Daredevil, volve o heroe
Coa 20th Century Fox falando xa dun relanzamento da súa saga dos Catro Fantásticos, semella non ser unha grande sorpresa que os estudos estean tamén a planear outro volta de rosca sobre o persoaxe da Marvel Comics Daredevil.
O mesmo que acontece con outros casos semellantes, os estudos teñen a obriga contratual de seguir facendo filmes baseados en certos persoaxes se non queren perder os dereitos sobre os mesmos, que regresarían ao seu dono (neste caso a Disney, recente compradora da Marvel).
O cómic fora adaptado previamente en 2003 con Ben Affleck, Jennifer Garner, Michael Clarke Duncan e Colin Farrell nos papeis principais. Cun orzamento de 78 millóns de dólares e uns ingresos no despacho de billetes de 179,2 millóns en todo o mundo mália unhas críticas moi negativas (especialmente dirixidas a Affleck), agora os estudos queren facer algo distinto e pode que tenten unha versión dirixida a un público mais adulto. De feito, en 2005 lanzou-se unha versión para maiores de 18 en DVD con 30 minutos mais de esceas, e obtivo unha resposta mais positiva.
Para a nova versión, David Scarpa (The Day the Earth stood still) escribirá o guión e Peter Chernin será o produtor.
O Capi, en marcha
O director da recente The Wolfman, Joe Johnston, ven de escomezar a súa promoción para o devandito novo filme, pero non escapou das preguntas das prensa que xa lle están a cuestionar sobre o seu seguinte proxecto, o filme de alto orzamento da Marvel Studios sobre o Capitán América.
Johnston revelou que xa está a traballar na preprodución en Manhattan Beach (Califórnia) con Rick Heinrichs, un experto no deseño de produción: “É a parte do proceso que mais me gusta. Temos oito ou dez artistas de talento, e sentamos todo o día e debuxamos propostas… esta é a fase da produción onde non importan os cartos“, dixo moi emocionado.
Actualmente o plan é comezar a acción do filme en 1942 e 1943 durante a Segunda Guerra Mundial, e logo “ir cara adiante ao que están a facer co Capitán América hoxe en día… imos tentar evitar todo ese rollo dos cómics dos anos 60 e 70“.
O filme comezará a súa produción a finais deste ano, coa vista posta nunha estrea que será o 22 de xullo de 2011.
Spiderman relánza-se
O luns coñeceu-se a nova de que a Sony Pictures e mais o director Sam Raimi, que levaban vários meses de tira e afrouxa por mor das diferéncias creativas ao redor da cuarta entrega da saga de Spiderman, veñen de rachar os seus acordos, e anunciaron que a Sony Pictures e mais a Marvel Studios teñen novos plans, que consistirán no relanzamento da franquía contando cunha equipa de produción totalmente nova.
A história utilizará o guión rexeitado de James Vanderbilt, que fai regresar a Parker ao seu papel de adolescente ateazado polos seus problemas como persoa humana e como superheroe: “Peter Parker é un adulto novo normal que conta con poderes extraordinários, o que sempre foi o fundamento que fixo deste persoaxe algo intemporal e atraínte para xeracións de fans. Estamos moi emocionados polas posibilidades creativas que veñen das raíces de Peter“, dixo a xefa da Sony Amy Pascal nunha rolda de prensa oficial.
Como resultado deste movemento, Sam Raimi (director) e Tobey Maguire (protagonista) fican fóra, con tan só unha nota de agradecemento da Sony. Raimi esencialmente dixera aos estudos que non podía ter un filme preparado para o verán de 2011, e os estudos, en vez de tenta-lo sen el, preferiron escomezar de novo, cun relanzamento da franquía no canto dunha cuarta entrega da saga actual.
O director de (500) Days of Summer, Marc Webb, é o principal candidato para sustituir a Raimi. Os estudos contan cunha “lista de desexos” na que aparecen James Cameron, David Fincher e Wes Anderson. Pero Webb é o único que polo de agora mantivo reunións cos produtores e mais os executivos dos estudos.
