sadler e Florentine Lahme tamén forman parte do reparto.

Producida pola compañía muniquesa Tandem Communications, Jaffe/Braunstein Films e Muse Entertainment Enterprises, a minisérie contará cun orzamento de 14 millóns de dólares (8,90 millóns de auros) e comezou xa a se rodar a semana pasada na Colúmbia Británica (Canadá).

O filme está producido en asociación con várias canles de televisión europeas, entre elas a española Cuatro, e ademáis a ProSieben Television (Alemaña), TF1 (Franza) e a Sony Pictures Home Entertainment. Tandem, que manexará a distribución internacional, xa vendeu os dereitos de emisión para máis de 90 países e rexións, incluindo Áustria, Rúsia, Poloña, Latinoamérica e o Médio Este.

Dirixida por Mike Rohl (Smallville) a partir dun guión de Michael Vickerman, Impact conta coa produción executiva de Jonas Bauer, Rola Bauer, Tim Halkin, Michael Jaffe, Howard Braunstein e Michael Prupas, e coa coprodución executiva de Irene Litinsky e Ted Bauman.

Zero-G, un videoxogo ao cinema

A 20th Century se fixo cos dereitos de Zero-G, un videoxogo de ciéncia-ficción da Union Entertainment creado por Daniel Jevons, e que ainda está por aparecer. O seu argumento é un thriller baseado nun ataque devastador con armas nunca vistas até agora contra unha cidade americana.

O proxecto é pasar ao cinema este xogo contando para elo coa produción de Richard Leibowitz, Wyck Godfrey da Temple Hill Entertainment e Marty Bowen e mais Ellen Goldsmith-Vein da Gotham Group.

O trato supón a primeira vez que un videoxogo da Union pasa a se converter en película, pero non é a primeira vez que unha película é transformada en videoxogo pola Union, xa que en 2007 apareceu The Darkness e ainda está por chegar ao mercado Sin City, baseadas ambas as dúas en novelas gráficas de Frank Miller.

Documental de Speed Racer

Joel Silver, produtor do vindeiro filme dos irmáns Wachowski Speed Racer, confirmou que esta película aparecerá xunto a un documental de 20 minutos adicado á família fictícia do protagonista. Serán, obviamente, dados falsos destinados a vender millor a liña de xoguetes que pensan lanzar con motivo da estrea da longametraxe.

Un novo anxo contra os demos

A actriz israelí Ayelet Zurer ven de se facer co papel feminino protagonista para interpretar xunto a Tom Hanks a precuela de O Código da Vinci que vai facer a Columbia Pictures, Anxos e Demos.

Ewan McGregor está en conversas para se unir ao reparto deste thriller, baseado, coma o seu predecesor, nunha novela de Dan Brown. McGregor interpretaría o papel dun poderoso persoaxe dentro do Vaticano que tenta axudar a Robert Langdon, o persoaxe que interpreta Hanks.

Na precuela, Langdon atópa-se de novo mergullado nunha loita contra as forzas do mal que teñen raigames moi antigas: os Illuminati, a máis poderosa organización secreta da história, e de novo contra a igrexa católica. Zurer fará o papel de Vittoria Vetra, unha científica italiana que se axunta a Langdon na súa loita. Ron Howard dirixirá a partir dun guión de Akiva Goldsman.

Urco en TXT e PDF

A Urco Editora anúncia a primeira das súas traducións na rede. Hoxe saíu a primeira delas, Sleepy Hollow e outros relatos, que xa é posíbel descargar en formato txt a través deste ligazón provisional no seu blogue. Ademáis, os suscriptores poden solicitar a versión maquetada en formato pdf, que non é pública.

Wesley Snipes irá ao cárcere

O actor americano Wesley Snipes foi condeado a 36 meses de cárcere, o máximo que pedía o fiscal, por vários delitos fiscais dos que foi atopado culpábel nun xuízo celebrado en febreiro, segundo fuentes judiciales.

