Nos cómics, Lobo é un cazarrecompensas interestelar álien. O anti-heroe, de dous metros e trece centímetros de alto, pel de cór azul, indestructible e musculoso, conduce unha moto tuneada e chega á Terra coa intención de atrapar a catro fuxitivos que se fugaron e están a causar o caos.

Lobo asócia-se cunha rapaza adolescente dunha pequena vila para detér ás creaturas. Joel Silver, Akiva Goldsman e Andrew Rona serán os produtores.

O proxecto leva en desenvolvemento vários anos, e a última vez que oíramos falar del Guy Ritchie ía ser o director.

A DC Comics lanzará unha renumeración histórica das 52 liñas de cómics do Universo DC por completo, incluindo a aparición da nova Liga da Xustiza a cargo do escritor Geoff Johns e do debuxante Jim Lee. A publicación do número 1 da Liga da Xustiza será simultánea en papel e na Internet, co que a DC convérte-se na primeira editorial das dúas importantes (a outra é a Marvel) que lanza os seus cómics de superheroes dixitalmente e en papel o mesmo día.

A xogada da DC xa ergueu moitísimas críticas, entre as que se inclúen a do novo uniforme que utilizarán moitos superheroes, Superman incluído. Segundo fontes internas da editorial, a nova política será «nada de calzóns por fóra», co que os calzóns vermellos do Home de Aceiro deixarán de ser unha das súas principais características (se cadra algo ten que ver co feito de que a partir do ano que ven a DC podería ver-se obrigada a deixar de usar o uniforme clásico de Superman?).

O grande risco agora é que os fans que estaban a seguir as coleccións normais deixen de mercar o cómic, porque xa coñecen as orixes dos seus persoaxes favoritos. De todos os xeitos na DC consideran que paga a pena tenta-lo e que as novas orixes de todos os persoaxes serán unha oportunidade perfecta para gañar novos leitores.

A série narra a história de Gabriel Cole, un oficial de policía que lle debe a súa vida a Alpha-One, o único superheroe do mundo. Pero cando descubra os escuros segredos do seu heroe, Cole deberá loitar en solitário contra o ser humán mais poderoso da Terra.

Mary Parent, Cale Boyter e JC Spink serán os produtores. O proxecto é ún dos poucos títulos da DC que non está dentro do acordo que asinaron coa Warner Bros. Pictures e polo tanto estaba dispoñíbel para calquera outra produtora que quixese facer-se cos dereitos deste cómic, controlados polos seus creadores Keith Champagne e Peter Tomasi.

Man of Steel, dirixida por Zack Snyder e producida por Christopher Nolan, está prevista para se estrear en decembro de 2012. Pero menos dun ano despois desa data, certos dereitos sobre o persoaxe pasarán a ser novamente propiedade da família dos seus creadores orixinais, Jerry Siegel e Joe Shuster.

E o que sinifica «certos dereitos»? Pois que non todo pertencerá aos herdeiros de Siegel e Shuster. Iso é porque segundo a senténcia xudicial, todo o que inventou a parella para Superman antes de que ambos escomezasen a traballar para a DC Comics volverá a ser propiedade das súas famílias. E todo o que inventaron despois de escomezar a traballar para a editorial pertencerá á editorial (que actualmente é propiedade da Warner Bros. Pictures).

En resumidas contas, os herdeiros de Siegel e Shuster terán os dereitos sobre o uniforme azul e vermello de Superman, así coma de certos superpoderes, concretamente os de «chimpar mais alto cós edifícios», «ser mais rápido ca unha locomotora» e ser «capaz de deter as balas». Todo o demais, que foi engadido despois de 1938, cando xa traballaban na DC, será propiedade da devandita compañía: o resto dos seus superpoderes, coma o de voar, ou a súa galería de superinimigos, incluíndo a Lex Luthor.

Así pois, en teoría, a partir de 2013 as famílias de Siegel e Shuster e mais a Warner poderían facer dous filmes diferentes, cadaún cun Superman con poderes diferentes, un uniforme distinto, e superfalcatruáns de seu. Un dos filmes non podería amosar a Superman voando, e o outro non podería amosar o uniforme azul e vermello.

