James Bond, suspendido
Hai un poucos meses que o desenvolvemento da 23ª película da saga de James Bond foi paralisada indefinidamente pola EON Productions, polo menos até que as finanzas da MGM se aclarasen un pouco.
E dende aquela non temos nin unha soa nova mais. Excepto que esta semana dous informes aparecidos na prensa inglesa anunciaban que fontes internas dos estudos afirman que o proxecto non está no limbo, senón directamente morto.
Pero pola súa banda, a EON quere manter o tema dentro dunha vaguedade ben calculada, sen confirmar oficialmente a cancelación do proxecto e sen suxerir que non haxa novas nesta história: “Non sabemos cando se continuará o proxecto e non podemos comentar ren mais neste intre“.
O que sinifica todo isto? Pois que non hai moitas cousas novas que dicir. Para escomezar, Sam Mendes xa non será o director? É moi probábel. Os problemas da MGM manterán-se ao longo dos vindeiros meses como mínimo e Mendes non pode estar agardando a que rematen.
E o que acontece co guión de Peter Morgan? Iso tamén é incerto pero seica xa non podemos contar con el. Todos os anteriores esbozos de guión presentados para todos os filmes da saga de James Bond pasaron por importantes graos de reescritura. Hai pouco soubo-se ao respecto do filme dos anos 90 O Mañá nunca morre que durante o desenvolvemento do proxecto titulou-se Shatterhand e que nel aparecía un doutor malvado que usaba armas químicas e que pretendía evitar que Inglaterra devolvese a súa colónia de Hong Kong aos chineses en 1996. Como é óbvio, nada disto chegou ás pantallas nunca, polo que xa podemos imaxinar como de grande foron as modificacións no guión final.
Daquela está morto James Bond? Para nada. A pregunta non é se a franquía está morta ou vai desaparecer, senón de que xeito regresará ás pantallas. Sendo unha das sagas mais lucrativas da história do cinema, é mais ca dubidoso que os problemas nos estudos que a producen sexan abondo para matar ao superespía ao servizo da Súa Maxestade Británica.
Nombergantes, o tempo segue pasando e cada vez é mais seguro que Daniel Craig deixará de ser James Bond e que será sustituido após de tan só dúas películas interpretando ao persoaxe, a primeira delas con moito éxito e a segunda non tanto. Pero como pode testemuñar Timothy Dalton, non sería a primeira vez que o actor que dá vida a 007 marche antes de tempo.
Atrasos na MGM
Peter Jackson ven de confirmar que os problemas da MGM terán un impacto directo na adaptación ao cinema da novela de J.R.R. Tolkien O Hobbit.
Preguntado sobre o atraso na rodaxe até o final de ano, Jackson respondeu decindo que os estudos ainda non lle deron luz verde ao proxecto e que mália todas as especulacións, nunca houbo unha data oficial de lanzamento do filme. O cásting non pode escomezar até que se aprobe o proxecto, e iso é algo que non acontecerá até que alguén merque á MGM ou os estudos pasen por unha profunda reestruturación dalgún xeito.
Pero todos estes problemas non detiveron a Jackson de seguir traballando no guión do segundo filme. O director e produtor revelou que “vimos de entregar o guión. Literalmente a semana pasada, entregamos o segundo dos dous guións, o primeiro esbozo. Así que os estudos xa teñen os dous guións, o que é un fito; e se había algo polo que estabamos a agardar, era por nós a que remataramos os guións, porque estivemos a escribir os mais rápido que puidemos, pero levou-nos todo este tempo poder remata-lo. Así que aceptamos calquera responsabilidade que haxa pola velocidade“.
Asi que como están as cousas agora? Jackson di que “estamos no proceso de presupostar os filmes, e logo esperamos poder chegar a un orzamento co que a xente dos estudos estea contenta, e que lle dean a luz verde ás películas e anunciemos as datas de rodaxe. Estaría contento de poder rodar antes de finais de ano. Imaxinaría outubro, novembro, que esteamos por aló de rodaxe. Pero eu non vou anuncia-lo“.
Por outra banda, pouco despois de que Jackson anunciase este atraso, os produtores da saga de James Bond Michael G. Wilson e Barbara Broccoli dixeron practicamente o mesmo sobre a vindeira entrega de 007.
O traballo no filme ficou paralisado por parte da EON Productions após de que a Metro fracasara no seu intento de atopar un comprador. O protagonista Daniel Craig dixo que ten confianza nos produtores e que agarda que se continúa axiña a rodaxe.
A produción estaba prevista para se estrear en novembro de 2011, pero de continuar a paralisación, o atraso podería afectar á data de estrea.
Mendes dirixirá a 007?
