Vadim Perelman en Poltergeist?
Segundo apuntan os últimos rumores, o director ucraíno Vadim Perelman está en conversas para se encargar do remake do filme Poltergeist, que foi anunciado oficialmente este mes. No pasado xa estivo vencellado a outros proxectos coma Atlas Shrugged ou The Talisman, pero o seu nome foi sempre eliminado das listas de candidatos.
A vida imita ao arte
O protagonista de Expediente X David Duchovny ven de ingresar voluntáriamente nunha clínica de rehabilitación por mor da súa adicción ao sexo. O curioso do tema é que o actor está a interpretar na súa actual série Californication a un persoaxe con ese tipo de adicción.
O director de Babylon A.D. critica ao filme
Mathieu Kassovitz, director do thriller sobrenatural Babylon A.D., está procurando marcar distáncias entre el mesmo e o filme que dirixiu, que levou unha malleira de paus por parte dos críticos cinematográficos, que consideran esta obra coma un desastre. Nunha recente entrevista á que puideron ter acceso os novos enviados especiais, Kassovitz dixo que o filme é “pura violéncia e estupidez“, con partes do filme que semellan “un episódio malo de 24“.
Fontes preto da produción, que compararon a Kassovitz co persoaxe Billy Walsh da série de TV Entourage, replicaron a través dos médios de comunicación que os comentários do director foron tan só a derradeira pinga nunha série de dóres de cabeza producidos por Kassovitz. A produción de Babylon A.D. tivo que se atrasar tres semanas por motivos persoais que implicaban a Kassovitz. O director tamén fallou moitas veces a roldas de prensa, decidindo no seu canto ir-se de vacacións a unha illa do Caribe.
Kassovitz (Gothika) dixo que a Fox é a culpábel da fasquía final do seu filme, mesmo ainda que a versión revisada é a versión internacional do director e a Fox non-a distribúe fóra dos Estados Unidos.
“A Fox enviou-me avogados que se puxeron á procura de todas as comas e todos os puntos“, laiou-se Kassovitz na entrevista. “Puxéron-mo todo difícil dende o A ao Z“.
A Fox declinou facer comentários polas declaracións de Kassovitz pero dixo que ten toda a intención de distribuir o filme tal cal está. A estrea nos Estados Unidos é hoxe día 29 de agosto.
A Paramount creará cómics nos móbiles
A Paramount está a producir unha série de cómics destinados ao mercado dos teléfones móbiles baseados nos persoaxes das súas películas, incluindo a franquía de Misión Imposíbel. A Paramount Digital Entertainment asinou un trato coa empresa de animación de Singapur Omnitoons para lanzar séries de cómic estilo manga baseados nalgunhas das franquías máis populares dos estudos de cinema.
Os cómics lanzarán-se en diversos formatos, dende sinxelos paneis até máis de 20 pantallas por episódio. Actualmente, estes cómics están dispoñíbeis en formatos MMS e J2ME nos Estados Unidos, Austrália, Europa e Índia. Os cómics para móbil poderán descargar-se dende as principais redes de telefonía móbil en todo o mundo.
Os estudos pretenden que estes cómics sirvan para apoiar as campañas de márketing co gallo do lanzamento dos seus filmes nas salas de cinema, pero as compañías de telefonía móbil tratarán aos cómics coma contido de pago e só para os usuários que paguen por eles, co que é moi dubidoso que cheguen a ser populares.
Downey Jr. en Master Mind
Robert Downey Jr. e Tina Fey están en negociacións para lles poñeren as súas voces aos persoaxes do novo filme de debuxos animados da DreamWorks, Master Mind, unha paródia do xénero de superheroes. Esta película será producida pola compañía de Ben Stiller, a Red Hour Films.
Master Mind céntra-se nun falcatruán que perde a súa vontade de vivir despois de matar accidentalmente ao seu archirival. O guión foi obra dunha parella de debutantes: Alan Schoolcraft e Brent Simons. Os veteráns da DreamWorks Animation Cameron Hood e Kyle Jefferson serán os directores.
