Gañadores dos premios Bram Stoker 2010
No decurso da Convencion Mundial de Terror que se celebró esta pasada fin de semana na localidade inglesa de Bighton déron-se a coñecer os gañadores dos prémios Bram Stoker e outros galardóns concedidos pola Asociacion de Escritores de Terror.
Tanith Lee e James Herbert foron nomeados novos Grandes Mestres.
Basil Copper, Brian Lumley e William F. Nolan recebiron un recoñecemento a toda a sua carreira.
O prémio Presidente Richard Layman foi para Vince Liaguno.
O prémio Silver Hammer (para voluntários no seu trballo en prol da asociación) foi para Kathy Ptacek.
O premio Specialty Press foi para a editorial Tartarus Press (Ray Russell e Rosalie Parker).
E por fin, os gañadores dos prémios Stoker foron:
- Novela: Audrey’s Door, de Sarah Langan
- Novela debutante: Damnable, de Hank Schwaeble
- Relato longo: The Lucid Dreaming, de Lisa Morton
- Relato curto: In The Porches Of My Ears, de Norman Prentiss
- Antoloxía: He Is Legend: An Anthology Celebrating Richard Matheson, de Christopher Conlon
- Colección: A Taste of Tenderloin, de Gene O’Neill
- Ensaio: Writers Workshop of Horror, de Michael Knost
- Poesía: Chimeric Machines, de Lucy A. Snyder
A Asociación desvelou asemade que para o ano que ven haberá novas categorías, de millor guión, millor novela para adolescentes e millor novela gráfica.
O regreso de Godzilla
A Legendary Pictures ven de anunciar a través dun comunicado que todo está listo para escomenzar o desenvolvemento dun novo filme baseado no lendário monstro Godzilla da Toho Studios, após de adquirir os dereitos sobre o persoaxe creado hai mais de 50 anos no filme orixinal de 1954.
A Legendary producirá a longametraxe como parte dun acordo comercial coa Warner Bros. e coa esperanza de anunciar o nome dun director en breve xa que a sua intención é poder estrear o filme en 2012.
A Toho, propietaria dos dereitos, mantívo-se viva a través de duas xeracións de películas, moitas das cales foron estreadas só en Xapón. A última vez que Godzilla saiu da illa do sol nacente foi no 50º aniversário da estrea do filme orixinal, e en 1998 Roland Emmerich fixo a versión americana, Godzilla, todo un éxito nos despachos de billetes mália as durísimas críticas dos especialistas.
ID4 2 e 3, mais preto
Todo semella indicar que Will Smith ven de asinar un contrato coa 20th Century Fox para protagonizar dúas novas entregas do filme Independence Day.
Roland Emmerich, que dirixiu o filme orixinal, ven dicindo dende hai tempo que a Fox non quería facer unha secuela do seu éxito de 1996 porque o custe de contratar a Will Smith (o seu soldo ronda actualmente os 20 millóns de dólares por película) poñería o proxecto ao borde do desastre financeiro mesmo antes de se escomezar a rodar. Pero agora seica dalgún xeito eses problemas semellan solventados e a rodaxe podería anunciar-se para escomezar o ano que ven.
Emmerich estáa dirixir actualmente o thriller Anonymous mentres que Smith deberádecidir-se nos vindeiros dúias entre dous proxectos á vista: The City That Sailed ou Men in Black 3. Calquera secuela de Independence Day non iría nunca antes de calquera dos dous proxectos.
Frankenstein chega a Londres
O realizador ruso Timur Bekmambetov (Wanted, Night Watch) será o director de Casebook of Victor Frankenstein, un filme que escomezará a se rodar axiña.
O guionista gañador dun prémio Tony (os Oscar do teatro) David Auburn (Proof, The Lake House) será o encargado de adaptar ao cinema a novela orixinal de Peter Ackroyd que narra unha vez mais o clásico do terror de Mary Shelley Frankenstein dende un punto de vista algo distinto.
A novela de Ackroyd leva a acción a Londres, onde o estudante de medicina Victor Frankenstein reanima o cadáver dun coñecido del, pero fica tan horrorizado que abandoa a creatura. O monstro, furioso, traerá a miséria e a morte a todos os que estiveron algunha vez relacionados con el.
Ackroyd ocúpa-se de lle dar un trasfondo histórico realista á súa obra, na que os clásicos poetas románticos Lord Byron e Percy Bysshe Shelley aparecen coma persoaxes secundários, e mesmo incorpora á mesma Mary Shelley e á famosa xuntanza de 1816 que inspirou a obra.