Estas novas fan que todas as anteriores notícias e rumores sobre Spiderman 4 fiquen anuladas: Kirsten Dunst non regresará e todas as conversas que contaban con o Vuitre e mais a Gata Negra xa non teñen valor algún. Os produtores Avi Arad e Laura Ziskin aínda están vencellados ao filme, coa mesma capacidade que antes, mentres están á procura dunha data no verán de 2012 para un Spiderman que mesmo podería rodar-se en 3D, a tecnoloxía de moda.
Os motivos de todo isto non están nada claros. Ainda que o orzamento de Spiderman 3 foi de 250 millóns de dólares e as críticas foron moi negativas, os fans acudiron en masa os cinemas e o filme recadou 890 millóns en todo o mundo, polo que á Sony non lle debería importar moito as subas de orzamento, o caché dos protagonistas nin o do seu caprichoso director. A Sony ten que seguir facendo filmes de Spiderman para non perder os dereitos sobre o persoaxe, así que aquí hai algo mais que non nos contaron.
Dende o punto de vista dun executivo dos estudos, todo cobra sentido porque se poden reducir os custes da rodaxe da seguinte película e se recuperaría o control creativo sobre a propiedade, ao contar cun director mais disposto a aceptar ordes. O regreso aos anos de mocidade do persoaxe no canto de explorar a vida dun trintaneiro casado semella mais doada de aceptar polo público e polos creativos. Voltar ao Peter de sempre, dándo-lle énfase ao romance, podería incrementar a audiéncia feminina e fará que de novo destaquen as súas diferéncias co seu máximo rival no despacho de billetes, o superheroe da DC Comics Batman, do que axiña se verán dúas novas entregas.
Todo isto ten o seu lado negativo: os fans de sempre perderán-se, a xente que é leal sobre todo a Raimi deixará de ir a ver o filme, e nos fóros da Internet as críticas mesmo antes de escomezar a se producir o novo Spiderman xa arrécian e poderían danar á franquía. En todo caso, a presión está agora do lado da Sony, obrigada a cumprir coa súa palabra e ter un bó filme en verán de 2012.
Stuart Townsend deixa Thor
O actor irlandés Stuart Townsend abandonou a produción do novo filme de Kenneth Branagh Thor a pasada semana, tan só uns días antes de que escomezase a súa participación na rodaxe, o luns en Los Angeles.
O actor americano Joshua Dallas (The Descent Part 2, Red Tails) será o seu sustituto no papel de Fandral, ún dos Tres Guerreiros. Townsend deixou a película oficialmente por mor de “diferéncias creativas“.
Esta non é a primeira vez que Townsend abandoa precipitadamente unha rodaxe antes de escomeza-la. Hai dez anos, antes de que se iniciase a rodaxe de O Señor dos Anéis baixo a dirección de Peter Jackson, Townsend renunciou nada menos que ao papel de Aragorn, e foi sustituido por Viggo Mortensen.
A Marvel contra-ataca nos xulgados
A compañía Marvel Entertainment, proprietária de mais de 5.000 personaxes de ficción, apresentou unha demanda contra os herdeiros do debuxante Jack Kirby, que pretenden recuperar os dereitos sobre alguns súper-heroes, incluídos Spiderman ou O Incríbel Hulk.
Na demanda tramitada nun tribunal federal en Manhattan esta compañía, que foi adquirida pola Disney o ano pasado, pide ao xuiz que declare inválidas as reclamacións dos herdeiros de Kirby, quen traballou durante mais dunha década na empresa.
A Marvel explicou que en setembro pasado recibeu 45 avisos legais dos herdeiros de Kirby alusivos á cancelación futura dos dereitos de propriedade da empresa sobre alguns súper-heroes, incluídos os X-Men e Os Catro Fantásticos, e histórias publicadas entre 1958 e 1963. Os herdeiros do debuxante consideran que entre 2014 e 2019 lles corresponderá recuperar alguns dereitos trasferidos á Marvel, algo para o que esta empresa considera que non hai base legal.
A compañía de cómics, que ten a súa sede en New York, considera que as aportacións de Kirby ás suas publicacións, como os de outros escritores e debuxantes coetáneos, eran traballos contratados e dos que a Marvel é a única proprietária.
O avogado da empresa, John Turitzin, manifestou que as reclamacións dos herdeiros “son un intento de escribir de novo a história das relacións de Kirby coa Marvel“.
