Flores para Will Smith

Seica Will Smith ven de asinar para protagonizar e producir unha adaptación co cinema da clásica novela de ciéncia-ficción de Daniel Keyes Flores para Algernon, publicada en 1959. Smith traballaría para a súa propia produtora, a Overbrook Entertainment.

En todo caso, a história de Algernon céntra-se nun home mentalmente discapacitado que se converte no primeiro en pasar por unha operación que lle dará intelixéncia. E ainda que a operación é todo un éxito, dándolle un cociente intelectual de 185 cando antes era de 68, os efectos colaterais serán os da súa exclusión social e o ostracismo.

Ainda non hai guionista nin director vencellados a este proxecto, se ben Gabriele Muccino (The Pursuit of Happyness, Seven Pounds) é un dos nomes que soan. Cliff Robertson levou un Oscar ao millor actor na anterior adaptación ao cinema desta novela, que se fixo en 1968 e titulou-se Charly.

Cohen nos Homes de Negro

Etan Cohen (Tropic Thunder) é a última fichaxe da Sony Pictures para que se encargue de escribir o guión da terceira entrega da franquía de Os Homes de Negro.

Polo de agora é o único contratado en firme, xa que non se sabe se o director das dúas anteriores partes, Barry Sonnenfeld, ou os seus aclamados protagonistas, Will Smith e Tommy Lee Jones, regresarán para a nova entrega.

Os estudos, nombergantes, teñen toda a intención de lle meter présa ao proxecto, xa que queren que se comece a rodaxe en 2010.

A secuela de ID4

Nunha rolda de prensa que serviu para presentar aos médios de comunicación o lanzamento do filme 2012 en Colorado, o director Roland Emmerich foi cuestionado sobre por que ainda non fixo unha secuela do seu megaéxito de 1996 Independence Day.

E Emmerich contestou que xa ten planeada unha história, “unha história realmente boa e grande, unha moi guai“. Daquela, a que está a esperar? Pois seica o cheque que recibirá Will Smith é o seu principal motivo de desacougo.

Emmerich dixo que el e mais o produtor Dean Devlin están ainda desexando poder facer a agardada secuela, e que o seu máximo protagonista, o actor Will Smith, tamén quere intervir dalgún xeito que sexa compatíbel coa economía da 20th Century Fox.

A paga de Smith (a quen lle corresponde unha porcentaxe sobre os benefícios que dea o filme) é a causa de que a Fox estea a planear algunha maneira de facer o filme sen contar co carísimo actor, pero Emmerich mantén que a súa participación é esencial para todos, para este filme e tamén para os espectadores.

O resultado inevitábel é que a secuela está aínda no limbo e que os estudos continúan a negociar unha participación á baixa de Smith: “Xa veremos o que acontece“, dixo Emmerich, “Encantaría-me poder face-lo“.

Regreso a Hancock

Will Smith e Charlize Theron regresarán para a secuela de Hancock, segundo ven de confirmar o director Peter Berg nunha entrevista na canle musical MTV. A primeiros desta semana, Berg afirmou ao respeito da participación dos dous actores que “todo o mundo vai regresar para a secuela“.

Os rumores escomezaron hai unhas semanas indicando que a continuación da comédia de superheroes rexeitada pola crítica pero cun grande éxito nos despachos de billetes (recadou 628 millóns de dólares, que son uns 430 millóns de euros) estaba xa en movemento. Berg está confirmado para a dirección, mentres que os guionistas Adam Fierro (24, Dexter) e Glen Mazzara (The Shield) están a rematar un libreto que se lle entregará a Smith para que o aprobe.

Ao respeito do argumento, Berg tamén revelou que no filme aparecerá un terceiro inmortal na história, para o que xa ten a alguén en mente, se ben non quixo dicir de quen se trataba.

Mália todo o anterior, ainda non hai ren asinado, polo que os compromisos non son firmes e ainda non existen datas oficiais de escomezo da rodaxe nin data de estrea.

Guionistas para Hancock 2

Os guionistas Adam Fierro e Glen Mazzara son os elixidos para escribir a secuela do filme de superheroes Hancock que protagonizou Will Smith para a Sony Pictures o ano pasado.

Os detalles do argumento ainda están por descubrir, ainda que os guionistas traballarán xunto a Smith e mais o director Peter Berg para construir o mundo que se deixou entrever ao remate da primeira película.

No filme orixinal Smith era un superheroe alcohólico e irresponsábel que decide poñer-se nas mans dun relacións públicas para millorar a súa imaxe. Mais tarde descúbre-se que o heroe é tan só parte dunha liñaxe de seres inmortais que levan no mundo dende hai 3.000 anos e que perden os seus superpoderes cando están na presenza doutros inmortais coma eles.

A parella de escritores xa traballara xunta no telefilme The Shield, que foi un éxito na televisión por cable. Fierro tamén é un habitual das séries 24 e Dexter, mentres que o traballo de Mazzara puido-se ver en episódios de Life e Crash.

Agárda-se que moitos dos produtores do filme orixinal regresen para a secuela.

