Cuatro emitirá Perdidos
Tras os fracasos de Alias e Os 4.400, a cadea xeralista Cuatro ven de se facer cos dereitos de emisión en España doutra série xa vista noutra canle, esta vez en TVE: así, Cuatro adquiriu os dereitos íntegros de emisón da série Perdidos. A cadea mercou todas as tempadas da série, cuxas tres primeiras puideron ver-se en TVE. Ademais, a série emite-se no canal de pago FOX España.
Lost (Perdidos) é unha série de culto entre os rapaces que até agora sementou mais éxito na Internet que na televisión. En TVE, após dunha relativa boa arrincada pola primeira cadea, pronto foi desterrada á segunda, onde pasou sen mágoa nen glória.
Non é a primeira vez que Catro emite unha série de culto oferecida anteriormente noutra cadea para tentar quitar-lle proveito, ainda que polo de agora sempre fracasou. Nos seus comezos, a canle xa ofrecera após Telecinco Alias, e o ano pasado repetiu xogada con Os 4.400, até entón nas mans de Antena 3. A série, que debutou nun domingo, tamén acabou desterrada á madrugada polas suas pésimas audiencias.
Next premonition e Primeval en Cuatro
A canle xeralista Cuatro ven de se facer cos dereitos de emisión en España de duas das producións europeas fantásticas mais aclamadas dos últimos anos, a francesa Next Premonition (David Nolande) e da inglesa Primeval, producida pola ITV. Ambas chegarán a Cuatro nos vindeiros meses.
Next Premonition, estreada no pasado setembro en Franza (France 2) e Bélxica (Une-a), xa se converteu nun grande éxito de audiéncia: só na sua estrea atinxiu os 8,18 millóns de espectadores, cun 30,9% de share, e no segundo episódio logrou 7,06 millóns de seguidores e un 29,6% de cota de pantalla.
A série, que deu un xiro na panorama televisivo francés, até daquela pouco acostumado ao fantástico, está protagonizada polos actores galos Frédéric Diefenthal e Elsa Kikoïne e dirixido por Nicolas Cuche. Está centrada en David Nolande, un xoven executivo, casado e cunha filla pequena. Unha tarde, tras celebrar o éxito dunha campaña publicitária, sofre un acidente e provoca a morte dunha adiviña. Como consecuéncia, cae unha maldición sobre el: quitou unha vida e terá que salvar outras para evitar que os membros da sua família sofran un drama terríbel.
Primeval fixo que a emisora inglesa ITV rachara moldes cunha minisérie na que se entremisturan a fantasía e mais o documental. Producida por Tim Hains, responsábel da saga Camiñando con… e de Deep Ocean, Primeval acadou na súa estrea 6,90 millóns de espectadores e un 28,9% de share e situou-se con ampla marxe por riba da média na franxa da cadea durante 2006.
A série vai sobre o zoólogo Nick Cutter, quen descobre que se produciron buracos na barreira do tempo, permitindo que unhas criaturas provintes da prehistória deambulen polo mundo actual. Cutter e a súa equipa loitan para manter o iminente desastre en segredo mentres loitan cos salvaxes dinosáuros e outros mortais inimigos.
Impacto europeo
Natasha Henstridge (Species), James Cromwell e David James Elliott protagonizarán Impact, un telefilme de desastres e ciéncia-ficción dividido en dúas partes sobre unha estrela anana que choca contra a Lúa e causa estragos na Terra. Os actores alemáns Benjamin Sadler e Florentine Lahme tamén forman parte do reparto.
Producida pola compañía muniquesa Tandem Communications, Jaffe/Braunstein Films e Muse Entertainment Enterprises, a minisérie contará cun orzamento de 14 millóns de dólares (8,90 millóns de auros) e comezou xa a se rodar a semana pasada na Colúmbia Británica (Canadá).
O filme está producido en asociación con várias canles de televisión europeas, entre elas a española Cuatro, e ademáis a ProSieben Television (Alemaña), TF1 (Franza) e a Sony Pictures Home Entertainment. Tandem, que manexará a distribución internacional, xa vendeu os dereitos de emisión para máis de 90 países e rexións, incluindo Áustria, Rúsia, Poloña, Latinoamérica e o Médio Este.
Dirixida por Mike Rohl (Smallville) a partir dun guión de Michael Vickerman, Impact conta coa produción executiva de Jonas Bauer, Rola Bauer, Tim Halkin, Michael Jaffe, Howard Braunstein e Michael Prupas, e coa coprodución executiva de Irene Litinsky e Ted Bauman.
