O Relostro pode voltar a brillar

O escritor Stephen King podería estar a traballar na secuela de O Relostro, unha das suas obras mais célebres que levará por título Dr. Sleep. Foi o próprio King quen fixo o anúncio nun acto promocional do seu último traballo Under the Dome (Baixo a cúpula), unha novela que polo de agora xa conta cun proxecto de minisérie na TV por conta de Steven Spielberg. O autor de It ou Carrie asegurou que desde o verán leva traballando nesta secuela para ver se consegue ter entre as suas mans unha história que poda funcionar e saiba estar á altura do relato orixinal.

O único que King quixo desvelar é que a novela levará por título Dr. Sleep e que terá como protagonista a Danny Torrance, o neno da novela orixinal xa crecidiño. Segundo apuntou o autor, Dr. Sleep presentará-nos a Danny con corenta anos, vivindo en New York e traballando nun centro para enfermos terminais. Alá axuda a quen están por morrer utilizando os poderes que xa se albiscou que tiña en O Relostro.

Uns poderes que tamén usa para se gañar un diñeiriño apostando nas carreiras de cabalos. “A primeira novela nunca explica o que aconteceu co xove Danny e os seus poderes psíquicos“, apuntou King nunha entrevista xunto ao director David Cronenberg na que se negou en redondo a dar mais detalles. “Talvez se sigo falando diso non terei que escribi-lo“, sentenciou.

De todos os xeitos, King engadiu que a xente non debería “ficar contendo o alento” agardando a que apareza esta novela, e que probablemente nunca chegará a existir. Aínda así, King non puido pechar a porta ao rumor que el mesmo escomezara, e engadiu que “probablemente non é con total certeza, así que xa veremos“.

Publicada en 1977, The Shining (O Relostro) é unha das novelas mais emblemáticas na carreira de King que, como moitas outras obras do Rei do Terror, foi levada á grande pantalla, da man de Stanley Kubrick en 1980 nunha decepcionante película que protagonizou Jack Nicholson.

Natalia Corbillón, Prémio Mallorca Fantástica

A escritora ourensana Natalia Corbillón foi a gañadora do Prémio de Narrativa Mallorca Fantástica grazas ao seu conto El amante fiel.

A história vencedora, coma o resto da súa obra, fuxe da clásica temática fantástica de fadas e elfos e procura un maior realismo. O conto, que podedes ler nesta páxina Web (ollo, contido magufo!) retrata a un antigo empregado de prelo que segue adicando a sua vida aos libros. O protagonista escrebe até se converter nunha estátua, controlado polos libros como nunha adición.

En Mallorca, onde estivo tres días presentando o seu libro reeditado en outubro Los Hijos de Gea, Natalia atopou-se “cun festival de ciéncia ficción e terror incríbel que xira sobre todo ao redor do cinema, o ano pasado acudiu Vicente Aranda e nesta edición, Álex de la Iglesia“, segundo relatou a própia Corbillón, quen dispón dun blog de seu onde dá a coñecer as novidades verbo das súas novelas.

Con 25 anos e estudante de Deseño Industrial, Corbillón traballa agora nunha triloxia a partir de Los hijos de Gea. En algún lugar de Orión, un libro que conta coas ilustracións do artista esloveno Urban Breznik. A triloxía utilizará como argumento o clásico mito de Orión e o Escorpión: “A sua loita de inimigos, coa intervención da deusa Xea, o orgullo dos gregos e as suas terríbeis vinganzas“. A acción de Los hijos de Gea transcurre en diversos lugares do planeta da nosa actualidade, ainda que os seus persoaxes actúan movidos por raíces da mitoloxía grega. É unha maneira diferente de ver a fantasía e unha maneira diferente de ver a ciéncia-ficción, unha ponte a cabalo entre o exótico dos mundos pasados e a realidade actual.

