Thor e o Capi en 3D
Nun longo artigo publicado hai uns días no xornal americano Los Angeles Times, a Marvel Studios ven de confirmar que tanto Thor coma O Capitán América, os seus dous vindeiros filmes de superheroes, serán convertidos ao formato 3D e estrados deste xeito.
Tal e coma se dixera anteriormente, Thor está-se a rodar en 2D e será convertido a 3D con posterioridade. No artigo, a Marvel confirmou que o director de Capitán América, Joe Johnston, fixo algunhasprobas con cámaras en 3D para rodar directamente o filme con este formato, pero tras declarar que o proceso foi “un pesadelo“, a Marvel decidiu que este filme tamén se rodaría íntegramente en 2D e sería convertido a 3D mais tarde.
Tanto Johnston, coma o director de Thor Kenneth Branagh e mais o voceiro da Marvel Kevin Feige recoñeceron que hai un estigma negativo contra o cinema “reconvertido” a 3D: “Diría que non hai un grande sentimento a prol da conversión, baseada en filmes que tiveron éxito financeiro pero que foron atacados artísticamente”, comentou Feige, quen engadiu que “adicará-se unha cantidade de tempo sen precedentes ao proceso de conversión“, e que os efectos especiais para ambos os dous filmes foron concebidos dende o princípio en 3D. As “cidadelas de Asgard” especialmente préstan-se á dimensión extra.
Renner e McDonough, superheroes
Ainda que se leva a rumorear dende hai meses, semella agora mais seguro que Jeremy Renner está en negociacións moi avanzadas para se facer co cobizado papel de Hawkeye no filme d’Os Vingadores.
Renner fora vencellado co mesmo papel para aparecer en Thor o ano pasado, pero os rumores decaeron cando se soubo que Renner estaba a negociar a súa incorporación a outros proxectos, un dos cales nunca chegou a asinar e outro dos cales non puido sair adiante por falla de financiamento.
Agora todo semella indicar que será o escollido para interpretar ao superheroe Hawkeye no filme que axuntará a moitos dos mais famosos heroes da Marvel e que comezará a se rodar o ano que ven.
Pola súa banda, Neal McDonough está a manter conversas para se facer co papel de Dum Dum Dugan no filme de Joe Johnston Captain America: The First Avenger.
O persoaxe é un oficial da S.H.I.E.L.D. e un dos mais experimentados membros da equipa de Nick Fúria. É coñecido polo seu chapeu redondo, que e é o seu sinal de identidade, e mais por ser un excelente francotirador.
A rodaxe do Capitán América escomezará o mes que ven en Inglaterra.
Dominic Cooper é Stark Sr.
Dominic Cooper (Mamma Mia, The Duchess) será o xoven Howard Stark, pai de Tony (Iron Man), nas escenas ambientadas nos anos 40 para a vindeira longametraxe The First Avenger: Captain America.
A nova coñeceu-se nun sítio Web hai uns días grazas a unha entrevista co musculoso actor inglés realizada no decurso do recente festival de Cannes, onde se mencionou que el formaría parte do cásting, pero sen que se chegase saber ren mais sobre que papel faría no filme. Pero após de que saltase a nova, unha investigación realizada de contado descobriu que este será o seu seguinte papel.
O protagonista de Mad Men, John Slattery, interpretou a un vello Howard Stark a princípios dos anos 70 en escenas de flashback na recentemente estreada Iron Man 2. Cooper fora anteriormente vencellado co filme Thor onde se dicía que podería interpretar a un dos Tres Guerreiros, pero finalmente os rumores non resultaron ser certos.
A rodaxe de Captain America escomezará nunhas poucas semanas en Londres.
Nick Fúria co Capitán
Samuel L. Jackson ven de lle confirmar á prensa que o persoaxe so que interpreta, Nick Fúria, estará no filme do Capitán América pero non no de Thor.
