E Terminator vai para…
Pacificor, unha empresa á penas coñecida pero baseada en Santa Barbara (Califórnia), ven de se facer cos dereitos sobre os futuros filmes que se realicen da franquía de Terminator grazas a unha aposta de tan só 29,5 millóns de dólares (21,5 millóns de euros).
A Halcyon Holding Corp puxo os dereitos sobre a popular franquía en venda á poxa o pasado martes, coa Sony Pictures e mais a Lionsgate coma os outros dous posíbeis compradores nesta carreira. Pero ningún dos dous xigantes de Hollywood puido chegar á oferta realziada pola Pacificor, o acreedor que obrigou no seu día á Halcyon a entrar en creba legal e a vender as súas propriedades para poder pagar as súas débedas. Con este movemento, a Halcyon fica definitivamente libre de débedas, ainda que legalmente iso dependerá dunha decisión final do xulgado que se producirá a finais da semana.
A Halcyon acadou facer-se con todos os benefícios xerados pola terceira e cuarta entrergas da saga, ademais dun pago único de 5 millóns de dólares por cada filme de Terminator que se realice no futuro.
A Lionsgate merca a Terminator
A Lionsgate está por ser a gañadora na poxa polos dereitos da franquía cinematográfica de Terminator grazas á súa aposta de 15 millóns de dólares en cartos en metálico e mais un 5% sobre os benefícios no despacho de billetes que poidan reportar as futuras entregas desta saga.
A Halcyon Group, actual propietária dos dereitos á venda, dixo que a Lionsgate é o cabalo gañador nesta poxa-venda debida a unha creba da compañía, que está a se enfrontar á súa desaparición nos xulgados. E isto sinifica que calquera outra empresa que desexe facer-se coa franquía deberá poñer sobre a mesa alomenos 750.000 dólares mais antes do vindeiro 5 de febreiro.
Tanto a Sony Pictures coma a Warner Bros. estaban interesada en adquirir os dereitos sobre o persoaxe que fixo famoso Arnold Schwarzenegger e ambas empresas teñen cartos abondo como para facer-se con el se realmente o desexaran.
O quinto Terminator
A Halcyon Co. ven de anunciar que está a desenvolver unha quinta entrega da saga de Terminator, na que intervirán unha vez mais o director de Terminator Salvation, McG, e mais os executivos da compañía Derek Anderson e Victor Kubicek.
Ainda non se tomou unha decisión sobre onde se rodará a seguinte entrega de Terminator, ainda que o Médio Este semella un forte candidato. Non en van o anúncio da quinta parte realizou-se no decurso do Festival de Cinema de Dubai.
Terminator Salvation, a cuarta parte da popular saga de ciéncia-ficción, presentou-se coma o comezo dunha nova triloxía de filmes, para os que Christian Bale xa asinou para protagoniza-los no papel de John Connor. A quinta parte ten previsto estrear-se en 2011.
A Warner Brothers ocupará-se da distribución do filme nos Estados Unidos, mentres que a Sony mercou os dereitos para o resto do mundo, coa excepción do Médio Este, onde se encargará a Gulf Film, unha empresa de Dubai.
Schwarzenegger non entende ao novo Terminator
Ser governador de Califórnia e estrela das tres primeiras entregas da saga non aseguran nada: Arnold Schwarzenegger viu recentemente material de Terminator Salvation pero á penas entendeu ren. “Ainda non sei o que van facer co filme” foi o máis que puido dicir Arnold.
O ex-actor explicou como lle amosaron parte do material, “pero non tiña a sensación de que fora unha película. Non vin abondo. Non estaba seguro de quen era o Terminator. Non sei se era a estrela da película ou o era o heroe. E esas son o tipo de cousas que determinan o éxito e a forza dunha película“.
A fita, cuxa rodaxe continúa en New Mexico, conta con McG como director e Christian Bale como protagonista, ainda que el non interpreta ao Terminator senon a John Connor, o líder da resisténcia humana.
Terminator Salvation é a cuarta entrega da série, pero a primeira na que Schwarzenegger non actuará. Na primera, dirixida por James Cameron, era o malo da fita, mentras nas dúas seguintes – a segunda tamén obra de Cameron, a terceira dirixida por Jonathan Mostow – axudaba aos humanos na súa guerra contra as máquinas.
A estrea de Terminator Salvation nos Estados Unidos está prevista para o 22 de maio de 2009.
Roland Kickinger é o novo Terminator
Con Terminator Salvation: The Future Begins xa en plea produción, ven de se dar a coñecer que o até agora descoñecido culturista austriaco Roland Kickinger será o substituto de Arnold Schwarzenegger no filme, dirixido por McG e protagonizado, entre outros, por Christian Bale.
Kickinger ten experiéncia como actor após de encarnar ao própio Schwarzenegger en See Arnold Run, o filme biográfico sobre a traxectória do culturista que chegou de Insbruck e rematou trunfando no cinema e governando Califórnia.
Kickinger xa fixo declaracións a algúns médios desvelando segredos da película. Así, por exemplo, explicou que nela “hai unha escena moi forte, cando John Connor atopa por primeira vez ao Terminator e non sabe se é bó ou malo“.
