Robert Rodriguez dirixirá Depredador
O director americano Robert Rodriguez ven de anunciar que planea realizar unha nova versión do clásico de acción e ciéncia-ficción dos oitenta Depredador, que foi protagonizado por Arnold Schwarzenegger e dirixido por John McTiernan en 1987, e no que un grupo de mercenários debían enfrontar-se a un feroz alieníxena en plea selva centroamericana.
Así o asegurou o mesmo Rodriguez nunha rolda de prensa celebrada en Texas na que falou dos seus vindeiros proxectos a través de Troublemaker Studios, a própria produtora do director. O autor de títulos coma Sin City, Spy Kids ou O mariachi que acostuma tamén a participar como produtor, guionista, na dirección de fotografia, banda sonora e montaxe final dos seus filmes, declarou que a sua intención é retomar a idea e o personaxe principal para desenvolver a partir diso un argumento de seu.
O título do filme seria Predators, e a sua orixe podería estar nun guión que chegou a escribir el mesmo para un posíbel Depredador 3 que nunca chegou a se materializar.
Nombergantes, trata-se dun proxecto que ainda deberá agardar, porque antes ten previsto rodar Machete, en torno a un asasino mexicano, partindo doutra ideia de seu que puido ver-se en forma de falso tráiler na sesión dobre Grindhouse, composta por Planet Terror e Death Proof – o segundo dirixido polo seu amigo Quentin Tarantino.
E ainda que fai meses se falou que Rodriguez tamén queria realizar un remake de Barbarella, unha psicodélica fantasia erótico-espacial que protagonizou Jane Fonda nos sesenta da man do seu daquela home Roger Vadim, éste ainda non figura entre os proxectos imediatos anunciados polo director.
Rodriguez revelou que tamén está a preparar un filme de ciéncia-ficción titulado Nerverackers, ademais de Sin City 2 e The Jetsons, baseada na famosa série de debuxos animados coñecida en Galiza como Os Supersónicos.
Pese a ter inspirado multitude de cómics e videoxogos, até o momento, os intentos de revitalizar a saga de Depredador non coñeceron demasiada fortuna. Unha secuela realizada en 1990 con Danny Glover de protagonista fracasou no despacho de billetes. Asimesmo, as duas entregas cinematográficas de Alien vs Predator tampouco gozaron do excesivo favor tanto de público como de crítica.
E entre as ideais mais extravagantes, en febreiro pasado anunciou-se Pride and Predator, producida polo cantante e compositor Elton John e que cruzaria aos personaxes do século XVIII de Orgullo e prexuízo, da escritora Jane Austen, co singular cazador de humanos extra-terrestre.
Jack Bauer e House na Marca Amarela
Coa fichaxe de Kiefer Sutherland (Jack Bauer en 24), o realizador Álex de la Iglesia cumprirá o seu desexo – como asi o manifestara nunha recente entrevista – de contar coa estrela da série 24 e tamén con Hugh Laurie, o televisivo Doutor House, para protagonizar a adaptación do cómic A marca amarela.
A incorporación de Sutherland ao proxecto foi confirmada polo mesmo director bilbaíno no decurso do Festival de Málaga, onde exerceu de presidente do Xurado.
A marca amarela é un dos cómics pertencentes á saga das aventuras de Blake e Mortimer, que xurdiron da imaxinación de Edgard P. Jacobs nos anos 40. Sutherland encarnaría ao axente dos servizos secretos Blake, mentres que Laurie seria o físico nuclear Mortimer.
A intención de Álex de la Iglesia é comezar a rodar durante o primeiro semestre de 2010. Entre outros nomes que tanteara se atopaba o de Kenneth Brannagh; o reparto poderia incluir ademais a John Hurt e Mark Strong.
Producida pola compañía francesa La Fabrique de Films (unha das coproductoras d’Os crimes de Oxford), o orzamento poderia ascender a uns 26 millóns de euros.
Este será o terceiro traballo internacional de Álex de la Iglesia, un grande apaixoado dos cómics, despois de Perdita Durango e Os crimes de Oxford. O guión escribirá-o conxuntamente co seu habitual parceiro Jorge Guerricaechevarría, con vistas a comezar a sua rodaxe, conxuntamente en inglés e español, durante o primeiro trimestre de 2010.
A marca amarela foi publicada en 1953 e é obra do debuxante belga Edgar Pierre Jacobs, quen colaborou co seu amigo Hergé para algunhas das aventuras gráficas do célebre Tintín. Narra as investigacons do capitán Francis Blake e mais o profesor Philip Mortimer que, neste caso, deberán enfrentar-se ao misterioso vilán coñecido como A marca amarela. Edgar P. Jacobs seguiu publicando a série até o 1970 e após da sua morte, en 1987, outros autores continuaron a obra cos dous personaxes protagonistas.
Morre J.G. Ballard, referente da literatura de ciéncia-ficción
O escritor James Graham Ballard, un dos grandes referentes da literatura inglesa de ciéncia-ficción das últimas décadas, morreu o domingo aos 78 anos despois dunha longa e valente batalla contra o cancro de próstata, segundo informou a súa axente, Margaret Hanbury.
