Unha família de superheroes en A3
Antena 3 prepara xunto a Ida y Vuelta (Física o química) Una Familia Normal, un novo proxecto de ficción de cara ao vindeiro ano. Tráta-se dunha série en prime time apta para todos os públicos centrada nos poderes dunha singular família. Con este proxecto a canle de Planeta adéntra-se no mundo do sobrenatural.
Mália a súa apariéncia de família corrente, algúns dos seus membros contan cunhas habilidades moi concretas que lles convirten en seres especiais, ao máis puro xeito dos superheroes.
Poderes sobrenaturais que agocharán fronte aos demáis, pero que non dubidarán en empregar sempre que xurda a ocasión. A capacidade de mover obxectos (telequinese) ou de lér a mente doutras persoas serán algunhas das habilidades que caracterizarán aos protagonistas desta ficción.
A família intentará por todos os médios preservar o seu grande segredo, porén, non tardarán en se decataren de que non só eles teñen esas habilidades especiais.
O cásting para esta nova serie corre a cargo de Carmen Utrilla, responsábel do cásting de películas coma Princesas, O Pau ou a galardonada con vários Goyas A hora dos valentes.
O novo proxecto de Antena 3 tocará diversos xéneros, dende a comédia até o drama, nembargantes, caracterizará-se sobre todo polas súas doses de suspense e ciéncia-ficción. Nestes intres a série atópa-se n pleo desenvolvemento, polo que ainda non está definido o eixo central da mesma.
Pola sua temática, a ideia lembra a outras produción estranxeiras coma por exemplo Heroes ou Sobrenatural.
Robert Schwentke dirixirá Red
O director do filme A Muller do Viaxeiro no Tempo (The Time Traveler’s Wife), Robert Schwentke, está en conversas para se ocupar do thriller da Summit Entertainment Red.
Protagonizado por Bruce Willis e Morgan Freeman, Red conta cun guión de Erich e Jon Hoeber e está baseado no persoaxe da WildStorm, unha editorial filial da DC Comics.
O filme de espías vai sobre un antigo axente de operacións especiais forzado a se retirar cando un asasino de alta tecnoloxía o ameaza a el e mais á súa moza.
Lorenzo di Bonaventura e Mark Vahradian estarán na produción.
Schwentke dirixiu Flightplan e The Family Jewels e estivo a desenvolver o drama baseado no caso da Enron Conspiracy of Fools. O seu filme Time Traveler’s Wife estreará-se este 14 de agosto.
Dallas Howard será a nova Victoria
A Summit Entertainment ven de anunciar que a protagonista de Terminator Salvation Bryce Dallas Howard será a nova vampira Victoria na vindeira entrega da saga de Twilight, Eclipse, sustituindo a Rachel Lefevre, quen interpretou o papel na primeira película e mais a na súa secuela, New Moon.
A sustitución produciu-se oficialmente e segundo din por mor dun problema coas axendas das actrices.
Eclipse escomezará a se filmar en Vancouver, Canadá, a partir de agosto. A nova entrega está baseada, coma as anteriores, nos libros de Stephenie Meyer e será dirixida por David Slade a partir dun guión escrito por Melissa Rosenberg. A data de estrea está fixada para o 30 de xuño de 2010.
En Eclipse, Bella estará de novo en perigo, rodeada por unha banda de misteriosos asasinos e ademais un vampiro malvado continúa aá súa procura para se vingar. No médio de todo, deberá escoller entre o seu amor por Edward e a súa amizade con Jacob, sabendo que a súa decisión ten o poder de reavivar os ódios ancestrais entre vampiros e lobishomes.
Os Lórax para o cinema
A Universal Pictures e mais a Illumination Entertainment unirán as súas forzas para converter o libro do Dr. Seuss The Lorax nun filme de debuxos animados xerados por computador e en tres dimensións.
The Lorax contará con tres directores: Chris Renaud, Cinco Paul e Ken Daurio, e con Paul e Daurio escribindo o guión.
Ainda que foi publicado en 1971, The Lorax conta cunha temática bastante “verde”. Está narrado por un avaricioso empresário que, mália os moitos avisos que lles fan os lorax, uns seres amantes das árbores, destrúe un bosque para facer prendas de vestir coas árbores.