O xuiz federal William Terrell decidiu impoñer a máxima condea, mália que nos últimos días várias estrelas de Hollywood, coma Denzel Washington ou Woody Harrelson, amosaron o seu apoio ao intérprete.

En febreiro, Snipes fora xulgado nun tribunal de Ocala, ao noroeste de Orlando (Florida), por non facer a súa declaración entre 1999 e 2004, o que supón un delito de evasión de impostos. A Fiscalía argumentou que o actor acumulara unha débeda con Facenda de tres millóns de dólares (1,9 millóns de euros), se ben a sua defensa aduciu que se trataba só de 228.000 dólares (144.587 euros).

Os avogados do protagonista da triloxía Blade, de 45 anos, pediran ao xuiz unha pena máis suave, sen prisión nin multa, dado que consideraban que se trataba dun delito menor e que o actor non tiña antecedentes penais.

Nos últimos días, unha trintena de amigos e familiares dirixiu cartas ao xuiz explicando o bó carácter e comportamento cidadán de Snipes. “Wesley é coma unha árbore… coma un grande carballo. Moitos dos que o coñecemos fomos testemuñas dos froitos do seu traballo, sentámo-nos á súa sombra e protexémo-nos cos súa presenza“, escribiu Denzel Washington.

O mesmo Snipes consideraba que non debía pasar ningún tiempo no cárcere e coida que a liberdade baixo fianza é “xusto castigo“, segundo documentos xudiciais entregados no tribunal federal de Ocala.

Morreu Hazel Court

O pasado día 14 morreu Hazel Court (1926 – 2008), unha das actrices máis queridas da época clásica do cinema de terror.

Nacida en Sutton Coldfield, Birmingham, Inglaterra, non fixo a súa primeira aparición nun filme de xénero fantástico até 1952, con O Barco Pantasma (Ghost Ship). Tamén apareceu en filmes “camp” coma Devil Girl from Mars e Doctor Blood’s Coffin.

Ainda que desexaba aparecer en comédias, continuou sendo unha das raíñas do cinema de terror. En 1957 participou en The Curse of Frankenstein, onde se gañou o estatus de “serea de culto”, se cadra por mor da exhibición xenerosa dos seus escotes. Viaxando entre Inglaterra e Hollywood, apareceu en catro episódios da série de TV de Alfred Hitchcock e tivo aparicións en A Woman of Mystery (1958) e The Man Who Could Cheat Death (1959).

A princípios dos anos 60 mudou-se definitivamente aos Estados Unidos, onde protagonizou filmes de terror baseados en obras de Edgar Allan Poe dirixidas por Roger Corman coma The Premature Burial (1962), The Raven (1963) e The Masque of the Red Death (1964), xunto con Vincent Price.

Retirada do cinema para se adicar ao seu fogar (casara en 1964 co actor Don Taylor) non volveu aparecer nas pantallas até unha breve intervención na terceira parte de A Profecía (1981).

Court morreu por mor dun ataque ao corazón na súa casa preto do lago Tahoe, en Califórnia o pasado día 15 de abril aos 82 anos.

Alex de la Iglesia en A Marca Amarela

Após de coñecermos as novas sobre a súa nova série de televisión, ven de se saber que o director español Álex de la Iglesia levará ao cinema ún dos millores cómics de todos os tempos: A marca amarela, o álbum que, protagonizado por Blake & Mortimer, aupou a Edgard P. Jacobs, o seu autor, ao máis alto da Novena Arte.

O mesmo de la Iglesia ven de confirmar a nova no fóro da súa páxina oficial. O proxecto está ainda nun estado embrionário pero todo indica que a película rodará-se en inglés, será protagonizada por Kenneth Branagh (sen dúbida o actor máis indicado para o papel) e será escrita por de la Iglesia coa colaboración do seu guionista habitual, Jorge Guerricaechevarria.

En 1997 xa se produciu unha série de debuxos animados (Blake e Mortimer) cos protagonistas da saga. A marca amarela, así coma os trece álbumes que forman a série de Blake & Mortimer, están editados en español por Norma Editorial e en portugués pola Meribérica e coma é habitual non existe ningún proxecto para traduci-los á nosa língua.

