Anxos emo na Disney
A Disney Pictures ven de se facer cos dereitos para o cinema da saga de catro novelas para adolescentes de Lauren Kate Fallen.
A história, ambientada na actualidade, céntra-se nunha rapaza solitária que debe decidir entregar o seu amor a un de dous rapaces carismáticos, sen saber que ambos os dous son anxos caídos que levan séculos loitando por ela.
Agora que as histórias de vampiros e de lobishomes están a saturar o mercado da fantasía adolescente grazas a Twilight e os seus moitos clons, a ideia de incluir a anxos emos inmortais semella ser o mais novidoso que podemos agardar.
Mark Ciardi e Gordon Gray serán os produtores.
Alien Legion no cinema
Seica o produtor Jerry Bruckheimer (Transformers, Piratas do Caribe) e mais a Disney levan algún tempo tentando converter en longametraxe con acción real o cómic Alien Legion. Parte da prensa americana se fixo eco dun suposto guión para o filme que estaría nas mans dos escritores Derek Haas e Michael Brandt, a parella que xa fixo Wanted e 3:10 to Yuma.
Lanzado orixinalmente en 1984 como proxecto persoal polo creador Carl Potts, Alien Legion leva desenvolvendo após de si unha chea de seguidores que o converteron nun cómic de culto ao longo destes anos.
A série redefiniu o xénero de ciéncia-ficción militar, narrando históriasd de guerra e exploración espacial a través dos ollos dunha lexión estranxeira composta por alieníxenas que loitan a prol da Terra. A súa popularidade está probada polo feito de que é a série mais antiga do selo Epic Comics, creado nos anos 80 pola Marvel para acoller proxectos menores.
Cancelado Nemo
O filme da Disney Captain Nemo: 20,000 Leagues Under the Sea, que ía adaptar a clásica novela de Jules Verne, ven de ser cancelado. O proxecto, que tiña previsto escomezar a se rodar en febreiro, foi adiado de xeito indefinido e de feito o director McG xa abandoou esta tarefa.
Mália os rumores da participación de Will Smith, nunca se fixera pública unha lista de actores para o reparto, que sufre este atraso, se cadra definitivo, por mor da nova xeréncia que está ao fronte dos estudos: o troco de Dick Cook a Rich Ross quitou-lle prioridade a este proxecto e posíbelmente a algúns outros dos que saberemos nun futuro próximo.
Polo de agora, a nova máxima prioridade da Disney no tocantes a proxectos acuáticos é a cuarta entrega de Piratas do Caribe, que escomezará a se rodar en maio. O director de Chicago e Memórias dunha Geisha, Rob Marshall, ven de confirmar que el será o encarregado da realización deste filme.
Os herdeiros de Kack Kirby darán batalla
Os herdeiros de Jack Kirby, o lendário co-creador de case todos os persoaxes da Marvel Comics, coma o Capitán América, Os Catro Fantásticos, a Patrulla X, os Vingadores, Iron Man, Hulk, Silver Surfer e Thor, anunciaron que teñen intención de demandar á Marvel e mais á Disney coa intención de que se declare que os dereitos de autor sobre os persoaxes lles deben ser reintegrados a eles. A demanda incluirá ás produtoras que fixeron filmes e séries de televisión cos seus persoaxes, coma a Sony, a Universal, a 20th Century Fox ou a Paramount Pictures.
Coma no caso de Jerry Siegel, cuxos herdeiros veñen de gañar un preito polo que se lles recoñece a propriedade sobre o persoaxe de Superman, os herdeiros de Kirby desexan que os dereitos de autor sobre os persoaxes e polo tanto os benefícios xerados con eles regresen ás súas mans. Para elo, os herdeiros servirán-se dos mesmos avogados que xa obtiveron esta vitória no caso de Siegel. O despacho de Toberoff & Associates está especializado nestes casos e a súa sona nestes intres é inmensa após de gañar o caso contra a DC e mais a Warner.
As alegacións, se son xustificadas, permitirían que os dereitos regresasen aos herdeiros a partir de 2014. Mentres tanto, a Marvel e mais a Disney continuarían explotando eses dereitos nos cómics e nos filmes. A posibilidade que se abre é que os herdeiros de entren en negociacións coa Marvel e cheguen a un acordo que lles permita seguir publicando os cómics baseados no seu traballo.