Marvel explicou que as leis federais sobre dereitos de autor estabelecen que aqueles traballos creados a petición e a costa dun editor durante os anos nos que ese artista traballou para a empresa son propriedade da compañía contratante e sinalou que os traballos aos que aluden os herdeiros axustan-se a esa categoría.
A empresa manifestou que os editores eran os encarregados de determinar en que traballos participaría Kirby, ao igual que con outros escritores e debuxantes, e eran pagados por iso.
O propósito da demanda apresentada pola empresa “é simplemente deixar as cousas claras” e obter unha declaración xudicial de que os avisos de cancelación de dereitos non son validos, segundo Turitzin.
Russo, a nai de Thor
Rene Russo será Frigga, a nai do heroe do martelo nórdico, o deus Thor, no filme que a Marvel Studios está a desenvolver baseado no seu persoaxe de cómic.
Coma muller do máximo deus nórdico (Anthony Hopkins) Frigga será a raíña de Asgard e nai tanto de Thor (Chris Hemsworth) coma do seu arquirrival Loki (Tom Hiddleston). Natalie Portman tamén é protagonista do filme, no papel da namorada de Thor.
Mark Protosevich e Zack Stentz escribiron o guión, no que o arrogante guerreiro Thor fai escomezar unha guerra longamente esquecida, e coma castigo é enviado á Terra para vivir entre os seres humáns.
Unha vez entre nós, aprenderá o que sinifica ser un auténtico heroe, cando o seu máximo rival, o seu poderoso e maléfico irmán Loki, invoque ás forzas escuras de Asgard para invadir a Terra. Kenneth Branagh dirixe este proxecto que comeza a se filmar en xaneiro.
Hopkins será Odín
Anthony Hopkins interpretará ao deus nórdico Odín no filme Thor que desenvolverá a Paramount Pictures adaptando ao popular superheroe da Marvel Comics ás pantallas de cinema.
A história ten como protagonista ao poderoso pero fachendoso deus guerreiro Thor (Chris Hemsworth) cuxas incasábeis accións en prol do Ben fan que reescomece unha esquecida loita entre os deuses. Como castigo, Thor é enviado á Terra e obrigado a vivir entre os seres humáns.
Unha vez alí, terá que aprender o que supón ser un auténtico heror, cando o seu pior inimigo no mundo dos deuses, o seu irmán Loki (Tom Hiddleston), apareza entre os humáns comandando aos sinistros exércitos de Asgard para invadir a Terra.
Natalie Portman tamén é a protagonista deste filme que dirixe Kenneth Branagh sobre un guión de Mark Protosevich e Zack Stentz.
A rodaxe escomezará en xaneiro de 2010 coa vista posta nunha entrea nalgún intre ao longo de 2011.
Un Skarsgard para Thor
Stellan Skarsgard (Anxos e Demos, Piratas do Caribe) ven de revelar á prensa que aceptou un papeliño para o vindeiro film da Marvel Studios Thor.
Skarsgard non quixo adiantar que papel interpretará, ainda que dixo que non asinou o contrato até non ter lido a súa parte no guión e comprobar se lle resultaba moi difícil, o que a xulgar polo seu apelido, non debería.
O fillo de Skarsgard, Alexander Skarsgard (da série de TV True Blood), estivo moito tempo en boca de todo o mundo mentres corrían aínda os rumores sobre quen ía ser o protagonista deste filme de superheroes e deuses nórdicos, até que finalmente foi contratado Chris Hemsworth (Star Trek) para o papel.
Tom Hiddleston, Natalie Portman, Jaimie Alexander, Colm Feore e Samuel L. Jackson xa están no reparto desta película que producirá a Paramount will baixo a dirección de Kenneth Branagh e que ten prevista a súa estrea para o 20 de maio de 2011.
Os herdeiros de Kack Kirby darán batalla
Os herdeiros de Jack Kirby, o lendário co-creador de case todos os persoaxes da Marvel Comics, coma o Capitán América, Os Catro Fantásticos, a Patrulla X, os Vingadores, Iron Man, Hulk, Silver Surfer e Thor, anunciaron que teñen intención de demandar á Marvel e mais á Disney coa intención de que se declare que os dereitos de autor sobre os persoaxes lles deben ser reintegrados a eles. A demanda incluirá ás produtoras que fixeron filmes e séries de televisión cos seus persoaxes, coma a Sony, a Universal, a 20th Century Fox ou a Paramount Pictures.
