Alien terá unha precuela
O pasado luns cumpríron-se 30 anos da estrea de Alien, de Ridley Scott, e onte o seu irmán, o tamén director Tony Scott, revelou que os estudios 20th Century Fox xa traballan nunha precuela deste clásico da ciéncia-ficción.
Os rumores desatados hai uns días por vários sítios da rede, onde se informaba da decisión do estudo e de que o filme sería dirixido polo descoñecido Carl Rinsch, foron confirmados onte por Scott durante a presentación perante a prensa do seu último traballo, The Taking of Pelham 123.
A experiéncia de Rinsch, que non debutou no mundo da longametraxe, limíta-se á gravación de anúncios e vídeos musicais.
“Si, Carl Rinsch vai-se encargar de dirixir a precuela de Alien. É ún dos directores dentro da nosa compañía“, afirmou aos xornalistas Tony Scott, en alusión á compañía Scott Free Productions, financiada pola Fox.
“Estou entusiasmado porque Ridley creou o orixinal e Carl Rinsch forma parte da família“, comentou Scott, director de fitas coma Top Gun ou Spy Game, quen apuntou que a produción do filme podería escomezar a finais de ano.
Descoñéce-se polo de agora se Sigourney Weaver, a protagonista da película orixinal de Ridley Scott, participará dalgún xeito na precula dunha saga que a lanzou á fama en 1979, ainda que obviamente a súa interpretación no papel orixinal semella pouco lóxico se a intención dos estudos é botar a visata ao pasado e indagar nas oríxenes do alieníxena.
Hai uns meses, a actriz manifestara os seus desexos de volver a dar vida á tenente Ripley, unha das grandes heroínas do cine: “Sinto que a saga ainda non rematou para min“, dixo. “Ripley está viva e a salvo, espero que non remate perdida no espazo para sempre“.
Tomb Raider unha prequela?
O produtor Dan Lin revelou á prensa que o previsto relanzamento da saga cinematográfica de Tomb Raider será, de feito, unha precuela. “É unha grande história sobre as orixes a que imos narrar”, dixo nunha entrevista. “Moi orientada aos persoaxes, eu diría, e mais realista cós anteriores filmes de Lara Croft“.
Lin engadiu que o casting para o papel ainda ten que escomezar, pero que os realizadores queren definitivamente a alguén mais nova que Angelina Jolie, a actriz que interpretou á famosa superheroína nas anteriores entregas da saga.
Doutor Who en preparación
A canle pública inglesa, a BBC, ven de anunciar que está a desenvolver unha longametraxe baseada no seu grande éxito internacional de ciéncia-ficción, a série de televisión Doutor Who.
Un voiceiro da BBC Films confirmou que “hai un guión en desenvolvemento“, mentres daba a coñecer o regreso de David Tennant (o antigo doutor Who) como convidado especial no papel de Señor do Tempo na série secuela de Doutor Who, The Sarah Jane Adventures.
Nombergantes, o correspondente de espectáculos da BBC, Lizo Mzimba, dixo que non había garantías de que o filme se chegase a rodar; se o proxecto entraba na fase deprodución, o seu lanzamento podería ter que agardar moito tempo. Tampouco está claro se Tennant ou outro actor interpretaría ao protagonista.
Mentres tanto, Tennant, de 38 anos, ten previsto aparecer noutros dous episódios da nova série de 12 entregas sobre Sarah Jane e que escomezará a se emitir en setembro en Inglaterra.
Russell T. Davies, produtor executivo de The Sarah Jane Adventures e de Doutor Who, dixo que sería unha aparición estelar e non un mero cameo.
Na série orixinal, Tennant foi sustituido por Matt Smith, de 26 anos, que é nestes intres o 11º actor que dá vida ao doutor Who na história do programa.
Terrorífico Van Damme
Todo semella indicar que o saco de músculos mais famoso de Bruxelas, que responde ao nome de Jean-Claude Van Damme, após de disfrutar dun relativo pero abraiante éxito polo seu filme autobiográfico JCVD, tentará un achegamento a un novo xénero cinematográfico que polo de agora non tentara: o terror.
