Finou Joseph Pevney

Joseph Pevney, un dos máis prolíficos actores e directores da televisión americana, finou en Los Ángeles (Califórnia) aos 96 anos. Pevney dirixiu algúnos episódios de séries coma O incríbel Hulk, A família Munster e 14 capítulos da série orixinal de Star Trek.

Outro xoguete á pantalla grande

A produtora Platinum Dunes propriedade de Michael Bay ven de mercar os dereitos sobre a Ouija, o popular xogo de mesa da compañía xogueteira Hasbro para converte-la nun filme. O proxecto será realizado pola Universal, empresa coa que a Hasbro asinara unha asociación para seis anos.

Michael Bay, Andrew Form e Brad Fuller producirán a longametraxe xunto coa Hasbro.

Ainda que o argumento para esta história ainda fica no segredo, o filme será unha aventura sobrenatural co famoso taboleiro da Ouija xogando un papel central nos acontecementos.

Ainda que os taboleiros de adiviñación ou de contacto cos mortos levan séculos dando voltas polo mundo, non foi até finais da década de 1800 cando comezaron a se vender coma xoguetes para nenos. A Ouija, un taboleiro cun abecedário impreso, foi patentada en 1890. No xogo, deben colocar-se os dedos dos participantes sobre unha pequena plancha que é supostamente movida polas forzas espectrais que enviarían asemade mensaxes dende o reino dos mortos.

A compañía Hasbro fíxo-se cos dereitos sobre o xogo e comezou a vende-lo en 1966 baixo o seu selo de xoguetes Parker, convertíndo-se axiña nun xoguete moi popular en todo o mundo e vendendo millóns de caixas.

O parceiro da Platinum Dunes David Berenbaum escribiu Elf e traballou nas Crónicas de Spiderwick, Zoom e The Haunted Mansion.

Finou o autor da música de Star Trek

Alexander (Sandy) Courage, o compositor de cinema e televisión nominado ao Oscar coñecido sobre todo polo tema orixinal da série Star Trek, finou o pasado 15 de maio en Pacific Palisades, Califórnia, aos 88 anos de idade e após de sufrir unha longa enfermidade que o tiña maltreito dende 2005.

A fanfárria da série orixinal de Star Trek para a nave espacial U.S.S. Enterprise, composta en 1965 para o primeiro dos dous episódios piloto escoitou-se ao longo das tres primeiras tempadas da série, pero repetiu-se posteriormente nas séries dos anos 80 e 90 Star Trek: A nova xeración e nos filmes para a pantalla grande, supoñendo un dos máis salientábeis sinais de identidade de toda a saga.

Courage gañou un prémio Emmy en 1988 polos seus arranxos do especial da ABC Julie Andrews: The Sound of Christmas e recebiu nominacións ao Oscar (compartidas con Lionel Newman) pola súa adaptación da banda sonora de Na procura do amor en 1963 e Doctor Dolittle en 1967.

Nado en Philadelphia e criado en New Jersey, Courage licenciou-se pola Eastman School of Music en Rochester (New York) en 1941, e logo mudou-se a Califórnia.

Courage compuxo dúcias de temas para filmes e séries de televisión, incluindo entre as fantásticas Viaxe ao Fondo do Mar, Perdidos no Espazo e Terra de Xigantes. Pero foi a música de Star Trek a que lel deu sona e glória. Ademáis da fanfárria inicial, o tema da série e as bandas sonoras dos dous episódios piloto, Courage compuxo a música doutros catro episódios.

Unha precuela de Harry Potter

O segredo do que aconteceu antes de que o neno meigo Harry Potter fora á escola de Hogwarts sairá á luz o vindeiro mes, nunha inusual poxa con fins benéficos.

A escritora J.K. Rowling ven de redactar un esbozo de 800 palabras sobre o que aconteceu antes da saga de sete libros que a converteu en multimillonária, un texto que se poxará o 10 de xuño na libraría Waterstones.

O relato, que remata coa frase “Da história prévia na que non estou traballando — pero foi divertido!“, é unha das 13 pezas creadas por famosos autores, coma o novo escritor de James Bond, Sebastian Faulks, e a prémio Nobel Doris Lessing, que se poxarán no tradicional remate.

“Cal é a túa história? pon-se cada vez máis emocionante, todos estes brillantes traballos de incríbeis escritores e ilustradores, cadaún unha pequena obra de arte“, dixo Gerry Johnson, director da Waterstone. “Nunca soñamos con que J.K. Rowling podería doar algo tan prezado, e estamos incríbelmente agradecidos“, engadiu.

Os cartos recadados doarán-se a institucións benéficas coma English PEN e Dyslexia Action.

Outros autores que doaron os seus traballos son Lisa Appignanesi, Margaret Atwood, Lauren Child, Richard Ford, Neil Gaiman, Nick Hornby, Michael Rosen, Axel Scheffler, Tom Stoppard e Irvine Welsh.

Del Toro e Jackson cos fans

Nun encontro virtual cos fans a través da Internet, Guillermo Del Toro e Peter Jackson confirmaron que o primeiro dos dous filmes do Hobbit será a história narrada por Tolkien, mentres que a segunda será un relato orixinal que unirá os periodos comprendidos entre O Hobbit e O Señor dos Aneis.

