Non haberá mais Superman no futuro próximo

Diane Nelson, responsábel da nova división da Warners DC Entertainment, deu unha resposta directa a unha pregunta realizada no decurso dunha entrevista na tele onte, ao respeito de se haberá ou non novos filmes da saga de Superman ou se hai algo previsto no futuro próximo.

“En realidade non temos ningún plan actualmente para Superman. Obviamente xa fixemos unha manchea de grandes cousas para a propiedade na nosa história, e [Superman] é unha parte esencial da nosa família, pero non temos actualmente plan para Superman“, dixo Nelson.

Esta declaración chega pouco despois de que unha sentencia xudicial disparara os rumores de que os estudos estarían desexando facer unha nova entrega de Superman antes de que os dereitos cinematográficos sobre os persoaxe regresasen aos herdeiros do seu creador en 2013. Agora con todos os dereitos no aire e no médio de liortas xudiciais para os vindeiros anos, semella que o Home de Aceiro non regresará á pantalla grande até dentro de moito tempo.

Mentres tanto, a única encarnación do persoaxe nas pantallas, a série de televisión Smallville, arrincará a súa derradeira tempada o vindeiro venres nos Estados Unidos.

A liortas por Superman

Os problemas legais entre Brian Quintana e Jon Peters, os dous produtores da nova entrega cinematográfica de Superman, que debía levar por título Superman: Man of Steel, foron moi graves este pasado decembro. Daquela, seica Quintana demandou a Peters non só para lle reclamar uns cartos que lle debía, senón tamén por acoso sexual e por lle pedir de xeito moi violento que lle axudase a facer unha série de cousas, entre as que estaban o perxúrio, falsificación de sinaturas, procura de drogas ilegais, fraudes fiscais e contábeis e a axuda e ocultación de comportamentos sexuais extremos.

Ademais, entre as demandas que seixa interpuxo Peters contra Quintana estaba a petición de encubrimento da violación da filla de Peters.

Segundo publicou esta semana o xornal americano The New York Post, Peters foi condeado a se manter afastado 100 iardas (91 metros) de Quintana, e todo porque Peters lle espetou literalmente a Quintana “vou cruzar esta mesa e che vou partir a puta cara, vou-te patear o cú“, todo no decurso dunha declaración que tivo lugar diante do mesmísimo xuiz o pasado 12 de agosto en Los Angeles mentres se discutía o caso de suposto acoso sexual polo que Quintana acusa a Peters.

Quintana presentou unha denúncia ante a Policía o 14 de agosto na que se di que “O señor Peters ameazou con me partir as pernas. Teño medo, estou nervoso e desacougado e temo que Jon Peters vaia facer-me dano ou matar-me“. O 19 de agosto, o xuiz condeceu a Quintana unha orde afastamento para evitar que Peters poidera “ameaza-lo, asalta-lo ou acosa-lo“.

O avogado de Peters, Joe Yanny, afirma que a orde de afastamento non ten xustificación e que a perda dos nervos de Peters foi debida a que Quintana lle tirou biquiños a Peters mentres que esta estaba declarando perante o xuiz.

Este 9 de setembro houbo unha nova vista na que se deberá decidir por canto tempo mais a orde de afastamento ficará en vigor.

Superman pode deixar de ser kryptonián

Seguirá sendo Superman o derradeiro supervivinte do planeta Krypton? A longa guerra legal polos dereitos do Home de Aceiro conta xa cun novo episódio que pode afectar sériamente á lenda que envolve á mais famosa ícona do cómic americano. Os herdeiros de Jerry Siegel – cocreador xunto a Joe Shuster do personaxe – apontan-se a vitória nunha batalla que pode ter resultados pouco agradábeis para o xigantesco conglomerado de Time Warner, a actual proprietária da DC Comics, a editorial que publica o personaxe desde 1938.

Segundo a última sentenza, o xuiz considera que os dados provistos polo especialista Denis Kitchen nun blogue da páxina Web Newsarama son decisivos para demostrar que moitas das ideias publicadas nalgúns dos cómics do personaxe foran deseñadas polo guionista moito antes de que a editorial encarregase aos xoves autores a creación do personaxe. Segundo as leis americanas de copyright, se a creación se realizou por encargo, legalmente os dereitos pertencen á editorial, polo que é necesário demostrar que existen evidéncias dunha creación anterior á relazón laboral.