El Mechri dirixe Insiders

A actriz Jessica Alba (Os 4 fantásticos) será a protagonista da adaptación ao cinema do cómic Insiders, unha série de novelas gráficas belgas publicadas pola editorial Dargaud. Segundo din, foi a mesma Alba a que puxo cartos de seu para mercar os dereitos para o cinema, todo cunha axudiña do seu amigo o director texano Robert Rodriguez, quen oarticipará no proxecto como produtor.

A novidade é que ven de se saber que o director franco alxerián Mabrouk El Mechri, que se fixo cun nome a nivela internacional grazas ao éxito do seu filme JCVD o ano pasado, será o encargado de realizar este filme, do que ainda non se coñece data de comezo da rodaxe, se ben cóida-se que será axiña.

Insiders, un cómic creado en 2002, céntra-se no persoaxe de Najah Cruz, unha rapaza colombiana tan letal coma fermosa, experta en armas e en combate persoal ao xeito de James Bond. Seguindo ordes da Casa Branca, infíltra-se nunha organización mafiosa internacional composta por homes de negócios e políticos e convérte-se no gardacostas do líder da banda.

Outro remake de Amityville

A Weinstein Company e mais a Dimension Films están a planear un novo remake dunha das sagas do cinema de terror mais manidas de todos os tempos, The Amityville Horror.

O filme de 1979 converteu-se axiña nun clásico de culto para os afeccionados ao xénero do macabro, especialemnte porque a lenda di que estaba baseado nunha suposta história real dunha família que se mudou a unha casa nova en Long Island, onde descubren que nese mesmo lugar tivo lugar un espantoso asasinato hai uns anos, e que agora a casa está enmeigada.

Andrew Douglas dirixiu un remake en 2005 para a Platinum Dunes que acadou nada menos ca 100 millóns de dólares no despacho de billetes, se ben as críticas que recebiu por parte da prensa especializada non foron para lanzar foguetes. Realmente, din as malas línguas que o único bó que había naquela longametraxe eran os moitos, se cadra excesivos, primeiros plans dos músculos de Ryan Reunolds cos que se obsequiaba a vista das espectadoras.

Todo semella indicar que a produtora está ainda á procura dun director, e até que non se coñeza o seu nome non haberá datas para a posta en marcha do proxecto.

Lawrence dirixe xente pequena

Francis Lawrence (Eu son Lenda, Constantine) será o director dunha adaptación ao cinema do cómic In the Small para a Weed Road Pictures e mais a Warner Bros. Pictures.

A novela gráfica orixinal de Michael Hague vai sobre unha estraña explosión que convirte a todos os seres humáns en creaturas de quince centímetros de alto, deixando todo o demás no mundo do mesmo tamaño. Os que sobreviviron á transición son forzados a crfear un novo orde social e axustar-se a un mundo onde os seres humáns xa non son o cúmio da cadea alimentícia.

Mentres tentan averiguar o que é o que aconteceu, a humanidade deberá enfrentar-se a unha nova ameaza existencial. Laura Harrington escribiu a adaptación.

A primeiros deste mes Lawrence reemprazou a Guy Ritchie coma director na adaptación doutro cómic á pantalla grande, neste caso a do persoaxe da Segunda Guerra Mundial Sarxento Rock, e Akiva Goldsman está disposto a producir os dous proxectos. Sarah Schechter será tamén produtora de In the Small.

Estes dous son só dous dos moitos proxectos que ten entre mans Lawrence e podería ser a súa seguinte película. Entre os outros filmes que están na recámara atópan-se a adaptación da novela de Michael Chabon Snow and Seven e mais a adaptación de Water for Elephants.

Kat Dennings tamén en Thor

A actriz de Nick and Norah’s Infinite Playlist Kat Dennings ven de se facer cun papel en Thor, o filme de superheroes que dirixirá Kenneth Branagh para a Paramount Pictures e mais a Marvel Studios. Natalie Portman revelou a nova durante unha entrevista esta semana, pero non desvelou o papel que faría exactamente. A rodaxe escomezará a primeiros do ano que ven e a estrea está prevista para maio de 2011.

Luz verde para Real Steel

O drama con robots loitadores ao xeito de Rocky Real Steel ven de acadar a luz verde para entrar en fase de produción na DreamWorks Pictures.