Remake de Plan 9?

O pior filme de todos os tempos: así foi designada por diversas votacións, e acadou o seu intre de maior glória cando hai dez anos Tim Burton homenaxeouna na sua maxistral Ed Wood. É Plan 9 do espazo exterior, un dos cúmios do cinema de série Z, está por cumprir cincuenta anos e terá unha nova versión para celebra-lo.

Vampira, Bela Lugosi e o resto dos desafortunados actores que acompañaban ao director Ed Wood nos seus descabelados proxectos poderían ter sustitutos se, coma semella, o remake chega a se filmar.

O argumento da película é coñecido: uns alieníxenas veñen á Terra para, reanimando cadáveres, acabar cos humáns e apoderar-se do noso planeta. Pero a película é relembrada polos seus pésimos efectos especiais, horrorosas interpretacións e os diálogos sen sentido.

O director John Johnson, autor de Shadowhunters, amosou o seu entusiasmo por facer o remake, asegurando ademáis que o filme non será unha paródia, senón algo “realmente aterrador“. Para elo conta coas actuais tecnoloxías, o mesmo entusiasmo ca Wood e, por suposto, con millóns de fans do filme orixinal, convertido nun clásico de culto.

Máis información no sítio Web do filme.

Propaganda antisoviética

Entre as escasas persoas que non teñen previsto ir ver Indiana Jones e o reino da caveira de cristal están os membros do afortunadamente pequeno partido comunista de Rúsia, que ven de condear o filme coma “propaganda antisoviética” e que “distorsiona a história” e pediu que fora prohibido nos cinemas rusos.

Novo libro de Manel Díez Román

Edicións Mandrágora ven de anunciar a publicación dunha novela dun dos colaboradores máis veteráns e queridos de NOVA FANTASIA, o escritor Manuel Díez Román, titulada Barcelona Blues.

Segundo a editorial, o seu argumento xira ao redor dunha Barcelona dividida en bárrios privados e murallas tras das que se agochan os cidadáns procurando protexer-se das bandas e a contaminación, mentres os disidentes son expulsados aos Territórios Libres. É unha sociedade balcanizada e caótica, onde prosperan as seitas e as crenzas máis diversas, tutelada de preto polo exército após da guerra do Magreb, ainda que o poder na sombra osténtano as corporacións transnacionais. Un policía, unha xornalista e mais un neurojockey verán como o seu futuro sufre un cámbio drástico ao se involucraren involuntáriamente nunha trama que pretende crear novas regras de poder na sociedade.

Manuel Díez Román (Barcelona, 1966) foi cofundador da revista electrónica Ad Astra. Ven colaborando con relatos e artigos en diversos fanzines e revistas tanto españolas como hispanoamericanas e ten publicada unha antoloxía de relatos de temática cyberpunk, na que é un auténtico mestre.

Fórum Fantástico 2008 em Lisboa

O Fórum Fantástico 2008 ocorrerá de 2 a 5 de Outubro, na Faculdade de Belas Artes de Lisboa (em pleno coração do Chiado). De novo organizado em colaboração com a Épica – Associação Portuguesa do Fantástico nas Artes, o FF2008 terá como responsáveis Rogério Ribeiro e Safaa Dib, a que se juntam este ano Ricardo Correia e Ana Baptista.

Marcando a quarta edição consecutiva do evento, o FF2008 vai voltar a proporcionar quatro dias cheios de iniciativas relacionadas com o género Fantástico, de novo no formato de quinta-feira a domingo.

Como nas edições anteriores, podem contar com um rico conteúdo, do que se faz lá fora e cá dentro nesta área. E para isso, estando neste momento o programa a ser elaborado, aceitamos também as vossas sugestões, que poderão ser enviadas para forumfantastico@gmail.com.

Indiana Jones 4 xa arrasa

Indiana Jones e o reino da caveira de cristal, a cuarta entrega dunha das sagas máis célebres da história do cinema, chegou ao máis alto da billeteira dos EE.UU. durante a recente fin de semana do Día dos Caídos.

Segundo os cálculos da Paramount Pictures, a película recadou 101 millóns de dólares dende o venres e se se suma o xoves, día da sua estrea, os ingresos que xerou Indy acadan os 126 millóns de dólares (79 millóns de euros). A distribuidora do filme prevé que o luns, festivo nos Estados Unidos, acadarán outros 25 millóns de dólares, co que a recadación total para toda a ponte ascenderá a uns 151 millóns de dólares.

Con estas previsións, Indiana Jones obterá uns resultados espectaculares, se ben ficará por atrás dos 153 millóns de dólares que recadaron o ano pasado Johnny Deep e Orlando Bloom con Piratas do Caribe 3 durante a mesma fin de semana.

O récord absoluto manténo o terceiro episódio da Guerra das Galáxias con A vinganza dos Sith, a película máis billeteira de 2005.

As tres primeiras entregas de Indiana Jones recadaron 1.200 millóns de dólares en todo o mundo.

A moita distáncia de Indy situaron-se esta fin de semana O Príncipe Caspian, a segunda parte das Crónicas de Nárnia, cuns ingresos de 23 millóns de dólares, e Iron Man, que acadou 20,1 millónes.

Páxina seguinte »