Os resultados serán catastróficos, xa que todos os animais deben marchar e nada vivo fica no lugar.
The Lorax é un libro que levantou moita polémica dende a súa orixe. En 1988, un pequeno coléxio en California decidiu manter o libro como leitura para os seus alumnos mália as ameazas dunha emmpresa madereira que dicía que o libro era inxusto coa indústria. Moitos membros da indústria madereira aliáron-se para escribir outro libro chamado The Truax e no que ofrecían o seu punto de vista oposto ao ecoloxismo.
O filme está previsto para se estrear o 2 de marzo de 2012, unha data sería xusto o aniversário de Theodor Geisel (o verdadeiro nome do doutor Seuss), quen finou en 1991.
Regreso ao mundo de NIMH
A Paramount Pictures está a desenvolver unha nova longametraxe que tentará adaptar o clásico infantil de Robert C. O’Brien Mrs. Frisby and the Rats of NIMH.
A história céntra-se nun rato (a señora Frisby, que foi renomeada coma Sra. Brisby no filme da MGM) que debe enfrontar-se a unha crise cando o seu fillo caia enfermo e ela e mais a súa família deban mudar-se para fuxir do arado dun granxeiro.
A Sra. Frisby enróla-se nun grupo de antigas ratas de laboratório, onde axiña se decatará de que forman unha sociedade altamente evoluída, que posúe tecnoloxía avanzada e que dividen o seu traballo ao xeito que o fan os seres humanos.
A MGM desenvolvera a propiedade xa en 1982 en forma de debuxos animados no filme The Secret of NIMH. Nesta ocasión, ainda que non está decidido, todo semella indicar que este filme combinará os debuxos animados con persoaxes reais, coma no caso de Alvin e os Esquíos ou Garfield.
O director Neil Burger (O Ilusionista) está en conversas para escribir o guión. Cary Granat será o produtor.
A Sony e mais os videoxogos
Continuando coa recente maré de adaptacións de videoxogos ao cinema, a Sony Pictures ven de mercar os dereitos para trasladar o electrizante xogo de Sucker Punch para a PlayStation 3 inFamous á pantalla grande.
Ainda que os detalles están ainda baixo sete chaves, Sheldon Turner (X-Men Origins: Magneto, Texas Chainsaw Massacre: The Beginning) está a traballar nun guión, mentres que os gurús dos xogos pasados ao cinema Avi e Ari Arad (Uncharted, Mass Effect, Lost Planet) serán os produtores.
“O xogo, ainda que é grande e divertido, é no seu corazón unha balada de amor dirixida ás persoas que teñen un grande potencial pero que non-o desenvolven, coma o noso heroe, Cole McGrath“, segundo Turner. “O que mais me emociona sobre o xogo é que foi o primeiro para o que tiven unha grande ideia e un persoaxe“.
Comeza a se rodar a terceira Nárnia
The Chronicles of Narnia: The Voyage of the Dawn Treader, a terceira entrega da saga épica das Crónicas de Nárnia baseadas nos populares libros do escritor cristiano C.S. Lewis, comezou a súa fotografía principal en Queensland, Austrália, este luns día 27. A produción, que será realizada conxuntamente entre a Twentieth Century Fox Film Corporation e mais a Walden Media, é a continuación da franquía que comezou en 2005 con As Crónicas de Nárnia: O León, a bruxa e o armário e a súa continuación de 2008 O Príncipe Caspian, que levan recadados conxuntamente 1.200 millóns de dólares en todo o mundo.
Nesta ocasión, Edmund e Lucy Pevensie, xunto co seu curmán Eustace Scrubb serán tragados por un cadro que representa unha fantástica nave de Nárnia, que se dirixe cara á fin do mundo. No barco deberán unir as súas forzas co príncipe Caspian e mais o guerreiro rato Reepicheep e compartir aventuras nunha misteriosa misión nas Illas Solitárias e mais aló.
O veterán realizador Michael Apted (O Mundo non é Abondo) será o director desta nova entrega, que de novo estará´interpretada polos nenos Georgie Henley e Skandar Keynes. Ben Barnes (Dorian Gray) repite o papel de príncipe Caspian, mentres que o curmán Eustace será o actor inglés Will Poulter.