Mentres viviu, Kirby loitou coa Marvel durante anos para que lle fose recoñecido o dereito á propiedade sobre alomenos o traballo físico que realizou (os debuxos en si mesmos), e se lle pediu que asinase documentos polos que renunciaba específica e irrevocábelmente aos dereitos de autor sobre os persoaxes, algo que sempre se negou a facer. Ademais, contribuiu á loita doutros creadores dentro da Marvel, coma Steve Gerber, co-creando Destroyer Duck xunto a Gerber nun libro adicado ao Pato Howard que ía no benefício destes artistas.
Nacido co nome de Jacob Kurtzberg, Jack Kirby está considerado coma o debuxante de superheroes mais salientábel do mundo, se ben traballou noutros xéneros de cómic, coma o romance, os cómics de guerra e os de ciéncia-ficción. O seu traballo dentro da DC tamén proporcionou moito para poder facer o recente éxito de vendas da série Final Crisis da DC. Actualmente, a editorial Dynamite, de acordo cos herdeiros de Kirby, está a traballar nunha nova liña de persoaxes deste autor, o “Kirbyverso”, publicando persoaxes que nunca apareceron nin na Marvel nin na DC.
Jack Kirby finou en 1994, deixando catro fillos, Susan, Neal, Barbara e Lisa, e dous netos, Jeremy e Tracy.
Disney e Del Toro alían-se
A Walt Disney, en colaboración co director Guillermo del Toro (O Labirinto de Pan, O Hobbit), van lanzar unha nova produtora chamada Double Dare You e que se adicará a crear novos filmes de debuxos animados con histórias de medo dirixidos a todas as audiéncias, segundo anunciou hoxe Dick Cook, presidente dos estudos Walt Disney.
Todos os filmes producirán-se baixo a supervisión de del Toro, que é o autor do concepto orixinal e mais do deseño da DDY. Del Toro ademais podería dirixir algúns proxectos persoalmente. O primeiro deles levará por título Trollhunters, unha história creada polo director mexicano que será o produtor.
En mareas extrañas
O maior e probábelmente millor anúncio realizado na recente exposición D23 da Disney Pictures deste ano foi un simples título: o venres a compañía fixo saber que a cuarta entrega da saga de Piratas do Caribe levará por título Pirates of the Caribbean: On Stranger Tides e que xa conta oficialmente coa data de verán de 2011 para a súa estrea mundial.
Non lle levou moito tempo á prensa relembrar unha novela do escritor fantástico Tim Powers titulada precisamente On Stranger Tides e que casualmente vai sobre un pirata chamado Jack Shandy que se ve inmerso nunha carreira contra o lendário pirata Barba Negra e mais a súa tripulación de vivos e mortos para chegaren os primeiros á Fonte da Xoventude.
A Fonte da Xoventude é precisamente a pista final da derradeira escena de Piratas do Caribe 3: Na Fin do Mundo, o que fai que a conexión entre este libro e mais a cuarta parte da saga cinematográfica sexa bastante óbvia.
A novela de Powers inclúe elementos coma loitas con espadas, batallas mariñas, e mais un amor en prisión e mesmo convertido en monicreque.
A fita está definitivamente aprobada e conta con Johnny Depp novamente como protagonista no papel do capitán Jack Sparrow. Para rebaixar un pouco o orzamento, nin Orlando Bloom nin Kiera Knightley regresarán á história, de non ser que conten con algún cameo. Tamén é de agardar que regrese Geoffrey Rush coma o capitán Barbossa, se ben isto ainda non está confirmado.
A Disney compra á Marvel
A Walt Disney Company ven de anunciar un acordo para comprar á Marvel por preto de 4.000 millóns de dólares (uns 2.800 millóns de euros) en accións e cartos en metálico, co que se convirten nos propietários dos dereitos dos persoaxes do cómic mais populares da actualidade: Iron Man, Spiderman, a Patrulla X, o Capitán América e até 5.000 persoaxes mais.
