Don Quixote non está tolo
A Warner Bros. Pictures e mais o produtor Joel Silver están a desenvolver unha nova adaptación do clásico de Miguel Cervantes Don Quixote orientado á acción.
Silver planea de feito un filme coa fasquía de Piratas do Caribe, coa ideia de que o Quixote non estaba realmente tolo, e que polo tanto existe de verdade un mundo fantástico após das súas aventuras.
O proxecto semella estar na lanzadeira de saída para o ano 2012 e a ideia é que poida converter-se nunha longametraxe de alto orzamento estilo Sherlock Holmes.
As novas chegan precisamente mentres que Terry Gilliam comeza a facer algúns progresos na súa segunda intentona de realizar The Man Who Killed Don Quixote, outra adaptación do meirande clásico das letras españolas.
McGregor en Don Quixote
Ewan McGregor (Obi Wan Kenobi nas tres primeiras entregas da Guerra das Galáxias) ven de se unir ao reparto do proxecto mais gafado e paixonal de Terry Gilliam, The Man Who Killed Don Quixote.
Gilliam xa tentara rodar unha película cun orzamento de 53 millóns de dólares protagonizado por Johnny Depp en 2000, pero a rodaxe, que se fixo na rexión española d’A Mancha, converteu-se nun desastre e non puido chegar a se rematar. Dez anos despois, Gilliam quere intenta-lo unha vez mais, se ben esta vez cun orzamento de só 20 millóns.
Se a história é a mesma, McGregor fará o papel que ía tomar Depp dun executivo de publicidade que viaxa no tempo até a España do século XVII e fica atrapado nas aventuras de Don Quixote. Robert Duvall xa foi contratado para interpretar ao cabaleiro andante, un papel que ía facer Jean Rochefort no filme orixinal.
A rodaxe está prevista para escomezar no mes de setembro.
Gilliam téntao de novo
Mentres o derradeiro filme no que participou Heath Ledger, The Imagnarium of Doctor Parnassus, xa está rematado e listo para a estrea, o seu director, Terry Gillian, xa comeza a mirar cara o seu seguinte proxecto… ou se cadra, cara ao anterior.
“Tony [Grisoni] e mais eu escomezamos a reescribir Don Quixote esta mesma semana pasada. Por fin temos de novo o guión. Relín o millor dos guións que tiñamos escritos e decatei-me de que había que reescribi-lo! Realmente quero escomezar con todo isto para o mes que ven ou así“, dixo Gillian (12 Monos, Time Bandits).
Hai uns dez anos Gilliam e Grisoni (Medo e Noxo en Las Vegas) escribiron O Home que matou a Don Quixote (“The Man Who Killed Don Quixote”), un intento orixinal de filmar o clásico de Cervantes. Pero a produción só puido aturar unha semana de rodaxe antes de se cancelar por mor de vários desastres, dende accidentes dos actores que resultaron feridos até inundacións no plató de rodaxe e interferéncias das forzas aéreas españolas sobre o ceo da Mancha onde se estaba a filmar.
Os problemas en si mesmos foron filmados e amosados con grande detalle nun documental que se titulou Lost In La Mancha. Após de moitos problemas legais e reclamacións ás compañías de seguros, os dereitos sobre o guión do Quixote por fin reverteron á parella.
Gilliam ainda desexa facer o proxecto e agarda poder filma-lo a finais de este ano. “Estou comenzando a crér que tiven sorte, porque se cadra o filme será millor agora que hai sete anos“, dixo.
A Pixar prepara Don Quixote
Os últimos rumores pola Rede, e especialmente o blog Upcoming Pixar, que informa de todo o que rodea aos famosos estudos de cinema americanos de animación, afirma que Up, un filme baseado na novela de Cervantes Don Quixote da Mancha, será unha das vindeiras películas da casa.
O clásico de Cervantes tivo xa várias adaptacións ao cinema, ainda que ningunha delas tivo éxito. É máis, esta obra mestra da literatura española ten certo aura de maldita no cinema, por mor dos proxectos fallidos de Orson Welles ou Terry Gilliam, que non chegaron a completar as suas películas.
Precisamente este nadal estreou-se en Galiza Donkey Xote, un filme en animación 3D da produtora galega Filmax dirixida por José Pozo. A fita, unha libre adaptación do clásico castelán, narra a historia de Don Quixote e Sancho Panza a través dos ollos do seu cabalo e o seu burro.
Un dos directores de Monstros S.A, Pete Docter, sería o responsábel de Up, cuxa data de estrea sería o 12 de xuño de 2009.