Polo de agora Marc Toberoff, o avogado das famílias dos creadores de Superman, está a tentar desesperadamente sacar adiante unha apelación perante o tribunal, mentres que a Warner decidiu demandar directamente ao avogado, acusándo-o de rachar as boas relacións que tiñan coas famílias antes de que fosen a xuízo por mor dos dereitos sobre o home de aceiro, precisamente instigados por este avogado.

Mentres se resolve o caso, Man of Steel podería ser a derradeira vez que vexamos ao «auténtico» Superman no cinema. As secuelas poderán amosar a un Kal-El sen o seu uniforme, mentres que vemos a outro persoaxe co mesmo nome pero incapaz de voar, tal e coma foi deseñado orixinalmente por Siegel e Shuster. Será o final definitivo para Superman?

No decurso dunha conferéncia financeira, o CEO da Warner Barry Meyer dixo que haberá un «anúncio organizacional» a semana que ven. Nalgures durante o mes que ven os estudos desvelarán os detalles de vários superheroes que serán presentados aos espectadores e non só mediante longametraxes.

Meyer engadiu que os estudos planean facer algo «moi empresarial» coas súas propriedades. Mesmo consideran a posibilidade de facer un filme en 3D coa franquía de Harold & Kumar, unha comédia protagonizada por dous drogaditos interpretados por John Cho e Kal Penn.

Superman

Diane Nelson, responsábel da nova división da Warners DC Entertainment, deu unha resposta directa a unha pregunta realizada no decurso dunha entrevista na tele onte, ao respeito de se haberá ou non novos filmes da saga de Superman ou se hai algo previsto no futuro próximo.

«En realidade non temos ningún plan actualmente para Superman. Obviamente xa fixemos unha manchea de grandes cousas para a propiedade na nosa história, e [Superman] é unha parte esencial da nosa família, pero non temos actualmente plan para Superman«, dixo Nelson.

Esta declaración chega pouco despois de que unha sentencia xudicial disparara os rumores de que os estudos estarían desexando facer unha nova entrega de Superman antes de que os dereitos cinematográficos sobre os persoaxe regresasen aos herdeiros do seu creador en 2013. Agora con todos os dereitos no aire e no médio de liortas xudiciais para os vindeiros anos, semella que o Home de Aceiro non regresará á pantalla grande até dentro de moito tempo.

Mentres tanto, a única encarnación do persoaxe nas pantallas, a série de televisión Smallville, arrincará a súa derradeira tempada o vindeiro venres nos Estados Unidos.

A presidenta da Warner Premiere, Diane Nelson, quen supervisou e continuará a supervisar a franquía de Harry Potter, que pertence aos mesmos estudos, será a nova responsábel da DC Entertainment baixo o mando directo do presidente da Warner, Jeff Robinov.

Esta reestruturación levaba un tempo xestándo-se pero agora se lle deu algo de présa como xeito de potenciar as franquías da compañía após da recente compra da Marvel pola Disney e porque os persoaxes franquía dos seus rivais (X-Men, Spiderman, Iron Man e Hulk) están a obter moitos mais benefícios no despacho de billetes.

En comparación coa Marvel, a Warners/DC só obtivo un éxito salientábel nos últimos anos, a dúas películas de Christopher Nolan da saga de Batman. Dende 1998 só outros tres persoaxes da DC chegaron a aparecer nas pantallas de cinema, con diferentes éxitos: a risíbel Catwoman de 2004, a cara e non moi ben criticada Superman Returns en 2006, e a adaptación de Watchmen, que contou con boas críticas pero malos resultados no despacho de billetes. Entre os proxectos que agardan na recámara para os seguintes anos a DC ten os de Wonder Woman, A Liga da Xustiza e Flash.

Hai uns poucos días xurdiu o rumor, non confirmado oficialmente, de que a Warner quería volver a contar con produtores sobranceiros de Hollywood coma Chuck Roven, Joel Silver e Akiva Goldman para lle dar mais pulo aos seus novos títulos. Este movemento permitirá ao estudo controlar moito mellor ás súas propriedades e tirar mais benefícios dos persoaxes.