E preguntado sobre por que non estará en Thor, Jackson respondeu con franqueza que “non teño nin ideia. Non son o responsábel de tomar tales decisións“. E cando lle cuestionaron verbo dunha posíbel película adicada só a Nick Fúria, Jackson dixo que o filme de superheroes conxunto Os Vingadores será de feito “o meu próprio vehículo coma protagonista para ese persoaxe, realmente si“.
Finalmente o actor dixo que está a se poñer en forma para a rodaxe d’Os Vingadores, que escomezará a se facer no vindeiro mes de febreiro do ano que ven. Jackson está chamado para se incorporar á rodaxe do Capitán América en Londres este verán.
Atwell no Capitán América
A Marvel Studios ven de anunciar que finalmente será a actriz Hayley Atwell a que interprete a Peggy Carter na agardada vindeira produción dos estudos, Captain America: The First Avenger.
Nos primeiros cómics da série, Peggy Carter era a namorada do Capitán América (Chris Evans) mentres ambos loitaban xuntos na Segunda Guerra Mundial. O persoaxe deberá pasar por unha adaptación xa que ten moito que poñer ao día.
En anteriores informacións, Emily Blunt era a principal candidata, pero rexeitou o papel, polo que este ficou pendente dunha decisión entre Atwell e mais a Alice Eve. A actriz británica finalmente foi a desbotada.
A Atwell puidemos ve-la en filmes coma The Duchess, Brideshead Revisited, Cassandra’s Dream e mais na recente minisérie remake de O Prisioneiro.
O Capi terá á súa Eve
A actriz inglesa de 28 anos Alice Eve (She’s Out of My League, Sex and the City 2) é a principal candidata para interpretar a Peggy Carter no vindeiro filme de superheroes The First Avenger: Captain America da Marvel Studios.
Tanto Eve coma a súa compatriota Hayley Atwell (The Prisoner, Brideshead Revisited) pasaron hai pouco por unha segunda proba de cásting esta semana en Londres baixo a supervisión dos produtores do filme. O papel tivera non hai moito como candidata a interpreta-lo a Keira Knightley, pero seica esa xa non é unha opción que segan a manexar nos estudos.
Nos cómics, Margaret “Peggy” Carter é unha rapaza que loitou na resisténcia francesa contra os nazis na Segunda Guerra Mundial e que axudou ao Capitán América en várias operacións.
Quen queira que ao final se faga co papel unirá-se a Chris Evans, que será o protagonista no papel de Steve Rogers e a Sebastian Stan, que será James “Bucky” Barnes. O filme comezará a súa fase de produción este mesmo verán e a estrea está prevista para xullo de 2011.
Stan ainda no Captán América
Ainda que perdeu a oportunidade de se converter no Capitán América en The First Avenger: Captain America, o musculoso e xoven actor Sebastian Stan (das séries de televisión Kings e Gossip Girl) ainda está vencellado ao proxecto da Marvel Studios.
Múltiples fontes confirman que Stan ven de asinar un contrato para várias películas para interpretar a Bucky Barnes, o acompañante dos primeiros días do Capitán nos cómics, cando estaba de moda que todo super-heroe que se prezase tivera un axudante noviño. Nos cómics, Barnes chega a se converter no asasino soviético Winter Soldier, e mais tarde chega a sustituir ao Capitán após da morte de Steve Rogers.
Inicialmente Barnes era un orfo que descubre a verdadeira identidade do Capitán América, quen decide utiliza-lo coma o seu parceiro para loitar contra os nazis durante a Segunda Guerra Mundial. Aparentemente morre na mesma explosión do avión que levaba ao Capitán e que o deixou conxelado no Atlántico até que é descuberto moitas décadas despois.
En 2005 Barnes reaparece e sábe-se que o persoaxe fora rescatado do mar polos soviéticos. Vítima de amnésia, transplántan-lle un brazo biónico e convérte-se en asasino profesional ao servizo da Unión Soviética.
O acordo con Stan incluiría non só o filme do Capitán América senón o dos Vingadores e outros filmes da Marvel. A rodaxe do primeiro deles escomezará en Europa este verán.