Kitchen aportou probas atopadas pola família Siegel dun antigo proxecto do guionista co debuxante Russell Keaton que non chegou a ver a luz nos xornais. Nel apresentaba-se a história dun bebé de extraordinários poderes que chegaba do futuro nunha máquina do tempo, enviado polo derradeiro home sobre a Terra ao ano 1935 para ser descuberto polos Kent. A parella adoptaria-o despois co nome de Clark Kent.

As semellanzas son evidentes e a decisión xudicial é clara: os herdeiros dos Siegel deben recuperar os dereitos de autor do cuarto número da revista Action Comics, algunhas páxinas do primeiro número da colección Superman e as duas primeiras semanas das tiras diárias que se publicaron nos xornais dos Estados Unidos. Precisamente aquelas poucas tiras diárias onde Siegel e Shuster desenvolveron a orixe do Home de Aceiro, creando a sua orixe no planeta Krypton: perante a iminente destrución do planeta, o científico Jor-El introduce a un recén nado Kal-El nunha nave espacial que lle levará á Terra, onde será atopado polos Kent. Unha história que xa forma parte da cultura popular e que agora só poderá ser utilizada co consentemento dos herdeiros do autor. Xa sexa en filmes, séries de televisión ou, por suposto, en cómics, as novas aventuras de Superman non poderán facer referéncias ás suas orixes kryptonianas sen acordo prévio.

Un espantoso novo capítulo na longa guerra que se iniciou entre os autores e a editorial hai décadas, pero non inesperado: ainda que o xigantesco empório mediático da Time Warner loita con uñas e dentes polos pingües benefícios que lle proporciona Superman, pouco a pouco vai perdendo ao seu famoso persoaxe. Pese a que a morte de Joe Shuster sen descendéncia lle proporcionase o 50% dos direitos do Home de Aceiro, as leis americanas en dereitos de autor fixan o ano 2013 como limite para ese control. A partir dese momento, o personaxe reverterá totalmente aos herdeiros dos seus creadores (neste caso, de Jerry Siegel) até o ano 2033, no que Superman pasará definitivamente ao domínio público.

Superman sae do xuízo

Ven de se desvelar que este mércores un xulgado federal nos Estados Unidos sentenciou que os dereitos sobre Superman volverán a pertencer aos herdeiros dos seus creadores orixinais, Jerome Siegel e Joe Shuster, en 2013 e mentres tanto á Warner Brothers se lle está a rematar o tempo para acadar un guión e facer a secuela de Superman Returns. De feito, se escomezasen agora mesmo, os estudos non poderían ter o filme rematado até 2012 no millor dos casos.

Na decisión xudicial do mércores, o xuiz Stephen G. Larson sentenciou que os pagos que a Warner fixo ao representante da DC Comics non foron xustos xa que están por baixo do valor do mercado e que os herdeiros só poden reclamar a súa parte dos benefícios á DC Comics (que só gañou 13,6 millóns de dólares co filme de 2006) e non á Warner Bros.

Ademais, o xuiz estableceu a data do 1 de decembro para celebrar unha vista na que se determinará a cota de benefícios dos herdeiros, que o ano pasado gañaran o dereito sobre a metade do copyright polo material baseado en Superman. E en 2013 obterán o 100% dos dereitos de autor.

O xuiz, que dirixiu un xuizo que durou 10 días, salientou que o presidente da Warner Brothers Alan Horn testemuñara que ainda que teñen a espranza de facer outro filme sobre Superman, ainda non teñen un guión, non hai nada en desenvovlemento e que como moi cedo o novo filme estaría listo en 2012.

Brandon Routh xa non é Superman

Brandon Routh, o último actor que encarnou a Superman na pantalla grande, ven de confirmar que o seu contrato para dar vida ao Home de Aceiro xa non está vixente.

Brandon Routh empezou dar vida a Superman hai xa mais de tres anos, cando a Warner invistiu case 270 millones de dólares en Superman Returns. A ideia era acadar unha superprodución dirixida por Bryan Singer e que sería a primeira dunha série de filmes que farían rexurdir o prestíxio do kriptonián no cinema. Nombergantes, o grande investimento non deu os resultados que se agardaban e a Warners non se animou a continuar a franquía… até agora.

