Neill Blomkamp noutra de CF
Neill Blomkamp, director e guionista do éxito deste verán, District 9, vai-se asociar coa Media Rights Capital para un novo proxecto de ciéncia-ficción aínda sen título. Blomkamp planea que sexa un filme cun orzamento baixo pero que custará moito máis dos 30 millóns de dólares de District 9.
A Dreamworks enméiga-se
A Dreamworks Pictures ven de se facer cos dereitos para o cinema sobre Wicked, unha série de cinco novelas para adolescentes orixinal de Nancy Holder e Debbie Viguie.
A história vai sobre unha rapaza que descubre que é a descendente dun poderoso aquelarre de bruxas, pero axiña terá problemas ao ficar namorada dun rapaz que resulta ser membro dun aquelarre rival.
Os irmáns Aaron e Matthew Benay serán quen escriban o guión desta adaptación, cuxo derradeiro tomo da saga aínda chegou ás librarías este mesmo verán.
Guión para Ghost in the Shell
Laeta Kalogridis (Shutter Island, Alexandre Magno) escribirá o guión da adaptación en 3D e con actores reais do clásico do anime xaponés Ghost in the Shell para a produtora DreamWorks Pictures.
Ghost in the Shell (Kōkaku Kidōtai) é unha franquía multimédia xaponesa composta por un manga, unha série de anime, longametraxes, videoxogos e novelas, todo elo centrado nas actividades dunha organización antiterrorista chamada Sección Policial de Seguridade Pública 9, nun Xapón futurista e cyberpunk.
A primeira aparición foi o manga de Shirow Masamune Ghost in the Shell, publicado en 1989 na revista Young Magazine. A ela seguíu-lle unha edición especial en 1991, unha secuela, Ghost in the Shell 2: Man/Machine Interface, en 2002; e un manga serializado, Ghost in the Shell 1.5: Human-Error Processor, en 2003.
A série de manga foi adaptada a tres longametraxes de debuxos animados (anime): Ghost in the Shell, Ghost in the Shell 2: Innocence, e Ghost in the Shell: Stand Alone Complex Solid State Society; dous séries de televisión: Ghost in the Shell: Stand Alone Complex e Ghost in the Shell: Stand Alone Complex 2nd GIG; e tres videoxogos.
Avi Arad, Ari Arad e Steven Paul serán os produtores deste filme, que será o primeiro no que os actores sexan de carne e óso. Jamie Moss escribira o esbozo de guión prévio ao que agora se vai realizar.
Candidatos dos prémios Ignotus 2009
Rematada a primeira fase dos prémios Ignotus, organizados coma sempre pola Asociación Española de Fantasía, Ciéncia-Ficción e Terror (AEFCFT) e votados polos seus membros, xa podemos coñecer os finalistas nas diversas categorías, que tedes no enderezo Web da páxina oficial da asociacion.
David Duchovny quere máis Expedientes X
O actor David Duchovny, o popular axente Mulder da série de televisión Expediente X, ven de revelar que mália o fracaso de crítica e despacho de billetes que supuxo o filme do verán pasado The X-Files: I Want to Believe, espera que se faga unha terceira parte da franquía e que regrese por todo o alto. “No tocante ao filme de Expediente X, gostaría-me face-lo de seguido, e se dependese de min, sería un regreso ao corazón, ao alma da súa mitoloxía, que é a conspiración sobre os extra-terrestres. Coido que é normal para Expediente X facer outro filme en 2012, así que xa veremos se conseguimos face-lo“.
Nickelodeon fai-se coas Tartarugas Ninja
A Nickelodeon ven de se facer cos dereitos para todo o mundo sobre a propiedade intelectual da marca das Tartarugas Ninja Mutantes, que até agora pertencían ao The Mirage Group e á 4Kids Entertainment, Inc. nunha operación que custou 40 millóns de euros.
Xunto á adquisición, a Nickelodeon anunciou ademáis que ten plans para desenvolver unha nova série de televisión con gráficos xerados por computador baseada nesta popular franquía de superheroes e ademáis unha longametraxe que realizará coa axuda da Paramount Pictures (ambas empresas pertencen xa ao grupo Viacom Inc.). Tanto o filme coma o primeiro episódio da série para a tele aparecerán en 2012.