Hugh Jackman será o protagonista no papel dun ex-loitador que se converte en promotor de combates de boxeo, cando as loitas entre seres humáns sexan definitivamente prohibidas por seren demasiado violentas. Os novos gladiadores serán robots de mil kilos de peso con cualidades humáns.

O acceso do ex-loitador a compoñentes de baixa calidade de robots fará que as súas esperanzas de glória fiquen polo chan, até que descubre a un robot descartado que semella que sempre gaña.

O ex-boxeador descubre asemade que é o pai dun rapaz de 13 anos, e xuntos adestrarán ao robot no seu camiño ao éxito.

Shawn Levy dirixirá este filme, que conta cun orzamento de 80 millóns de dólares e que está baseado nun conto do escritor Richard Matheson (o mesmo de Eu son Lenda). Steven Spielberg e Stacey Snider producirán a longametraxe, cuxa rodaxe dará comezo en xuño.

Kull volve ao cinema

A prensa francesa ven de anunciar que está en preparación unha nova adaptación ao cinema do persoaxe Kull creado polo escritor americano Robert Ervin Howard na Paradox Entertainment.

Howard creou ao seu heroe aventureiro en 1929 e utilizou-no coma inspiración para o seu seguinte persoaxe,que sería ainda mais popular: Conan o Bárbaro.

Nativo da Atlántida, Kull medra nunha família en Tiger Valley até que unha inundación asulaga a todo o seu clan. Outro clan recólle-o pero cando entra nunha liorta por defender a unha muller que estaba condeada a ser queimada viva, é expulsado da Atlántida para sempre, así que decide navegar ao redor do mítico continente e levar unha vida de mercenário. Chegará a se converter en rei, o mesmiño ca Conan faría milleiros de anos despois. Baixo a súa influenza, Valúsia convérte-se no reino mais poderoso do seu tempo.

A propiedade fora anteriormente levada ao cinema no filme de 1997 criticado polos especialistas Kull the Conqueror, protagonizado por Kevin Sorbo.

Mais oubeos

Os produtores Joel Kastelberg e Etchie Stroh están a preparar o relanzamento da franquía de Howling (Aullidos, en España) co filme The Howling: Reborn.

O director de Gremlins, Joe Dante, realizou o primeiro filme que foi un éxito en 1981 e acadou nada menos ca seis secuelas. Nesta saga, Dee Wallace-Stone era o protagonista no papel dun presentador do telexornal ameazado por un asasino en série que resultaba ser un lobishome.

Os detalles do argumento para este remake/relanzamento ainda están baixo segredo, e tan só sabemos que Joe Nimziki fará o seu debut coma director contando cun guión escrito por el mesmo.

A rodaxe escomezará en febreiro coa vista posta nunha estrea que sería para Halloween do ano que ven.

Guionista para Uncharted

Joshua Oppenheimer e Thomas Dean Donnelly (Sahara, A Sound of Thunder, Dead of Night) será a parella de guionistas que escriba a adaptación para o cinema do popular videoxogo da Sony Uncharted.

A história, baseada no primeiro xogo da série (Drake’s Fortune), narra as aventuras dun cazador de tesouross chamado Nate Drake, convencido de que coñece o paradoiro de Eldorado, a fabulosa cidade de ouro situada nalgures en Sudamérica, grazas a unha estatuíña de ouro enmeigada.

A procura converterá-se nunha competición cando un cazatesouros rival se una á expedición, peroserá ainda pior cando unhas criaturas maléficas mutantes descendentes dos españois e dos nazis, comecen a atacar aos que queren apoderar-se dossegredos do mítico tesouro.

O primeiro xogo foi o mais aclamado da plataforma Playstation 3. A súa secuela, Among Thieves, foi lanzada recentemente e axiña chegou ao cúmio dos videoxogos mais vendidos do presente ano.

Kyle Ward fora anunciado previamente coma o guionista deste filme, pero seica o acordo non chegou a coallar.

Páxina seguinte »