Todo semella indicar que o director inglés Sam Mendes (Revolutionary Road, Jarhead) está en negociacións para se encargar da realizacion da 23ª entrega da saga de James Bond.
Mália que nun primeiro intre anunciara-se que podería haber un adiamento nesta franquía por mor dos problemas financeiros da MGM, que está á venda, seica os plans para este filme seguen adiante e mesmo podería escomezar-se a rodaxe a mediados de verán. A Metro ainda non confirmou ren de todo isto.
En declaracións anteriores, o produtor Michael Wilson revelara á prensa que “a nosa axenda está un pouco no aire coa situación da Metro Goldwyn Mayer, así que temos que ser flexíbeis. Simplemente non sabemos abondo sobre a situación para poder comenta-la, pero sabemos que é incerta“.
As novas chegan pouco despois dos comentários escoitados ao guionista Peter Morgan, que está a traballar no guión deste filme, e que indicou que o atraso era inevitábel. A MGM espera que lle comecen a chegar as primeiras ofertas de compra nas vindeiras semanas.
A principal preocupación é que se regrese ao problema legal que en 1989 rematou con seis anos de pausa na saga, e que impediu rodar mais filmes desta franquía até que regresou en 1995 con Goldeneye e cun novo James Bond, Pierce Brosnan.
O que si que é oficial é que os guionistas habituais de Bond Neal Purvis e Robert Wade volverán a se encargar do libreto, xunto ao autor de Frost/Nixon, Peter Morgan. Coma sempre, Michael Wilson e Barbara Broccoli serán os produtores, mentres que Daniel Craig repetirá o seu papel como axente 007. Craig e Mendes xa traballaran anteriormente xuntos no filme de 2002 Camiño á Perdición.
Problemas graves na MGM?
O bombazo desta semana estivo protagonizado por un rumor aparecido en vários médios de comunicación e segundo o cal a MGM Pictures está por crebar.
Segundo fontes internas, os estudos do león precisarían 20 millóns de dólares de contado para facer fronte a diversos pagos inminentes, e outros 150 millóns para poder rematar o ano e poder continuar producindo os proxectos pendentes. Durante a fin de semana houbo contactos con todos os accionistas en conversas que duraron segundo din várias fontes entre dúas e seis horas, coa intención de obter financiamento e de adiar algúns pagos, pero seica non se resolveu grande cousa. A compañía aínda ten débedas por un total de 3.700 millóns de dólares e os acreedores queren obter a creba xudicial como última opción de poder cobrar parte das inversións que fixeron no seu día.
Como é lóxico, de ir adiante acreba, iso sinificaría o final de dous salientábeis proxectos que están a se realizar nestes intres: O Hobbit de Peter Jackson e mais a seguinte entrega de James Bond, que após de dúas películas rodadas pola Sony regresa á Metro. Nombergantes, en ambos os dous casos nin a Warner Bros. nin a Eon Productions teñen intención de que lles afecte unha posíbel bancarrota da MGM xa que os filmes teñen evidentes esperanzas de seren senllos éxitos no despacho de billetes e de que a inversión sexa mais ca recuperada.
O novo Bond xa ten tres guionistas
O guionista de Frost/Nixon Peter Morgan unirá-se aos veteráns da saga de James Bond Neal Purvis e Robert Wade para escribir conxuntamente o guión da vindeira entrega do superaxente secreto británico.
Os produtores Michael G. Wilson e Barbara Broccoli da EON Prods. e mais a MGM queren sacar adiante canto antes a que será a 23ª entrega da popular série de espías.
Purvis e Wade traballaran xuntos en Quantum of Solace e Casino Royale.
Xa se sabe que Daniel Craig repetirá o seu papel como axente 007, e que Wilson e Broccoli serán unha vez mais os produtores. Ainda non hai data para o escomezo da rodaxe, pero a EON e mais a MGM queren que todo estea disposto para poder estrear o filme en 2011.
Este novo filme será o primeiro no que a MGM sexa a única distribuidora após de que nos dous anteriores tivera que compartir esta tarefa con diversas empresas. As primeiras 20 películas tamén foran distribuidas pola Metro.
Morgan escribiu o guión e mais a adaptación á pantalla grande de Frost/Nixon, así coma O derradeiro rei de Escócia e A Raíña. Ultimamente estivo a traballar en The Special Relationship para a HBO, e en Hereafter para a DreamWorks.
O traballo de Purvis e Wade puidémo-lo ver en The Brazilian Job, a secuela de The Italian Job, na que tamén foron os guionistas.
Winehouse quere vingar-se de James Bond
A cantante londinense Amy Winehouse prepara a súa vinganza após de ser humillantemente descartada do último filme de James Bond, Quantum of Solace, que se estreará o 31 de outubro en Inglaterra, e no que ela ía compoñer e interpretar o tema principal.