O autor de obras coma O Império do Sol e Crash, cuxas adaptacións cinematográficas foron grandes éxitos de Hollywood, escribeu un total de 15 novelas e numerosas histórias cortas.
Ballard, que afirmaba que os seus libros non eran ciéncia-ficción, se non “un retrato da psicoloxía do futuro“, obtivo fama mundial con O Império do Sol (1984), novela baseada nos anos que pasou nun campo de concentración xaponés en China cando era un neno. A novela foi levada á grande pantalla por Steven Spielberg en 1987, ao igual que o foi Crash (1973), adaptada por David Cronenberg en 1996 e tamén un grande éxito de público e crítica.
Ballard naceu en Shangai (China) o 18 de novembro de 1930 e durante a II Guerra Mundial foi detido xunto á sua família, que formaba parte da comunidade británica de expatriados, polos invasores xaponeses, cuxa violencia é descrita na sua obra.
Esa experiéncia cando tiña só 12 anos lle marcou e deixou unha clara impronta na sua obra, que comezou a desenvolver pleamente a princípios dos anos 60, xa instalado no Reino Unido. Sobre a sua experiéncia infantil durante a guerra, afirmou nunha ocasión: “Non diria que fun feliz, pero non teño lembranzas desagradabeis do campo. Lembro moita da brutalidade arbitrária e das malleiras contínuas, pero ao mesmo tempo os nenos podíamos xogar todo o que quixesemos e a todas horas“.
Inspirado por algúns escritores americanos de ciéncia-ficción cos que sentía afinidade, coma Jack Vance, comezou a escribir obras deste xénero, que vendeu a revistas inglesas e dos Estados unidos. Os seus primeiros contos e novelas, entre as que se inclúen “o cuarteto do desastre” formado por The Wind from Nowhere (1961), The Drowned World (1962), The Burning World (1964) e The Crystal World (1966), foron o escomezo do xénero de desastres na ciéncia-ficción, á que tamén aportou os seus raros e desacougantes subtextos, nos que os protagonistas semellaban médio namorados dos apocalipses descritos.
Estas tendéncias converteron a Ballard nun autor controvertido entre os fans, que case o esqueceron cando comezou os seus devaneos coa etapa New Wave da ciéncia-ficción, para a que creou obras coma The Atrocity Exhibition (1969), un libro tildado de “repunante” polo seu primeiro editor americano. Nombergantes, ainda que se adicara mais ao mainstream que á ciencia-ficción, os seus fans nunca o esqueceron e el nunca rexeitou os abandonou a metodoloxía da CF.
A súa obra publicada mais recente foi a súa autobiografía, Miracles of Life (2008), o libro no que revelou a súa condición terminal. Pero por suposto que será polas súas obras de ciéncia-ficción e pola súa inclasificábel, surrealista, mimética e profética ficción contemporánea pola que Ballard foi recoñecido e continuará sendo honrado. A súa influéncia nas seguintes xeracións de escritores, dende o cyberpunk ao humanismo aos practicantes do New Weird, é incalculábel.
Os incidentes de Nye
A Dark Castle ven de se facer cos dereitos cinematográficos sobre a novela gráfica da editorial Devil’s Due The Nye Incidents, escrita polo novelista magufo de ciéncia-ficción e cazador de mistérios Whitley Strieber. Todd Lincoln será o director deste filme.
Inspirada segundo o seu autor en supostos feitos reais, o cómic vai sobre un médico forense que vai á caza dun asasino de xente que foi abducida polos extra-terrestres. Ainda non hai ningún guionista vencellado a este proxecto.
Strieber é coñecido entre os fans do fantástico polas súas novelas The Wolfen e The Hunger, que foron adaptadas ao cinema nos anos 80, e sobre todo polo seu libro de abduccións Communion, que segundo el, non é unha obra de ficción senón que é real.
Chega a continuación d’O Código da Vinci
A continuación da novela do escritor Dan Brown O Código da Vinci, que foi un éxito mundial, aparecerá nos Estados Unidos, Inglaterra e Canadá o vindeiro 15 de setembro e levará por título The Lost Symbol, editada pola Random House.
O Código da Vinci vendeu mais de 70 millóns de cópias dende que apareceu en 2003 e chegou ao número un das mais vendidas en todo o mundo, erguendo as iras do Vaticano e dos católicos por mor do seu argumento, baseado en conspiracións nas que está implicada a igrexa católica.
A primeira tirada de The Lost Symbol (O símbolo perdido), que de novo misturará a ficción coa realidade e contará como protagonista co simbiólogo de Harvard Robert Langdon, contará con cinco millóns de exemplares, a mais grande da história da editorial Random House.
“Esta novela foi unha viaxe estraña e marabillosa“, dixo Brown nunha nota de prensa. “Ficar durante cinco anos investigando e traballando doce horas ao día foi un desafío esgotador. A vida de Robert Langdon móve-se moito mais rápido cá miña, claramente“.
Ainda non se deron a coñecer mais detalles sobre o argumento do novo libro, que será publicado nos Estados unidos e en Canadá pola editorial Doubleday e en Inglaterra pola Transworld Publishers, todas elas filiais da Random House, que é súa vez pertence á Bertelsmann AG.
