Máis de Robocop?

A MGM ven de anunciar que vai desenvolver unha nova série de filmes baseados nas franquías de Robocop e Máis alá do Límite. O anúncio fíxo-se nunha rolda de prensa na que se salientou o nomeamento de Mary Parent coma presidenta da sección internacional do estudos, un novo cargo.

“A MGM está a planear un outono e un inverno cunha axenda emocionante“, dixeron á prensa o pasado día 13. “En colaboración coa Sony Pictures Entertainment, a MGM traerá novas entregas de dúas das súas principais franquías, a nova de James Bond con Quantum of Solace e outra da Pantera Rosa con Steve Martin. A MGM tamén lanzará o thriller Valkyrie, en colaboración coa United Artists, protagonizado por Tom Cruise, o vindeiro 3 de outubro. Co nomeamento de Parent, a MGM entrará nunha nova fase da evolución enfocándo-se en grandes producións coma as de James Bond, a Pantera Rosa, O Hobbit, O caso de Thomas Crown 2, Máis Alá do Límite, Robocop, O Vingador Anónimo e Fama, entre outras“.

O anúncio non puxo ningunha data nin ofreceu máis detalles sobre estes lanzamentos previstos.

Parent, a ex-vicepresidenta de produción internacional da Universal Pictures, supervisará o desenvolvemento de filmes de xénero fantástico coma Serenity.

A Paramount pon-se “heavy”

A Paramount Pictures fará un filme de debuxos animados inspirado na revista de ciéncia-ficción dos anos 70 Heavy Metal, co director David Fincher comandando o proxecto.

Heavy Metal será unha fita na que non fallarán as escenas e mais os argumentos violentos e eróticos da revista que creou escola na América dos anos 70 dende o seu debut en 1977. A revista presentou os traballos de debuxantes e guionistas coma Robert Silverberg, Harlan Ellison ou H.R. Giger.

O filme consistirá nunha série de oito ou nove segmentos cada ún dos cales será dirixido por un realizador distinto. Fincher dirixirá ún deles; Kevin Eastman (Teenage Mutant Ninja Turtles), que agora é o propietário e editor da revista, dirixirá outro. Igualmente faráo Tim Miller, cuxos Estudos Blur serán os encargados de crear a animación para este filme, que se prevé que saia cunha calificación de para maiores de 18 anos.

Fincher, Eastman e Miller producirán a película, para a que xa se está a procurar ao resto dos directores. A revista xa fora a base dun filme en 1981 e dunha secuela en 2000.

O novo Embaixador do Xapón

O novo Embaixador do Xapón podería ser alguén de quen se ten falado moito, ainda que el mesmo non teña orellas. O Ministro de Asuntos Exteriores anunciou o venres pasado que ía nomear a Doraemon, o popular persoaxe dos debuxos animados, como primeiro “Embaixador do anime” nun esforzo do Xapón por promover a súa indústria de animación.

Doraemon, ou máis ben unha persoa disfrazada do gato cósmico, recibirá o nomeamento oficial mañán mércores no decurso dunha cerimónia que presidirá o Ministro Masahiko Komura.

O persoaxe aparecerá dende agora en novos filmes de debuxos animados que tentarán amosar o estilo de vida e mais os costumes xaponeses.

“Co nomeamento de Doraemon, agardamos que o público doutros países comprenda millor o anime xaponés e profundice o seu interese na nosa cultura“, dixo Yuko Hotta, un voceiro do Ministério de Asuntos Exteriores nipón.
Lér mais