Rodriguez en Fire and Ice
O realizador texano Robert Rodriguez ven de lle revelar á prensa que adquiriu os dereitos para facer un remake da longametraxe de debuxos animados de 1983 de Ralph Bakshi e do recentemente defunto Frank Frazetta Fire and Ice.
Gerry Conway e Roy Thomas escribiron o guión orixinal, unha fantasía estilo Conan na que un campesiño e mais a princesa do país de Firekeep únen-se para deteren á malvada raíña de Icepeak que quere destruir o mundo con glaciares.
O filme usou a técnica do rotoscoping, na que a animación é debuxada directamente sobre escenas de acción real (e que tamén foi utilizada en outros filmes coma Tron, e na versión de debuxos de Bakshi O Señor dos Anéis). A produtora de Rodriguez, a Troublemaker Studios, encargará-se deste remake.
Jessica Alba e a Bande Dessinée
A actriz Jessica Alba volverá rodar baixo as ordes do realizador que xa a dirixira en Sin City, o texano Robert Rodriguez, na vindeira Insiders, que será unha adaptación dun popular cómic francés de espías orixinal do debuxante Jean-Claude Bartoll.
A saga, moi coñecida en Franza, onde vendeu decenas de miles de cópias, leva xa sete volumes e se agarda a aparición dun oitavo para o mes de outubro. A história vai sobre Najah Cruz, unha colombiana que traballa para a Casa Branca e que debe infiltrar-se e axudar a destruir unha organización criminal internacional composta por políticos e homes de negócios. A acción percorre diversos países, incluindo Chechénia, Afganistán, Rúsia e China. O que non está claro é que partes destas novelas gráficas serán as que sexan transferidas á pantalla grande.
Jessica Alba non é nova no de interpretar adaptacións de persoaxes do cómic, xa que fixo de Susan Storm (a Rapaza Invisíbel) nos filmes dos Catro Fantásticos e tamén da exótica bailarina Nancy Callahan en Sin City. Ademais, interpretou á supersoldado Max Guevara na série de televisión de James Cameron Dark Angel.
Polo de agora non se coñecen mais detalles sobre este filme, nin datas de escomezo nin mais actores para o reparto.
Nombergantes, Rodriguez ten moito choio por diante, xa que entre os seus vindeiros proxectos están Os Supersónicos, Red Sonja e Sin City 2.
Os Jetsons chegarán en 2010
Robert Rodriguez ven de desvelar á prensa que o seu proxecto de película con acción real baseada na série de televisión de debuxos animados Os Supersónicos orixinal da Hanna-Barbera podería escomezar a se rodar o ano que ven.
“Levo desenvolvendo Os Supersónicos un tempo“, confesou Rodriguez, quen engadiu que agarda que a rodaxe poida escomezar nalgún momento dentro do ano que ven.
Ainda que o director confirmou que o filme será con actores de carne e óso, ficou mudo cando lle preguntaron por outros detalles. O que se sabe é que Adam F. Goldberg (Fanboys) escribira un guión para esta longametraxe, pero que non contou co visto bó dos estudos e que terá que se someter a unha revisión: “Estamos a escribir o guión nestes intres“, dixo Rodriguez como toda resposta.
Robert Rodriguez dirixirá Depredador
O director americano Robert Rodriguez ven de anunciar que planea realizar unha nova versión do clásico de acción e ciéncia-ficción dos oitenta Depredador, que foi protagonizado por Arnold Schwarzenegger e dirixido por John McTiernan en 1987, e no que un grupo de mercenários debían enfrontar-se a un feroz alieníxena en plea selva centroamericana.
Así o asegurou o mesmo Rodriguez nunha rolda de prensa celebrada en Texas na que falou dos seus vindeiros proxectos a través de Troublemaker Studios, a própria produtora do director. O autor de títulos coma Sin City, Spy Kids ou O mariachi que acostuma tamén a participar como produtor, guionista, na dirección de fotografia, banda sonora e montaxe final dos seus filmes, declarou que a sua intención é retomar a idea e o personaxe principal para desenvolver a partir diso un argumento de seu.
O título do filme seria Predators, e a sua orixe podería estar nun guión que chegou a escribir el mesmo para un posíbel Depredador 3 que nunca chegou a se materializar.
Nombergantes, trata-se dun proxecto que ainda deberá agardar, porque antes ten previsto rodar Machete, en torno a un asasino mexicano, partindo doutra ideia de seu que puido ver-se en forma de falso tráiler na sesión dobre Grindhouse, composta por Planet Terror e Death Proof – o segundo dirixido polo seu amigo Quentin Tarantino.
