Alícia, xa entre os grandes
A nova versión de Alicia no País das Marabillas ven de se unir ao selecto grupo de filmes que superan na história os 1.000 millóns de dólares de recadación no despacho de bileltes, un logro que únicamente acadaron outros cinco filmes na história do cinema e que a fita de Tim Burton debe en grande medida á renovada forza do 3D.
A última superprodución da Disney, protagonizada por Johnny Depp, Helena Bonham Carter, Anne Hathaway e a xoven Mia Wasikowska debe a sua entrada no clube dos mil millóns á excelente acollida que tivo fóra dos Estados Unidos. Segundo os dados feitos públicos, a fita de Burton recadou mais de 332 millóns de dólares nos Estados Unidos mentres que no resto do mundo o despacho de billetes proporcionou outros 667 millóns.
Alicia no País das Marabillas é a quinta película que supera os 1.000 millóns e a segunda de maior recadación da Disney até hoxe, por atrás da segunda entrega de Piratas do Caribe, que sumou un total de 1.070 millóns en 2006.
A lista das longametraxes con mais recadación está encabezada por Avatar, coa que James Cameron renovou o cinema de 3D, a ciéncia-ficción e o negócio do cinema. As aventuras dos Na’vi en Pandora recadaron 2.266 millóns de dólares, superando en moito á segunda clasificada, tamén dirixida por Cameron: Titanic colleitou 1.845 millóns en 1997. Os outros membros deste clube dos mil millóns son O Señor dos Aneis 3, Piratas do Caribe 2 e O Cabaleiro Escuro, o que demostra, por se alguén ainda non-o tiña moi claro, o asoballante domínio da fantasía nas preferéncias dos espectadores de cinema.
Iron Man 2 prepara o récord
Moitos fans levan tempo queixándo-se de que a Paramount non está a facer publicidade abondo de Iron Man 2 e que os plans para escomezar unha promoción a nivel mundial durante os vindeiros meses deste filme ficaron cancelados.
Agora semella aclararse o motivo desta falta de interese. E a razón é que non fai falta algunha. Os primeiros indicadores desta secuela semellan revelar que o debut será por todo o alto e que de feito agárda-se bater o récord mundial de recadación na primeira fin de semana.
Polo de agora o filme de 2008 O Cabaleiro Escuro continúa a manter ese récord, con 158,4 millóns de dólares. O filme orixinal Iron Man recadou 98 millóns en 2008, pero a secuela do home de ferro estará moi preto da do home morcego e os produtores confían en sobrepasar doadamente as cifras da súa predecesora.
A enquisa feita pública polos estudos revela que o abraiante non é que os homes de case todas as idades estean desexando ver o filme, senón que as mulleres, normalmente pouco ou nada interesadas en filmes de superheroes, están a amosar un interese moi alto por Iron Man 2. De feito, e segundo os dados da enquisa, o único sector non interesado maiormente no filme é o das rapazas adolescentes, de menos de 18 anos.
Avatar, mil millóns
Após de tan só 17 días, o filme de James Cameron Avatar ven de cruzar a fronteira dos mil millóns de dólares de recadación no despacho de billetes en todo o mundo, sobrepasando o megaéxito do ano pasado O Cabaleiro Escuro, que estaba no posto 4 da lista mundial de éxitos de todos os tempos.
De feito, se os números continúan medrando coas estimacións previstas, agárda-se que Avatar sobrepase a Piratas do Caribe III e mais a O Señor dos Anéis III, converténdo-se na segunda película mais exitosa de todos os tempos, tan só un posto por atrás doutro filme do mesmo Cameron: o clásico Titanic.
Polo de agora, como é de prever, a recadación vai baixando a medida que pasan as semanas, pero non por iso deixa de bater novos récords. Na súa terceira semana nas pantallas dos Estados Unidos, o filme de Cameron gañou outros 68 millóns de dólares, batendo o anterior récord de Spiderman 3, que era de 45 millóns para unha película na súa terceira semana.
Nestes intres e só nos Estados Unidos xa leva 352 millóns de dólares, e é a segunda película con mais éxito no despacho de billetes de 2009, o cal non está nada mal tendo en conta que só estivo dúas semanas nas carteleiras durante o ano pasado. Tan só Transformers 2 puido facer-lle sombra, con 402 millóns. Se ben agárda-se que axiña sobrepase esa cantidade, que a Transformers lle levou catro meses alcanzar.
Fóra dos Estados Unidos o filme é tamén un éxito sen precedentes, chegando ao segundo posto mundial para todo 2009, por atrás de Ice Age: Dawn of the Dinosaurs con 691 millóns, que Avatar sobrepasará en un ou dous días mais.
Outro récord para o Joker
O Cabaleiro Escuro converteu-se no cuarto filme da história do cinema que é capaz de recadar mais de 1.000 millóns de dólares nas billeteiras en todo o mundo. O anúncio foi realizado pola Warner Bros. o pasado venres, cando se comunicou que o total internacional fora de 1.001.082.160 dólares (786.351.679,71 euros) até entón, con 533 millóns só nos Estados Unidos e 567 no resto do mundo.
