King regresa con Haven
Stephen King ven de asinar o contrato polo que cede os dereitos cinematográficos sobre a súa novela The Colorado Kid para que sexa adaptada á televisión en forma dunha série con episódios de unha hora de duración e que serían producidos polos estudos independentes E1 Entertainment baixo o título de Haven.
O proxecto céntra-se nunha arrepiante vila de Maine onde viven exiladas persoas que sofriron un meigallo. Cando a malldición regresa, o axente do FBI Audrey Parker chega para investigar e manter a raia ás forzas sobrenaturais, mentres tenta resolver os mistérios dos habitantes de Haven.
O actor Scott Shepherd será o protagonista e produtor executivo, xunto con Lloyd Segan e Shawn Piller. Os tres xa exerceran a mesma laboura na série da USA Network The Dead Zone.
Outros dous antigos participantes daquela série, Sam Ernst e Jim Dunn, están a escribir o guión para o episódio piloto e ademáis serán produtores executivos eles tamén.
Problemas graves na MGM?
O bombazo desta semana estivo protagonizado por un rumor aparecido en vários médios de comunicación e segundo o cal a MGM Pictures está por crebar.
Segundo fontes internas, os estudos do león precisarían 20 millóns de dólares de contado para facer fronte a diversos pagos inminentes, e outros 150 millóns para poder rematar o ano e poder continuar producindo os proxectos pendentes. Durante a fin de semana houbo contactos con todos os accionistas en conversas que duraron segundo din várias fontes entre dúas e seis horas, coa intención de obter financiamento e de adiar algúns pagos, pero seica non se resolveu grande cousa. A compañía aínda ten débedas por un total de 3.700 millóns de dólares e os acreedores queren obter a creba xudicial como última opción de poder cobrar parte das inversións que fixeron no seu día.
Como é lóxico, de ir adiante acreba, iso sinificaría o final de dous salientábeis proxectos que están a se realizar nestes intres: O Hobbit de Peter Jackson e mais a seguinte entrega de James Bond, que após de dúas películas rodadas pola Sony regresa á Metro. Nombergantes, en ambos os dous casos nin a Warner Bros. nin a Eon Productions teñen intención de que lles afecte unha posíbel bancarrota da MGM xa que os filmes teñen evidentes esperanzas de seren senllos éxitos no despacho de billetes e de que a inversión sexa mais ca recuperada.
Harris á precuela dos zombis
Danielle Harris (Urban Legend, Halloween 4, Halloween 5) ven de se unir ao reparto do filme Night of the Living Dead: Origins, que se rodará en 3D e con gráficos xerados por computador.
Zebediah de Soto e David R. Schwartz co-escribiron o guión que seica é unha história sobre as orixes dos zombis creados por George A. Romero, ainda que sen a participación do famoso director. O obxectivo é poñer ao día a história dos persoaxes que aparecían no filme orixinal narrando o transfondo de cada ún deles.
De Soto será o director mentres que Simon West e Jib Polhemus serán os produtores.
Unha visita ao Área 51
O guionista e director de Paranormal Activity Oren Peli ven de ficar vencellado a un proxecto semellante pero cun tón máis de ciéncia-ficción chamado Area 51.
A história vai sobre unha fita de vídeo atopada por un grupo que está a tentar localizar e entrar na lendária base militar secreta onde din que se estrelou un ovni nos anos 50.
A pre-produción para este filme xa escomezou en Utah.
Campbell e Craven volven a Scream
A actriz Neve Campbell ven de asinar para regresar ao seu papel de Sidney Prescott na saga de Scream, que Wes Craven podería volver a dirixir se acepta os termos do contrato proposto pola Dimension Films.
Coa produción da The Weinstein Company no aire, o xefe da Dimension Bob Weinstein ten intención de xogar sobre seguro e traer á nova entrega a faces coñecidas para este novo episódio dunha franquía que está a dar moito de si e que normalmente debería contar cunha boa lexión de seguidores disposta a ir a ver o filme ao cinema.
Ainda que se falou de que tamén poderían regresar antigos protagonistas coma Courteney Cox e David Arquette, a cuarta parte de Scream pretendía nun princípio dar-lle un toque diferente á saga sen a participación de Campbell ou Craven. Pero estas novas confirman que, dado que o filme ten previsto escomezar a súa rodaxe en abril ou maio, o obxectivo será moito mais cobizoso e que o proxecto pasa a ser de envergadura.