Os novos lobishomes
O mundo dos lobishomes vai ter duas novas interpretacións na pantalla grande grazas a senllos novos proxectos en marcha.
O primeiro está a cargo do guionista David Hayter (X-Men, Watchmen) que fará o seu debut na dirección cun thriller titulado Wolves e que terá un orzamento de 18 millóns de dólares á súa disposición.
Descrito coma un Twilight menos casto, o guión do mesmo Hayter revisará algunhas das películasmais clásicas dos lobishomes e fará un percorrido pola súa mitoloxía, sen esquecer que o mito en si é unha metáfora do espertar sexual na adolescéncia.
O proxecto estivo dando voltas por diversos estudos hai dous anos da man de Thomas Dekker e Ray Stevenson, pero o escomezo da crise económica detivo en seco a iniciativa.
E o outro filme de licántropos está asociado ao nome de Steve Pink (Hot Tub Time Machine, Accepted) que será o director dunha comédia de terror para maiores de 18 titulada Werewolves of Reseda.
O guión de Brian Frank vai sobre un grupo de rapaces que vive no val de San Fernando e que pouco a pouco se van convertendo en lobishomes. Os cámbios serán en realidade beneficiosos para as vidas das súas famílias. Lawrence Grey será o produtor.
Angelina a raíña malvada?
Corre o rumor de que Angelina Jolie está moi interesada no papel protagonista da malvada bruxa no filme Maleficent que está a preparar a Disney Pictures.
A pasada semana soubo-se que Linda Woolverton (A Bela e a Besta) escribiría o guión deste proxecto, descrito coma “unha aventura familiar post-moderna” e centrada na malvada raíña que fo ia principal inimiga da Bela Durminte no clásico da Disney do ano 1959.
Jolie está “moi interesada” en tomar este proxecto, segundo fontes ben informadas. Tim Burton é o nome que mais soa para se facer cargo da dirección, se ben polo de agora non houbo contactos con el.
Adeus a Dick Giordano
O pasado sábado finou por mor dunha neumonía Richard Joseph “Dick” Giordano (1932 – 2010), un artista e editor do mundo do cómic cuxo só nome esperta relembranzas dos tempos mais gloriosos da banda deseñada. Coñecido polo seu traballo na Charlton Comics e na DC Comics, foi como entintador como mais salientou, debuxando o lápis de Neal Adams nas séries de Batman, Lanterna Verde e Frecha Verde.
Dick Giordano naceu na cidade de New York, no bárrio de Manhattan. Comezou como debuxante freelance na Charlton Comics en 1952, unha empresa na que chegou a ser editor xefe en 1965. Grazas a el chegaron ao cómic artistas lendários coma Jim Aparo, Denny O’Neil ou Steve Skeates.
O daquela editor da DC Comics Carmine Infantino contratou a Giordano como editor en 1967, onde ficou até 1971, cando deixa a compañía para xunto a Neal Adams fundar a Continuity Associates, que serviu coma lanzadeira a artistas da Charlton, da Marvel Comics e da Big Apple Comix.
En 1980 a nova xefa da DC, Jenette Kahn, trouxo de volta a Giordano. Convertido inicialmente no editor dos títulos de Batman, foi nomeado novo editor xefe en 1981 e Vicepresidente e Editor Executivo en 1983. Con Kahn e Paul Levitz, Giordano axudou a relanzar persoaxes coma Superman, Batman, Wonder Woman, Flash, Lanterna Verde, a Liga da Xustiza e os Novos Titáns. A finais dos anos 80, crearon o novo selo Vertigo para audiéncias mais maduras, e para iso contaron con talentos británicos coma Alan Moore e Neil Gaiman.
Durante este periodo o traballo mais salientábel de Giordano foi coma entintador dos debuxos de George Pérez na mítica saga Crise en Terras Infinitas e de John Byrne en O Home de Aceiro.
En 1993 e após da tráxica morte da súa muller, Giordano deixou a DC e comezou un semi retiro, no decurso do cal ainda lle deu tempo a ilustrar a novela gráfica Modesty Blaise da DC Comics para Peter O’Donnell.