A polémica cantante revelou que pensa rematar a gravación de Another way to die que empezou con Mark Ronson e podería mesmo saca-la ao mercado o mesmo día da estrea do filme, para fastidiar aos produtores.
Os americanos Alicia Keys e Jack White, da banda White Stripes, foron os finalmente elixidos para gravar a dúo a canzón para a película, despois de que en maio se fixera público que Winehouse non estaba en condicións de face-lo.
O compositor e produtor musical Mark Ronson, colaborador de Amy no proxecto, confirmou que ían abandoa-lo a médias ao non estar ela “preparada para se centrar na música” tras vários problemas de saúde por mor da súa adición ás drogas.
“Deberían ter agardado un pouco máis“, dixo en alusión aos productores da película. “Se querían un éxito mundial, téño-os todos aquí dentro“, engadiu, sinalándo-se a cabeza.
Amy quere amosar aos directivos cinematográficos que “cometeron un erro” ao prescindir dela: “Supoño que querían algo ben definido e aburrido. Cando saque a miña versión, e estou tentada de face-lo o mismo día da estrea, será o maior éxito“, presumiu a cantante.
Amy Winehouse cantará para James Bond
A polémica cantante inglesa Amy Winehouse ven de ser a elixida para compoñer, xunto a Mark Ronson, o tema principal da nova entrega de James Bond, papel que volverá encarnar Daniel Craig. Ambos atopan-se xa gravando Quantum of Solace.
Esta canción será “moi escura“, segundo se puido saber, pero encaixará “perfectamente” no peculiar estilo da artista, quen recebiu a nova o pasado mes de febreiro, se ben tivo que mante-la en segredo.
Como anécdota, os produtores esixiron a Winehouse a condición de que se manteña “limpa de drogas” até alomenos uns días despóis da gravación da banda sonora.
007, fóra de Perú
Quantum of Solace, a vindeira 22ª película da saga de James Bond, non se rodará finalmente en Cusco, Perú, por mor do tempo atmosférico que resulta imprevisíbel.
As condicións metereolóxicas, imposíbeis de predicir, poderían dar ao traste coa produción, segundo informaron fontes próximas aos estudos.
Segundo Margarita Morales, de Iguana Productions, a compañía peruana que axuda á inglesa EON Productions na rodaxe, os ingleses non queren arriscar-se a entrar na cidadela inca sen saber de antemán se o tempo lles será favorábel.
“Non van filmar porque se requerían unhas condicións especial para o filme e estas xa non existen. A suspensión débe-se principalmente aos trocos climáticos“, dixo Morales.
Morales negou que a decisión dos estudos se debese ás protestas ou aos conflitos políticos que están a ter lugar na rexión.
Quantum Of Solace
O título do vindeiro filme de James Bond será Quantum of Solace (algo así coma Anaco de consolo), segundo veñen de anunciar os produtores nunha rolda de prensa celebrada o día 24 nos Estudos Pinewood ás afóras de Londres, onde está a se rodar a película.
Daniel Craig regresará no papel de 007. A 22ª entrega desta venerábel saga é a continuación do filme de 2006 Casino Royale e retomará os acontecementos onde ficaron na anterior parte, con James Bond considerando a vinganza após da traizón do seu amor, Vesper Lynd.
A rodaxe escomezou nos estudos Pinewood a primeiros deste mes. Após de Londres, a rodaxe continuará en Áustria, Itália e Panamá. Judi Dench regresa no papel da xefa do MI-6, M, e Mathieu Amalric (Le scaphandre et le papillon) interpreta ao vilán de turno. No reparto está incluida ademáis a actriz ucraína Olga Kurylenko no papel da misteriosa “rapaza Bond” Camille.
Quantum of Solace ten prevista a súa estrea en Inglaterra e nos Estados Unidos para o vindeiro 7 de novembro.
Amalric, novo falcatruán de Bond
O actor francés Mathieu Amalric (Le Scaphandre et le papillon) interpretará ao principal personaxe malvado na vindeira 22ª entrega da saga de filmes de James Bond, ainda sen título oficial.
Amalric deberá enfrontar-se ao axente 007, encarnado novamente por Daniel Craig nesta produción da Columbia Pictures e da MGM.
Un executivo dos estudos confirmou asemade o papel de Jeffrey Wright, quen interpretou ao axente da CIA Felix Leiter no anterior filme, Casino Royale, e que repetirá o mesmo papel en Bond 22.
A rodaxe xa escomezou nos estudos Pinewood de Londres, case un mes máis tarde do que se tiña previsto orixinalmente. Ainda así, a data de estrea segue a se manter para o 7 de novembro, baixo a dirección de Marc Forster.
Lér máis
