Spielberg e Noah Wyle nunha de áliens

A antiga estrela da série de televisión Urxéncias, Noah Wyle, quen hai pouco se converteu nun heroe de acción grazas aos seus telefilmes da saga de Librarian (O Bibliotecário, en España), será o protagonista dunha nova película deseñada para a pequena pantalla, nesta ocasión para a canle TNT, e que irá sobre unha invasión álien. O telefilme será un episódio piloto para unha posíbel nova série e marcará a súa reunión co produtor e director Steven Spielberg.

“É un priviléxio poder escomezar unha segunda série con Noah“, dixo Spielberg, cuxa compañía estivo xa atrás de Urxéncias. “A primeira vez non foi de todo mal“.

O proxecto, escrito por Robert Rodat a partir dunha ideia que el mesmo concebiu xunto a Spielberg, está ambientado xusto despois de que os áliens aliminaran a case toda a povoación da Terra. Wyle interpretará ao líder dun grupo de soldados e civís famentos que loitan contra as forzas de ocupación alieníxenas.

Wyle xa protagonizou catro filmes anteriormente para esta mesma canle: as da saga de Librarian, que xa levan tres entregas, e a mítica Piratas de Silicon Valley, na que interpretou a Steve Jobs.

“Non podería sentir-me mais na casa“, dixo Wyle.

Adéus ao Rei do Pop

Michael Jackson, o lendário rei do pop, finou aos 50 anos de idade o pasado xoves á noite por mor dun ataque ao corazón, se ben se continúan a investigar as verdadeiras causas da súa morte, que puido ser orixinada por unha sobredose dalgún fármaco non totalmente legal.

O seu álbum de 1982 Thriller non só se converteu no álbum mais vendido de todos os tempos, producindo sete números ún entre os seus éxitos e vendendo mais de 50 millóns de cópias, senón que foi acompañado por un vídeo musical de 14 minutos de duración e que sentou todo un precedente na indústria da música.

Mais un curto de terror ca un vídeo musical, foi dirixido por John Landis, e nel aparecía Jackson no papel dun rapaz que se converte nun lobishome e logo nun zombi seguido por unha lexión de monstros. Foi o vídeo musical mais caro do seu tempo e a coreografía utilizada nel converteu-se nun clásico.

A carreira musical de Jackson abranguiu 45 anos: escomenzou en 1964 cando el á penas contaba con 5 anos de idade e cantaba e bailaba xunto aos seus irmáns no grupo Jackson 5 que facía música na Motown Records.

No mundo do cinema Michael Jackson aventurou-se por primeira vezn en 1978 cando interpretou ao espantallo no filme The Wiz, outra versión musical de O Meigo de Oz xunto a unha Diana Ross que fixo de Dorothy e a Richard Pryor coma o Meigo. Foi daquela cando coñeceu a Quincy Jones, o produtor responsábel da banda sonora do filme. Baixo a súa guía, Jackson lanzou o seu primeiro álbum en solitário, Off the Wall, que foi un éxito mundial. Nombergantes, non sería até o seu seguinte álbum, Thriller, cando se lle comezou a chamar con toda xustiza o Rei do Pop.

En 1983 Jackson inventou o seu paso de baile mais famoso, o “Moonwalk”, e ao ano seguinte deixou abraiados a todos ao levar para casa oito Grammys dunha tacada. En 1985 produciu xunto a Lionel Ritchie a canzón We are the World, grazas á cal axuntou a 45 estrelas da música para axudar a reducir a fame en África.

Após diso experimentou co cinema unha vez mais, protagonizando o filme en 3D Captain EO, dirixido por Francis Ford Coppola e producido por George Lucas. Ainda que nunca foi distribuido oficialmente, foi visionado moitasveces como atracción especial nos parques temáticos da Disney en todo o mundo. Nel, Jackson interpreta ao Capitán EO, o comandante dunha nave espacial que visita un planeta governado por unha tiránica líder a quen deu vida Anjelica Huston. O Capitán EO e mais a súa tripulación enviaban unha mensaxe de amor e felicidade ao mundo a través da música e o baile.

