A colección Vétera da editorial Rinoceronte volve presentar ao público galego un par de clásicos da literatura universal, que nesta ocasión teñen marcado caracter fantástico: Beowulf, o primeiro texto anglosaxón, e os Relatos Verídicos de Luciano de Samóstata.
Xurxo L. Bueno Alonso presenta a versión en galego de Beowulf e tamén unha introdución para facilitar a lectura da que é a saga medieval máis importante da cultura inglesa. Beowulf é o heroe deste poema épico anglosaxón, que foi escrito en inglés antigo en verso aliterativo. A súa importancia é equiparábel á do Cantar dos Nibelungos ou ao Cantar de mío Cid. Estíma-se que o poema se redactou na primeira metade do século VI, aínda que seguramente naceu na imaxinación dos bardos anónimos que foron transmitindo a história, até que se fixou nun manuscrito. Ten dúas grandes partes: a primeira acontece durante a mocidade de Beowulf, e narra como acode en axuda dos daneses ou xutos, que sufrían os ataques dun troll xigante (Grendel), e tras matar a este, enfrónta-se á súa nai, quen regresara na procura de vinganza; na segunda parte Beowulf xa é o rei dos gautas e pelexa até morrer loitndo cun dragón.
A obra foi obxecto do primeiro artigo aparecido na nosa revista NOVA FANTASIA en 1997, que ainda podedes consultar neste enderezo.
Pola súa banda, Relatos verídicos ocupa un lugar salientábel dentro da extensa obra do escritor romano Luciano de Samósata. A obra ten un marcado carácter paródico, pois a intención de Luciano era entreter ao lector mofándo-se dos autores de relatos prodixiosos e lendários das tradicións literária grega e latina. Neste divertimento novelesco, narrado en primeira persoa, o barco no que navega Luciano chega á Lúa tras ser arrastrado por unha tempestade e viaxar polo aire durante sete días. Alí o autor narra as súas aventuras entre os selenitas.
Luciano de Samósata naceu arredor do ano 120 da nosa era na cidade comercial de Samósata, á beira do río Éufrates. Viviu nunha época dourada do Império romano, tanto no que respecta á paz e prosperidade comercial, como no eido da cultura. Luciano foi contemporáneo do emperador Marco Aurálio e do novelista latino Apuleio.