Guillermo del Toro dirixirá O Hobbit

Xa é oficial: Guillermo del Toro dirixirá as dúas películas baseadas en O Hobbit, o clásico de J.R.R. Tolkien, coma precedentes da saga d’O Señor dos Aneis, que dirixiu Peter Jackson (nesta ocasión produtor executivo). O cineasta mexicano, que gañou tres prémios Oscar con O laberinto de Pan, rodará as películas en Nova Celándia.

Os estudos New Line Cinema e Metro-Goldwiyn-Mayer veñen de anunciar que a rodaxe escomezará en 2009 e que a primeira entrega podería estrearse en 2010 e, un ano despois, a segunda parte. Ainda que se estrearán por separado, rodarán-se xuntas, coma xa aconteceu coa triloxía do Señor dos Aneis.

O tamén director de Cronos, O espiñazo do diaño e das dúas partes de Hellboy (a segunda parte estreará.-se en agosto) participará asemade na produción do filme. Durante os vindeiros dous anos deberá residir en Nova Celándia para poder traballar con Jackson na rodaxe do filme. O mesmo del Toro supervisará xunto a Jackson, Fran Walsh e Philippa Boyens a escritura dun guión cuxo punto máis quente será decidir en que parte da historia de O Hobbit meten a tesoura para poder dividir o libro en dúas películas.

Polo de agora non hai data fixada para o comezo da rodaxe nin se sabe moito do reparto, agás que Sir Ian McKellen repetirá coma o meigo Gandalf. Ainda está por decidir se outros actores da triloxía, cuxos persoaxes tamén aparecen en O Hobbit, retoman os seus papeis.

O Hobbit, que Tolkien escribiu para os seus fillos en 1937, desenvólve-se uns 60 anos antes cá triloxía de O Señor dos Aneis e relata a viaxe que emprende unha tropa de ananos, á que acompañan o hobbit Bilbo Bulseiro, tío de Frodo, e máis o meigo Gandalf.

Todos eles viaxan rumo á Montaña Senlleira na procura do tesouro do dragón Smaug nunha aventura que será a orixe da célebre triloxía, xa que é nesta viaxe cando Bilbo consigue roubar-lle o anel único a Gollum.

Spielberg, Lucas e Ford apostan por Indy

Steven Spielberg, George Lucas e Harrison Ford decidiron, nunha ousada aposta, renunciar a todas as suas gañáncias pola cuarta entrega de Indiana Jones se a billeteira non supera os 400 millóns de dólares.

Deste xeito, os ingresos iniciais pola venda de entradas para ver Indiana Jones e o reino da caveira de cristal irán parar exclusivamente ás arcas da Paramount Pictures.

Nesta época pouco propícia para a indústria de Hollywood, o elevado custe do filme, uns 335 millóns de dólares, levou aos artífices do filme a acordar pospoñer os seus ingresos, normalmente unha porcentaxe da billeteira, até que a Paramount recupere o seu investimento no proxecto.

As grandes produtoras son cada vez máis prudentes á hora de se involucraren en longametraxes multimillonárias ante as nubes negras que se prevén sobre Hollywood, onde todos temen unha crise en breve. Cada vez é máis caro facer unha película e nin as billeteiras nin os DVD garanten aos estudios amortizar o investimento, polo que os amos da indústria procuran cubrir-se as costas, especialmente despois dunha folga de guionistas e un posible paro dos actores.

A Paramount aportou 185 millóns de dólares para a realización da cuarta entrega de Indiana Jones e alomenos 150 millóns de dólares para a sua promoción en todo o mundo. A estas cantidades sumará-se o 2,5 por ciento dos ingresos que se obteñan da distribución da película, ainda que Spielberg, Lucas e Ford non verán un centavo até que as nuevas aventuras do arqueólogo máis famoso do cinema reporten aos estudos alomenos 400 millóns de dólares.
Lér mais

Páxina seguinte »