A Dreamworks enméiga-se
A Dreamworks Pictures ven de se facer cos dereitos para o cinema sobre Wicked, unha série de cinco novelas para adolescentes orixinal de Nancy Holder e Debbie Viguie.
A história vai sobre unha rapaza que descubre que é a descendente dun poderoso aquelarre de bruxas, pero axiña terá problemas ao ficar namorada dun rapaz que resulta ser membro dun aquelarre rival.
Os irmáns Aaron e Matthew Benay serán quen escriban o guión desta adaptación, cuxo derradeiro tomo da saga aínda chegou ás librarías este mesmo verán.
A Dreamworks planea os Dinocamións
A DreamWorks Animation ven de se facer cos dereitos para adaptar á pantalla grande do libro para nenos Dinotrux.
Escrito por Chris Gall, este libro de á penas 32 páxinas ten lugar nunha era prehistórica fictícia, cando o mundo estaba governado polos Dinotrux, unhas criaturas médio camións (truck, en inglés) e médio dinosáuros, con espécies coma o Craneosauraus, o Garbageadon e mais o Tyrannosaurus Trux, que movían a terra e derrubaban coma as máquinas de construción de hoxendía.
A Dreamworks desexa converter esta propiedade nun filme de debuxos animados por computador con criaturas que poidan falar e asegurar-se unha nova franquía de éxito.
DreamWorks, volcada coas secuelas
A DreamWorks Animation, a factoría que todos os anos compete co binómio Disney-Pixar para lanzar o filme de animación do ano, prepara un auténtico aluvión de secuelas dos seus personaxes mais emblemáticos e recadadores.
Así, a produtora xa traballa en Shrek goes fourth, a cuarta entrega do ogro mas popular da história que verá a luz en 2010, e en Madagascar 3 que se estreará en 2012. E entre meias está previsto tamén que se estree a secuela doutro dos seus éxitos mais recentes, Kung Fu Panda, unha das nominadas ao Globo de Ouro ao mellor filme de animación do ano.
Foi o máximo responsábel de DreamWorks Animation, Jeffrey Katzenberg o que durante a promoción da que será a sua próxima creación Monstros contra Alieníxenas, que chegará a España en abril do próximo ano, confirmou o aluvión de secuelas que preparan para encher os cines os próximos anos. En declaracións á prensa revelou que a cuarta entrega de Shrek non será unha secuela se non unha precuela que relatará como o ogro mais célebre do celuloide comezou a vivir na sua suxa e añorada ciénaga.
Encanto a Madagascar 3, avanzou que nesta nova aventura Marty a cebra, o león Alex, Melman a xirafa, Glória o hipopótamo, o Rei Julien e os graciosos pingüinos farán o camiño de volta e tornarán ao seu fogar, o zoo de Central Park. Ademais, sobre a segunda entrega de Kung Fu Panda, o directivo de DreamWorks segurou que a secuela non será o último filme protagonizada por Po que se converterá na estrela de outra hipertaquilleira saga de animación.
Se repasamos as cifras de despacho de billetes é evidente atopar o porque DreamWorks se volca cos seus personaxes mais coñecidos. A terceira entrega de Shrek atinxiu unha recadación global de 793 millóns de dólares, menos cós 920 millóns de dólares que logrou Shrek 2 aos que hai que somar os 480 millóns do seu debut.
Tres auténticos éxitos que converten ao ogro verde da DreamWorks na saga de animación mais exitosa da história. Pola sua parte, Kung Fu Panda superou os 600 millóns en despacho de billetes e con Madagascar 2 xa levan recadados mais de 300 millóns de dólares en todo o mundo.
Os Fillos da Lámpada
Mentres que cada estudo de Hollywood está á procura do seu vindeiro Señor dos Anéis ou dun Harry Potter que levar á boca, a DreamWorks, após de se facer cos dereitos para o cinema, vai tentar converter a série de libros Children of the Lamp de Philip B. Kerr na franquía que lles dea o éxito e mais os cartos. Lee Hall escribira un esbozo de guión antes de que escomezara a pasada folga de guionistas, pero agora teñen a tarefa de converte-lo nun guión completo, para o cal seica xa confiaron en Dave Guion e Michael Handelman. Ainda non hai un director vencellado para este proxecto, que tampouco conta coa luz verde para escomezar o desenvolvemento.
Children of the Lamp é unha série de catro libros que trata dunha família de dijinn (unha espécie de xénios das tradicións árabes) que se disfrazan de seres humanos, pero ainda poden conceder-lles desexos. A história céntra-se en dous dijinn xemeos, John e Philippa Gaunt (coma dos descendentes de Guillermo o Conquistador) e o desafío que suporá para eles adaptar-se no mundo da máxia e da concesión de desexos. Mentres afinan as súas habilidades, deberán anfrontar-se aos poderes do mal, para manter un balance entre as forzas do Ben e do Mal. As súas aventuras levarános dende o seu fogar natal en Manhattan até os nevados cúmios das montañas de Nepal.
Spielberg adquire 39 Pistas
Dreamworks, a produtora de Steven Spielberg, ven de adquirir os dereitos para o cinema de The 39 clues (As 39 pistas), unha série de 10 libros xuvenís de xénero fantástico. Disque Spielberg está a se prantexar dirixir el mesmo a versión cinematográfica. Polo de agora está a procura dun guionista.