O que pasa é que o actor Brandon Routh non está xa dentro deses plans. Hai uns días, o actor recoñeceu nunha entrevista a un popular sítio Web brasileiro que o seu contrato expirara o pasado 28 de xuño. Ademais, engadiu que está totalmente certo de que a Warner traballa nunha nova película de SUperman, pero que ainda non sabe ren do tema, o que lle fai pensar que non contan con el.

De todos os xeitos, Routh dixo que “se me chaman outra vez, regresarei ao persoaxe sen pensa-lo duas veces“.

Nombergantes, Routh queixou-se da pouca confianza que os produtores tiveron na liña argumental que marcou Superman Returs. O actor considera que a saga podería obter mais éxito nas seguintes entregas, para o que puxo como exemplo a Batman Begins, que tampouco funcionou do todo ben no despacho de billetes pero que logo acadou un enorme éxito con O Cabaleiro Escuro, unha oportunidade que non lle deron ao Home de Aceiro.

Poxan un traxe de Superman que levou Christopher Reeve

Un traxe de Superman que levou o falecido actor americano Christopher Reeve será poxado en Melbourne o vindeiro 24 de maio, segundo anunciou o mércores o seu dono.

O disfrace é propriedade de Gis Moon, un afeizoado á saga que o mercou fai cinco anos en Londres e espera obter entre 11.000 e 15.000 dólares.

“Os traxes de Superman raramente aparecen no mercado e están moi solicitados polos coleccionistas, e algúns venderon-se por mais de 100.000 dólares“, afirma Moon.

O disfrace non inclúe nin as botas nin a capa e foi especialmente deseñado para as escenas de voo do superheroe, con aberturas nos lados para os cabos que mantiñan suspendido no ár ao actor.

Ademais do traxe, Moon tamén ofrece os calzóns vermellos e mais o cinto amarelo que o actor levou na primeira entrega da saga, que chegara ás pantallas cinco anos antes.

Christopher Reeve, que encarnou ao Home de aceiro en catro filmes entre 1978 e 1987, ficou parapléxico en 1995 tras sofrer unha caída dun cabalo e morreu en 2004 aos 52 anos, após dunha intensa loita en prol da investigación científica con células nai.

Superman á venda

Un exemplar do primeiro número de Action Comics, considerado o primeiro cómic de superheroes da história e no que se apresentou a Superman, sairá a poxa nas próximas horas a través de Internet.

Trata-se dun exemplar moi difícil de atopar e moi cotizado polos coleccionistas, xa que o Action Comics nº1 publicou-se en xuño de 1938 e, dende aquela, cóida-se que non sobreviviron moitas mais de cincuenta cópias. Ainda que a poxa organizada na páxina web da Comic Connect comezará o venres por un dólar (78 céntimos de euro), prevé-se que a oferta final sexa moito mais elevada e, de feito, ao gañador oferece-se-lle a posibilidade de pagar en seis meses e sen nengun tipo de interese.

Até o 13 de marzo poderá-se poxar por un cómic que custaba 10 centavos de dólar cando saiu á venda fai mais de 70 anos e que, segundo os organizadores, se atopa en bó estado.

Neste cómic – que daquela era unha antoloxia – apresentou-se por primeira vez a Superman, unha das maiores iconas da cultura pop mundial e o primeiro superheroe da história. Por iso, o Action Comics nº 1 considera-se o primeiro cómic de superheroes xamais publicado, algo que explica a grande atención que produce esta poxa entre os afeizoados ao xénero.

En 1992 vendeu-se outro destes escasos exemplares por 82.500 dólares (64.543 euros actuais). O mercador foi Steve Geppi, presidente da Diamod Comics, o maior distribuidor de cómics, quen en 2003 chegaría a ofrecer até un millón de dolares a quen lle apresentase un destas exemplares en perfeitas condicións.

Catro anos mais tarde, Sotheby’s poxou en New York outro dos cómics creados polo guionista Jerry Siegel e o ilustrador Joe Shuster, e en cuxa mítica portada pode-se ver a Superman erguendo un coche verde mentres dous homes foxen estarrecidos e outro xace case tendido no chan.

Nesa ocasión vendeu-se por 61.900 dolares (48.427 euros actuais), unha cantidade inferior á anterior porque nese caso fora parcialmente restaurado.

Wachowskis na triloxía de Superman?

