Debutará Ledger en Cannes?
O derradeiro filme de Heath Ledger, a longametraxe fantástica que dirixiu Terry Gilliam The Imaginarium of Doctor Parnassus, por fin poderá debutar internacionalmente grazas ao festival de cinema de Cannes a mediados de maio.
O filme terá que agardar de todos os xeitos até meiados de outono para a súa estrea oficial, que está a custar moito porque non dá atopado un distribuidor nos Estados unidos; a súa aparición nas pantallas de Cannes daría aos médios de comunicación e mais aos fans a posibilidade de contemplar esta película por primeira vez. A rodaxe tivera, como ben lembraredes, moitos problemas, xa que cando Ledger finou inesperadamente en xaneiro de 2008, o seu papel tivo que se adaptar ás novas circunstáncias, e así, Johnny Depp, Colin Farrell e Jude Law tiveron que se encargar de facer as partes do mesmo que ainda non se rodaran.
O filme vai sobre unha feira ambulante que lle dá aos seus clientes moito mais do que seica mercaron. Coma case todos os filmes de Gilliam (12 Monos, Brazil, Time Bandits), tivo unha produción moi longa e chea de dificultades e que se prolongou durante moitos meses mais do inicialmente agardado.
Benjamin Button aos Oscars
O curioso caso de Benjamin Button lidera as nominacións aos Oscar de Hollywood con 13 candidaturas, entre as que se inclúen as de millor filme, segundo ven de anunciar hoxe mesmo a Académia de Cinema dos Estados unidos. O filme acadou ademais nominacións ao millor actor, para Brad Pitt, á millor actriz, para Taraji P. Henson, e ao millor director, David Fincher.
O gañador póstumo do Globo de Ouro Heath Ledger, pola súa banda, acadou unha nominación ao millor actor secundário polo seu papel do Joker no filme O Cabaleiro Escuro. A aclamada secuela de Batman non puido facer-se con máis nominacións ás categorías mais salientábeis dos Oscar, ainda que era unha das grandes favoritas a millor filme e millor director, e tivo que se contentar cunha chea de nominacións a Oscars de menor calado, coma a millor realización, efectos especiais e edición.
A ciéncia-ficción, a fantasía e o sobrenatural ficaron coma adoita ser habitual iñorados polos membros da Académia entre as categorías importantes. Iron Man e Hellboy II: O Exército Dourado acadaron nominacións en categorías de tipo técnico.
Os que si tiveron algo mais de sorte foron os filmes de debuxos animados, xa que entre os nominados hai tres de xénero fantástico: Bolt, Kung Fu Panda e WALL-E.
WALL-E ademais acadou unha nominación ao millor guión orixinal, algo que non é nada habitual para un filme de debuxos animados, e outra nominación para a millor canzón orixinal.
A cerimónia de entrega dos Oscars terá lugar o vindeiro 27 de febreiro en Hollywood, Califórnia.
Globos de Ouro fantásticos
Tal e coma se agardaba, o defunto Heath Ledger gañou o prémio ao millor actor secundário na gala dos Globos de Ouro celebrada o domingo en Beverly Hills, Califórnia, pola súa diabólica representación do Joker no filme superéxito Batman O Cabaleiro Escuro.
Este prémio fai que as posibilidades de Ledger de gañar o Oscar ao Millor Actor Secundário se disparen cara ás nominación para as estatuíñas da Académia de Hollywood, que se darán a coñecer este día 22, precisamente o aniversário da morte accidental do actor por mor dunha sobredose de drogas.
O prémio do Globo de Ouro foi recollido polo director de O Cabaleiro Escuro Christopher Nolan, que dixo que tanto el coma os seus colaboradores estaban abraiados polo grande éxito do filme e pola aclamación da interpretación de Ledger en todo o mundo.
Entre os outros gañadores do xénero fantástico estiveron WALL-E, que levou o prémio á millor película de debuxos animados. O director Andrew Stanton agradeceu o prémio á produtora, Pixar Animation, e mais á distribuidora, a Walt Disney, decindo que a história de amor que se debuxa no filme entre dous robots comunicada con asubíos e chasquidos “non podía ser feita por ninguén mais“.
Anna Paquin, pola súa banda, gañou o Globo de Ouro á millor actriz nunha série de televisión dramática polo seu papel coma protagonista de True Blood.
Piden o Oscar para Heath Ledger
Mentres se achega a data de entrega dos Oscars, a Warner Bros continúa a intensificar a súa campaña a prol de que Heath Ledger, o finado actor que interpretou ao Joker en O Cabaleiro Escuro, a última entrega da saga de Batman, sexa ún dos nominados na categoría de millor actor secundário.
A Warner publicou no último número de Variety, a revista senelleira do sector cinematográfico, unha páxina de publicidade lembrando o grande traballo de Ledger no filme. Para elo cita un comentário do crítico de Time, Richard Corliss, ún dos que mais sona teñen nos Estados Unidos.
Os votos para as candidaturas ao Oscar serán enviados á Académia entre o 26 de decembro e o 12 de xaneiro. Os finalistas en cada categoría serán anunciados o 22 de xaneiro.