“Este verán farei un novo filme cun director famoso, titulado Weapon. Após diso farei un filme de terror que se chamará The Breed. É unha grande história, un grande guión con auténtica emoción. Quero amosar-lle aos meus fans que podo transformar-me. Quería facer un filme de terror dende hai anos pero os guións eran frouxos e non tiña director“, revelou Van Damme. “Breed é diferente, está ambientado nunha vila onde acontecen cousas extrañas, xa sabedes, deixemos que o filme fale por si mesmo!“.
Filme de Buffy sen Buffy
Xa está en preparación unha nova reencarnación de Buffy Cazavampiros para a pantalla grande, pero olliño, porque esta nova versión non inclúe ao creador da série Joss Whedon, seica non terá conexión coa série da tele e por riba non sairán os seus principais persoaxes: Angel, Willow, Xander ou Spike.
A cuestión é que o filme, que será desenvolvido por Roy Lee e Doug Davison da Vertigo Entertainment e Fran Rubel Kuzui, a directora do filme orixinal de 1992 Buffy the Vampire Slayer, e mais o seu home Kaz Kuzui, será chamado remake ou relanzamento, pero nin secuela nin precuela.
E todo porque Kuzui e mais a súa empresa, a Kuzui Enterprises, teñen os dereitos sobre Buffy dende o comezo, cando ela descubriu o guión de Buffy que escribira o daquela descoñecido Whedon. Kuzui desenvolveu o guión mentres o seu home puxo os cartos para financiar o filme, que pasou en pena nen glória polas pantallas en 1992 baixo a distribución da Fox.
Kuzui mais tarde aliou-se con Gail Berman, daquela presidente da Sandollar Television, e trouxo de volta a Whedon para que fixera a série de televisión, que foi producida pola Fox e emitida pola canle da WB en 1997 (mais tarde mudou-se á UPN). Kuzui e Sandollar recebiron cretos como produtores executivos sobre Buffy e mais a súa secuela, Angel.
Polo de agora as partes mantiveron xuntanzas detraballo e están á procura duns estudos que fagan o proxecto. Os produtores non contan coa intervención de Whedon pero polo de agora tampouco se puxeron en contacto con el.
Volve o vóo do Navigante
A Disney ten pensado facer un remake do seu filme de 1986 de ciéncia-ficción Flight of the Navigator (O vóo do navigante), e paralelo xa conta con Brad Copeland para escribir o guión. O remake será producido polos parceiros da Mandeville David Hoberman e Todd Lieberman.
O filme orixinal narrabaa história dun rapaz de 12 anos que era abducido por unha nave espacial extra-terrestre en 1978 e que reaparecía oitos anos mais tarde, ainda coa mesma idade pero sen recordos do que lle aconteceu. Os científicos da NASA descubren unha conexión entre o rapaz e unha nave que se estrelara anteriormente e tentan explotar as novas habilidades do rapaz, que fuxe na astronave e tenta reunir-se coa súa família.
O filme recadara tan só 17 millóns de dólares nos despachos de billetes cando se estreou, pero posteriormente obtivo moito éxito grazas ao vídeo, chegando a se converter nun clásico do cinema dos 80.
Copeland é o autor do guión de Wild Hogs (Porcos Salvaxes) para a Disney e arestora está a escribir o libreto de Nightcrawlers para a Warners.
Un superheroe da Marvel debuxado por un galego
Cháma-se Demolition Man e tivo o seu intre de glória nos anos 80. Agora goza dunha nova oportunidade grazas ao debuxo dun galego: Xurxo García Penalta. O persoaxe da Marvel Comics é un atleta creado por Mike Carlin e Ron Wilson que conseguía a súa forza sobrehumana ao se administrar unha droga da que rematou por depender. “Esa é a tendéncia hoxe en día nos cómics, reinventar vellos heroes que caeron no esquecemento. De feito, estou a traballar noutra recuperación dun persoaxe dos anos noventa“, asegura Penalta, que se ocupou dos pincéis na reinvención deste superhome.