Preguntado polas diferéncias entre o seu papel e o de Arnold, Kickinger afirmou que “é o mesmo có de Arnold no primeiro filme. Ese é, básicamente, o meu papel, pero vinte anos antes, explicando de onde ven exactamente o Terminator“.
A estrea de Terminator Salvation: The Future Begins está prevista, nos Estados Unidos, para o 22 de maio de 2009.
Carter entra na Salvación
Helena Bonham Carter está en conversas para se unir ao reparto do novo filme do director McG, Terminator Salvation, a cuarta entrega na franquía que puxo en marcha James Cameron en 1984.
Os actores que darán vida aos papeis protagonistas no novo filme seguen sendo un segredo moi ben gardado, pero fontes internas da produción confirmaron a NOVA FANTASIA que o papel de Bonham Carter é pequeno pero moi importante.
A fotografía principal para este fime que produce a Halcyon e que narra as orixes da batalla entre os humanos e a rede Skynet, comezou o mes pasado en New Mexico (Estados unidos), coa ideia de que a meirande parte dos exteriores se rode antes de que comece a temida folga de actores. A Warners ten prevista a estrea deste filme de acción en maio de 2009.
Carter é coñécida para os fans da ciéncia-ficción polos seus papeis nos filmes de Harry Potter, o Frankenstein de Kenneth Branagh e o máis recente remake do Planeta dos Símios.
Finou Stan Winston
O mestre dos efectos especiais de Hollywood Stan Winston, xefe da empresa coñecida por imaxinar as creaturas dos filmes do Terminator, Parque Xurásico, e mesmo o Iron Man este mesmo ano, ven de finar o pasado día 15 de xuño após dunha longa loita contra o cancro aos 62 anos de idade.
O artista, gañador do prémio Oscar aos millores efectos especiais finou na súa casa rodeado da súa família após de pasar os últimos sete anos loitando contra un terríbel mieloma múltiple, segundo un voceiro da Stan Winston Studio.
Foi un líder no traballo dos efectos prácticos, dando oportunidades a todos os millores mestres dos efectos especiais de hoxe en día. Winston estaba moi agradecido á xente que veu antes ca el no seu eido, coma Ray Harryhausen.
Winston gañou os Oscars ao millores efectos especiais cos filmes Aliens (1986), Terminator 2 (1992) e Parque Xurásico (1993).
Winston deixa muller, Karen; un fillo, unha filla, un irmán e catro netos.
Bryce Dallas en Terminator
A actriz Charlotte Gainsbourg non será, finalmente, a muller de John Connor en Terminator Salvation: The Future Begins, como semellaba seguro. O papel será, definitivamente, para Bryce Dallas, que sustitúe a Gainsbourg tras ter ésta, ofícialmente, problemas de axenda.
Bryce Dallas Howard interpretará polo tanto a Kate Connor, personaxe que apareceu por primeira vez en Terminator 3 e que fora interpretado por Claire Dans.
Bryce Dallas Howard, filla do director Ron Howard, destacou en dous filmes de M. Night Shyamalan: O bosque e A xove da auga, ademais de polo seu papel secundário como Gwen Stacy en Spiderman 3.
O director de Terminator Salvation, McG, xa comezou a desvelar dados do filme, cuxa rodaxe comezou en New Mexico. A estrea da fita está prevista para o 22 de maio de 2009.
O rap entra en Terminator
Dentro da campaña “poña un rapeiro na súa película” que seica están a implantar case todas as producións hollywoodenses que se precen, o rapeiro e por veces actor Common ven de asinar un contrato para coprotagonizar Terminator Salvation: The Future Begins para a Halcyon Pictures.
Christian Bale e Sam Worthington xa están embarcados neste proxecto, que será distribuido pola Sony no noso país.
A história estará centrada en John Connor (Bale), agora con uns 30 anos, e liderando ao que ficpu da raza humana nunha guerra contra as máquinas. Common fará o papel dun loitador humano e membro do círculo de amigos de Connor.
McG dirixirá este proxecto a partir dun guión de John D. Brancato, Michael Ferris e Paul Haggis. A estrea está prevista para o 22 de maio de 2009.
Xa hai mulleres en Terminator
A espectacular modelo californiana Moon Bloodgood (Journeyman) está en conversas finais para se facer co papel feminino protagonista no filme de McG Terminator Salvation: The Future Begins, a cuarta entrega da popular franquía de ciéncia-ficción.
Bloodgood protagonizaría o filme xunto a Christian Bale, Sam Worthington e Anton Yelchin na secuela, que está a ser producida por Halcyon Co. e será distribuida pola Warner Brothers no verán de 2009.
Bloodgood interpretará a unha feroz loitadora da resisténcia humana contra as máquinas. A fotografía principal da rodaxe ten previsto o seu escomezo o vindeiro 5 de maio.
Bloodgood foi a protagonista dunha série ainda non vista en Galiza, Journeyman, que emitiu a canle americana NBC e ademáis está a rodar Street Fighter: The Legend of Chun-Li.