O acordo de compra pola Nickelodeon inclúe todos os dereitos sobre o merchandising e a continuación da sociedade coa empresa xogueteira Playmates Toys, que é a que leva mais de vinte anos fabricando as figuras de acción das tartarugas e todo o resto de material para os nenos.
A actual série de debuxos animados Teenage Mutant Ninja Turtles continuará emitíndo-se na canle The CW network até o vindeiro mes de agosto.
Shane West en Dous Lobos
Shane West (A Liga dos Cabaleiros Extraordinários) é a última incorporación ao reparto do filme de lobishomes Two Wolves (Dous Lobos) que realizará a Remember Dreaming Productions.
A história narra as aventuras dun adestrador de cans para cegos que é desfigurado nun coléxio aillado. Sen poder relembrar o que fixo nas últimas doce horas, convérte-se no máximo sospeitoso dunha cadea de asasinatos que semellan producidos por un lobo e deberá fuxir dunha incansábel detective da policía que lle segue as pegadas, todo elo sen saber realmente se é ou non o culpábel.
Alex Wright dirixirá este filme a partir dun guión de Chris Freeman, quen xunto a Stan Spry é o produtor. Wright está tamén vencellado ao remake do clásico do terror dos anos 80 que protagonizara Jamie Lee Curtis Terror Train.
Presentación do libro A Capela Branca
Este venres 23 no Hotel Hesperia de Vigo (Avenida da Florida, 60) a partir das 20:00 horas terá lugar a presentación do libro La capilla blanca (A capela branca), unha novela de xénero fantástico escrita pola autora Isabel Llor e publicada en español por Ediciones Atlantis.
A novela xira ao redor dos Mestres Cabaleiros que descenden dos ceos cada dez anos para seleccionar a uns poucos elixidos, adicados aos valores máis nobres e á protección de cantos o precisen. De entre eses aspirantes, un está destiñado ao máis alto. Iván de Bretaña percorrerá o camiño dunha viaxe iniciática, alén do mundo visíbel, e voltará con moito máis ca un coñecemento íntimo e profundo de canto compón a realidade. Co tempo, o seu cometido de guerreiro, ser o primeiro para que os que veñan atrás o teñan máis doado, extenderá-se até formar un proxecto fabuloso de proporcións nunca vistas.
Isabel Llor Cerdán é unha escritora viguesa adicada profesionalmente ao ensino e é profesora no Conservatório de Vigo. Esta é a súa primeira novela en español, xa que é autora de dous libros en galego para nenos: Contos da Cidade de Cristal e Contos de vellos tempos.
Reparto vampírico
Rhys Coiro (da série de televisión Entourage), Harold Perrineau (de Perdidos), Kiele Sanchez (A Perfect Getaway), Diora Baird (Texas Chainsaw Massacre: The Beginning), Mia Kirshner (The Black Dahlia) e Monique Ganderton serán os protagonistas da segunda parte do éxito de terror da Sony Pictures de 2007 30 Días de Escuridade, e que levará por título 30 Days of Night: Dark Days.
Esta secuela non será estreada nos cinemas dos Estados Unidos senón que irá directa ao mercado de aluguer de DVD. O filme adaptará a novela gráfica de Steve Niles na que unha desesperada e solitária Stella Oleson (a protagonista da primeira parte) decide unir-se a un grupo de duros cazadores de vampiros para procurar vinganza contra Lilith, a poderosa vampira responsábel do ataque á súa vila en Alaska e no que todos os cidadáns resultaron mortos.
Ben Ketai dirixe o proxecto, que comezará a se filmar esta semana.
Superheroe invisíbel
O guapeiras australiano e protagonista da série True Blood (Sangue Fresco en España) Ryan Kwanten vai regresar a casa para filmar a comédia romántica de superheroes Griff the Invisible para a Transmission Films.
O conto vai sobre un superheroe que traballa de día nunha oficina e cuxo mundo é posto ao revés cando atope unha guapa científica que se namora del.
Maeve Dermody, Patrick Brammall e Toby Schmitz tamén formarán parte do reparto. Leon Ford fará o seu debut como director neste proxecto que ten planeada a súa estrea para finais do ano que ven.