En 2002, Giordano axudou no lanzamento da Future Comics xunto ao guionista David Michelinie e mais o debuxante Bob Layton. A Future non tivo moito éxito porque pechou só dous anos despois, en 2004. Nos seus últimos anos mantivo unha intensa actividade benéfica na ACTOR (A Commitment To Our Roots), renomeada en 2006 a Hero Initiative. En 2005, a F+W Publications Inc. publicou Drawing Comics with Dick Giordano (que el escribiu e ilustrou), un tomo no que comparte os seus métodos e técnicas de debuxo cos leitores, aos que ainda lle deixou como testamento o seu traballo no número 51 de Jonah Hex, publicado en marzo deste ano.
O traballo de Dick Giordano serviu coma axuda e inspiración para toda unha xeración de entintadores, entre os que se inclúen Terry Austin, Klaus Janson, Bob Layton, Steve Mitchell, Joe Rubinstein e Mike DeCarlo.
Os que disfrutamos nos anos 80 co seu traballo e sempre asociaremos o seu nome co Superman máis clásico o botaremos de menos.
WondLa no cinema
A Paramount Pictures ven de se facer cos dereitos para adaptar ao cinema a vindeira novela para adolescentes de Tony DiTerlizzi The Search for WondLa.
A história vai sobre Eva Nine, unha rapaza de doce anos orfa que medrou nun fogar subterráneo de alta tecnoloxía governado por unha matriarca robótica. Eva remata fuxindo cando a súa casa é atacada e tentará atopar outros humanos coma ela, inspirada por un retrato coa verba WondLa axuntada.
Este é só o primeiro libro dunha série que ainda que non escomezará a se ver nas librarías até este outono, xa conta coa promesa de ser adaptada por enteiro ao cinema, coa produción de Ellen Goldsmith-Vein. DiTerlizzi é tamén o autor da série tamén pasada ao cinema As Crónicas de Spiderwick.
Douglas Adams e Gurb por fin en galego
Desde este 1 de marzo, en preto de 300 librarías de toda Galiza, poderedes atopar os libros dunha nova editorial galega, a 2.0 Editora que pretende non só introducir-se no mercado habitual senón tamén no do autopublicación.
Pero a nova interesante para os afeccionados ao xénero é que para escomezar a súa andaina no universo galego das letras, lanzan dúas coleccións, unha de narrativa e outra de ensaio, e a primeira serve para introducir nas letras galegas a un par de vellos coñecidos: Douglas Adams e Gurb o extra-terrestre.
Así, a primeira obra da colección Mundos é nada menos que A Guía do Autostopista Galáctico, un clásico da ciéncia-ficción e do humor de Douglas Adams, unha obra de ficción social cun humor enxeñoso e punzante, unha sátira que nos amosa dun xeito divertido as nosas condutas cotiás. A Guía do autostopista galáctico é o volume inicial da triloxía en cinco partes e obra cimeira de Douglas Adams. Agora, logo de 30 anos da súa primeira edición, podes lela en galego.
A tradución de Ruth Layús Quiroga conta como un xoves á hora de comer a vida de Arthur Dent, e da poboación enteira dese soporífero planeta chamado Terra, ía mudar de xeito inexorable e repentino. Só Arthur e o seu particular amigo Ford foxen a tempo da demolición do planeta e inician unha estraña aventura polo espazo na compaña de suxerentes personaxes e obxectos futuristas: un androide paranoide, un insólito presidente da Galáxia, un motor de probabilidade infinita, un sorprendente libro que recolle o saber intergaláctico e que advirte na súa cuberta QUE NON CUNDA O PÁNICO, un peixe babel causante dos máis catastróficos equívocos espaciais ou unha indispensábel toalla.
Pola súa banda, o número 2 da mesma colección é o clásico Sen novas de Gurb, de Eduardo Mendoza. Coa tradución de Antón Lado e estruturado a modo de diário, ateigado de ironía e fino sarcasmo, Sen novas de Gurb é o relato da busca iniciada polo protagonista, nas rúas da Barcelona preolímpica, do seu compañeiro alieníxena Gurb. Nesa busca fará partícipe ao lector dunha visión nova, insólita e en moitos casos esclarecedora da vida na gran cidade.
Angela Basset en Lanterna Verde
Angela Bassett é a última actriz que se une ao reparto da adaptación ao cinema que Martin Campbell realizará do clásico cómic de superheroes da DC Comics Lanterna Verde pola Warner Bros. Pictures. Bassett interpretará á Dra. Amanda Waller, unha científica malvada que traballa en segredo para o governo e que apareceu por primeira vez no universo dos cómics da DC no ano 1986.