Os anos 80 remataron para Jackson co seu álbum Bad, que foi un éxito novamente e xenerou unha série de concertos por todo o mundo que ainda seguen a ser récord mundial de recadación, con 124 millóns de dólares só entre setembro de 1987 e decembro de 1988. Neste mesmo ano Michael Jackson: Moonwalker foi o seu segundo intento de se lanzar como actor no cinema, nun filme dirixido por Jerry Kramer e Colin Chilvers, e protagonizado por Joe Pesci, Sean Lennon, Kellie Parker e Brandon Adams. Moonwalker é unha estraña fantasía musical que reatrata a Jackson coma unha espécie de superheroe do pop. A finais dos 80, xa fora aclamado oficialmente coma Artista da Década.

En 1997, Michael lanzou o álbum remix Blood on the Dance Floor, que foi acompañado por unha curtometraxe de38 minutos titulada Ghosts, e na que Michael interpretou un total de cinco papeis. Ghosts estaba baseada nun conto escrito por Jackson e Stephen King e foi dirixida polo gañador dun Oscar Stan Winston.

Jackson regresou ao cinema en 2003 con Men in Black II, na que tivo un pequeno cameo no papel do persoaxe Axente M. Os derradeiros anos da súa vida transcurriron entre fallos de saúde e problemas legais que o levaron aos tribunais, todo baixo a presión dos médios de comunicación e o vixiante escrutínio de todo o mundo.

Calquera que sexa a opinión sobre o home, a figura de Michael Jackson na história da música é xigantesca. A súa pegada no alma da música moderna é imborrábel, a súa paixón por sempre ir un pouco máis aló no terreo artístico, técnico, profesional… inspirou a toda unha xeración de artistas e axudou a rachar as barreiras da creatividade e da experimentación musical, revolucionando o mundo.

Foi descrito coma o “embaixador da música”, axudando a eliminar barreiras entre xéneros, dende o rap até o country, do heavy metal ao Rhythm & Blues. A súa figura sen dúbida ficará nas nosas memórias coma a dunha auténtica lenda, e será sempre relembrado por todos os tempos coma o Rei do Pop.

A ditadura de Irán usa O Señor dos Anéis contra o seu povo

Mentres as manifestacións continúan a se suceder nas rúas de Teherán por mor das protestas contra as eleccións fraudulentas, o governo da ditadura teocrática de Irán está a recurrir a todos os médios ao seu dispór para evitar que triunfe a liberdade. Así, ademais da habitual propaganda antiamericana que está a lle botar as culpas aos misteriosos axentes secretos da CIA que seica controlan o mundo xunto aos Homes de Negro, estes días están a botar pola tele a saga do Señor dos Anéis para evitar que a xente saia ás rúas a protestar e fique na casa mirando a tele.

Ainda que os médios de comunicación estranxeiros foron expulsados do país, que fica arestora baixo unha férrea lei do silenzo de portas afóra, soubo-se que a televisión iraniana, que habitualmente nunca emite cinema nin séries de televisión que non sexan feitas por allatolás ou que non entren dentro da mais estrita lei islámica, estáa emitir estes días os tres filmes seguidos da saga de Peter Jackson do Señor dos Anéis como parte dos esforzos do governo para evitar liortas nas rúas.

Nombergantes, hai quen está a facer comparacións pouco agradábeis para os ditadores iranianos, xa que o comportamento heroico dos hobbits contra un poder moi superior é tomado como sinal de que a loita debe continuar.

Morreu Farrah Fawcett

A actriz Farrah Fawcett finou o xoves á idade de 62 anos após dunha longa batalla de tres anos contra un cancro. Para os fans desaparece unha actriz que foi un sex-symbol mundial, e que deixa após de si unha considerábel obra tanto no cinema coma na televisión.

Os seus papeis mais famosos inclúen éxitos dos anos 70 na televisión coma as séries Os Anxos de Charlie e O Home de Seis Millóns de Dólares, onde facía papéis de guapa loira que loitaba contra o crime. Xunto a outras estrelas da época coma Kate Jackson e Jaclyn Smith, Fawcett converteu-se nunha estrela mundial grazas ás súas curvas, aos seus peiteados e ao seu carisma, que foi imitado por millóns de mulleres no mundo.

Como actriz de xénero, Fawcett interveu en várias producións que xa son iconas da fantasía e a ciéncia-ficción. En 1976, o mesmo ano que debutou coma Anxo de Charlie, apareceu en A Fuga de Logan, a película psicodélica dirixida por Michael Anderson. Ainda que non tiña un papel moi salientábel, contribiui en grande medida a que o filme fose un éxito mundial, recadando 25 millóns de dólares da época.