A compañía xa rematou a rodaxe da adaptación ao cinema doutro persoaxe menor, Jonah Hex, que non entrará nesta operación, pero a reestruturación podería afectar á rodaxe de Lanterna Verde, unha das mais importantes que se agardan, ainda que estea paralizada arestora en Austrália, e á recentemente anunciada Lobo, que dirixirá Guy Ritchie.

Así, a Warner Bros. ven de contrata-lo para que dirixa a adaptación cinematográfica de Lobo, unha série de cómics da DC Comics sobre o persoaxe homónimo, creado en 1983 polo artista Keith Giffen e mais o escritor Roger Slifer.

Lobo non é realmente un superheroe, senón un mercenário de orixe extra-terrestre, procedente de Czarnia, un planeta cuxa raza pacífica foi exterminada completa e violéntamente polo noso protagonista, que ficou coma o derradeiro czarniano.

Lobo caracteríza-se pola sua forza excepcional, semellante á de Superman. A súa durabilidade, resistenza e mais o seu factor curativo acelerado permíten-lle que rexenere o tecido danado ou destruído con velocidade, recuperando mesmo membros perdidos ou partes do seu corpo. As súas semellanzas co persoaxe Lobeto da Marvel non son casuais, xa que no seu intre foi vendido coma a resposta da DC á fama mutante da que disfrutaba (e volve disfrutar) a Patrulla X nos anos 80, especialmente Lobeto. Entre os afeccionados as rifas foron constantes e as comparacións só serviron para lle dar mais púlo a Lobo, que após do seu éxito nos 80 e primeiros 90 foi caendo no esquecemento.

Dado o carácter de antiheroe deste persoaxe, a WB está decidida a que esta fita teña a calificación de PG-13, a xusta para non pasar-se e que non-a deixen fóra do circuito do seu público natural, os rapaces.

Joel Silver, Akiva Goldsman e Andrew Rona estarán na produción, que dará comezo a primeiros do ano que ven.

Nikolaj Arcel

Deadman é a pantasma dun acróbata de circo que foi asasinado e que ten o poder de posuir o corpo dun ser vivo mentres anda á procura dos seus asasinos e axuda de paso aos inocentes.

Arnold Drake e mais Carmine Infantino crearon ao persoaxe en outubro de 1967 para a DC Comics, pero até o ano 1986, nunha série limitada de catro números, o persoaxe non contou nunca cunha revista de seu. Daquela os encargados de lle dar vida foran o guionista Andrew Helfer e mais o debuxante hispano-arxentino José Luis García-López.

Guillermo del Toro, Don Murphy e Susan Montford serán os produtores.

Superman

Seguirá sendo Superman o derradeiro supervivinte do planeta Krypton? A longa guerra legal polos dereitos do Home de Aceiro conta xa cun novo episódio que pode afectar sériamente á lenda que envolve á mais famosa ícona do cómic americano. Os herdeiros de Jerry Siegel – cocreador xunto a Joe Shuster do personaxe – apontan-se a vitória nunha batalla que pode ter resultados pouco agradábeis para o xigantesco conglomerado de Time Warner, a actual proprietária da DC Comics, a editorial que publica o personaxe desde 1938.

Segundo a última sentenza, o xuiz considera que os dados provistos polo especialista Denis Kitchen nun blogue da páxina Web Newsarama son decisivos para demostrar que moitas das ideias publicadas nalgúns dos cómics do personaxe foran deseñadas polo guionista moito antes de que a editorial encarregase aos xoves autores a creación do personaxe. Segundo as leis americanas de copyright, se a creación se realizou por encargo, legalmente os dereitos pertencen á editorial, polo que é necesário demostrar que existen evidéncias dunha creación anterior á relazón laboral.

Kitchen aportou probas atopadas pola família Siegel dun antigo proxecto do guionista co debuxante Russell Keaton que non chegou a ver a luz nos xornais. Nel apresentaba-se a história dun bebé de extraordinários poderes que chegaba do futuro nunha máquina do tempo, enviado polo derradeiro home sobre a Terra ao ano 1935 para ser descuberto polos Kent. A parella adoptaria-o despois co nome de Clark Kent.