Rádio Libre Albemut no cinema
Atópa-se xa en fase de posprodución o filme Rádio libre Albemut, adaptación cinematográfica da novela homónima do clásico da ciéncia-ficción Philip K. Dick. John Alan Simon é o responsábel do filme, no seu debut na cadeira de director (até agora traballara como produtor e guionsta). Protagoniza a fita Jonathan Scarface, e no reparto figura a cantante Alanis Morrisette.
John Alan Simon leva dende 1999, cando escribiu o guión, tentando realizar a película, pero non se puido rodar até agora por mor dos problemas de finanzación. Segundo o seu director, dous factores lograron que rodara o filme: por unha banda, as novas técnicas do cinema dixital, que pemiten reducir o orzamento nos efectos especiais, e por outra, a inestimábel colaboración dun produtor privado que lera a novela, gustou-lle o guión e decediu-se a aportar os fondos necesários.
Simon tivo claro que quería facer un filme fiel ao espíritu da novela de Dick. Expresou asemade o seu descontento coas adaptacións que polo de agora fixo Hollywood das obras deste escritor. Simon estivo asemade hai un tempo escribindo o guión para o filme Flúan as miñas bágoas, dixo o policía, que ía ser dirixida por Oliver Stone, pero o proxecto frustrou-se.
“Rádio Libre Albemut foi un sacrifício financeiro para case todos os implicados no no proxecto. Eu coido que o resultado xustifica o esforzo. Gósta-me pensar que Philip K. Dick estaría orgulloso desta pequena subversiva película“.
Doutor Who ao cinema?
Steven Moffat, gañador do prémio BAFTA polos guións da série Doutor Who, ven de revelar que podería estar en preparación o chimpo do persoaxe á pantalla grande. Esta saga televisiva é moi popular en Inglaterra, onde debutou en 1963, e foi emitida hai máis dunha dúcia de anos pola TVG, cando a canle autonómica ainda tiña unha programación decente.
The Strangers… 2
A Rogue Pictures ven de lle dar a luz verde á produción dunha secuela do seu recente éxito The Strangers, para o que contará novamente co director e guionista Bryan Bertino. Tamén agardan poder contar coa actriz Liv Tyler de nuevo. A primeira parte deste filme debutará en España o 19 de setembro.
Os heroes da Marvel en anime
A Marvel ven de asinar un contrato coa produtora de anime (debuxos animados xaponeses) Madhouse para crear unha nova liña de animación para o mercado xaponés na que aparezan os superheroes dos seus cómics.
As primeiras catro séries xa debutarán en 2010 na Animax, unha canle adicada ao anime e que emite 24 horas. Para atraer millor aos fans xaponeses, os superheroes da Marvel, incluindo a Iron Man e Lobeto, serán redeseñados con fasquía manga e con novos trasfondos que os acheguen á cultura e á história xaponesas.
Creada en 1972, a Madhouse xa traballou con moitos dos autores de anime xaponeses de máis sona, coma Satoshi Kon, Katsuhiro Otomo, Yoshiaki Kawajiri ou Rintaro (Hayashi Shigeyuki).
A compañía matriz da Madhouse é a Index, un conglomerado multimédia cunha forte presenza no negócio dos teléfones móbiles. Os seus sócios tamén planean explotar as novas séries de debuxos animados para crear servizos de telefonía móbil, así como a fabricación de artigos cos persoaxes e merchandising de todo tipo.
Zombieland
Woody Harrelson será o protagonista da nova comédia de terror Zombieland, un filme que contará cun guión escrito pola equipa composta por Rhett Reese e Paul Wernick (The Joe Schmo Show), e que vai sobre un par de supervivintes nun mundo dominado polos zombis. Harrelson interpretará a un loitador contra os zombis chamado Albuquerque. Ruben Fleischer dirixirá este filme para a Columbia Pictures.