Un papel no xénero da CF que foi mais importante foi no filme de 1980 de Stanley Donen Saturno 3, onde compartiu protagonismo con Kirk Douglas. Ainda que a película tivo moitos problemas de produción e distribución, que non axudaron a que tivese un grande nivel artístico, converteu-se nun éxito grazas aos escasos segundos nos que puidemos disfrutar da visión da actriz espida por primeira vez na pantalla.

A súa carreira pasou por altibaixos dende aquela, até que aos 48 anos apareceu espida novamente na revista Playboy, o que lle deu unha nova oportunidade. En 2006 foi diagnosticada cun cancro e escomezou o tratamento, pero sen resultados positivos. O cancro converteuse en metástase no fígado e Fawcett finou sen que puidera chegar a celebrar a voda que tiña prevista co seu compañeiro de case toda a vida, Ryan O’Neal.

Drake’s Fortune á pantalla grande

A Columbia desenvolverá o videoxogo de acción e aventuras Drake’s Fortune para converte-lo nunha longametraxe, para o que ven de contratar a Kyle Ward para que escriba o guión da adaptación, que será producida por Avi Arad, Charles Roven e Alex Gartner.

A história vai sobre un descendente do pirata inglés Sir Francis Drake, un cazador de tesouros chamado Nate Drake que coida que sabe onde se atopa Eldorado, a fabulosa cidade feita de ouro das lendas dos índios sudamericanos, grazas a unha estatuíña de ouro maldita. A procura convérte-se nunha competición cando un cazatesouros rival úne-se á rifa, que sube uns cantos puntos a tensión cando teñen que loitar contra malvadas criaturas mutantes descendentes dos malvados españois e dos non menos malvados nazis e que atacan aos protagonistas para evitar que descubran os segredos da mítica cidade.

O xogo, orixinal da Sony Computer Entertainment, vendeu un millón de cópias tan só nas súas primeiras dez semanas nas tendas cando foi lanzado a finais de 2007.

Dez millor ca cinco

A Académia de Cinema de Hollywood ven de anunciar que por primeira vez en mais de 65 anos, e para a vindeira entrega de prémios, que será a 82ª, os nominados na categoría de millor película pasarán a ser dez no canto dos cinco que son actualmente.

O curioso é que o presidente da Académia, Sid Ganis, dixo mentres anunciaba a nova que “ter dez nominados á millor película vai permitir aosmembros da Académia recoñecer e incluir algúns dos filmes fantásticos que decote aparecen noutras categorías do Oscar pero que son eliminados da carreira polo primeiro prémio“. Toda unha declaración de intencións con respeito ao cinema que mais se roda, que mais se ve e que mais cartos, con enorme diferéncia, dá en Hollywood.

Esta ampliación chega despois das moitas queixas que se escoitaron o ano pasado, cando entre os cinco finalistas ao millor filme do ano non se puido incluir a O Cabaleiro Escuro, mália ser o que mais recadou e un dosde maior calidade presentados en 2007. E o mesmo se pode dicir con respeito a moitos outros filmes fantásticos que rematan por desaparecer dos postos de honra.

As regras deste ano poderían favorecer a filmes que se levan todo no despacho de billetes, coma Star Trek, que doutro xeito non serían nin tan sequera considerados polos estritos votantes da Académia.

Reparto dos prémios Saturno

O Cabaleiro Escuro (si, ese filme rodado hai dous anos) ainda segue dando que falar a quen quere aparecer nos médios de comunicación por lle conceder algún novo prémio ao seu defunto actor secundário Heath Ledger.

E nesta ocasión foron os escuros prémios Saturno, que concede a Académia de Cinema Fantástico e de Terror, na súa 35ª edición. O Cabaleiro Escuro levou cinco prémios, ao millor filme de acción, aventura ou thriller, ao millor guión, o xa mencionado a Ledger, e millor música e aos millores efectos especiais.

O curioso caso de Benjamin Button e Iron Man, con tres estatuíñas cadanseu, levaron os prémios ao millor filme fantástico, millor actriz secundária e millor maquillaxe. Iron Man gañou nas categorías de millor filme de ciéncia-ficción, millor actor e millor director.

Outros gañadores foron Hellboy II ao millor filme de terror, Angelina Jolie como millor actriz, Jaden Christopher Smith como millor actor novo, Indiana Jones e o Reino da Caveira de Cristal ao millor vestiário, Let the Right One In ao millor filme estranxeiro (non americano, se entende) e WALL-E ao millor filme de debuxos animados.

Na categoría de televisión, Battlestar Galactica levou tres prémios e Dexter outros dous.