As semellanzas son evidentes e a decisión xudicial é clara: os herdeiros dos Siegel deben recuperar os dereitos de autor do cuarto número da revista Action Comics, algunhas páxinas do primeiro número da colección Superman e as duas primeiras semanas das tiras diárias que se publicaron nos xornais dos Estados Unidos. Precisamente aquelas poucas tiras diárias onde Siegel e Shuster desenvolveron a orixe do Home de Aceiro, creando a sua orixe no planeta Krypton: perante a iminente destrución do planeta, o científico Jor-El introduce a un recén nado Kal-El nunha nave espacial que lle levará á Terra, onde será atopado polos Kent. Unha história que xa forma parte da cultura popular e que agora só poderá ser utilizada co consentemento dos herdeiros do autor. Xa sexa en filmes, séries de televisión ou, por suposto, en cómics, as novas aventuras de Superman non poderán facer referéncias ás suas orixes kryptonianas sen acordo prévio.

Un espantoso novo capítulo na longa guerra que se iniciou entre os autores e a editorial hai décadas, pero non inesperado: ainda que o xigantesco empório mediático da Time Warner loita con uñas e dentes polos pingües benefícios que lle proporciona Superman, pouco a pouco vai perdendo ao seu famoso persoaxe. Pese a que a morte de Joe Shuster sen descendéncia lle proporcionase o 50% dos direitos do Home de Aceiro, as leis americanas en dereitos de autor fixan o ano 2013 como limite para ese control. A partir dese momento, o personaxe reverterá totalmente aos herdeiros dos seus creadores (neste caso, de Jerry Siegel) até o ano 2033, no que Superman pasará definitivamente ao domínio público.

Reynolds gaña deste xeito na mesma liña de chegada a un grupo de actores que tamén eran fortes candidatos a interpretar o papel principal deste filme de acción, e entre os que se atopaban Bradley Cooper, Jared Leto e Justin Timberlake. Todo eles tiveron que pasar por dúas sesións de cásting moi esixente.

Seica entre os motivos da elección están non só que saia mais barato cós outros dous, senón que agás o elixido, o resto dos actores ficaban libres por contrato o luns, mentres que o de Ryan remataba o venres, tan só catro días despois. Ademais, unha razón para a longa procura foi que De Line, Campbell e os estudos tiñan cadanseu favorito e iso dificultou o consenso.

Se o trato fica pechado, Reynolds converterá-se no único actor que interpretou a heroes tanto da Marvel coma da DC, xa que ven de facer de Deadpool no filme da Fox X-Men Origins: Wolverine. E de feito, interepretouno tan ben que entre os seus proxectos está o de facer unha secuela só con ese persoaxe. Ademais, e para os fans do fantástico, tamén resultará unha face coñecida por ser o cazador de vampiros Hannibal King en Blade: Trinity.

Lanterna Verde será o segundo intento de Reynold de se converter nun superheroe da DC Comics, xa que hai uns anos, estivo a punto de se facer co papel de Flash, outro dos persoaxes clásicos da compañía de cómics.

O estudo, que posúe os dereitos de todos os persoaxes da DC Comics, está a desenvolver arestora versións para Lanterna Verde, Flash e se cadra Wonder Woman xunto aos seus proxectos de Batman e Superman, xa convertidos en franquías. Todos eles teñen previsto seren filmes para maiores de 13 anos.

Mália o anterior, as adaptacións de superheroes clasificadas para maiores tampouco se deixarán de facer, e así por exemplo Jonah Hex si que ten previsto ser para 18 anos xa que non se considera (ainda que sexa un persoaxe da DC) un filme de superheroes ou de grande orzamento. Pero ao mesmo tempo, medrará a presión sobre McG para que entregue unha versión para maiores de 13 anos do seu filme Terminator Salvation.