Ainda que polo de agora só é un rumor do mais abraiante, xa se fixeron eco del algunhas fontes de confianza, polo que podemos dicir que os irmáns Wachowski, os responsábeis da saga de Matrix, teñen intención de interviren no relanzamento da franquía de Superman cunha nova triloxía de filmes.

Seica o comentário provén dun colaborador habitual dos Wachowski, James McTeigue (director de V de Vendetta ou Ninja Assassin) nun programa da televisión alemá RTL1 cando lle preguntaron cales son os seus plans para este ano.

Nesa entrevista ademais engadiu que o director de Superman Returns, Bryan Singer, rexeitou a súa participación no relanzamento do superheroe mais clásico e que podería estar a se adicar arestora só ao seu longamente agardado proxecto de remake de A Fuga de Logan, mentres que os Wachowski ainda están a considerar a oferta.

A parella de irmáns teñen agora mesmo a Plastic Man en desenvolvemento, con McTeigue axudando como director da segunda unidade, polo que se chegan a entrar no proxecto de Superman, sería moi posíbel que McTeigue fora ascendido a director de Plastic Man.

Os plans de Millar para Superman

Dende o éxito do filme Wanted, que tiña moi pouca relación co cómic no que está supostamente baseado, Mark Millar foi acosado nas entrevistas que se lle fixeron por mor da súa participación na nova versión de Superman que el e mais un “grande director de acción de Hollywood“, do que non quixo revelar o nome, realizará en breve para a Warner Bros. Pictures.

Hai uns días por fin rachou o seu silenzo e revelou algúns detalles da súa cobizosa história épica de oito horas que segundo dixo “narrará a vida completa de Kal-El“.

Millar dixo que o plan é facer unha saga en tres partes, e cada filme estreándo-se un ano após do outro. E engadiu: “Vai ser coma Michael Corleone nos filmes do Padriño, a história completa dende o comezo até o remate, ves onde comeza, ves o que chega a ser e a onde lle leva iso“.

Millar dixo: “Quero escomezar en Krypton, hai mil anos, e rematar con Superman só no planeta Terra, o derradeiro ser vivo na Terra, mentres o noso sol marelo vólve-se vermello e comeza a ser unha supernova, e perde os seus poderes“.

Novos plans para Superman

O presidente da Warner Bros. Pictures, Jeff Robinov, ven de revelar á prensa financeira que os estudos mudaron de opinión respecto do futuro non só da franquía de Superman senón de todos os superheroes da DC Comics dos que posúen os dereitos para desenvolver filmes.

Así, no canto de facer unha secuela á decepcionante película de 2006 Superman Returns, a Warner planea facer un relanzamento do persoaxe, do mesmo xeito que fixera a Universal con Hulk este ano.

Robinov dixo que “Superman non funcionou abondo ben como filme do xeito que nós pretendíamos, non posicionou ao persoaxe do xeit oque precisabamos que se posicionase. Se Superman funcionara en 2006, xa teríamos unha película para nadal deste ano ou 2009. Pero agora o plan é só reintroducir a Superman sen facer referéncias a unha película prévia de Superman ou Batman“.

Os estudos negaron asemade os proxectos de Batman vs. Superman e da Liga da Xustiza polo de agora xa que planean adoptar o mesmo modelo que a Marvel Studios está a desenvolver arestora – lanzar un filme para cada persoaxe, e logo usar eses filmes e mais as súas secuelas para crear unha película con moitos persoaxes uns anos despóis.

Do mesmo xeito cá Marvel, o obxectivo da DC Comics é fornecer con dous dos 6 ou 8 persoaxes principais por ano á Warner para 2011. Os estudos desexan lanzar catro películas con persoaxes de comic de superheroes nos dous vindeiros anos, incluindo un terceiro filme de Batman, un novo filme reintroducindo a Superman, e dous películas enfocadas noutros dous persoaxes da DC Comics. Actualmente teñen na axenda a Lanterna Verde, Flash, Frecha Verde e Wonder Woman.

Ao contrário cá Marvel cos seus argumentos lixeiros e máis enfocados á fantasía pura (coma nos casos de Iron Man e Spiderman), o obxectivo é facer un tón máis escuro e realista, ao xeito de O Cabaleiro Escuro para todos os seus heroes: “Imos tentar poñernos escuros até o punto que os persoaxes o permitan“, dixo Robinov.

Os plans oficiais e as novas datas de lanzamento de cada proxecto serán anunciadas o mes que ven.

Páxina seguinte »