Xa hai Capitán América
Por fin temos un gañador. Após de non poucas dúbidas, apostas e consultas, Chris Evans ven de aceptar o papel que lle ofreceron na Marvel Studios para interpretar a Steve Rogers, o Capitán América, no vindeiro filme The First Avenger: Captain America.
Evans foi ún dos últimos actores que entraron nas apostas, e non fo iaté a semana pasada cando lle offreceron o papel, que aceptou após de pasar a fin de semana pensando. Ainda que fican un par de flecos por pechar, xa só é unha cuestión de sinaturas. A Marvel ainda non comentou ren, pero se agarda a que faga pública a súa decisión en canto todos os contratos estean asinados.
O trato consiste en interpretar ao Capitán alomenos en tres filmes co Capitán como protagonista único e noutro como parte do equipo de superheroes dos Vingadores. Hugo Weaving xa se comprometeu a interpretar ao malvado Cránio Vermello, o inimigo nazi do Capitán América.
O filme contará coa dirección de Joe Johnston e a rodaxe debe escomezar este verán, coa vista posta nunha estrea que se producirá en xullo de 2011.
Weaving Cráneo Vermello?
Hugo Weaving (O Señor dos Anéis, V for Vendetta, Matrix) podería engadir un novo papel ao seu longo percorrido polo cinema fantástico e converter-se no malvado Cráneo Vermello en The First Avenger: Captain America, o filme que sobre o Capitán América prepara a Marvel Studios.
Nos cómics, Cráneo Vermello é a man dereita de Hitler e un as da espionaxe e da sabotaxe a princípios dos anos 40. Após dunha loita contra o Capitán, fica conxeado en animación suspendida e xunto a el, é revivido nos tempos actuais.
Joe Johnston, o director deste proxecto, traballou xa con Weaving até o mes pasado en The Wolfman. O actor, nacido en Nixéria no ano 1960, xa ten costume de traballar baixo unha máscara todo o tempo en V de Vendetta, o que o converte no home ideial para un papel que deberá poñe-lo baixo unha tonelada de maquillaxe e mesmo disimular todo o seu rostro coa axuda de efectos especiais.
Candidatos para ser o Capi
John Krasinski (da série de TV The Office) semella ser o favorito nunha lista de candidatos que manexan os estudos Marvel para protagonizar o seu vindeiro filme The First Avenger: Captain America.
As probas de pantalla están a ter lugar estes días e durante as seguintes duas semanas para ver quen se fai co papel de Steve Rogers (o Capitán Amárica) na nova versión para o cinema do superheroe dos cómics que dirixirá Joe Johnston (The Wolfman, Jurassic Park III).
Na lista están ademais outros xóvenes actores que resultarán mais ou menos familiares aos afeccionados á televisión pero que son ainda relativamente descoñecidos para o grande público. Así, temos a Scott Porter (da série de TV Friday Night Lights, The Good Guy), Mike Vogel (Cloverfield, Poseidon), Michael Cassidy (Smallville, OC) e a Patrick Fluger (Os 4400, Brothers).
Chace Crawford (da série Gossip Girl, The Covenant) está en conversas para facer as probas pero ainda non foi confirmado. Garret Hedlund (Troy, Four Brothers, Tron: Legacy) estivo na listaxe pero seica o seu nome caiu, o mesmo có de Jensen Ackles (Supernatural, My Bloody Valentine 3D) por mor de conflitos coa axenda.
O proceso de todos os xeitos podería rematar sen que ninguén sexa elixido, ou volver sobre os pasos após dunha primeira elección. No filme Thor, tamén da Marvel, o australiano Chris Hemsworth non foi o primeiro elixido e mesmo chegou estar fóra das apostas, pero após de várias semanas o seu nome foi o que saiu e levou-se o papel.
Parte do problema que teñen os produtores nestes intres para elixir a un protagonista é o orzamento. Quen sexa elixido agora podería participar até en nove filmes para a mesma produtora, mentres que o salári oque se rumorea non sería precismente para tirar foguetes.
O Capitán América non chegará ás salas de cinema até xullo de 2011.
