Non importa canto o desexen, a Marvel non é capaz de converter ao seu persoaxe Hulk nunha boa película. O filme de Ang Lee de 2003 tivo críticas negativas e 245 millóns de recadación, mentres que o de Louis Leterrier de 2008 só tivo críticas un pouco millores e 263 millóns de dólares de recadación.
O venres pasado saltou a nova de que a Marvel decidira despedir a Edward Norton, o protagonista da versión de 2008, polo que non repetirá o seu papel no vindeiro filme adicado aos Vingadores. Seica o director Joss Whedon mantivera un encontro con Norton e chegaran a un acordo, pero a Marvel só uns días despois informou ao actor de que non participaría no filme.
O voceiro da Marvel, Kevin Feige, confirmou as novas nunha declaración: “A nosa decisión non está baseada en factores económicos, senón que ten as súas raíces na necesidade de contar cun actor que represente a creatividade e mais o espírito creativo dos outros membros do noso reparto. Os Vingadores requiren actores que traballen coma parte dun grupo. Procuramos anunciar un nome de actor que encaixe nestes requisitos e teña paixón polo papel icona nas vindeiras semanas“.
O axente de Norton contraatacou de contado: “Esta ofensiva declaración de Kevin Feige na Marvel é confusa a mantenta e un intento inaxeitado de pintar ao noso cliente cunha luz negativa“. Na súa declaración, confirmou que o auténtico problema de fondo é económico e que aceptan que a Marvel non quera pagar o que pide Norton.
Nos días seguintes os rumores sobre quen será o xigante esmeralda semellan apuntar cara a Mark Ruffalo (Zodiac, Collateral) quen estaría negociando coa Marvel Studios a súa incorporación. Outros nomes que tamén soaron estes días foron os de Joaquin Phoenix, Adrien Brody, Nathan Fillion e David Tennant.