Coma no caso de Jerry Siegel, cuxos herdeiros veñen de gañar un preito polo que se lles recoñece a propriedade sobre o persoaxe de Superman, os herdeiros de Kirby desexan que os dereitos de autor sobre os persoaxes e polo tanto os benefícios xerados con eles regresen ás súas mans. Para elo, os herdeiros servirán-se dos mesmos avogados que xa obtiveron esta vitória no caso de Siegel. O despacho de Toberoff & Associates está especializado nestes casos e a súa sona nestes intres é inmensa após de gañar o caso contra a DC e mais a Warner.
As alegacións, se son xustificadas, permitirían que os dereitos regresasen aos herdeiros a partir de 2014. Mentres tanto, a Marvel e mais a Disney continuarían explotando eses dereitos nos cómics e nos filmes. A posibilidade que se abre é que os herdeiros de entren en negociacións coa Marvel e cheguen a un acordo que lles permita seguir publicando os cómics baseados no seu traballo.
Mentres viviu, Kirby loitou coa Marvel durante anos para que lle fose recoñecido o dereito á propiedade sobre alomenos o traballo físico que realizou (os debuxos en si mesmos), e se lle pediu que asinase documentos polos que renunciaba específica e irrevocábelmente aos dereitos de autor sobre os persoaxes, algo que sempre se negou a facer. Ademais, contribuiu á loita doutros creadores dentro da Marvel, coma Steve Gerber, co-creando Destroyer Duck xunto a Gerber nun libro adicado ao Pato Howard que ía no benefício destes artistas.
Nacido co nome de Jacob Kurtzberg, Jack Kirby está considerado coma o debuxante de superheroes mais salientábel do mundo, se ben traballou noutros xéneros de cómic, coma o romance, os cómics de guerra e os de ciéncia-ficción. O seu traballo dentro da DC tamén proporcionou moito para poder facer o recente éxito de vendas da série Final Crisis da DC. Actualmente, a editorial Dynamite, de acordo cos herdeiros de Kirby, está a traballar nunha nova liña de persoaxes deste autor, o “Kirbyverso”, publicando persoaxes que nunca apareceron nin na Marvel nin na DC.
Jack Kirby finou en 1994, deixando catro fillos, Susan, Neal, Barbara e Lisa, e dous netos, Jeremy e Tracy.
Relanzamento dos 4F
Á penas unhas horas despois de se anunciar a bomba da adquisición da Marvel pola Disney, os estudos da 20th Century Fox veñen de facer público que lle van dar un acelerón á produción dunha nova entrega da súa série dos Catro Fantásticos en forma de relanzamento.
Tim Story dirixiu os dous filmes anteriores en 2005 e 2007, ambos con moitas malas críticas por parte da prensa especializada pero con excelentes resultados no despacho de billetes (a recadación foi duns 300 millóns de dólares por cada unha en todo o mundo).
O guionista Akiva Goldsman (A Beautiful Mind, Batman and Robin) foi contratado para supervisar este relanzamento mentres que o produtor Michael Green (o da série de TV Heroes e da vindeira Lanterna Verde) será quen escriba o guión.
Segundo se comenta, todas estas presas veñen dadas para poder retér os dereitos sobre os persoaxes neste intre. A Fox ten un acordo de licenciamento coa Marvel que lle permite controlar a franquía a perpetuidade, sempre e cando continúe facendo filmes sobre eles. Un motivo moi semellante ao que levou en 2002 a facer o filme Queen of the Damned, que tivo a aprobación dos estudos (neste caso da Warner Bros.) para poideren reter os dereitos sobre a série de libros de Anne Rice As Crónicas do Vampiro.
Ioan Gruffudd, Jessica Alba, Chris Evans, Michael Chiklis e Julian McMahon foron os protagonistas nas anteriores entregas dos 4F, ainda que os seus contratos non lles obrigan a regresar para actuar en mais películas da saga, o que fai difícil de prever se estaremos finalmente perante unha nova entrega ou un relanzamento da franquía.