Tamén houbo reparto en categorías de lanzamento en DVD e vários persoeiros levaron mais estatuíñas para impresionar aos fotógrafos da prensa: Jeffrey Katzenberg recebiu o prémio “Visionário” polos seus esforzos en prol do cinema en 3D e o clásico Leonard Nimoy recebiu outro por interpretar a Mr. Spock en Star Trek. O actor Lance Henriksen levou o derradeiro da noite polos méritos da súa carreira.

Un trasno de efectos especiais

O especialista en efectos especiais Charles Gibson fará o seu debut como director dunha longametraxe grazas a un guión para unha comédia de Geoff Rodkey titulado The Goblin.

Matt Berenson será o produtor xunto ao presidente da Wind Dancer Film, Matt Williams, e mais Judd Payne. os produtores executivos serán David McFadzean e Dete Meserve, da Wind Dancer.

A história vai sobre unha família das afóras dunha grande cidade que se muda á súa nova casa e alí atopan a un “goblin”, un trasno fervello e rebuldeiro que non lles permite ficar alí.

“O de crear a un goblin é algo que atraerá a espectadores de todas as idades“, dixo un moi optimista Williams.

Gibson foi o gañador do Oscar aos millores efectos especiais por Babe o porquiño valente e por Piratas do Caribe O Cofre do Home Morto. Ademáis, participou nos efectos especiais e dirixiu a segunda unidade en todos os filmes da franquía dos Piratas do Caribe e en Terminator Salvation.

Adiante Mutantes!

A Universal Pictures ven de adquirir os dereitos para a pantalla grande da novela de Larry Doyle Go Mutants! O filme contará coa produción do xefe da Imagine Entertainment, Brian Grazer, e o mesmo Doyle escribirá o guión.

Go Mutants! é unha comédia de aventuras con adolescentes ambientada nun coléxio onde todas as tropas invasoras das películas clásicas de ciéncia-ficción dos anos 50 fan-se realidade. Anos despois, os fillos desas creaturas mutantes están misturados co resto dos habitantes da vila.

Doyle dixo que o libro e mais o filme fan moi posíbel os cameos das creaturas mais salientábeis dos vellos filmes de ciéncia-ficción dos anos 50, coma Gort (o robot de Ultimato á Terra) ou a creatura da lagoa negra, metade peixe metade humán.

Os estudos e mais a Imagine mercaron o libro cando ainda está por rematar, pero Doyle prometeu finalizar a súa novela este verán e poñer-se a traballar no guión, todo ao mesmo tempo. O libro non aparecerá nos andéis das librarías até o verán que ven.

William Horberg e David Bernardi da Imagine serán os produtores executivos.

Non é a primeira vez que Doyle presenta unha novela aos estudos de cinema, xa que moi recentemente adaptou a súa I Love You, Beth Cooper para que a dirixise Chris Columbus na produción da Fox que se estrea o vindeiro 10 de xullo.

Jessica Alba e a Bande Dessinée

A actriz Jessica Alba volverá rodar baixo as ordes do realizador que xa a dirixira en Sin City, o texano Robert Rodriguez, na vindeira Insiders, que será unha adaptación dun popular cómic francés de espías orixinal do debuxante Jean-Claude Bartoll.

A saga, moi coñecida en Franza, onde vendeu decenas de miles de cópias, leva xa sete volumes e se agarda a aparición dun oitavo para o mes de outubro. A história vai sobre Najah Cruz, unha colombiana que traballa para a Casa Branca e que debe infiltrar-se e axudar a destruir unha organización criminal internacional composta por políticos e homes de negócios. A acción percorre diversos países, incluindo Chechénia, Afganistán, Rúsia e China. O que non está claro é que partes destas novelas gráficas serán as que sexan transferidas á pantalla grande.

Jessica Alba non é nova no de interpretar adaptacións de persoaxes do cómic, xa que fixo de Susan Storm (a Rapaza Invisíbel) nos filmes dos Catro Fantásticos e tamén da exótica bailarina Nancy Callahan en Sin City. Ademais, interpretou á supersoldado Max Guevara na série de televisión de James Cameron Dark Angel.

Polo de agora non se coñecen mais detalles sobre este filme, nin datas de escomezo nin mais actores para o reparto.

Nombergantes, Rodriguez ten moito choio por diante, xa que entre os seus vindeiros proxectos están Os Supersónicos, Red Sonja e Sin City 2.

Páxina seguinte »