The 39 clues é un proxecto de 10 libros, editados pola misma editorial que publicou a saga completa de Harry Potter, e que conta cuns persoaxes fixos, pero escritos por diferentes autores. O primeiro, The maze of bones de Rick Jordan, publicará-se en setembro. Tráta-se dunha história multimédia, que inclúe cartas coleccionábeis e mais un xogo online, no que os nenos teñen que resolver un mistério, cun prémio final de 10.000 dólares (6.200 euros).
A história de 39 clues céntra-se nos Cahills, a família máis poderosa do mundo, entre cuxos membros están Napoleón ou Houdini. Dous nenos investigan 39 pistas, repartidas por diversos países, co fin de atopar a orixe do poder dos Cahill. Precisamente os lectores deben seguir 39 pistas, que irán aparecendo nos libros, para gañar o prémio.
A Dreamworks sénta-se na Mesa Redonda
Brian K. Vaughan é un dos responsábeis da série Perdidos e un dos guionistas de cómics de moda na actualidade grazas a creacións coma Y: The Last Man, Runaways, Ex Machina ou Ultimate X-Men.
Agora Vaughan vendeu o seu guión Roundtable (Mesa redonda), unha comédia fantástica baseada na lenda do Rei Artur. A Dreamworks ven de pagar case un millón de dólares (630.000 euros) por unha história pola que se querían facer algúns dos grandes estudos de Hollywood.
Roundtable narrará como o Meigo Merlín ve-se obrigado a recrutar, para combater a un demo, a un grupo de cabaleiros… vidos da época actual. A decepción do Meigo será enorme cando comprobe que os persoaxes recrutados dende o século XXI, atletas famosos, científicos e actores, non son precisamente grandes guerreiros.
Spielberg en Ghost in the Shell
A produtora de Steven Spielberg, a DreamWorks, ven de adquirir os dereitos sobre o manga xaponés Ghost in the Shell e planea converter este thriller co seu mundo futurista nun filme en 3D con acción real.
A história, todo un clásico para os afeccionados ao manga e ao anime, vai sobre un membro dunha unidade de elite policial xaponesa especializada en perseguir os crimes que teñen relación coa alta tecnoloxía.
Creado por Masamune Shirow, Ghost in the Shell foi publicado por primeira vez en 1989. Pasou por dúas edicións en formato manga, tres películas de animación (anime), unha série de televisión e tres videoxogos. O segundo filme, Ghost in the Shell 2: Innocence, non chegou aos Estados Unidos até 2004, e foi precisamente da man da Dreamworks.
Ari Arad e Steven Paul da Seaside Entertainment serán os encargados da produción e de mercar o proxecto para os estudos. Jamie Moss foi contratada para escribir a adaptación.
A Dreamworks descubre Atlantis
A DreamWorks ven de se facer cos dereitos do cómic da editorial Platinum Studios Atlantis Rising para converte-lo nunha longametraxe con acción real que será producida polos guionistas de Star Trek Alex Kurtzman e Roberto Orci. O presidente da Platinum e mais o CEO Scott Mitchell Rosenberg tamén serán os produtores.
Creada por Rosenberg, Atlantis é unha minisérie de cinco episódios publicada pola Platinum Studios Comics no pasado mes de novembro. A quinta e derradeira entega da série, escrita por Scott O. Brown e debuxada por Tim Irwin e Andy Elder, aparecerá nos andeis das librarías a finais deste mes.
O argumento vai sobre perturbacións sísmicas no mar que obrigan aos militares do mundo a investigar a parte máis profunda do océano, onde unha civilización agocha emerxerá para lle declarar a guerra ao planeta Terra.
Atlantis é a segunda compra que lle fai a DreamWorks á Platinum. DreamWorks, xunto coa Universal, fíxo-se cos dereitos de Cowboys and Aliens o ano pasado e está a desenvolver este western de aventuras de ciéncia-ficción con Kurtzman e Orci e mais a Imagine Entertainment.
Kurtzman e Orci están traballando en Transformers 2 e veñen de se xuntar co director de Star Trek, J.J. Abrams, para producir o telefilme da canle Fox Fringe, que será un episódio piloto de dúas horas para unha nova série de televisión.
A DreamWorks aposta polo Paranormal
A DreamWorks ven de adquirir os dereitos sobre o filme independente do director Oren Peli Paranormal Activity, unha película que vai sobre casas enmeigadas, rodado cunha cámara de man e feito cun orzamento moi limitado. No recente Slamdance Film Festival, que corre paralelo ao cada vez máis poderoso de Sundance, recebiu moi boas críticas cando foi exhibido. Ainda que o filme será distribuido internacionalmente pola IM Global, será lanzado nos Estados Unidos directamente ao mercado do DVD.
Nado e criado en Israel, Peli chegou aos Estados Unidos aos 19 anos e comezou unha carreira de programador de videoxogos antes de se converter en director de cinema. Rodou Paranormal Activity no prazo dunha semana cunha cámara de alta definición na súa própia casa e con dous actores descoñecidos, Katie Featherstone e Micah Sloat, quen á súa vez tiveron que manexar a cámara a maior parte do tempo.