O Cabaleiro Escuro estaba uns 4 millóns de dólares por baixo do récord cando a Warner Bros. re-lanzou o filme nas pantallas Imax o 23 de xaneiro, xusto o día despois de que se soubera que tiña oito nominacións para os Oscars. Ademais, as gañanzas que chegaron dende Ecuador tamén audaron a superar o récord.
Só Titanic, con 1.800 millóns de dólares, O Señor dos Aneis: O retorno do Rei e Piratas do Caribe: O Cofre do Home Morto puideron superar os mil millóns de dólares en benefícios anteriormente.
O Cabaleiro Escuro é tamén a segunda película que mais recada nos Estados Unidos de toda a história, só por atrás de Titanic.
A Warner tamén salientou que é o filme que mais recadou da história nos cinemas Imax, con case 50 millóns de dólares nos Estados Unidos e uns 65 no resto do mundo.
Solpor, récord en España
Solpor (Twilight), o filme dirixido por Catherine Hardwicke que se estreou o pasado 5 de decembro en España, atinxiu a data de hoxe mais de 5 millóns de euros alzando-se asi co número un no despacho de billetes desta fin de semana.
O filme, baseado na novela homónima de Stephenie Meyer, acadou a millor apertura do primeiro fin de semana de decembro dos últimos 5 anos, e o cuarto millor resultado do ano superando a Quantum of Solace e High School Musical 3, e por atrás de superéxitos coma o último de Indiana Jones.
Solpor estreou-se nos Estados Unidos o pasado 21 de novembro, recadando na sua primeira fin de semana 70,5 millóns de dólares e actualmente supera xa os 150 millóns. O venres da estrea marcou a 15ª millor apertura da história do cinema con 36 millóns de dolares, convertíndo-se na segunda millor apertura da história rexistada no mes de novembro, despois de Harry Potter e o Cáliz de Lume. Por se fose pouco, a fita conseguiu ser a mellor apertura da história do cinema dunha directora.
Dirixida por Catherine Hardwicke, este filme de vampiros dirixido ao público adolescente está protagonizado por Kristen Stewart e Robert Pattinson.
Wall-E varre… en España
Wall-E. Batallón de limpeza, a última proposta animada da Disney e Pixar, varreu aos seus contrincantes no despacho de billetes español desta pasada fin de semana desbancando a A Mómia 3 e a Hancock cunha recadación de dous millóns de euros, segundo cifras facilitadas pola Walt Disney Studios España.
A película, que narra as aventuras do derradeiro robotr sobre a Terra, Wall-E, foi vista dende a sua data de estrea o pasado 6 de agosto por máis de 500.000 persoas e xa recadou un total de 3,2 millóns de euros no despacho de billetes.
Wall-E, xunto á moderna e atractiva robot EVA, son os protagonistas desta história de “sorpresas, acción, humor e sentimento” asinada polo director Andrew Stanton e os estudos Pixar – responsábeis de títulos coma Á procura de Nemo ou Ratatouille.
Esta semana Wall-E deberá facer fronte nas salas españolas nada menos que a O Cabaleiro Escuro, a nova entrega das aventuras de Batman que está a bater récords en todo o mundo.
Batman esmaga ao Home Araña
O Cabaleiro Escuro ven de sobrepasar a Spiderman 3 coma o filme coa millor fin de semana de estrea nas billeteiras da história, acadando un récord de 155,34 millóns de dólares (98 millóns de euros) nesta pasada fin de semana do 18 de xullo. Até agora o récord ostentábao Spiderman 3 con 151,1 millóns de dólares (95 millóns de euros) dende maio de 2007.
Desde xeito, e grazas ás orellas de Batman, o cinema de Hollywood celebrou o seu millor fin de semana de todos os tempos, cun total de 253 millóns de dólares (159 millóns de euros) de recadación en tres días, batendo por moito aos 218,4 millóns de dólares (138 millóns de euros) do pasado 7 de xullo de 2006, que até de agora mantiñan o récord.
Ainda así, Spiderman 3 mantén o récord de entradas vendidas por moi pouco, pero por mor da suba dos prezos nas billeteiras gañou O Cabaleiro Escuro. Os benefícios finais poderían mesmo superar un pouco estas cifras, que son só estimacións realizadas por empresas especializadas nos Estados Unidos.
No resto do mundo, O Cabaleiro Escuro engadiu outros 40 millóns de dólares (25 millóns de euros) nos 20 países nos que xa se estreou o filme o pasado día 16, incluindo Austrália, México e Brasil. O filme estreará-se en Inglaterra esta fin de semana e irá chegando ao resto das carteleiras do mundo pouco a pouco. A España chegará o vindeiro 13 de agosto.
O Cabaleiro Escuro, que custou 185 millóns de dólares realizar-se, tamén pulverizou o récord de Spiderman 3 no tocante ao millor debut nos cinemas IMAX de pantalla xigante, con 6,2 millóns de dólares. Spiderman 3 acadara 4,7 millóns.
O éxito do filme é ainda máis abraiante ao se realizar en pleno verán. O lanzamento correu o risco de ser eclipsado pola recente morte dunha das súas estrelas, Heath Ledger, o australiano que interpreta o papel do Joker e que finou por mor dunha sobredose de drogas o pasado xaneiro.