Lawrence e Smith cruzan o charco

Francis Lawrence poderá reunir-se co seu actor principal en Eu Son Lenda, Will Smith, nunha nova superprodución do xénero fantástico que levará por título The City That Sailed (A cidade que navegou) e que producirán os estudos Twentieth Century Fox.

O director está a desenvolver o proxecto arestora baixo a produción do selo de Smith, a Overbrook, e todo semella indicar que el será quen se encargue de se poñer atrás das cámaras.

Cun guión de Andrew Niccol, a história vai sobre un meigo da rúa en New York cuxa filla, por mor de circunstáncias familiares, vive en Inglaterra. Mentres explora un faro un día, a nena atopa unha habitación chea de velas máxicas e pide un desexo, o de se reunir con seu pai. O efecto é que a illa de Manhattan comezará a nevegar polo océano Atlántico para cruza-lo cara a Inglaterra.

Os estudos mercaran o guión en 2006.

Ainda non hai contratos asinados nin por parte de Lawrence nin de Smith. Lawrence está a desenvolver ao mesmo tempo Water for Elephants na Fox 2000 e The World Without Us, tamén na Fox. Non se sabe que proxecto irá o primeiro. Smith tamén ten que escoller o seu seguinte proxecto para cando remate de rodar o drama Seven Pounds.

Will Smith ve monstros

Will Smith protagonizará un filme de terror titulado Monster Hunter (O cazador de monstros), do que el mesmo será un dos produtores.

O protagonista de Monster Hunter posúe a terrorífica característica de ver aos monstros que se agochan baixo das camas ou no interior dos armarios para aterrorizar aos nenos. Unha cualidade que, como psicólogo, utiliza para librar aos pequenos daqueles medos que lles amedoñan… até o momento no que se cruzará cun ser verdadeiramente perigoso e diabólico.

Ainda non se anunciaron outros integrantes do reparto, nen a data de rodaxe ou estrea.

Nun princípio, o actor elixido fora Kevin James, pero seica os produtores prefiriron subir ao filme un chanzo mais nas suas posibilidades coa contratación de Smith, o que o convirte automáticamente en favorito para as audiéncias.

O guión será escrito por Robert L. Baird e Daniel Gerson (que colaboraron, por exemplo, en Monstros S.A., que oferece vários pontos en comun con Monster Hunter), e a dirección correrá a cargo de David Dobkin (o posíbel director da adaptación do superhéroe da DC Comics The Flash).

McG quere a Will Smith para Nemo

O director McG (Charlie’s Angels, Terminator Salvation) quere que a megaestrela Will Smith interprete ao Capitán Nemo na súa recentemente anunciada precuela de 20.000 légoas de viaxe submariña para a Disney Pictures.

“O persoaxe de Nemo neste filme vai mais sobre unha obsesión, está obsesionado e a xente tende a esquecer que cando estás tan obsesionado rematas por ser o malvado. Estou tentando que Will Smith o faga, tentando que acepte asinar. Xa levo moito tempo tentando traballar con el. Ese tío é xenial“, dixo McG.

O filme é unha história orixinal, baseada no clásico de Jules Verne, e cos mesmos escenários, pero narrará a suposta orixe do seu submariño, o Nautilus.

Hancock regresará

Confirmou-se o rumor: Will Smith ven de revelar que haberá “indubidábelmente” unha segunda parte de Hancock, o filme sobre un superheroe frustrado que o actor protagonizou este ano xunto a Charlize Theron.

Segundo Smith, había moitos persoaxes na película que merecían ser “explorados“, o que xustifica sobradamente que se rode unha segunda parte. Ademáis desas vías polas que paga a pena seguir co persoaxe, a recadación da longametraxe aconsella tamén rodar a secuela: máis de 623 millóns de dólares en todo o mundo, o que a convirte nunha das que máis recadaron no despacho de billetes neste 2008.

A aposta é bastante segura: Smith é unha das estrelas máis rendíbeis no complicado panorama do cinema actual. As últimas nove películas protagonizadas polo que fora “príncipe de Bel Air” superaron a barreira psicolóxica dos 100 millóns de dólares, o que constitúe un récord nunca acadado até hoxe en Hollywood.

Spielberg e Will Smith en Oldboy

Steven Spielberg e Will Smith están en conversas prelimiares para colaborar nun remake do filme de acción coreano do ano 2003 Oldboy, que dirixiu Chan Wook-park cun grande éxito de billeteira.

No filme orixinal, un home é secuestrado e mantido nunha escura cela durante 15 anos sen ningunha explicación. De súpeto, é ceibado e lle dan cartos, un teléfone móbil e roupa e decide comezar a investigar quen destruiu a súa vida e vingar-se del.

Smith, que podería interpretar ao home secuestrado se todas as pezas encaixan no seu sítio finalmente, e mais Spielberg están á procura dun guionista que comece o proceso de desenvolvemento. O filme non comezaría a se producir até que Spielberg remate o seu proxecto na primeira película das dúas que se teñen previsto rodar de Tintín.

A DreamWorks está a tentar asegurar-se os dereitos sobre este remake, mentres que a Universal pretende ser a distribuidora.

Páxina seguinte »