A nova constituiría unha sorpresa porque o rapaz Yelchin, ainda que obtivo boas críticas polo seu traballo en filmes anteriores, non é un nome ainda familiar para os afeccionados ao cinema e este filme pretendía ser un proxecto moi importante e mesmo xerar unha franquía para o persoaxe.

Ademáis o persoaxe que se pretende desenvolver é o de Hal Jordan, un piloto de probas que se converte nun superheroe cósmico, o que non é moi doado de adaptar para un actor que estea por baixo dos 25 ou 30 anos. En calquera caso, Yelchin é polo de agora só ún dos moitos actores novos que están a se considerar para interpretar a Lanterna Verde, xa que seica o que pretenden os produtores é facer unha nova oferta a Gosling para que reconsidere a súa negativa de participar nesta adaptación de superheroes.

Yelchin ten un papel salientábel en dous filmes fantásticos que ainda están por se estearen: Kyle Reese en Terminator Salvation e mais o novo Pavel Chekov en Star Trek.

O único confirmado polo de agora é o nome do director, Martin Campbell (Goldeneye, Casino Royale). A produción ten previsto escomezar a se rodar este ano coa vista posta nunha estrea o 17 de decembro de 2010.

O Escuadrón Suicida (Suicide Squad) está formado por un grupo de superfalcatruáns saidos da cárcere e recrutados polo governo para completar unha misión que é demasiado perigosa para os superheroes normais.

A primeira versión do escuadrón apareceu nas páxinas da DC Comics en 1959, pero non contaron cunha série de seu até 1987.

Stephen Gilchrist da Lin Pictures será o coprodutor. Justin Marks (20.000 légoas de viaxe submariña) será o encargado de escribir o guión.

Martin Campbell

O feito de que se nomee a este prestixioso director para un filme que até de agora era só un proxecto fai que a adaptación do popular superheroe dos comics da DC entre nunha vía de alta prioridade para os estudos, que xa consideran que este será un dos seus principais filmes para 2010 ou 2011.

Greg Berlanti, que até de agora era quen soaba como director para o proxecto, é de todos os xeitos o autor do guión xunto a Marc Guggenheim e Michael Green. Berlanti e Donald DeLine serán os produtores.

Campbell, que tamén se encargou dos dous filmes de Antonio Banderas do Zorro e de Límite Vertical, ven de rematar o seu traballo no thriller protagonizado por Mel Gibson Edge of Darkness, un remake da minisérie dos anos 80 que se emitiu na televisión inglesa co mesmo nome e que el mesmo dirixira daquela.

O proxecto fantástico, baseado no cómic creado por Bill Willingham e editado polo selo Vertigo da DC Comics, trata de persoaxes dos contos de fadas e do folklore clásico que viven no exílio no New York actual.

Os creadores e produtores executivos de Six Degrees Stu Zicherman e Raven Metzner están a escribir o guión para facer un drama dunha hora de duración para a Warner Brothers TV. David Semel será o director de Fables.

Zicherman e Metzner non quixeron detallar en que persoaxes dos contos de fadas se centrarán os episódios da série, pero dixeron que o Lobo Malo e Brancaneves, que son persoaxes centrais dos cómics, terán un papel semellante na série.

Segal e Ewing poñerán en marcha o pacto con Liam McBain: International Tennis Star and Proper English Geezer, un guión escrito por Chip Hall que Segal deberá desenvolver nun filme que trata sobre o auxe, caída e redención dunha estrela inglesa do tenis fictícia dos anos 80.

Como parte do trato, a WB tamén adquiriu o guión escrito por John August sobre o famoso persoaxe da DC Comics do Capitán Marvel. Segal dirixirá esta adaptación, na que en realidade xa leva dous anos de traballo xunto a Ewing na New Line, pero finalmente os dereitos sobre o persoaxe pasaron á Warner. O filme trata sobre o adolescente Billy Batson, capaz de se transformar nun pdoeroso super-heroe cando di en voz alta a palabra «Shazam!».

Este trato chega mentres Segal prepára-se para dirixir unha secuela de Get Smart para a WB e mais a Village Roadshow Pictures. Ewing foi produtor do filme orixinal, xunto con Chuck Roven, Alex Gartner e Andrew Lazar, mentres que Segal foi produtor executivo.