O cómic ven de sair á venda nos Estados Unidos nas páxinas da Assistant Sized Marvel Spectacular, unha série limitada de dous tomos na que os editores axudantes da Marvel dan renda solta á sua imaxinación e lanzan propostas que non serían admitidas nas coleccións habituais. Entre as histórias que compoñen este cómic está Slum City Warriors, debuxada por Penalta: “Foi ideia do editor Alejandro Arbona, ao que coñecín no pasado Salón do Cómic de Barcelona. Gustou-lle o meu traballo e rematou por me ofrecer recuperar a D-Man“, relembra o artista. Nesta historia amósa-se a un heroe vido a menos que ten a súa oportunidade de redenzón como soldado na guerra de Irak.
O cómic tivo boa aceptación en América: “É un bó intre para os superheroes, que recobraron popularidade grazas ás películas“, dixo Penalta.
Este é o primeiro traballo americano do debuxante galego, aindaque ten pendente de publicar outro cómic, Fear Agent, para a editorial Dark Horse. Mentras, continúa a traballar na série Ryokan, que se publica na revista galega Barsowia, e cuxo último número se presentará mañán antes de ir ao Salón de Barcelona.
Steven Spielberg nunha série de áliens
A TNT ven de ordear a produción dun episódio piloto para unha nova série ainda sen título pero que conta co apoio da DreamWorks TV e con produtores executivos da talla de Steven Spielberg, Justin Falvey, Darryl Frank e Robert Rodat.
A série estaría ambientada nun futuro próximo, tan só seis meses despois de que se produxera a invasión da Terra por uns seres alieníxenas. Rodat, o guionista de Salvar ao Soldado Ryan, está a escribir o guión do episódio piloto, baseado nunha ideia que el mesmo creou xunto a Spielberg.
Esta non é obviamente a primeira aproximación aos extra-terrestres de Spielberg, pero a última vez que o fixo na televisión foi na série de 2202 Taken, gañadora dun prémio Emmy.
Pola súa banda, a ABC tamén está a desenvolver unha série de invasión de extra-terrestres de seu, o remake do clásico dos anos 80 V.
UFO, da tele ao cinema
Robert Evans fará equipa coa ITV Global para producir unha longametraxe baseda na clásica série “camp” dos anos 70 da televisión inglesa UFO.
Evans será o produtor xunto a Avi Haas e Henri M. Kessler. Ryan Gaudet e Joseph Kanarek están a escribir o guión.
A série debutou en 1970 e durou tres temporadas, con persoaxes creados por Gerry Anderson. Estaba ambientada en 1980 e xiraba ao redor de Shado (Supreme Headquarters Alien Defense Organization), unha origanización militar secreta que loitaba contra unha raza alieníxena que levaba anos secuestrando e asasinando seres humanos, e logo usando os seus cadáveres.
O cuartel xeral da Shado se facía pasar por uns estudos de Hollywood, e o xefe dos estudos era en realidade do comandante da Shado. O filme estará agora ambientado no ano 2000.
Daemon ao cinema
Walter Parkes e David DiGilio adaptarán a novela tecno-thriller de Daniel Suarez Daemon á pantalla grande para os estudos Paramount Pictures.
Daemon vai sobre un mestre do deseño de videoxogos que antes de morrer crea un programa que loitará contra a humanidade. O libro apareceu nos andéis das librarías en xaneiro, pero o seu incríbel éxito fixo que xa se estea a falar dunha continuación.
A nova ten mais interese se cabe porque Parkes, un produtor de grande sona, non escribe un guión dende que en 1992 fixo Sneakers, e o outro único título de crédito onde aparece ademais é o clásico de culto de 1983 Xogos de Guerra.
Parkes e Laurie MacDonald serán os productores deste proxecto a través da súa empresa, unha filial da DreamWorks.