De ser nominado, non sería a primeira vez que acontece que un morto é finalista e mesmo gañador. O primeiro foi Sidney Howard, polo guión de Foi-se co vento (1939).
Podería Cher interpretar a Catwoman?
A cantante e actriz de 62 anos de idade Cher é seica unha das máximas candidatas para interpretar a Catwoman coma principal inimiga de Christian Bale na terceira entrega da saga de Batman que está a ofrecer o director inglés Christopher Nolan.
Cher, gañadora dun Oscar, uniría-se asemade a un reparto no que xa figuran Johnny Depp no papel do Riddler. O persoaxe de Catwoman, unha ladrona que ten un látigo como arma, xa foi interpretado anteriormente por Michelle Pfeiffer e Halle Berry en diversas etapas e filmes.
Un executivo dos estudos Warner Bros. dixo: “Cher é a primeira elección de Nolan para interpretar a Catwoman. El quere retrata-la coma unha vampiresa nos seus anos crepusculares. Pero a nova Catwoman será o contrário completo das creacións ronroneantes de Michelle Pfeiffer e Halle Berry“.
O comezo da rodaxe da nova entrega de Batman, que polo de agora leva o título de traballo de The Caped Crusader [O cruzado con capa], está previsto para primeiros do ano que ven en Vancouver (Canadá).
O Cabaleiro Escuro, o grande éxito nos despachos de billetes deste verán, xa é oficialmente o filme de máis éxito na saga de Batman. A Warner Bros ten a intención de chegar aos 530 millóns de dólares de recadación (uns 360 millóns de euros).
O Cabaleiro Escuro está protagonizado polo defunto Heath Ledger, que apareceu morto no seu apartamento de Manhattan por mor dunha sobredose de drogas. A súa interpretación do malvado Joker podería mesmo gañar a título póstumo unha nominación aos Oscar.
A aparición máis recente de Cher nas pantallas grandes foi Tea with Mussolini en 1999 e Stuck on You, en 2003, na que se interpretaba a si mesma. A súa única incursión polo de agora no cinema fantástico foi en As bruxas de Eastwick en 1987.
Gyllenhaal apoia o Oscar para Ledger
Maggie Gyllenhaal ven de apoiar a campaña para que lle sexa concedido un Oscar honorífico a título póstumo ao seu compañeiro no filme O Cabaleiro Escuro, Heath Ledger.
Christian Bale e Sir Michael Caine xa apoiaran anteriormente os chamamentos para que Ledger reciba unha estatuíña na vindeira gala dos prémios da Académia pola súa interpretación do Joker e Gyllenhaal coida que Ledger merece un prémio porque o seu papel serviu de inspiración para outros actores.
Gyllenhaal dixo á prensa que “para ser un bó actor tes que atopar un lugar onde ser libre, pero é moi raro ser absolutamente libre do xeito que el o foi neste filme“. E engadiu: “Foi inspirador traballar conel. Foi un grande pracer. Dalgún xeito sinto que é divertido pensar en Oscars cando non está vivo, pero ao mesmo tempo son un membro da Académia e votaría por el“.
Heath Ledger finou o pasado mes de xaneiro, pouco despóis de rematar o seu traballo en O Cabaleiro Escuro, por mor dunha sobredose de droga mentres se atopaba nun hotel.
Tres actores e un papel
Confirmando un rumor que levaba tempo dando voltas pola Rede, axéncias de novas internacionais veñen de informar que Jude Law, Johnny Depp e Colin Farrell aparecerán os tres facendo o papel do defunto Heath Ledger no filme por rematar de Terry Gilliam The Imaginarium of Doctor Parnassus.
Os tres actores interpretarán o papel de Tony neste filme fantástico, que Ledger deixou inconcluso mentres o rodaba até que finou en xaneiro pasado. Ainda non está moi claro de que xeito poderán entrar os tres actores nun mesmo papel.
A rodaxe deste filme rematara en Londres e viña de se mudar a Vancouver, Canadá, cando foi suspendido por mor do pasamento de Ledger.
The Imaginarium of Doctor Parnassus descríbe-se coma un conto fantástico sobre unha compañía de teatro que pode controlar a imaxinación dos demáis.
O novo Joker morreu
Heath Ledger, quen interpreta ao Joker na vindeira peleícula da saga de Batman, The Dark Knight, foi atopado morto o pasado 22 de xaneiro nunha casa en Manhattan, por mor posébelmente dunha sobredose de drogas, segundo desvelou a Policía de New York nun primeiro intre. Ledger tiña 28 anos.
O voceiro da Policía, Paul Browne, dixo á Prensa que Ledger tiña unha cita para unha masaxe nun apartamento de Manhattan. O porteiro do edifício foi quen atopu morto ao actor ás 3:26 horas do serán.
O actor australiano gañara unha nominación ao Oscar polo seu papel de vaqueiro gai en Brokeback Mountain e tiña moitas outras grandes actuacións ás súas costas.
Ledger viña de rematar o papel do malvado Joker na vindeira secuela de Batman, que dirixe Christopher Nolan, e que está prevista para se estrear en xullo. Últimamente estaba a rodar The Imaginarium of Doctor Parnassus en Inglaterra baixo as ordes do director Terry Gilliam.
Lér máis