Tom Hanks interpretou a Langdon no filme de 2006 que adaptou O Código da Vinci, un filme que recadou mais de 750 millóns de dólares en todo o mundo. A adaptación da anterior novela de Brown, Anxos e Demos, de novo protagonizada por Hanks no papel de Langdon, será estreada en maio.
Eli Roth e a CF épica
O creador do filme Hostel, Eli Roth, ven de revelar que está a desenvolver unha nova película épica de ciéncia-ficción.
“Xa case rematei o meu guión“, dixo Roth á prensa. “Xa o tiña case rematado antes de Inglourious Basterds [o filme de Quentin Tarantino no que el ten un papel], pero tiven que aparca-lo e estivo ben afastarme del durante un tempo, pero vouno rematar e escomezarei a rodaxe este outono“.
Roth non dixo moito sobre o filme, nin sequera o seu título. “Non quero desvelar o título aínda, porque quero estar seguro del ao cen por cen, pero vai ser algo realmente divertido, cunha chea de destrución en masa“, dixo. “Quería facer algo nas liñas de Transformers ou Cloverfield pero con mais ciéncia-fiicción, e cunha chea de caos e destrución masiva“.
Roth admitiu unha cousa: terá un monstro. “Non quero dicir que monstro é ainda“, dixo. “Unha vez estea feito, deixarei que todo o mundo o saiba. Non son áliens nin robot nin un virus, é algo un pouco mais terreal. Pero cando a xente o escoite, vai ser algo coma ‘Vai ser unha loucura!’“.
Ainda non se sabe se este filme será a adaptación da novela de Stephen King Cell, á que Roth estivo vencellado hai tempo antes de que deixa-se os seus plans para facer Hostel: Part II.
Pushing Daisies: haberá cómic de continuación
Bryan Fuller está decidido a que a série Pushing Daisies non conclua após do seu periplo televisivo, onde foi cancelada antes de tempo. Por iso, puxo-se xa en contacto con debuxantes e guionistas e tamén con editoriais especializadas para lanzar, antes de que remate 2009, o cómic baseado na série.
O principal atranco agora mesmo é que é Warner Bros quen ten os dereitos da série e a Marvel quen quere publica-la. Tendo en conta que a Warner é proprietária da DC, a principal competidora da Marvel no mercado mundial do cómic, Fuller ainda ten que resolver ese problema.
Pese a todo, o creador de Pushing Daisies é optimista: “Estou a reunir á equipa de guionistas. Crearemos un arco argumental para uns cantos números e ademais trataremos de que sexa accesíbel para quen non estean familiarizados coa série e introduciremos antagonistas que non chegaron a entrar na emisión da ABC“.
Para ilustrar o guión, Fuller pensou en Tim Sale, afamado debuxante de cómics e responsábel das pinturas de Isaac na primeira temporada de Heroes: “É un bó tipo e teño moi boas relacións con el, así que desexo que poida traballar connosco. A sua maneira de debuxar é moi particular e ten un interesante ponto de vista, especialmente o que lle deu a O longo Halloween (a série de Batman na que Sai debuxou os guións de Jeph Loeb). Ese cómic foi unha mistura perfeita entre guionista e debuxante, encantaria-me facer algo asi“.
Fuller espera que a série poida comezar no seu novo formato no próximo outono.
Merlín renace
A Cartoon Network pretende traer a lenda do rei Artur ao século XXI cun novo filme de acción real que producirá o presidente da sección de cinema da Lionsgate Alli Shearmur.
Escrito por Travis Wright (Eagle Eye), o proxecto, que polo de agora leva o nome de Reborn (Renacido), está inspirado na lenda de Merlín, e segundo se comenta, será unha narración moderna da história do rei Artur, cosseus persoaxes arquetípicos trasladados ao presente.
A antiga produtora executiva da Paramount e mais da Universal Allie Shearmur desenvolveu a ideia xunto a Wright antes de que ela se unise á Lionsgate en agosto. Os dous serán agora produtores executivos desta longametraxe, que fará a canle televisiva Cartoon como parte do seu novo esforzo por pasar-se ao cinema con acción real.
Secuela de Sleep Dealer
Alex Rivera, o realizador que dirixiu e co-escribiu o guión do filme independente de ciéncia-ficción Sleep Dealer, confirmou nunha recente entrevista que xa ten ideias para unha secuela. Sleep Dealer narra un futuro no que a tecnoloxía permite aos traballadores pilotar avións de combate remotamente ou mesmo traballar na construción virtualmente grazas a nodos implantados nos seus corpos. O auga converteu-se nun ben escaso e as grandes empresas controlan os recursos.
Prémio Philip K. Dick 2009
Os gañadores da edición deste ano do prémio Philip K. Dick á millor novela de ciéncia-ficción aparecida orixinalmente en formato peto nos Estados Unidos foron Emissaries from Dead, de Adam-Troy Castro e Terminal Mind, de David Walton, empatados. O prémio Philip K. Dick concéde-se anualmente pola Sociedade de Ciéncia-Ficción de Philadelphia.