E ainda que fai meses se falou que Rodriguez tamén queria realizar un remake de Barbarella, unha psicodélica fantasia erótico-espacial que protagonizou Jane Fonda nos sesenta da man do seu daquela home Roger Vadim, éste ainda non figura entre os proxectos imediatos anunciados polo director.
Rodriguez revelou que tamén está a preparar un filme de ciéncia-ficción titulado Nerverackers, ademais de Sin City 2 e The Jetsons, baseada na famosa série de debuxos animados coñecida en Galiza como Os Supersónicos.
Pese a ter inspirado multitude de cómics e videoxogos, até o momento, os intentos de revitalizar a saga de Depredador non coñeceron demasiada fortuna. Unha secuela realizada en 1990 con Danny Glover de protagonista fracasou no despacho de billetes. Asimesmo, as duas entregas cinematográficas de Alien vs Predator tampouco gozaron do excesivo favor tanto de público como de crítica.
E entre as ideais mais extravagantes, en febreiro pasado anunciou-se Pride and Predator, producida polo cantante e compositor Elton John e que cruzaria aos personaxes do século XVIII de Orgullo e prexuízo, da escritora Jane Austen, co singular cazador de humanos extra-terrestre.
Robert Rodriguez en Nerveracker
Entre tantos proxectos que tiña na sua axenda o director Robert Rodriguez (Sin City), finalmente será Nerveracker, un filme de ciéncia ficción do cal ainda non había novas, o seu seguinte filme, que será realizado para a compañía The Weinstein Co.
Neveracker levará-nos até o ano 2085 e centrará-se no personaxe de Joe Tezca, que forma parte dunha unidade de elite coa misión de deter unha vaga de crimes nunha sociedade perfeita. Pero Tezca descobrirá que “Neveracker” é unha revolta para se facer co control da cidade. O protagonista deberá deté-la antes de que se lle acabe o tempo. O filme ten previsto a sua estrea para o 16 de abril de 2010.
Pero aí non rematan os proxectos de Rodríguez, que segue a preparar a versión con actores reais de Os Supersónicos, para o cal xa estiveron a facer probas de cásting e o guión de Adam F. Goldberg segue en marcha.
Papeliño para a moza de Rodriguez
O director de Grindhouse, Robert Rodriguez, producirá un novo filme que adaptará as aventuras de Red Sonja, interpretada pola súa moza na vida real, Rose McGowan.
McGowan interpretará asemade á guerreira de pelo vermello nacida nas páxinas dos cómics e disposta a chegar ás pantallas do cinema en 2010.
O filme será unha história orixinal, dirixida polo parceiro de sempre de Rodriguez, Douglas Aarniokoski, e conterá partes da súa vida tomadas dos cómics, así coma das novelas do seu creador orixinal, o novelista Robert E. Howard, pai asemade do persoaxe de Conan o Bárbaro.
Reparto para Shorts
Jon Cryer, William H. Macy, Leslie Mann e James Spader serán os protagonistas da vindeira comédia familiar de aventuras de Robert Rodriguez, Shorts. Rodriguez escribirá o guión, dirixirá e producirá este filme para a Warner Brothers. A produción escomezará axiña en Austin, Texas.
Jimmy Bennett, Kat Dennings, Trevor Gagnon, Leo Howard, Devon Gearhart, Rebel Rodriguez, Jake Short e Jolie Vanier tamén estarán entre os protagonistas da história.
Shorts está ambientada nun báriio das afóras onde todas as casas son iguais e todo o mundo traballa para a Black Box, un fabricante de aparellos de comunicación e toda caste de gadgets. O caos xurdirá cando un rapaz de 11 anos resulte golpeado na cabeza cunha rocha multicolor que fai cumprir os desexos de todo aquel que a posúa.
Rodriguez traballará asemade neste filme coma director de fotografía, editor e supervisor de efectos especiais.
A Universal deixa Barbarella
A Universal Pictures podería ter abandoado o proxecto de Robert Rodriguez de facer o remake do clásico da ciéncia-ficción dos anos 60 Barbarella, á súa vez baseado no persoaxe do cómic francés.
Segundo fontes anónimas, a Universal rexeitou o proxecto porque Rodriguez (Sin City) insistiu en incluir no reparto á súa nova moza, Rose McGowan, e nada menos que no papel protagonista que no seu día fixera Jane Fonda en 1968. Daquela, Fonda tamén fora dixirida polo seu home, Roger Vadim. McGowan xa foi a protagonista doutro filme de Rodriguez, o recente Planet Terror, que é a súa metade do proxecto Grindhouse.
Barbarella, baseado nun cómic francés, vai sobre unha astronauta que viaxa pola galáxia, conquistando todo coas súas dotes coma seductora polo camiño.
Pola súa banda, Rodriguez dixo que os estudos non quixeron facer a película por mor dos cartos que lles ía custar.