Publicadas entre 1950 e 1956, as obras de Lewis venderon mais de 100 millóns de cópias en todo o mundo e foron traducidas a 50 idiomas. Lewis, un contemporáneo e amigo persoal de J.R.R. Tolkien, foi un escritor cristián que tentou difundir as súas ideias relixiosas a través do mundo fantástico de Nárnia.
A rodaxe rematará en novembro deste ano, e a postprodución durará un ano mais. A estrea está prevista para decembro de 2010.
Katie Holmes nun coche en lapas
A esposa de Tom Cruise, a tamén actriz Katie Holmes sufriu un incidente cando se atopaba rodando unha escena da sua nova película, o filme de terror Don’t be afraid of the dark. A actriz estaba dentro dun vehículo cando a batería comezou a despedir muxicas e fume, e xusto despois de que Holmes saíra do coche, éste comezou a arder. Holmes púxo-se moi nervosa e tomou-se o resto do día libre, mentres os técnicos de efectos especiais intentaban averigüar o que acontecera.
O rei da Illa da Caveira
A Spirit Pictures ven de se facer cos dereitos sobre o libro Kong: King of Skull Island, unha precuela da história do famoso gorila xigante, e ten pensado leva-la ao cinema nunha longametraxe de grande orzamento.
Escrita por Joe DeVito e Brad Strickland, a história céntra-se na lenda de Skull Island e cómo o símio xigante chegou a se converter no rei da illa. Ademais presenta a outros gorilas xigantes e mais a dinosáuros que se mencionaban tan só de pasada nos filmes anteriores.
A família do director do filme orixinal de 1933, Merian C. Cooper, que ten os dereitos sobre a propiedade de King Kong, vendeu os dereitos á Spirit, que segundo dixo, está “moi preocupada por honrar o legado de Merian C. Cooper en Hollywood“.
Utilizando a tecnoloxía de captura de movementos (motion-capture) usada en filmes coma The Polar Express e Beowulf, a Spirit pretende producir ela mesma os efectos xerados por computador.
Arnold Kunert e Steve Iles serán os produtores e Andy Briggs ocupará-se do guión.
Jackson fala do Hobbit e Tintín
Nunha conferéncia de prensa celebrada no decurso da Comic-Con en San Diego, o director Peter Jackson foi bombardeado con preguntas sobre O Hobbit e os progresos que está a facer coa adaptación ao cinema do libro de Tolkien.
A resposta que deu é que ainda quedan tres semanas para entregar o guión. Unha vez que estea, presupostarán o primeiro filme e usarán o guión como base para facer o orzamento do segundo. O traballo no segundo guión escomezará despóis. Ademais afirmou que mália todos os rumores que circulan pola rede, é falso que o actor David Tennant (o antigo Doutor Who) estea contratado para algún papel.
O xoves á noite durante unha festa privada con membros da prensa, Jackson foi preguntado sobre cal sería o segundo libro de Tintín que daría o chimpo á pantalla grande. O director respondeu que ainda non se decidiu pero que el prefire As sete bólas de cristal (que ten como continuación O Templo do Sol). A elección semella ter moito sentido, xa que este álbum é outra das aventuras dobres (é dicir, que teñen continuación noutro volume) de Hergé, e para a primeira película xa se elixiu O segredo do Alicornio / O tesouro de Rackham o Vermello.
A história vai sobre os arqueólogos da expedición Sanders-Hardmuth, que regresan a Europa tras dous anos en Perú e Bolívia, onde acharon o sepulcro do rei inca Rascar Capac. Non tardarán en comezar a padecer unha estraña enfermidade que lles mergulla nun profundo letargo, espertando todos á mesma hora do día, tremendamente sobresaltados, coma se os torturaran para volver caer no seu soño. Todo apunta a que se trate do castigo profetizado na propia tumba de Rascar Capac. Xunto a todos os enfermos atópanse os restos dunhas bochas esféricas de cristal con algún veleno no seu interior.
Jackson engadiu que lle gustaría facer tamén Obxectivo: a Lúa / Explorando a Lúa, pero que probábelmente esa aventura fique para unha terceira película.