Os accionistas da Marvel recibirán 30 dólares por acción e preto de 0,745 títulos da Walt Disney por cada acción que tiveran da compañía de cómics, asegurou a Disney nun comunicado distribuido o luns. A Disney realiza esta compra despois de que os filmes baseados nos persoaxes da Marvel se converteran en grandes éxitos no despacho de billetes.
Ambas as duas empresas anunciaron que os seus respectivos consellos de administración xa aprobaron a operación, que valora cada título da Marvel en 50 dólares (menos de 35 euros), o que supón unha prima do 29% respecto dos 38,65 dólares aos que pechou o vernes na Bolsa a compañía de cómics. As bolsas por certo recebiron o acordo con reaccións ben diferentes coma erade agardar: as accións da Disney cairon un 1,9% en Wall Street mentres que as da Marvel subían un 26%.
“Coidamos que a suma da Marvel á carteira única de marcas da Disney aportará sinificativas oportunidades de crecemento a longo prazo e de creación de valor“, asegurou hoxe o máximo responsábel executivo da Disney, Robert Iger, ao anunciar a operación.
Pola sua banda, o director executivo da Marvel, Ike Perlmutter, dixo que “a Disney é o fogar perfecto para o arquivo de persoaxes da Marvel, dada a sua probada habilidade para ampliar a creación de contidos e emprendementos“, e engadiu que “esta é unha oportunidade sen precedentes para a Marvel“.
Volve o vóo do Navigante
A Disney ten pensado facer un remake do seu filme de 1986 de ciéncia-ficción Flight of the Navigator (O vóo do navigante), e paralelo xa conta con Brad Copeland para escribir o guión. O remake será producido polos parceiros da Mandeville David Hoberman e Todd Lieberman.
O filme orixinal narrabaa história dun rapaz de 12 anos que era abducido por unha nave espacial extra-terrestre en 1978 e que reaparecía oitos anos mais tarde, ainda coa mesma idade pero sen recordos do que lle aconteceu. Os científicos da NASA descubren unha conexión entre o rapaz e unha nave que se estrelara anteriormente e tentan explotar as novas habilidades do rapaz, que fuxe na astronave e tenta reunir-se coa súa família.
O filme recadara tan só 17 millóns de dólares nos despachos de billetes cando se estreou, pero posteriormente obtivo moito éxito grazas ao vídeo, chegando a se converter nun clásico do cinema dos 80.
Copeland é o autor do guión de Wild Hogs (Porcos Salvaxes) para a Disney e arestora está a escribir o libreto de Nightcrawlers para a Warners.
Non sería bonito?
A Disney ven de se facer cos dereitos cinematográficos de Wouldn’t It Be Nice, unha comédia familiar de ciéncia-ficción baseada nun guión da equipa formada por Barry Blaustein e Jason Hefter. Andrew Gunn producirá a través da súa compañía, a Gunn Films.
A história vai sobre unha parella de adolescentes que, xusto antes de levar a cabo os seus plans de fuxir xuntos a perseguir os seus soños, son transportados máxicamente vinte anos no futuro, onde descubren que as súas vidas non sairon tal e coma planeaban. Con mais de trinta anos pero con mentalidades de adolescente e tentando sacar adiante a tres fillos pequenos, aprenderán que non eran tan maduros coma coidaban ser.
Todo semella indicar que será un filme prescindíbel cheo de moralina e baseado na canzón orixinal do mesmo nome dos Beach Boys.
O ataque dos monstros
Andy Fickman (Race to Witch Mountain) será o director do filme familiar de aventuras Monster Attack Network para a Disney Pictures.
A novela gráfica na que está baseado este filme, publicada en 2007, vai sobre un grupo de soldados que protexen aos cidadáns de Lapuatu, unha illa do Pacífico que sería un paradiso de non ser polos frecuentes ataques de xigantes mariños que xurden do fondo do mar.
Scott Elder e Josh Harmon adaptará a novela gráfica orixinal de Marc Bernardin e Adam Freeman nunha longametraxe de alto orzamento e con moitos efectos especiais e nela a illa do Pacífico será sustituida polas costas dos Estados Unidos e o grupo de soldados por unha axéncia secreta do Governo.