The Losers

A série da DC Comics The Losers será adaptada á pantalla grande. O director Sylvian White está en negociacións para se facer cargo deste proxecto.

White está vencellado últimamente a proxectos coma Castlevania (a adaptación do videoxogo) ou para facer o Ronin de Frank Miller. Ademáis conta no seu peto con filmes coma Sei o que fixestes o último verán ou Stomp the Yard. Peter Berg e James Vanderbilt escribiran xa un guión o ano pasado baseándo-se neste cómic, cuxos dereitos ostenta Tim Story.

The Losers é un comic dos anos 70 ambientado na Segunda Guerra Mundial. Dende 2004 comezou a se publicar novamente, esta vez baixo o patrocínio da liña Vertigo da DC, contando con guións de Andy Diggle e debuxos de Jock e narra as aventuras dun grupo especial de axentes que é traizoado e como este grupo busca vingar-se contra a CIA para limpar o seu nome.

Jonah Hex é un cómic sobre un anti-heroe do salvaxe Oeste creado polo guionista John Albano e mais o debuxante Tony DeZuniga e publicado por DC Comics, que serán os que produzan a longametraxe xunto á Mad Chance.

O filme será probábelmente unha mistura de ciéncia-ficción no Oeste americano con gráficos xerados por computador. No cómic orixinal no había ren de ciéncia-ficción, pero seica van introduci-la para lle dar algo de frescura ao argumento, dado que Hex é un cazarrecompensas e pistoleiro (nacido en 1838 e morto en 1904 segundo a cronoloxía oficial da DC) que ten a face terríbelmente desfigurada, con toda unha meixela desaparecida, a través da cal se poden ver os seus dentes. No filme os rumores apuntan a que a súa misión será a de perseguir a un practicante de vodú.

Goyer di estar actualmente a escribir o guión, e conseguiu que a Universal implique a algúns artistas para que traballen con el. Jamie Rama é o principal e Aaron Sims tamén. Rama é un grande artista conceptual que traballou en Batman Begins e en O Cabaleiro Escuro, e foi un dos principais artistas que traballou nos traxes de Batman.

O filme situaria-nos uns meses despois dos feitos do libro, cunha história pragada de figuras históricas onde estaria William Melville, xefe de Scotland Yard e creador do MI6; foi quen instaurou a toma de pegadas dixitais e foi amigo do meigo Houdini. Na história, Melville será quen capte ao home invisíbel e o converta en axente secreto para o enviar á Rusia imperial.

Goyer descrebe o filme coma unha grande reimaxinación, unha história que se lle ocurriu mentres daba os retoques ao guión de The Unborn, e mentres procuraba balgo que ler atopou unha cópia do vello libro de Wells, e de contado xurdiu a idea.

Pero aí non remata todo: seica Goyer ten en mente a realización doutro filme, para o que xa conta cun guión. Será Super Max, centrado no clásico superheroe da DC Comics Frecha Verde.

«Aos estudos gustou-lle realmente o guión«, dixo Goyer na Comic-Con International de San Diego mentres promocionaba o seu novo filme de terror, The Unborn. «Frecha Verde é ún dos persoaxes do comezo deste fantástico verán… Sei que para a Warner Brothers, Frecha Verde é ún dos persoaxes nos que están realmente interesados e que seica queren ir adiante con el«.

O argumento de Super Max amósa-nos a Frecha Verde descuberto, coa súa identidade secreta revelada e prisioneiro nunha cárcere de máxima seguridade para superfalcatruáns. O seu obxectivo será fugar-se e limpar o seu nome.

A ideia do guión xurdiu primeiro para un persoaxe sen definir, polo que Goyer dixo que a ofreceu tanto á Marvel coma á DC Comics. No caso da Marvel, sería (de se facer o filme) o Capitán América, e no caso da DC foi finalmente Frecha Verde.

Goyer engadiu que a Warner está desexando escomezar este proxecto canto antes e mentres dure a onda de Iron Man, baseado tamén nun dos seus superheroes.