Por outra banda, a Dimension e mais a Disney tamén están a desenvolver unha cuarta entrega da súa saga de Spy Kids, outra vez en 3D, que Robert Rodriguez está a escribir e que escomezará a se rodar en marzo. Entre os plans dos estudos figuran asemade fixar unha data para as estreas de Halloween 3D, os remakes en 3D de Hellraiser e Scanners, e os remakes de Os Nenos do Millo, Curtacircuito e Un lobishome americano en Londres.
Mal Chance
A Platinum Studios unirá-se xunto ao produtor Tony Krantz para adaptar nun filme con acción real a novela gráfica española Mal Chance, cun guión de Scott Murphy. A história vai sobre Lola, que forma parte dun antigo clan de asasinos até que o seu xefe mafioso márca-a como obxectivo. Lola verá como a sua única esperanza de sobrevivir pasa por desmantelar a organización á que pertencía, e para elo aliará-se cun xoven axente do FBI a quen lle agocha o seu pasado como asasina.
Raimi e o Yeti
Sam Raimi, mestre do xénero de terror e director da triloxía de Spiderman, será o produtor do filme de terror sobrenatural Refuge que está en preparación na Mandate Pictures.
A história ten lugar nunha remota vila que é aterrorizada por un Yeti, a criatura mitolóxica nativa das montañas do Himaláia.
Tom De Ville escribiu o guión e o director inglés Corin Hardy sería o encargado da realización, mentres que Jason Blum, Nathan Kahane e mais Steven Schneider serán os co-produtores.
Mentres tanto, a empresa de Blum, a Blumhouse Productions, financiará unha curta co mesmo argumento da longametraxe, na que Hardy e De Ville traballarán asemade. A ideia é ofrecer un tráiler que poda axudar a Hardy a refinar a súa visión mesmo ainda que o guión no estea rematado polo de agora.
He-Man non quere morrer
A Sony Pictures está a rematar un acordo coa empresa de xoguetes Mattel para devolver a He-Man e os Masters do Universo á pantalla grande.
O filme, baseado no popular boneco de acción e na súa história de trasfondo (o príncipe que se convirte en He-Man, o loitador contra o malvado Skeletor), contaba até hai pouco co apoio do produtor Joel Silver e cun guión de Justin Marks escrito para a Warner Bros., pero a Mattel, após de que pasasen anos sen se desenvolver o proxecto, logrou que os dereitos cinematográficos lle fosen devoltos, e agora pretende contar coa Sony para face-lo..
Todd Black, Jason Blumenthal e Steve Tisch serían os produtores deste filme que terá un novo comezo.
Volve o Ghost Rider
David Goyer está en conversas para crear unha história e supervisar o guión para unha secuela do filme baseado no superheroe da Marvel Comics Ghost Rider (O Motorista Pantasma, na versión galega) para a Sony Pictures.
Os plans seica son basear a secuela nun guión escrito hai xa uns anos por quen tamén foi o guionista de Blade e Batman Begins, ou sexa, o mesmo Goyer. O que non se sabe é se el mesmo dirixiría esta segunda parte.
Agárda-se que Nicolas Cage protagonice novamente o filme, contando coa produción de Avi Arad, Michael De Luca e Steven Paul.
Cronenberg nun remake de seu
David Cronenberg dirixirá un remake do seu própio filme de 1986 A Mosca para a 20th Century Fox, segundo fontes ben informadas.
Orixinalmente Cronenberg non quería nin oir falar dunha nova versión do seu filme, que é xa todo un clásico do cinema de terror. Nombergantes, as novas tecnoloxías de gráficos xerados por computador e os efectosespeciais dispoñíbeis no mercado seica o convenceron de que se pode facer un intento de facer regresar a franquía.
No filme orixinal de Cronenberg, baseado mais ou menos noutro de 1958, Jeff Goldblum era o protagonista dunha fita no que un científico desenvolve en solitário unha máquina que lle permite teletransportar-se dun lugar a outro. El mesmo utiliza a súa máquina para proba-la, pero sen se decatar de que unha mosca caseira se introduciu na máquina xunto a el.
Após de seica o experimento funcionase á perfeccción, o científico comeza a se transformar en mosca xigante ante o seu própio horror e mais o da súa moza, unha xornalista (interpretada por Geena Davis) coa que estaba a manter unha relación.
Cronenberg sería o produtor e pode que mesmo o director desta nova reinterpretación do clásico.
